ಭಾರತದಲ್ಲಿ ಮೊದಲ ಬಾರಿಗೆ ಪಿ ಅಂಡ್ ಪಿ ಡಬಲ್ ಡೆಕರ್ ರೈಲು; ಕೆಳಗೆ ಸರಕು, ಮೇಲೆ ಜನರು
P&P Double Decker Train: ಪಿ ಅಂಡ್ ಪಿ ಕಾರ್ಗೋ ಲೈನರ್ನ ಮೂರು ವಿನ್ಯಾಸಗಳನ್ನು ಆರ್ಸಿಎಫ್ ರೈಲ್ವೆ ಮಂಡಳಿಗೆ ಕಳುಹಿಸಿದೆ. ಅವುಗಳಲ್ಲಿ ಒಂದನ್ನು ಆಯ್ಕೆ ಮಾಡಲಾಗಿದೆ. ಇದಕ್ಕೆ ಸುಮಾರು ಮೂರು ಕೋಟಿ ರೂಪಾಯಿ ವೆಚ್ಚವಾಗುವ ನಿರೀಕ್ಷೆ ಇದೆ. ಆಗಸ್ಟ್ ಅಂತ್ಯಕ್ಕೆ ಇದು ಹಳಿಗೆ ಬರುವ ನಿರೀಕ್ಷೆ ಇದೆ.
Updated on: Aug 04, 2023 | 5:49 PM
ದೇಶದಲ್ಲಿ ಮೊತ್ತಮೊದಲ ಬಾರಿಗೆ ಪ್ರಯಾಣಿಕ ಮತ್ತು ಪಾರ್ಸೆಲ್ (P&P- Passenger and Parcel) ಕಾರ್ಗೋ ಲೈನರ್ ರೈಲು ಓಡಾಡುವ ಕಾಲ ಬಂದಿದೆ . ಈ ರೈಲನ್ನು ವಿಶ್ವವಿಖ್ಯಾತ ರೈಲ್ ಕೋಚ್ ಫ್ಯಾಕ್ಟರಿ (RCF- Rail Coach Factory) ಕಪುರ್ತಲಾದಲ್ಲಿ ನಿರ್ಮಿಸಲಾಗಿದೆ. ಶೀಘ್ರದಲ್ಲೇ ಇದು ಹಳಿಗೆ ಬರುವ ಸಾಧ್ಯತೆ ಇದೆ. ಅಂದರೆ, ಸರಕು ಸಾಗಣೆ ಮತ್ತು ಜನಸಾಗಣೆ ಎರಡೂ ಕೂಡ ಈ ರೈಲಿನಲ್ಲಿ ಆಗಲಿದೆ. ಇದರ ಡಬಲ್ ಡೆಕ್ಕರ್ ಕೋಚ್ ತರಹದ ಮೂಲಮಾದರಿಯ ಶೆಲ್ ಸಿದ್ಧವಾಗಿದೆ. ಇದರ ಫರ್ನಿಚರ್ ಕೆಲಸ ಸದ್ಯದಲ್ಲೇ ಆರಂಭವಾಗಲಿದೆ. ಈ ರೈಲಿನ ಓಡಾಟದ ನಂತರ ಭಾರತೀಯ ರೈಲ್ವೇಗೆ ಹೆಚ್ಚಿನ ಲಾಭವಾಗುವ ಸಾಧ್ಯತೆ ದಟ್ಟವಾಗಿದೆ. ಆಗಸ್ಟ್ ಅಂತ್ಯದ ವೇಳೆಗೆ ಈ ರೈಲಿನ ಪ್ರಯೋಗ ಪ್ರಾರಂಭವಾಗುವ ನಿರೀಕ್ಷೆಯಿದೆ.
ಜನರು P&P ರೈಲಿನ ಮೇಲಿನ ಡೆಕ್‌ನಲ್ಲಿ ಪ್ರಯಾಣಿಸಲು ಸಾಧ್ಯವಾಗುತ್ತದೆ ಮತ್ತು ಕೆಳಗಿನ ಡೆಕ್‌ನಲ್ಲಿ ಸರಕುಗಳನ್ನು ಸಾಗಿಸಬಹುದು. ಇದು ಒಂದೇ ವೆಚ್ಚದಲ್ಲಿ ಜನಪ್ರಯಾಣ ಮತ್ತು ಸರಕು ಸರಬರಾಜನ್ನು ಸಾಧ್ಯವಾಗಿಸುತ್ತದೆ. ಇದರಿಂದ ರೈಲ್ವೆಯ ಆದಾಯವೂ ಹೆಚ್ಚಲಿದೆ. ಕೋಚ್‌ನ ಮೇಲಿನ ಭಾಗವು 46 ಪ್ರಯಾಣಿಕರಿಗೆ ಆಸನಗಳನ್ನು ಹೊಂದಿರುತ್ತದೆ, ಆದರೆ ಅದರ ಕೆಳಭಾಗದಲ್ಲಿ ಸುಮಾರು ಆರು ಟನ್ ಸಾಮಾನುಗಳನ್ನು ಹಿಡಿದಿಡಲು ವಿನ್ಯಾಸಗೊಳಿಸಲಾಗಿದೆ.
