ಇಟಿಎಫ್​ನಲ್ಲಿ ಹೂಡಿಕೆ ಮಾಡಿದರೆ ಏನು ಲಾಭ? ನೀವು ತಿಳಿಯಬೇಕಾದ ಪ್ರಮುಖ ಅಂಶಗಳಿವು…

ನೀವು ಯಾವುದೇ ರೀತಿಯ ಹೂಡಿಕೆ ಮಾಡುವ ಮುನ್ನ ಅದರಿಂದ ಎಷ್ಟು ಲಾಭ ಸಿಗುತ್ತದೆ ಎಂಬುದನ್ನು ಗಮನಿಸುತ್ತೇವೆ. ಲಾಭದ ಜೊತೆಗೆ ಇನ್ನೂ ಹಲವಾರು ಅಂಶಗಳನ್ನು ನಾವು ಗಣನೆಗೆ ತೆಗೆದುಕೊಳ್ಳುವುದುಂಟು. ಇಟಿಎಫ್​ನಲ್ಲೂ ಹೂಡಿಕೆ ಮಾಡುವಾಗ ಹಲವು ಸಂಗತಿಗಳನ್ನು ತಿಳಿದುಕೊಂಡಿರಬೇಕು. ಇಟಿಎಫ್​ನಲ್ಲಿ ಹೂಡಿಕೆ ಮಾಡಲಾಗುತ್ತಿರುವ ಪ್ರಮಾಣ ಹೆಚ್ಚುತ್ತಲೇ ಇದೆ. ಎಕ್ಸ್​ಚೇಂಜ್ ಟ್ರೇಡೆಡ್ ಫಂಡ್​ಗಳು ಸಾಕಷ್ಟು ಹೂಡಿಕೆಗಳನ್ನು ಆಕರ್ಷಿಸುತ್ತಿವೆ. ನೀವು ಇಟಿಎಫ್​ಗಳಲ್ಲಿ ಹೂಡಿಕೆ ಮಾಡಲು ಯೋಚಿಸುತ್ತಿದ್ದೀರಾ? ಯಾಕೆ ಇಟಿಎಫ್​ನಲ್ಲಿ ಹೂಡಿಕೆ ಮಾಡಬೇಕು, ಅದರಿಂದ ಪ್ರಯೋಜನ ಏನು ಇತ್ಯಾದಿ ಸಂಗತಿಗಳು ತಿಳಿದಿರುವುದು ಒಳ್ಳೆಯದು.

ಇಟಿಎಫ್ ಅಥವಾ ಎಕ್ಸ್​ಚೇಂಜ್ ಟ್ರೇಡೆಡ್ ಫಂಡ್ ಎಂಬುದು ಒಂದು ರೀತಿಯಲ್ಲಿ ಇಂಡೆಕ್ಸ್ ಟ್ರ್ಯಾಕ್ ಮಾಡುವ ಮ್ಯುಚುವಲ್ ಫಂಡ್​ನಂತೆ. ಪ್ರಮುಖ ವ್ಯತ್ಯಾಸ ಎಂದರೆ ಇದು ಪಾಸಿವ್ ಫಂಡ್ ಆಗಿರುತ್ತದೆ, ಮತ್ತು ಷೇರು ವಿನಿಮಯ ಕೇಂದ್ರದಲ್ಲಿ ಷೇರುಗಳ ರೀತಿಯಲ್ಲಿ ಇದನ್ನೂ ಟ್ರೇಡ್ ಮಾಡಬಹುದು.

