ರೈಲು ಎಂಜಿನ್ ವಾಹನಗಳ ತಯಾರಿಕೆಯಲ್ಲಿ ಅಮೆರಿಕ, ಯೂರೋಪ್ ಅನ್ನು ಮೀರಿಸಿದ ಭಾರತ
Indian railways marching ahead confidently: ಭಾರತೀಯ ರೈಲ್ವೆಸ್ ಸಂಸ್ಥೆ ಈ ವರ್ಷ ತಯಾರಿಸಿರುವ ಲೋಕೋಮೋಟಿವ್ ವಾಹನಗಳ ಸಂಖ್ಯೆ 1,400 ದಾಟಿದೆ. ಅಮೆರಿಕ, ಯೂರೋಪ್ಗಳಲ್ಲಿ ತಯಾರಾದ ಒಟ್ಟಾರೆ ಲೋಕೋಮೋಟಿವ್ಗಳಿಗಿಂತ ಭಾರತವೇ ಹೆಚ್ಚು ತಯಾರಿಸಿದೆ. ಎರಡು ಲಕ್ಷಕ್ಕೂ ಅಧಿಕ ವ್ಯಾಗನ್ಗಳು, ಹತ್ತು ವರ್ಷದಲ್ಲಿ 41,000 ಎಲ್ಎಚ್ಬಿ ಕೋಚ್ಗಳನ್ನು ತಯಾರಿಸಿದೆ. ಎಲ್ಲಾ ಐಸಿಎಫ್ ಕೋಚ್ಗಳನ್ನು ಎಲ್ಎಚ್ಬಿ ಕೋಚ್ಗಳಾಗಿ ಪರಿವರ್ತಿಸುವ ಕಾರ್ಯ ಭರದಿಂದ ಸಾಗಿದೆ.
Updated on:Mar 23, 2025 | 1:42 PM
ನವದೆಹಲಿ, ಮಾರ್ಚ್ 23: ಭಾರತೀಯ ರೈಲ್ವೇ (Indian Railways) ಲೋಕೋಮೋಟಿವ್ ಉತ್ಪಾದನೆಯಲ್ಲಿ (Locomotives production) ಹೊಸ ದಾಖಲೆಯನ್ನೇ ಬರೆದಿದೆ. ಈ ವರ್ಷ ಅದು 1,400 ಲೋಕೋಮೋಟಿವ್ಗಳನ್ನು ತಯಾರಿಸಿದೆ. ಈ ವರ್ಷ ಅಮೆರಿಕ ಮತ್ತು ಯೂರೋಪ್ಗಳಿಂದ ತಯಾರಾದ ಒಟ್ಟು ಲೋಕೋಮೋಟಿವ್ಗಳಿಗಿಂತ ಭಾರತವೇ ಹೆಚ್ಚು ತಯಾರಿಸಿದೆ. ಭಾರತ ಈ ವರ್ಷ 1,400 ಲೋಕೋಮೋಟಿವ್ಗಳನ್ನು ತಯಾರಿಸಿರುವ ಸಂಗತಿಯನ್ನು ಕೇಂದ್ರ ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ ಲೋಕಸಭೆಗೆ ತಿಳಿಸಿದ್ದಾರೆ. ಭಾರತೀಯ ರೈಲ್ವೆ ಹಲವು ಕಡೆ ಲೋಕೋಮೋಟಿವ್ಗಳನ್ನು ತಯಾರಿಸುತ್ತದೆ. ಪ್ರಮುಖವಾಗಿ, ಪಶ್ಚಿಮ ಬಂಗಾಳದ ಆಸನ್ಸೋಲ್ನಲ್ಲಿರುವ ಚಿತ್ತರಂಜನ್ ಲೋಕೋಮೋಟಿವ್ ವರ್ಕ್ಸ್, ಉತ್ತರಪ್ರದೇಶದ ವಾರಾಣಸಿಯ ಬನಾರಸ್ ಲೋಕೋಮೋಟಿವ್ ವರ್ಕ್ಸ್, ಮತ್ತು ಪಂಜಾಬ್ನ ಪಾಟಿಯಾಲಾ ಲೊಕೋಮೋಟಿವ್ ವರ್ಕ್ಸ್, ಇಲ್ಲಿ ಹೆಚ್ಚು ಲೋಕೋಮೋಟಿವ್ಗಳ ನಿರ್ಮಾಣ ಕಾರ್ಯ ನಡೆಯುತ್ತದೆ.
ಏನಿವು ಲೋಕೋಮೋಟಿವ್ಗಳು?
ಲೋಕೋಮೋಟಿವ್ ಎಂಬುದು ಟ್ರೈನ್ನ ಎಂಜಿನ್ ವಾಹನವಾಗಿರುತ್ತದೆ. ರೈಲು ಬಂಡಿಯ ಬೋಗಿಗಳನ್ನು ಈ ಎಂಜಿನ್ ವಾಹನ ಹಳಿಯಲ್ಲಿ ಎಳೆದುಕೊಂಡು ಹೋಗುತ್ತದೆ.
