ಚೆನ್ನೈ, ಜೂನ್ 25: ತಮಿಳುನಾಡಿನಲ್ಲಿರುವ ಫಾಕ್ಸ್ಕಾನ್ ಕಂಪನಿಯ ಘಟಕದಲ್ಲಿ (foxconn unit) ವಿವಾಹಿತ ಮಹಿಳೆಯರಿಗೆ ಕೆಲಸ ಅವಕಾಶ ನಿರಾಕರಿಸಲಾಗಿದೆ ಎನ್ನುವಂತಹ ಸುದ್ದಿ ಎಕನಾಮಿಕ್ ಟೈಮ್ಸ್ ಪತ್ರಿಕೆಯಲ್ಲಿ ವರದಿಯಾಗಿದೆ. ಆ್ಯಪಲ್ ಕಂಪನಿಗೆ ಐಫೋನ್ ಅಸೆಂಬಲ್ ಮಾಡಿಕೊಡುವ ಫಾಕ್ಸ್ಕಾನ್ನ ಶ್ರೀಪೆರಂಬದೂರು ಫ್ಯಾಕ್ಟರಿಯಲ್ಲಿ ಈ ಅಘೋಷಿತ ನಿಯಮ ಜಾರಿಯಲ್ಲಿರುವುದು ತಿಳಿದುಬಂದಿದೆ. ರಾಯ್ಟರ್ಸ್ ಸುದ್ದಿ ಸಂಸ್ಥೆ ಈ ಬಗ್ಗೆ ತನಿಖಾ ವರದಿ ಬಿಡುಗಡೆ ಮಾಡಿದೆ. ಫಾಕ್ಸ್ಕಾನ್ನ ಮಾಜಿ ಎಚ್ಆರ್ ಎಕ್ಸಿಕ್ಯೂಟಿವ್ ಎಸ್ ಪೌಲ್ ಎಂಬುವವರೂ ಐಫೋನ್ ಘಟಕದಲ್ಲಿ ವಿವಾಹಿತ ಮಹಿಳೆಯರನ್ನು (married women) ಕೆಲಸಕ್ಕೆ ಸೇರಿಸಿಕೊಳ್ಳದೇ ಇರುವುದು ಹಾಗೂ ಇತರ ಕೆಲ ನಿರ್ಬಂಧಗಳು ಇರುವುದನ್ನು ಖಚಿತಪಡಿಸಿದ್ದಾರೆ.
ಇದನ್ನೂ ಓದಿ: ಸೋಲಾರ್ ಸೆಲ್ಗೆ ಚೀನಾ ಮೇಲೆ ಅವಲಂಬನೆ ಇನ್ಮುಂದೆ ಕಡಿಮೆ; ಸ್ವಾವಲಂಬನೆ ಹಾದಿಯಲ್ಲಿ ಭಾರತ
ತಮಿಳುನಾಡಿನಲ್ಲಿರುವ ಹಿಂದೂ ವಿವಾಹಿತ ಮಹಿಳೆಯರ ಕತ್ತಿನಲ್ಲಿ ತಾಳಿಸರ ಇದ್ದೇ ಇರುತ್ತದೆ. ಇದನ್ನು ತೆಗೆಯುವುದು ಅಪಶಕುನ ಎಂಬ ಭಾವನೆ ಇದೆ. ಆದರೆ, ಈ ಆಭರಣ ಧರಿಸುವುದರಿಂದ ಐಫೋನ್ ತಯಾರಿಕೆಯ ಕಾರ್ಯಗಳಿಗೆ ತೊಂದರೆ ಆಗುತ್ತದೆ. ಈ ಕಾರಣಕ್ಕೂ ವಿವಾಹಿತ ಮಹಿಳೆಯರನ್ನು ನೇಮಕ ಮಾಡಿಕೊಳ್ಳಲು ಫಾಕ್ಸ್ಕಾನ್ ಸಂಸ್ಥೆ ಹಿಂದೇಟು ಹಾಕುತ್ತದೆ ಎಂದು ಹೇಳಲಾಗುತ್ತಿದೆ.