ಆಗಸ್ಟ್ ಅಂತ್ಯದ ವೇಳೆಗೆ ಪಿ ಅಂಡ್ ಪಿ ಕಾರ್ಗೋ ಲೈನರ್ ರೈಲಿಗೆ ಚಾಲನೆ
ಆರ್ಸಿಎಫ್ ಸಾರ್ವಜನಿಕ ಸಂಪರ್ಕ ಅಧಿಕಾರಿ ಜಿತೇಶ್ ಕುಮಾರ್ ಮಾತನಾಡಿ, ಆರ್‌ಸಿಎಫ್‌ನಲ್ಲಿ ಮೊದಲ ಪಿ & ಪಿ ಕಾರ್ಗೋ ಲೈನರ್ ರೈಲನ್ನು ನಿರ್ಮಿಸಲಾಗುತ್ತಿದೆ. ಈ ರೈಲಿನ ಪ್ರಯೋಗ ಆಗಸ್ಟ್ ಅಂತ್ಯದ ವೇಳೆಗೆ ಪ್ರಾರಂಭವಾಗುವ ನಿರೀಕ್ಷೆಯಿದೆ. ಇದರ ವಿನ್ಯಾಸ ಅತ್ಯಂತ ಆಕರ್ಷಕ ಹಾಗೂ ವಿಶಿಷ್ಟವಾಗಿದೆ ಎಂದರು. ಈ ರೈಲು ಸಂಪೂರ್ಣ ಹವಾನಿಯಂತ್ರಿತವಾಗಿರುತ್ತದೆ.
ಈ ರೈಲಿನ ಕೋಚ್‌ನ ಮಾದರಿ ಶೆಲ್ ಅನ್ನು ಸಿದ್ಧಪಡಿಸಲಾಗಿದೆ ಎಂದು ಜಿತೇಶ್ ಕುಮಾರ್ ತಿಳಿಸಿದ್ದಾರೆ. ಫರ್ನಿಚರ್ ಕೆಲಸವೂ ಸದ್ಯದಲ್ಲೇ ಆರಂಭವಾಗಲಿದೆ. ನಂತರ ಅದನ್ನು ಪ್ರಯೋಗಗಳಿಗಾಗಿ ರೈಲ್ವೇ ಮಂಡಳಿಯ ಸಂಶೋಧನಾ ವಿನ್ಯಾಸ ಮತ್ತು ಗುಣಮಟ್ಟ ಸಂಸ್ಥೆ (RDSO) ಗೆ ಕಳುಹಿಸಲಾಗುತ್ತದೆ. ಪ್ರಯೋಗ ಯಶಸ್ವಿಯಾದರೆ ಹೆಚ್ಚಿನ ಕೋಚ್‌ಗಳನ್ನು ತಯಾರಿಸಲಾಗುವುದು.
ಆರಂಭದಲ್ಲಿ ಎರಡು ಡಬಲ್ ಡೆಕ್ಕರ್ ರೈಲು ಓಡಿಸಲು ಯೋಜನೆ
ರೈಲ್ವೆ ಮೂಲಗಳ ಪ್ರಕಾರ, ಆರಂಭದಲ್ಲಿ ಎರಡು P&P ಡಬಲ್ ಡೆಕ್ಕರ್ ರೈಲುಗಳನ್ನು ಓಡಿಸುವುದು ರೈಲ್ವೆಯ ಯೋಜನೆಯಾಗಿದೆ. ಪ್ರತಿ ರೈಲು 20 ಬೋಗಿಗಳನ್ನು ಹೊಂದಿರುತ್ತದೆ. ಇವುಗಳನ್ನು ಕಾರ್ಗೋ ಲೈನರ್ ಪರಿಕಲ್ಪನೆಯ ಮೇಲೆ ಹೊರತರಲಾಗುವುದು ಮತ್ತು ಗೊತ್ತುಪಡಿಸಿದ ಮಾರ್ಗಗಳಲ್ಲಿ ನಿಯಮಿತವಾಗಿ ಕಾರ್ಯಾಚರಣೆ ನಡೆಸಲಾಗುವುದು. ಸಮಯಕ್ಕೆ ಸರಿಯಾಗಿ ಪ್ರಯಾಣಿಸುವ ಜನರೊಂದಿಗೆ, ಅದರಲ್ಲಿ ಸಾಗಿಸುವ ಸರಕುಗಳನ್ನು ಸಹ ಸಮಯಕ್ಕೆ ತಲುಪಿಸಲಾಗುತ್ತದೆ. ಇದರಿಂದ ಸಮಯದ ಉಳಿತಾಯವೂ ಆಗಲಿದ್ದು, ಜನರು ಮತ್ತು ವ್ಯಾಪಾರಿಗಳು ತಮ್ಮ ಸರಕುಗಳೊಂದಿಗೆ ಒಂದೇ ರೈಲಿನಲ್ಲಿ ಹೋಗಬಹುದಾಗಿದೆ.
(ಕೃಪೆ: ಟಿವಿ9 ಪಂಜಾಬೀ)
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