ಇದನ್ನೂ ಓದಿ: ಭಾರತದ ಆರ್ಥಿಕತೆ 4.3 ಟ್ರಿಲಿಯನ್ ಡಾಲರ್; 10 ವರ್ಷದಲ್ಲಿ ಡಿಜಿಪಿ ಡಬಲ್; ಜಪಾನ್ ಅನ್ನೂ ಹಿಂದಿಕ್ಕಿದೆಯಾ ಭಾರತ?
ಭಾರತೀಯ ರೈಲ್ವೆ ಒಟ್ಟಾರೆ ಈ ವರ್ಷ 1,400 ಲೋಕೋಮೋಟಿವ್ಗಳನ್ನು ತಯಾರಿಸಿ ದಾಖಲೆ ಬರೆದಿದೆ. ಇಷ್ಟೇ ಅಲ್ಲ, ಎರಡು ಲಕ್ಷಕ್ಕೂ ಅಧಿಕ ರೈಲ್ವೆ ವ್ಯಾಗನ್ಗಳನ್ನು ನಿರ್ಮಿಸಿದೆ. ಕಳೆದ 10 ವರ್ಷದಲ್ಲಿ 41,000 ಎಲ್ಎಚ್ಬಿ ರೈಲು ಕೋಚ್ಗಳನ್ನೂ ತಯಾರಿಸಿದೆ. ಸಚಿವ ಅಶ್ವಿನಿ ವೈಷ್ಣವ್ ಪ್ರಕಾರ ಈ ಹಿಂದೆ ವರ್ಷಕ್ಕೆ 400ರಿಂದ 500 ಎಲ್ಎಚ್ಬಿ ಬೋಗಿಗಳ ನಿರ್ಮಾಣವಾಗುತ್ತಿತ್ತು. ಈಗ 5,000ದಿಂದ 5,500 ಕೋಚ್ಗಳನ್ನು ಪ್ರತೀ ವರ್ಷ ತಯಾರಿಸಲಾಗುತ್ತಿದೆಯಂತೆ.
ರೈಲ್ವೆ ಸುರಕ್ಷತೆಗೆ ಒತ್ತು
ರೈಲು ಪ್ರಯಾಣಿಕರಿಗೆ ಆರಾಮದಾಯಕ ಪ್ರಯಾಣ ಸಾಧ್ಯವಾಗಿಸಲು ಮತ್ತು ಅಪಘಾತವಾಗದಂತೆ ಸುರಕ್ಷಿತ ಪ್ರಯಾಣಕ್ಕಾಗಿ ಸರ್ಕಾರಿ ಒತ್ತು ಕೊಡುತ್ತಿದೆ. ರೈಲ್ವೆ ಸುರಕ್ಷತೆಗಾಗಿ ಹೂಡಿಕೆಯನ್ನು 1.16 ಲಕ್ಷ ಕೊಟಿ ರೂಗೆ ಹೆಚ್ಚಿಸಲಾಗಿದೆ ಎನ್ನುವ ವಿಚಾರವನ್ನು ಸಚಿವರು ತಿಳಿಸಿದ್ದಾರೆ. ಮುಂದಿನ ಕೆಲ ವರ್ಷಗಳೊಳಗೆ ಎಲ್ಲಾ ಐಸಿಎಫ್ ಕೋಚ್ಗಳನ್ನು ಎಲ್ಎಚ್ಬಿ ಕೋಚ್ಗಳಾಗಿ ಪರಿವರ್ತಿಸಲಾಗುವುದು ಎಂದಿದ್ದಾರೆ.
ಎಲ್ಎಚ್ಬಿ ಬೋಗಿಗಳು ಹೊಸ ಮಾದರಿಯದ್ದಾಗಿದ್ದು, ಇವು ಹೆಚ್ಚು ವೇಗವಾಗಿ ಓಡಬಲ್ಲುವು, ಹೆಚ್ಚು ಸುರಕ್ಷಿತವಾಗಿರುತ್ತವೆ. ಪ್ರಯಾಣಿಕರಿಗೆ ಹೆಚ್ಚಿನ ಸೌಲಭ್ಯಗಳು, ಪರಿಸರಪೂರಕ ಫೀಚರ್ಗಳು ಇರುತ್ತವೆ.
‘ಉದ್ದದ ರೈಲುಗಳು, ಎಲೆಕ್ಟ್ರಾನಿಕ್ ಇಂಟರ್ಲಾಕಿಂಗ್, ಫಾಗ್ ಸೇಫ್ಟಿ ಸಾಧನ, ಕವಚ್ ಸಿಸ್ಟಂ ಇವುಗಳನ್ನು ಬಹಳ ವೇಗವಾಗಿ ಜಾರಿ ಮಾಡಲಾಗುತ್ತದೆ. ರೈಲು ಟ್ರ್ಯಾಕ್ಗಳ ನಿರ್ವಹಣೆ ಮತ್ತಷ್ಟು ಸಮರ್ಪಕಗೊಳಿಸಲು ಹೊಸ ರೀತಿಯ ರೈಲ್ ಕಮ್ ರೋಡ್ ಅಥವಾ ಆರ್ಸಿಆರ್ ವಾಹನವೊಂದನ್ನು ಅಭಿವೃದ್ಧಿಪಡಿಸಲಾಗುತ್ತಿದೆ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 1:12 pm, Sun, 23 March 25
