ಅಕ್ಷಯ ತೃತೀಯಕ್ಕೆ ಜಿಯೋ ಗೋಲ್ಡ್ ಧಮಾಕ; 21 ಸಾವಿರ ರೂವರೆಗೆ ಉಚಿತ ಚಿನ್ನದ ಕೊಡುಗೆ; ಮೇ 5ರವರೆಗೆ ಆಫರ್
Akshaya Tritiya Jio Gold 24K Days campaign: ಜಿಯೋ ಪ್ಲಾಟ್ಫಾರ್ಮ್ಗಳಲ್ಲಿ ಅಕ್ಷಯ ತೃತೀಯಕ್ಕೆ ಉತ್ತಮ ಗೋಲ್ಡ್ ಆಫರ್ ನೀಡಲಾಗುತ್ತಿದೆ. ಜಿಯೋ ಫೈನಾನ್ಸ್ ಮತ್ತು ಮೈ ಜಿಯೋ ಆ್ಯಪ್ಗಳಲ್ಲಿ ಡಿಜಿಟಲ್ ಗೋಲ್ಡ್ ಖರೀದಿಸಿದರೆ ಶೇ. 2ರಷ್ಟು ಉಚಿತ ಚಿನ್ನ ಪಡೆಯಲು ಅವಕಾಶ ಇದೆ. 1,000 ರೂನಿಂದ 9,999 ರೂವರೆಗಿನ ಚಿನ್ನದ ಖರೀದಿಗೆ ಶೇ. 1 ಉಚಿತ ಚಿನ್ನ ಪಡೆಯಬಹುದು. 10,000 ರೂ ಮೇಲ್ಪಟ್ಟ ಮೌಲ್ಯದ ಚಿನ್ನದ ಖರೀದಿಗೆ ಶೇ. 2ರಷ್ಟು ಉಚಿತ ಚಿನ್ನ ಪಡೆಯಬಹುದು. ಈ ಆಫರ್ ಮೇ 5ರವರೆಗೆ ಮಾತ್ರ ಇರುತ್ತದೆ.
Updated on: Apr 29, 2025 | 12:01 PM
ಮುಂಬೈ, ಏಪ್ರಿಲ್ 29: ಇದೇ ಏಪ್ರಿಲ್ 30ನೇ ತಾರೀಕಿನಂದು ಅಕ್ಷಯ ತೃತೀಯ (Akshaya Tritiya) ಇದೆ. ವಿವಿಧ ಆಭರಣ ಮಾರಾಟಗಾರರು ನಾನಾ ರೀತಿಯಲ್ಲಿ ಡಿಸ್ಕೌಂಟ್, ಉಚಿತ ಚಿನ್ನ ಇತ್ಯಾದಿ ಭರ್ಜರಿ ಆಫರ್ ಕೊಡುತ್ತಿವೆ. ಡಿಜಿಟಲ್ ಪ್ಲಾಟ್ಫಾರ್ಮ್ಗಳೂ ಕೂಡ ಆಫರ್ ಕೊಡೋದ್ರಲ್ಲಿ ಹಿಂದೆ ಬಿದ್ದಿಲ್ಲ. ರಿಲಾಯನ್ಸ್ ಜಿಯೋ ತನ್ನ ಬಳಕೆದಾರರಿಗೆ ಉಚಿತ ಚಿನ್ನ ಆಫರ್ ಮಾಡಿದೆ. ಜಿಯೋ ಗೋಲ್ಡ್ 24K Days ಸ್ಕೀಮ್ನ (JIO Gold 24K Days) ಈ ಆಫರ್ ಇವತ್ತು ಆರಂಭವಾಗಿದ್ದು, ಮೇ 5ರವರೆಗೂ ಆಫರ್ ಇರಲಿದೆ. ಇದರಲ್ಲಿ ಶೇ. 2ರವರೆಗೆ ಚಿನ್ನ ಪಡೆಯಲು ಅವಕಾಶ ಇದೆ. ಗರಿಷ್ಠ 21,000 ರೂ ಮೌಲ್ಯದ ಚಿನ್ನವನ್ನು ಉಚಿತವಾಗಿ ಪಡೆಯಬಹುದು.
