ಕರ್ನಾಟಕದ ಮುದ್ರಾಂಕ, ನೋಂದಣಿ ಶುಲ್ಕಗಳ ಆದಾಯ ಭರ್ಜರಿ ಹೆಚ್ಚಳ; ಇಲ್ಲಿದೆ ವಿವರ

23ನೇ ಹಣಕಾಸು ವರ್ಷದ ಮೊದಲಾರ್ಧದಲ್ಲಿ ರಾಜ್ಯದ ಸರಾಸರಿ ಮಾಸಿಕ ಆದಾಯ 13.72 ಶತಕೋಟಿ ರೂ. ಆಗಿದೆ. ಕಳೆದ ವರ್ಷ ಇದು 9.83 ಶತಕೋಟಿ ರೂ. ಆಗಿತ್ತು.

ಕರ್ನಾಟಕದ ಮುದ್ರಾಂಕ, ನೋಂದಣಿ ಶುಲ್ಕಗಳ ಆದಾಯ ಭರ್ಜರಿ ಹೆಚ್ಚಳ; ಇಲ್ಲಿದೆ ವಿವರ
ಸಾಂದರ್ಭಿಕ ಚಿತ್ರ
TV9kannada Web Team

| Edited By: Ganapathi Sharma

Nov 21, 2022 | 6:46 PM

ಬೆಂಗಳೂರು: ಕರ್ನಾಟಕವು 23ನೇ ಹಣಕಾಸು ವರ್ಷದ ಮೊದಲಾರ್ಧದಲ್ಲಿ ಮುದ್ರಾಂಕ ಶುಲ್ಕ (Stamp Duty) ಮತ್ತು ನೋಂದಣಿ ಶುಲ್ಕಗಳಿಂದ (Registration Charges) 82.29 ಶತಕೋಟಿ ರೂಪಾಯಿ ಆದಾಯ ಸಂಗ್ರಹಿಸಿದೆ ಎಂದು ಮೋತಿಲಾಲ್ ಓಸ್ವಾಲ್ ಫೈನಾನ್ಶಿಯಲ್ ಸರ್ವೀಸಸ್ ಲಿಮಿಟೆಡ್ (Motilal Oswal Financial Services Limited) ಅಧ್ಯಯನ ವರದಿಯಿಂದ ತಿಳಿದುಬಂದಿದೆ. 22ನೇ ಹಣಕಾಸು ವರ್ಷಕ್ಕೆ ಹೋಲಿಸಿದರೆ ಈ ಆದಾಯದ ಪ್ರಮಾಣದಲ್ಲಿ ಶೇಕಡಾ 39ರಷ್ಟು ಹೆಚ್ಚಳವಾಗಿದೆ. ಕಳೆದ ವರ್ಷದಲ್ಲಿ ಕರ್ನಾಟಕ ಮುದ್ರಾಂಕ ಮತ್ತು ನೋಂದಣಿ ಶುಲ್ಕಗಳಿಂದ 59 ಶತಕೋಟಿ ರೂಪಾಯಿ ಆದಾಯ ಗಳಿಸಿತ್ತು ಎಂದು ವರದಿ ಹೇಳಿದೆ. ಇದರೊಂದಿಗೆ ಮುದ್ರಾಂಕ ಮತ್ತು ನೋಂದಣಿ ಶುಲ್ಕಗಳ ಆದಾಯದ ವಾರ್ಷಿಕ ಹೆಚ್ಚಳದ ಪ್ರಮಾಣದಲ್ಲಿ ಕರ್ನಾಟಕವು 16ನೇ ಸ್ಥಾನ ಪಡೆದಿದೆ. ಒಟ್ಟಾರೆಯಾಗಿ ಅತಿಹೆಚ್ಚು ಆದಾಯ ಗಳಿಸುತ್ತಿರುವ 4ನೇ ರಾಜ್ಯವಾಗಿ ಗುರುತಿಸಿಕೊಂಡಿದೆ.

23ನೇ ಹಣಕಾಸು ವರ್ಷದ ಮೊದಲಾರ್ಧದಲ್ಲಿ ರಾಜ್ಯದ ಸರಾಸರಿ ಮಾಸಿಕ ಆದಾಯ 13.72 ಶತಕೋಟಿ ರೂ. ಆಗಿದೆ. ಕಳೆದ ವರ್ಷ ಇದು 9.83 ಶತಕೋಟಿ ರೂ. ಆಗಿತ್ತು. ದೇಶದ ಒಟ್ಟಾರೆ ಆದಾಯಕ್ಕೆ ಕರ್ನಾಟಕ ಶೇಕಡಾ 8ರ ಕೊಡುಗೆ ನೀಡಿದೆ ಎಂದು ವರದಿ ಉಲ್ಲೇಖಿಸಿದೆ.