ಇದನ್ನೂ ಓದಿ: Thematic ETF ಎಂದರೇನು? ಈ ಹೂಡಿಕೆ ಯಾರಿಗೆ ಹೇಳಿ ಮಾಡಿಸಿದ್ದು? ಇಲ್ಲಿದೆ ಮಾಹಿತಿ

ಇಟಿಎಫ್​ನಲ್ಲಿ ಹೂಡಿಕೆ ಮಾಡಲು ಹಲವಾರು ಕಾರಣಗಳನ್ನು ಹೆಸರಿಸಬಹುದು. ಇಟಿಎಫ್ ಖರೀದಿಸುವುದರಿಂದ ನೀವು ಒಂದಲ್ಲ ಹಲವಾರು ಕಂಪನಿಗಳ ಷೇರುಗಳಲ್ಲಿ ಹೂಡಿಕೆ ಮಾಡುತ್ತೀರಿ. ಉದಾಹರಣೆಗೆ, ನಿಫ್ಟಿ50 ಇಟಿಎಫ್ ಎಂಬುದು ಆ ಇಂಡೆಕ್ಸ್ ಅನ್ನು ಟ್ರ್ಯಾಕ್ ಮಾಡುತ್ತದೆ. ನೀವು ನಿಫ್ಟಿ50 ಇಟಿಎಫ್ ಅನ್ನು ಖರೀದಿಸಿದಾಗ ಆ ಇಂಡೆಕ್ಸ್​ನಲ್ಲಿರುವ 50 ಷೇರುಗಳಲ್ಲಿ ಅವುಗಳ ವೈಟೇಜ್ ಆಧಾರದ ಮೇಲೆ ಹೂಡಿಕೆ ನಿಯೋಜನೆ ಆಗುತ್ತದೆ. ಒಂದು ಅಥವಾ ಎರಡು ಷೇರುಗಳಲ್ಲಿ ಹೂಡಿಕೆ ಮಾಡುವುದಕ್ಕಿಂತ ಹೆಚ್ಚಿನ ಷೇರುಗಳಲ್ಲಿ ಹೂಡಿಕೆ ಮಾಡುವುದರಿಂದ ರಿಸ್ಕ್ ಅಂಶ ತಗ್ಗುತ್ತದೆ. ಹೀಗಾಗಿ, ಇಟಿಎಫ್​ನಲ್ಲಿ ಹೂಡಿಕೆ ಮಾಡಿದರೆ ರಿಸ್ಕ್ ಅಂಶ ಸಹಜವಾಗಿ ಕಡಿಮೆ ಇರುತ್ತದೆ.

ಇಟಿಎಫ್​ನಲ್ಲಿ ಯಾಕೆ ಹೂಡಿಕೆ ಮಾಡಬೇಕು?

ಅಗಲೇ ತಿಳಿಸಿದಂತೆ ಇಟಿಎಫ್​ನಲ್ಲಿ ಹೂಡಿಕೆ ಮಾಡಿದರೆ ನಿಮ್ಮ ಹೂಡಿಕೆ ಪೋರ್ಟ್​ಫೋಲಿಯೋ ವಿಸ್ತೃತಗೊಳ್ಳುತ್ತದೆ. ನೀವು ಇಟಿಎಫ್ ಖರೀದಿಸಿದಾಗ ಯುನಿಟ್​ಗಳನ್ನು ಪಡೆಯುತ್ತೀರಿ. ಇವುಗಳನ್ನು ನೀವು ಸ್ಟಾಕ್ ಎಕ್ಸ್​ಚೇಂಜ್​ನಲ್ಲಿ ಟ್ರೇಡ್ ಮಾಡಬಹುದು. ಮಾರುಕಟ್ಟೆ ಅವಧಿಯಲ್ಲಿ ಯಾವಾಗಬೇಕಾದೂ ನೀವು ಇಟಿಎಫ್ ಅನ್ನು ಖರೀದಿಸಬಹುದು ಮತ್ತು ಮಾರಬಹುದು.