ಜಿಯೋಫೈನಾನ್ಸ್ ಮತ್ತು ಮೈ ಜಿಯೋ ಆ್ಯಪ್ಗಳಲ್ಲಿ ಆಫರ್ ಲಭ್ಯ
ಜಿಯೋ ಗೋಲ್ಡ್ 24K ಡೇಸ್ ಯೋಜನೆಯಲ್ಲಿ ಪಾಲ್ಗೊಳ್ಳಬೇಕೆಂದರೆ ಜಿಯೋಫೈನಾನ್ಸ್ ಅಥವಾ ಮೈಜಿಯೋ ಆ್ಯಪ್ ಹೊಂದಿರಬೇಕು. ಇವೆರಡು ಆ್ಯಪ್ಗಳಲ್ಲಿ ಒಂದನ್ನು ಡೌನ್ಲೋಡ್ ಮಾಡಿಕೊಂಡು ನೊಂದಾಯಿಸಿ ಈ ಸ್ಕೀಮ್ನಲ್ಲಿ ಭಾಗವಹಿಸಬಹುದು.
ಅಕ್ಷಯ ತೃತೀಯದ ಶುಭ ಸಂದರ್ಭದಲ್ಲಿ ಚಿನ್ನವನ್ನು ಖರೀದಿಸುವುದು ಬಹಳ ಹಿಂದಿನಿಂದಲೂ ನಡೆದುಬಂದ ಸಂಪ್ರದಾಯವಾಗಿದ್ದು, ಇದು ಶಾಶ್ವತ ಸಮೃದ್ಧಿ ಮತ್ತು ಸಂಪತ್ತನ್ನು ಸಂಕೇತಿಸುತ್ತದೆ. ಈ ಸಂದರ್ಭವನ್ನು ಇನ್ನಷ್ಟು ವಿಶೇಷ ಆಗಿಸುವುದಕ್ಕೆ ಗ್ರಾಹಕರು ಜಿಯೋ ಗೋಲ್ಡ್ 24K Days ನಲ್ಲಿ ಡಿಜಿಟಲ್ ಚಿನ್ನವನ್ನು ಖರೀದಿಸಬಹುದು ಮತ್ತು ಹೆಚ್ಚುವರಿಯಾಗಿ ಉಚಿತ ಚಿನ್ನವನ್ನೂ ಪಡೆಯಬಹುದು.
ಇದನ್ನೂ ಓದಿ: 24 ಕ್ಯಾರಟ್ ಚಿನ್ನಗಳಲ್ಲೇ ಬೆಲೆಗಳಲ್ಲಿ ಹೇಗೆ ವ್ಯತ್ಯಾಸ? ಜಿಎಸ್ಟಿ ಸೇರಿ ವಿವಿಧ ಹೆಚ್ಚುವರಿ ಬೆಲೆ ಬಗ್ಗೆ ತಿಳಿದಿರಿ
ಆ್ಯಪ್ನಲ್ಲಿ ರೂ. 1,000 ರಿಂದ ರೂ. 9,999 ಮೌಲ್ಯದ ಡಿಜಿಟಲ್ ಚಿನ್ನವನ್ನು ಖರೀದಿಸುವ ಗ್ರಾಹಕರು JIOGOLD1 ಎಂಬ ಆಫರ್ ಕೋಡ್ ಬಳಸಿ ಶೇಕಡಾ 1ರಷ್ಟು ಉಚಿತ ಚಿನ್ನ ಪಡೆಯಬಹುದು.
10,000 ರೂಪಾಯಿಗಿಂತ ಹೆಚ್ಚಿನ ಖರೀದಿಗಳಿಗೆ ಗ್ರಾಹಕರು ಚೆಕ್ಔಟ್ ಸಮಯದಲ್ಲಿ ಪ್ರೋಮೋ ಕೋಡ್ JIOGOLDAT100 ಅನ್ನು ಬಳಸಿಕೊಂಡು ಶೇಕಡಾ 2ರಷ್ಟು ಉಚಿತ ಚಿನ್ನ ಪಡೆಯಬಹುದು.
21,000 ರೂ ಉಚಿತ ಚಿನ್ನ ಪಡೆಯಿರಿ…
ಜಿಯೋದ ಈ ಆ್ಯಪ್ಗಳಲ್ಲಿ ಚಿನ್ನದ ಖರೀದಿಯನ್ನು 10 ರೂನಿಂದ ಆರಂಭಿಸಬಹುದು. ಆದರೆ, ಏಪ್ರಿಲ್ 29ರಿಂದ ಮೇ 5ರವರೆಗೆ ಉಚಿತ ಚಿನ್ನದ ಕೊಡುಗೆ ಪಡೆಯಬೇಕಾದರೆ ಕನಿಷ್ಠ ಖರೀದಿ 1,000 ರೂ ಇರಬೇಕು. ಈ ಸ್ಕೀಮ್ ಅಡಿಯಲ್ಲಿ ಒಬ್ಬ ಗ್ರಾಹಕರು 10 ಬಾರಿ ಮಾತ್ರ ಖರೀದಿ ಮಾಡಬಹುದು. ಆದರೆ, ಗರಿಷ್ಠ ಕೊಡುಗೆ 21,000 ರೂಗೆ ಸೀಮಿತವಾಗಿರುತ್ತದೆ.
