Paytm: ಫೆ. 29ರ ನಂತರ ಪೇಟಿಎಂನಲ್ಲಿ ನೀವು ಏನು ಬಳಸಬಹುದು, ಯಾವುದು ಸಾಧ್ಯವಿಲ್ಲ? ಇಲ್ಲಿದೆ ಡೀಟೇಲ್ಸ್

ಪೇಟಿಎಂ ಪೇಮೆಂಟ್ಸ್ ಬ್ಯಾಂಕ್​ಗೆ ಆರ್​ಬಿಐ ನಿರ್ಬಂಧ ವಿಧಿಸಿ ಕೆಲವಾರು ದಿನಗಳಾದರೂ ಪೇಟಿಎಂ ಭವಿಷ್ಯದ ಬಗ್ಗೆ ಬಹಳಷ್ಟು ಮಂದಿಗೆ ಈಗಲೂ ಗೊಂದಲಗಳಿವೆ. ಅದಕ್ಕೆ ಕಾರಣ ಪೇಟಿಎಂ ಮತ್ತು ಪೇಟಿಎಂ ಪೇಮೆಂಟ್ಸ್ ಬ್ಯಾಂಕ್ (Paytm Payments Bank) ನಡುವಿನ ಗಾಢ ಬೆಸುಗೆ. ಪೇಟಿಎಂ ಪೇಮೆಂಟ್ಸ್ ಬ್ಯಾಂಕ್​ನಲ್ಲಿ ಫೆಬ್ರುವರಿ 29ರ ನಂತರ ಯಾವುದೇ ಹೊಸ ಡೆಪಾಸಿಟ್ ಪಡೆಯುವಂತಿಲ್ಲ. ಪೇಟಿಎಂ ಪೇಮೆಂಟ್ಸ್ ಸರ್ವಿಸಸ್, ಒನ್97 ಕಮ್ಯೂನಿಕೇಶನ್ಸ್ ಸಂಸ್ಥೆಗಳು ಪೇಮೆಂಟ್ಸ್ ಬ್ಯಾಂಕ್​ನಲ್ಲಿ ಹೊಂದಿರುವ ನೋಡಲ್ ಖಾತೆಗಳನ್ನು ಬೇರೆ ಬ್ಯಾಂಕೊಂದಕ್ಕೆ ಫೆ. 29ರೊಳಗೆ ವರ್ಗಾಯಿಸುವಂತೆ ಆರ್​ಬಿಐ ನಿರ್ದೇಶನ ನೀಡಿದೆ. ಈ ಮಧ್ಯೆ ಪೇಟಿಎಂನ ಯಾವೆಲ್ಲಾ ಸೇವೆಗಳು ಸ್ಥಗಿತಗೊಳ್ಳಬಹುದು ಎಂಬ ಗೊಂದಲ ಮಾತ್ರ ಸ್ವಲ್ಪ ಉಳಿದುಕೊಂಡಿದೆ.

ಪೇಟಿಎಂ ಆ್ಯಪ್​ನಲ್ಲಿ ಹಲವು ಸೇವೆಗಳಿವೆ. ಬ್ಯಾಂಕ್, ಷೇರು ವಹಿವಾಟು, ಸಾಲ, ಇನ್ಷೂರೆನ್ಸ್, ವ್ಯಾಲಟ್, ಬಿಲ್ ಪಾವತಿ, ಒಎನ್​ಡಿಸಿ, ಫಾಸ್​ಟ್ಯಾಗ್ ಇತ್ಯಾದಿ ನಾನಾ ರೀತಿಯ ಸೇವೆಗಳನ್ನು ಪೇಟಿಎಂ ಒದಗಿಸುತ್ತದೆ. ಈಗ ನಿರ್ಬಂಧ ಇರುವುದು ಪೇಟಿಎಂ ಪೇಮೆಂಟ್ ಬ್ಯಾಂಕ್​ಗೆ ಮಾತ್ರ. ಪೇಟಿಎಂನ ಯಾವೆಲ್ಲಾ ಸೇವೆಗಳು ಪೇಮೆಂಟ್ ಬ್ಯಾಂಕ್​​ಗೆ ತಳುಕು ಹಾಕಿಕೊಂಡಿವೆಯೋ ಅವೆಲ್ಲವೂ ಬಾಧಿತವಾಗುತ್ತವೆ. ಆರ್​ಬಿಐ ನಿರ್ದೇಶನದಂತೆ ಪೇಟಿಎಂ ಪೇಮೆಂಟ್ ಸರ್ವಿಸ್ ಮತ್ತು ಒನ್97 ಕಮ್ಯೂನಿಕೇಶನ್ಸ್ ಸಂಸ್ಥೆಗಳು ಪೇಮೆಂಟ್ ಬ್ಯಾಂಕ್​ನಲ್ಲಿರುವ ತಮ್ಮ ನೋಡಲ್ ಅಕೌಂಟ್​ಗಳನ್ನು ಬೇರೆ ಬ್ಯಾಂಕುಗಳ ಕಡೆ ವರ್ಗಾಯಿಸಿದರೆ ಯಾವ ಸಮಸ್ಯೆಯೂ ಇರುವುದಿಲ್ಲ. ಪೇಟಿಎಂ ಸಿಇಒ ವಿಜಯ್ ಶೇಖರ್ ಶರ್ಮಾ ಹೇಳಿದಂತೆ ಫೆ. 29ರ ಬಳಿಕವೂ ಪೇಟಿಎಂ ಯಥಾ ಪ್ರಕಾರ ಮುಂದುವರಿಯುತ್ತದೆ.