ಫಾಕ್ಸ್ಕಾನ್ನ ಮಾಜಿ ಎಚ್ಆರ್ ಎಕ್ಸಿಕ್ಯೂಟಿವ್ ಎಸ್ ಪೌಲ್ ಅವರು ಮಾತ್ರವಲ್ಲ, ಇನ್ನೂ ಕೆಲ ಮಾಜಿ ಉದ್ಯೋಗಿಗಳು ಈ ನಿರ್ಬಂಧ ಇರುವುದನ್ನು ದೃಢಪಡಿಸಿದ್ದಾರೆ ಎಂದು ರಾಯ್ಟರ್ಸ್ ಸುದ್ದಿ ಸಂಸ್ಥೆ ಹೇಳಿದೆ. ಫಾಕ್ಸ್ಕಾನ್ ಘಟಕಕ್ಕೆ ಆಭ್ಯರ್ಥಿಗಳನ್ನು ಆರಿಸಿ ಇಂಟರ್ವ್ಯೂಗೆ ಕಳುಹಿಸಲು ಹೈರಿಂಗ್ ಏಜೆನ್ಸಿಗಳಿಗೆ ಗುತ್ತಿಗೆ ಕೊಟ್ಟಿರಲಾಗುತ್ತದೆ. ಈ ಏಜೆನ್ಸಿಗಳಿಗೆ ಮೌಖಿಕವಾಗಿ ನಿರ್ಬಂಧದ ಬಗ್ಗೆ ಸೂಚನೆ ನೀಡಲಾಗಿರುತ್ತದೆ. ಅಲ್ಲಿಂದಲೇ ಅಭ್ಯರ್ಥಿಗಳನ್ನು ಫಿಲ್ಟರ್ ಮಾಡಲಾಗುತ್ತದೆ.
ಇದನ್ನೂ ಓದಿ: ಝೀರೋ ಬ್ಯಾಲನ್ಸ್ ಇರುವ ಪೇಟಿಎಂ ವ್ಯಾಲಟ್ಗಳು ಬಂದ್ ಆಗಲಿವೆ, ಗಮನಿಸಿ
ನೇಮಕಾತಿಯಲ್ಲಿ ವೈವಾಹಿಕ ಸ್ಥಿತಿ ಆಧಾರದಲ್ಲಿ ತಾರತಮ್ಯ ಮಾಡುವುದನ್ನು ಭಾರತದ ಕಾನೂನು ನಿರ್ಬಂಧಿಸುತ್ತದೆ. ಆ್ಯಪಲ್ ಸಂಸ್ಥೆಯಾಗಲೀ, ಫಾಕ್ಸ್ಕಾನ್ ಸಂಸ್ಥೆಯಾಗಲೀ ಈ ನೀತಿ ಹೊಂದಿಲ್ಲ. ಅವುಗಳ ಸಪ್ಲೈ ಚೈನ್ನಲ್ಲೂ ಇಂಥದ್ದು ಇರದಂತೆ ನಿಗಾ ವಹಿಸುತ್ತವೆ ಆ ಕಂಪನಿಗಳು. ಆದರೂ ಕೂಡ ಶ್ರೀಪೆರಂಬದರೂರಿನಲ್ಲಿರುವ ಫಾಕ್ಸ್ಕಾನ್ ಘಟಕದಲ್ಲಿ ವಿವಾಹಿತ ಮಹಿಳೆಯರಿಗೆ ಕೆಲಸ ನಿರಾಕರಿಸುವ ಪದ್ಧತಿಯೊಂದು ಅಘೋಷಿತವಾಗಿ ಚಾಲನೆಯಲ್ಲಿದ್ದಂತಿದೆ. ಈ ಬಗ್ಗೆ ಆ ಘಟಕದ ವತಿಯಿಂದ ಯಾವ ಅಧಿಕೃತ ಹೇಳಿಕೆ ಬಂದಿರುವುದು ಈವರೆಗೆ ಗೊತ್ತಾಗಿಲ್ಲ.
ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