ನೀವು ಜಿಯೋಫೈನಾನ್ಸ್ ಅಥವಾ ಮೈ ಜಿಯೋ ಆ್ಯಪ್ಗಳಿಗೆ ಹೋಗಿ ಅಲ್ಲಿ ಕೆವೈಸಿ ದಾಖಲೆ (ಪ್ಯಾನ್) ಅಪ್ಡೇಟ್ ಮಾಡಿ ನೊಂದಾಯಿಸಿರಬೇಕು. ಆಗಷ್ಟೇ ಸ್ಕೀಮ್ ಅನ್ನು ಪಡೆಯಬಹುದು. ನೀವು ಆ ಆ್ಯಪ್ಗಳಲ್ಲಿ ಡಿಜಿಟಲ್ ಗೋಲ್ಡ್ ಖರೀದಿಸಿ 72 ಗಂಟೆಯೊಳಗೆ ಹೆಚ್ಚುವರಿ ಚಿನ್ನ ಸಂದಾಯವಾಗುತ್ತದೆ.
ಇದನ್ನೂ ಓದಿ: ಚಿನ್ನ ದುಬಾರಿಯಾದರೂ ಅಕ್ಷಯ ತೃತೀಯಕ್ಕೆ ಭರ್ಜರಿ ಡಿಸ್ಕೌಂಟ್ ಆಫರ್ಸ್
ಫೋನ್ಪೇನಲ್ಲಿ 500 ರೂವರೆಗೆ ಕ್ಯಾಷ್ಬ್ಯಾಕ್
ಫೋನ್ ಪೆ ಆ್ಯಪ್ನಲ್ಲಿ ನೀವು ಡಿಜಿಟಲ್ ಗೋಲ್ಡ್ ಖರೀದಿಸಿದರೆ 500 ರೂವರೆಗೆ ಕ್ಯಾಷ್ಬ್ಯಾಕ್ ಪಡೆಯಲು ಅವಕಾಶ ಇದೆ. ಈ ಆಫರ್ ಇವತ್ತೇ (ಏಪ್ರಿಲ್ 29) ಮುಗಿಯುತ್ತಿದೆ. ಕನಿಷ್ಠ 1,500 ರೂ ಮೌಲ್ಯದ ಚಿನ್ನ ಖರೀದಿಸಿದರೆ ಮಾತ್ರ ಈ ಕ್ಯಾಷ್ಬ್ಯಾಕ್ ಆಫರ್ ಚಾಲೂ ಆಗುತ್ತದೆ.
ಡಿಜಿಟಲ್ ಗೋಲ್ಡ್ ನಿಮಗೆ ಉತ್ತಮ ಹೂಡಿಕೆ ಆಯ್ಕೆ
ನೀವು ಚಿನ್ನದ ಮೇಲೆ ಹೂಡಿಕೆ ಮಾಡಲು ಡಿಜಿಟಲ್ ಗೋಲ್ಡ್ ಒಳ್ಳೆಯ ಮಾಧ್ಯಮವಾಗಿದೆ. ಹೂಡಿಕೆ ಬಹಳ ಸುಲಭ ಹಾಗು ಸರಳ. ಕನಿಷ್ಠ ಹೂಡಿಕೆ ಅವಧಿ 3 ವರ್ಷವಾದರೂ ಇರಲಿ. ಖರೀದಿಸುವಾಗ ಶೇ. 3 ಜಿಎಸ್ಟಿ, ಮತ್ತು ಮಾರುವಾಗ ಶೇ. 3ರಷ್ಟು ಜಿಎಸ್ಟಿ, ಹೀಗೆ ಶೇ. 6ರಷ್ಟು ಹಣ ಕಡಿತವಾಗುತ್ತದೆ. ಹೀಗಾಗಿ, ಹೆಚ್ಚು ಅವಧಿಯವರೆಗೆ ಹೂಡಿಕೆ ಹೊಂದಿರುವುದು ಉತ್ತಮ.
ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
