Investment: ಡೆಟ್ ಫಂಡ್ ಎಂದರೇನು? ಎಫ್​ಡಿಗೂ ಅದಕ್ಕೂ ಏನು ವ್ಯತ್ಯಾಸ? ಯಾವುದರಿಂದ ಹೆಚ್ಚು ಲಾಭ? ಇಲ್ಲಿದೆ ಡೀಟೇಲ್ಸ್

ಇವತ್ತು ಸಾಕಷ್ಟು ಹೂಡಿಕೆ ಆಯ್ಕೆಗಳಿವೆ. ಹೂಡಿಕೆ ಕಾರ್ಯ ಬಹಳ ಸುಲಭವೂ ಹೌದು. ಅವರವರ ಹಣಕಾಸು ಪರಿಸ್ಥಿತಿಗೆ ಅನುಗುಣವಾಗಿ ಹೂಡಿಕೆಗಳನ್ನು ಆಯ್ದುಕೊಳ್ಳಬಹುದು. ಈಕ್ವಿಟಿ ಮಾರುಕಟ್ಟೆ, ಡೆಟ್ ಮಾರುಕಟ್ಟೆ, ಸಾಂಪ್ರದಾಯಿಕ ಬ್ಯಾಂಕ್ ಠೇವಣಿಗಳು (Bank FDs), ಸಣ್ಣ ಉಳಿತಾಯ ಯೋಜನೆಗಳಿಗೆ ಬಹಳಷ್ಟು ಪ್ರಮಾಣದಲ್ಲಿ ಹೂಡಿಕೆಗಳು ಹರಿದುಬರುತ್ತಿವೆ. ಹೆಚ್ಚು ರಿಸ್ಕ್ ತೆಗೆದುಕೊಳ್ಳಲು ಸಿದ್ಧರಿರುವ ಜನರು ಈಕ್ವಿಟಿ ಷೇರು ವಹಿವಾಟು ಹಾಗೂ ಅದಕ್ಕೆ ಜೋಡಿತವಾದ ಮ್ಯುಚುವಲ್ ಫಂಡ್​ಗಳಲ್ಲಿ ಹೂಡಿಕೆ ಮಾಡುತ್ತಾರೆ. ಸುರಕ್ಷಿತ ಹೂಡಿಕೆ ಆಯ್ಕೆಗಳಾದರೆ ಡೆಟ್ ಮಾರುಕಟ್ಟೆ ಹಾಗೂ ಅದಕ್ಕೆ ಜೋಡಿತವಾದ ಮ್ಯೂಚುವಲ್ ಫಂಡ್​ಗಳು ಹಾಗೂ ಬ್ಯಾಂಕ್ ಠೇವಣಿ ಮತ್ತು ಸಣ್ಣ ಉಳಿತಾಯ ಯೋಜನೆಗಳಿವೆ.

ಸಣ್ಣ ಉಳಿತಾಯ ಯೋಜನೆಗಳು ತೆರಿಗೆ ಲಾಭ ತಂದುಕೊಡುವುದರಿಂದ ನಿರ್ದಿಷ್ಟ ಪ್ರಮಾಣದಲ್ಲಿ ಹೂಡಿಕೆ ಆಕರ್ಷಿಸುತ್ತವೆ. ಇನ್ನು, ಇತರ ಸುರಕ್ಷಿತ ಹೂಡಿಕೆಗಳಲ್ಲಿ ಡೆಟ್ ಫಂಡ್ ಮತ್ತು ಫಿಕ್ಸೆಡ್ ಡೆಪಾಸಿಟ್​ಗಳಿವೆ.

ಏನಿದು ಡೆಟ್ ಫಂಡ್?