ಇದನ್ನೂ ಓದಿ: ಪೇಟಿಎಂ ಫಾಸ್​ಟ್ಯಾಗ್, ವ್ಯಾಲಟ್ ಬಳಕೆ ನಿಲ್ಲಿಸಬೇಕಿಲ್ಲ; ಅಷ್ಟಕ್ಕೂ ಆರ್​ಬಿಐ ನಿರ್ಬಂಧ ಹಾಕಿದ್ದು ಯಾಕೆ, ಡೀಟೇಲ್ಸ್ ನೋಡಿ

ಪೇಟಿಎಂ ಆರ್​ಬಿಐ ನಿರ್ದೇಶನಗಳನ್ನು ಚಾಚೂತಪ್ಪದೇ ಪಾಲಿಸುವುದಾಗಿ ಹೇಳಿದೆ. ಅಂತೆಯೇ ಬೇರೆ ಬ್ಯಾಂಕುಗಳೊಂದಿಗೆ ಒಪ್ಪಂದಗಳನ್ನು ಮಾಡಿಕೊಳ್ಳುತ್ತಿದೆ. ಹೀಗಾಗಿ, ಪೇಟಿಎಂ ಬಳಕೆದಾರರು ಹೆಚ್ಚು ಚಿಂತೆ ಪಡುವ ಅವಶ್ಯಕತೆ ಇರುವುದಿಲ್ಲ. ಈ ಕೆಳಗಿನ ಪೇಟಿಎಂ ಸೇವೆಗಳು ಏನಾಗಬಹುದು ನೋಡಿ…