ದೇಶದಲ್ಲಿ ಮುದ್ರಾಂಕ ಮತ್ತು ನೋಂದಣಿ ಶುಲ್ಕಗಳ ಆದಾಯ ಶೇಕಡಾ 35ರಷ್ಟು ಹೆಚ್ಚಳವಾಗಿದ್ದು, ಈ ವರ್ಷ ಮೊದಲಾರ್ಧದಲ್ಲಿ 948.47 ಶತಕೋಟಿ ರೂ. ಸಂಗ್ರಹವಾಗಿದೆ. ಕಳೆದ ವರ್ಷ ಇದು 701.20 ಶತಕೋಟಿ ರೂ. ಆಗಿತ್ತು. ತಿಂಗಳ ಸರಾಸರಿ ಆದಾಯ ಸಂಗ್ರಹ ಈ ವರ್ಷ 158.07 ಶತಕೋಟಿ ರೂ. ಇದೆ. ಕಳೆದ ವರ್ಷ ಇದು 116.87 ಶತಕೋಟಿ ರೂ. ಆಗಿತ್ತು.

ಮೊದಲ ಸ್ಥಾನದಲ್ಲಿ ಮಹಾರಾಷ್ಟ್ರ

ಮುದ್ರಾಂಕ ಮತ್ತು ನೋಂದಣಿ ಶುಲ್ಕಗಳಿಂದ ಅತಿಹೆಚ್ಚು ಆದಾಯ ಗಳಿಸುವ ರಾಜ್ಯಗಳ ಪಟ್ಟಿಯಲ್ಲಿ ಮಹಾರಾಷ್ಟ್ರ ಮತ್ತು ಉತ್ತರ ಪ್ರದೇಶಗಳು ಕ್ರಮವಾಗಿ ಮೊದಲ ಎರಡು ಸ್ಥಾನ ಪಡೆದಿವೆ. ಮಹಾರಾಷ್ಟ್ರ 113.0 ಶತಕೋಟಿ ರೂ. ಆದಾಯ ಗಳಿಸಿದ್ದು, ಕಳೆದ ವರ್ಷಕ್ಕೆ ಹೋಲಿಸಿದರೆ ಆದಾಯ ಗಳಿಕೆ ಪ್ರಮಾಣದಲ್ಲಿ ಶೇಕಡಾ 20ರಷ್ಟು ಹೆಚ್ಚಳವಾಗಿದೆ. ಉತ್ತರ ಪ್ರದೇಶ 93 ಶತಕೋಟಿ ರೂ. ಆದಾಯ ಗಳಿಸಿದ್ದು, ಶೇಕಡಾ 13ರಷ್ಟು ಹೆಚ್ಚಳವಾಗಿದೆ. ತಮಿಳುನಾಡು 86.62 ಶತಕೋಟಿ ರೂ. ಆದಾಯ ಗಳಿಸಿ ಮೂರನೇ ಸ್ಥಾನದಲ್ಲಿದೆ. ಕರ್ನಾಟಕ ಮತ್ತು ತೆಲಂಗಾಣ ಕ್ರಮವಾಗಿ 82.29 ಶತಕೋಟಿ ರೂ. ಹಾಗೂ 72.13 ಶತಕೋಟಿ ರೂ. ಆದಾಯ ಗಳಿಸಿ ನಾಲ್ಕು, ಐದನೇ ಸ್ಥಾನಗಳಲ್ಲಿವೆ.

ಮುದ್ರಾಂಕ, ನೋಂದಣಿ ಶುಲ್ಕಗಳ ಆದಾಯ; ಟಾಪ್ 5 ರಾಜ್ಯಗಳು
ಮಹಾರಾಷ್ಟ್ರ 113.0 ಶತಕೋಟಿ ರೂ.
ಉತ್ತರ ಪ್ರದೇಶ 93 ಶತಕೋಟಿ ರೂ.
ತಮಿಳುನಾಡು 86.62 ಶತಕೋಟಿ ರೂ.
ಕರ್ನಾಟಕ 82.29 ಶತಕೋಟಿ ರೂ.
ತೆಲಂಗಾಣ 72.13 ಶತಕೋಟಿ ರೂ.

ಇನ್ನಷ್ಟು ವಾಣಿಜ್ಯ ಸುದ್ದಿ ಓದಲು ಇಲ್ಲಿ ಕ್ಲಿಕ್ ಮಾಡಿ

ತಾಜಾ ಸುದ್ದಿ

Follow us on

Related Stories

Most Read Stories

Click on your DTH Provider to Add TV9 Kannada