ಇದನ್ನೂ ಓದಿ: ಹೂಡಿಕೆಯಲ್ಲಿ ಲಿಕ್ವಿಡಿಟಿ ಅಂಶ ಎಷ್ಟು ಮುಖ್ಯ? ಉತ್ತಮ ಲಿಕ್ವಿಡಿಟಿ ಇರುವ ಇಟಿಎಫ್​ನ ಪ್ರಯೋಜನಗಳಿವು…

ಈ ವಿಚಾರದಲ್ಲಿ ಮ್ಯೂಚುವಲ್ ಫಂಡ್ ತುಸು ಭಿನ್ನ. ಮ್ಯುಚುವಲ್ ಫಂಡ್​ಗಳನ್ನು ಖರೀದಿಸಿದರೆ ನಿಮಗೆ ನೆಟ್ ಅಸೆಟ್ ವ್ಯಾಲ್ಯೂ ಅಥವಾ ಎನ್​ಎಇ ಪ್ರಕಾರ ಯೂನಿಟ್ ಸಿಗುತ್ತದೆ. ಈ ಎನ್​ಎವಿ ಎನ್ನುವುದು ಟ್ರೇಡಿಂಗ್ ಕೊನೆಯಲ್ಲಿ ನಿರ್ಧಾರವಾಗುತ್ತದೆ. ಆದರೆ, ಇಟಿಎಫ್ ಎಂಬುದು ರಿಯಲ್ ಟೈಮ್ ಟ್ರೇಡಿಂಗ್​ಗೆ ಲಭ್ಯ ಇರುತ್ತದೆ. ಮಾರುಕಟ್ಟೆ ಏರುತ್ತಿದೆ ಎಂದನಿಸಿದರೆ ನೀವು ಇಟಿಎಫ್ ಮಾರಿ ಲಾಭ ಮಾಡಬಹುದು.

ಇಟಿಎಫ್​ನ ಮತ್ತೊಂದು ಅನುಕೂಲವೆಂದರೆ, ಆ್ಯಕ್ಟಿವ್ ಮ್ಯುಚುವಲ್ ಫಂಡ್​ಗೆ ಹೋಲಿಸಿದರೆ ಇದರ ಎಕ್ಸ್​ಪೆನ್ಸ್ ರೇಶಿಯೋ ಕಡಿಮೆ ಇರುತ್ತದೆ. ಅಂದರೆ, ಇದರ ನಿರ್ವಹಣಾ ವೆಚ್ಚ ಕಡಿಮೆ ಇರುತ್ತದೆ.

ಪಾಸಿವ್ ಇನ್ವೆಸ್ಟರ್ಸ್​ಗೆ ಒಳ್ಳೆಯ ಆಯ್ಕೆ

ಆ್ಯಕ್ಟಿವ್ ಫಂಡ್​ಗಳಾದರೆ ಬೆಂಚ್​ಮಾರ್ಕ್ ಇಂಡೆಕ್ಸ್​ಗಿಂತ ಹೆಚ್ಚಿನ ಲಾಭವನ್ನು ತರುವ ಗುರಿ ಮತ್ತು ಒತತಡ ಹೊಂದಿರುತ್ತವೆ. ಆದರೆ, ಇಟಿಎಫ್ ಒಂದು ಪಾಸಿವ್ ಫಂಡ್ ಮಾತ್ರವೇ ಆಗಿರುತ್ತದೆ. ಬೆಂಚ್​ಮಾರ್ಕ್ ಇಂಡೆಕ್ಸ್​ನ ಸಾಧನೆಯನ್ನು ಸರಿಗಟ್ಟುವ ಗುರಿ ಮಾತ್ರವೇ ಇದರದ್ದು. ಇದರ ಹೂಡಿಕೆಯನ್ನು ಸಕ್ರಿಯವಾಗಿ ನಿರ್ವಹಿಸುವ ಅವಶ್ಯಕತೆ ಇರುವುದಿಲ್ಲ. ಹೀಗಾಗಿ, ಇದರ ಎಕ್ಸ್​ಪೆನ್ಸ್ ರೇಶಿಯೋ ಕಡಿಮೆ ಇರುತ್ತದೆ.

ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