• ಪೇಟಿಎಂ ವ್ಯಾಲಟ್ ಅನ್ನು ಫೆ. 29ರ ನಂತರವೂ ಮುಂದುವರಿಸಲು ಅಡ್ಡಿ ಇಲ್ಲ. ಬೇರೆ ಬ್ಯಾಂಕ್ ಖಾತೆಗಳಿಂದ ಪೇಟಿಎಂ ವ್ಯಾಲಟ್​ಗೆ ಹಣ ತುಂಬಿಸಿ ಬಳಕೆ ಮಾಡಬಹುದು.
• ಪೇಟಿಎಂ ಫಾಸ್​ಟ್ಯಾಗ್ ಅನ್ನು ಬಳಸಬಹುದು. ಆದರೆ, ಫಾಸ್​ಟ್ಯಾಗ್​ಗಾಗಿ ಪೇಟಿಎಂ ಸಂಸ್ಥೆ ಪೇಮೆಂಟ್ ಬ್ಯಾಂಕ್ ಬದಲು ಎಚ್​ಡಿಎಫ್​ಸಿ ಬ್ಯಾಂಕ್ ಜೊತೆ ಒಪ್ಪಂದ ಮಾಡಿಕೊಂಡಿದೆ. ಹೀಗಾಗಿ, ಪೇಟಿಎಂ ಫಾಸ್​ಟ್ಯಾಗ್ ಹೊಂದಿರುವವರು ಎಚ್​ಡಿಎಫ್​ಸಿಯ ಫಾಸ್​ಟ್ಯಾಗ್ ಪಡೆಯಬಹುದು.
• ಪೇಟಿಎಂ ಮನಿ ಮೂಲಕ ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆ ಮಾಡಿರುವವರಿಗೆ ಯಾವ ಭಯ ಇರಬೇಕಿಲ್ಲ. ಪೇಟಿಎಂ ಮನಿ ಸೆಬಿ ನಿಯಂತ್ರಣಕ್ಕೆ ಒಳಪಟ್ಟಿದೆ. ಅಲ್ಲಿ ನಿಮ್ಮ ಮ್ಯುಚುವಲ್ ಫಂಡ್ ಇತ್ಯಾದಿ ಹೂಡಿಕೆಗಳು ಸುರಕ್ಷಿತವಾಗಿರುತ್ತವೆ.
• ಪೇಟಿಎಂನಲ್ಲಿ ನಮ್ಮ ಅನೇಕ ಮಾಸಿಕ ಬಿಲ್​ಗಳನ್ನು ಜೋಡಿಸಿರುತ್ತೇವೆ. ವಿದ್ಯುತ್ ಬಿಲ್, ನೀರಿನ ಬಿಲ್, ಮೊಬೈಲ್ ಬಿಲ್ ಇತ್ಯಾದಿ ಹಲವು ಬಿಲ್ ಸೇವೆಗಳನ್ನು ಪೇಟಿಎಂ ನೀಡುತ್ತದೆ. ಪೇಮೆಂಟ್ ಬ್ಯಾಂಕ್​ಗೆ ಲಿಂಕ್ ಆಗಿದ್ದರೆ ಮಾತ್ರವೇ ಇವುಗಳ ಬಳಕೆ ಆಗುವುದಿಲ್ಲ. ಬೇರೆ ಬ್ಯಾಂಕ್ ಖಾತೆ ಲಿಂಕ್ ಆಗಿದ್ದರೆ ಸಮಸ್ಯೆ ಇರುವುದಿಲ್ಲ. ಯಥಾ ಪ್ರಕಾರ ಪೇಟಿಎಂ ಬಳಸಬಹುದು.
• ಪೇಟಿಎಂನಿಂದ ಯುಪಿಐ ಮೂಲಕ ಹಣ ವರ್ಗಾವಣೆ, ಹಣ ಪಾವತಿಯನ್ನು ಮುಂದುವರಿಸಬಹುದು. ಆದರೆ, ಪೇಟಿಎಂ ಪೇಮೆಂಟ್ಸ್ ಬ್ಯಾಂಕ್​ನ ಖಾತೆ ಲಿಂಕ್ ಆಗಿರಬಾರದು ಅಷ್ಟೇ.

ಇದನ್ನೂ ಓದಿ: ಫ್ರಾನ್ಸ್‌ನಲ್ಲಿ ಯುಪಿಐ ಬಳಕೆಗೆ ಚಾಲನೆ, ಭಾರತೀಯರು UPI ಮೂಲಕ ಪೇ ಮಾಡಬಹುದು!

ಒಟ್ಟಾರೆ ಸಾರಾಂಶ ಇಷ್ಟು…

ಕೊನೆಯದಾಗಿ ಸ್ಪಷ್ಟವಾಗಿ ಹೇಳುವುದಾದರೆ, ನೀವು ಪೇಟಿಎಂ ಪೇಮೆಂಟ್ಸ್ ಬ್ಯಾಂಕ್​ನಲ್ಲಿ ಖಾತೆ ಹೊಂದಿದ್ದರೆ ಫೆಬ್ರುವರಿ 29ರ ಒಳಗೆ ಅದರಿಂದ ಹೊರಗೆ ಬನ್ನಿ. ನಿಮ್ಮ ಎಲ್ಲಾ ಹಣವನ್ನು ವರ್ಗಾಯಿಸಿಕೊಳ್ಳಿ. ಪೇಟಿಎಂಗೆ ಬೇರೆ ಬ್ಯಾಂಕ್ ಖಾತೆ ಲಿಂಕ್ ಆಗಿಲ್ಲದೇ ಇದ್ದರೆ ಮೊದಲು ಆ ಕೆಲಸ ಮಾಡಿ. ಇನ್ನುಳಿದಂತೆ ನೀವು ಪೇಟಿಎಂ ಅನ್ನು ಯಥಾ ಪ್ರಕಾರ ಬಳಕೆ ಮಾಡಬಹುದು.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