ಡೆಟ್ ಎಂದರೆ ಸಾಲ. ಡೆಟ್ ಮಾರುಕಟ್ಟೆ ಎಂದರೆ ಸಾಲದ ಮಾರುಕಟ್ಟೆ. ಗವರ್ನ್ಮೆಂಟ್ ಬಾಂಡ್ ಅಥವಾ ಸರ್ಕಾರ ಬಿಡುಗಡೆ ಮಾಡುವ ಬಾಂಡ್, ಸಾಲಪತ್ರ, ಕಾರ್ಪೊರೇಟ್ ಬಾಂಡ್ ಇತ್ಯಾದಿಗಳು ಡೆಟ್ ಮಾರುಕಟ್ಟೆಯಲ್ಲಿರುತ್ತವೆ. ಈ ಸಾಲಪತ್ರಗಳ ಮೇಲೆ ಹೂಡಿಕೆ ಮಾಡುವ ಮ್ಯುಚುವಲ್ ಫಂಡ್​ಗಳನ್ನು ಡೆಟ್ ಫಂಡ್ ಎಂದು ಕರೆಯಬಹುದು. ಕೆಲ ಮ್ಯುಚುವಲ್ ಫಂಡ್​ಗಳು ಈಕ್ವಿಟಿ ಮತ್ತು ಡೆಟ್ ಎರಡರಲ್ಲೂ ಹೂಡಿಕೆ ಮಾಡುತ್ತವೆ. ಶೇ. 60ಕ್ಕಿಂತ ಹೆಚ್ಚು ಹಣವನ್ನು ಡೆಟ್​ಗಳಲ್ಲಿ ಹೂಡಿಕೆ ಮಾಡುವ ಮ್ಯುಚುವಲ್ ಫಂಡ್ ಅನ್ನು ಡೆಟ್ ಫಂಡ್ ಎಂದು ಪರಿಗಣಿಸಬಹುದು.

ಇದನ್ನೂ ಓದಿ: ಬಿಸಿನೆಸ್ ಮಾಡಬೇಕು, ಆದರೆ ಯಾವ ವ್ಯವಹಾರ ಆರಂಭಿಸಬೇಕು ಅಂತ ಗೊಂದಲವಾ? ಇಲ್ಲಿದೆ ಒಂದಷ್ಟು ಐಡಿಯಾ

ಬ್ಯಾಂಕ್ ಎಫ್​ಡಿ ಮತ್ತು ಡೆಟ್ ಫಂಡ್​ನಲ್ಲಿ ಯಾವುದು ಲಾಭಕಾರಿ?

ಪ್ರಮುಖ ಕಮರ್ಷಿಯಲ್ ಬ್ಯಾಂಕುಗಳಲ್ಲಿ ನಿಶ್ಚಿತ ಠೇವಣಿಗಳಿಗೆ ಶೇ. 6ರಿಂದ 7ರಷ್ಟು ಬಡ್ಡಿ ಸಿಗುತ್ತದೆ. ಕೆಲವೊಂದು ಅವಧಿಗೆ ಶೇ. 7.5ರಷ್ಟು ವಾರ್ಷಿಕ ಬಡ್ಡಿ ಸಿಗಬಹುದು.

ಡೆಟ್ ಮಾರುಕಟ್ಟೆ ಒಂದು ವರ್ಷದಲ್ಲಿ ಶೇ. 7ರಿಂದ 8ರಷ್ಟು ಬಡ್ಡಿ ಆದಾಯ ಕೊಡಬಹುದು. ಕೆಲವೊಮ್ಮೆ ಇನ್ನೂ ಹೆಚ್ಚಾಗಬಹುದು ಎಂದು ಕೆಲವರು ಅಂದಾಜು ಮಾಡುತ್ತಾರೆ. ಆದರೆ, ಮೇಲ್ನೋಟಕ್ಕೆ ಡೆಟ್ ಫಂಡ್ ಮತ್ತು ಬ್ಯಾಂಕ್ ಎಫ್​ಡಿಯಿಂದ ಸಿಗುವ ಆದಾಯದಲ್ಲಿ ಅಷ್ಟೇನೂ ವ್ಯತ್ಯಾಸ ಇರುವುದಿಲ್ಲ.

ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