Post Office Fixed Deposit: ಪೋಸ್ಟ್ ಆಫೀಸ್ ಎಫ್ಡಿ ಹಣ ಹಿಂಪಡೆಯುವ ಮುನ್ನ ಈ ಮಹತ್ವದ ನಿಯಮ ಬದಲಾವಣೆ ತಿಳಿದಿರಿ
FD Premature Withdrawal Rules: ಅಂಚೆ ಕಚೇರಿ ನಿಶ್ಚಿತ ಠೇವಣಿ ಸ್ಕೀಮ್ನಲ್ಲಿ ನವೆಂಬರ್ 7ರಂದು ಹಣಕಾಸು ಸಚಿವಾಲಯ ಮಹತ್ವದ ನಿಯಮ ಬದಲಾವಣೆ ಮಾಡಿತ್ತು. ನವೆಂಬರ್ 10ರ ನಂತರ ಆರಂಭಿಸುವ ಎಫ್ಡಿ ಸ್ಕೀಮ್ನಲ್ಲಿ ಪ್ರೀಮೆಚ್ಯೂರ್ ಆಗಿ ಹಣ ವಿತ್ಡ್ರಾ ಮಾಡಲು ಇನ್ನಷ್ಟು ನಿರ್ಬಂಧ ಹಾಕಲಾಗಿದೆ. ಐದು ವರ್ಷದ ಅವಧಿಯ ಎಫ್ಡಿಗೆ 4 ವರ್ಷ ಲಾಕ್ ಇನ್ ಪೀರಿಯಡ್ ಇದೆ. 4 ವರ್ಷದವರೆಗೂ ಹಣ ಹಿಂಪಡೆಯಲು ಆಗುವುದಿಲ್ಲ.
ಉಳಿತಾಯ ಹಣ ಇರಿಸಲು ಅಂಚೆ ಕಚೇರಿಯಲ್ಲಿ ಕೆಲ ಮಹತ್ವದ ಸ್ಕೀಮ್ಗಳಿವೆ. ಅವುಗಳಲ್ಲಿ ನಿಶ್ಚಿತ ಠೇವಣಿಯೂ ಒಂದು. ಪೋಸ್ಟ್ ಆಫೀಸ್ ಫಿಕ್ಸೆಡ್ ಡೆಪಾಸಿಟ್ಗಳು (Post Office Fixed Deposits) ಒಂದರಿಂದ 5 ವರ್ಷದ ಅವಧಿಯ ಶ್ರೇಣಿಗಳಲ್ಲಿವೆ. ಹಣಕಾಸು ಸಚಿವಾಲಯ ಕಳೆದ ತಿಂಗಳು ಫಿಕ್ಸೆಡ್ ಡೆಪಾಸಿಟ್ ವಿಚಾರದಲ್ಲಿ ಕೆಲ ಬದಲಾವಣೆ ಮಾಡಿ ಅಧಿಸೂಚನೆ ಹೊರಡಿಸಿತ್ತು. ಅವಧಿಗೆ ಮುನ್ನ, ಅಂದರೆ ಪ್ರೀಮೆಚ್ಯೂರ್ ಆಗಿ ಠೇವಣಿ ಹಣ ಹಿಂಪಡೆಯುವ ವಿಚಾರದಲ್ಲಿ ಪ್ರಮುಖ ನಿಯಮ ಬದಲಾವಣೆ ಮಾಡಲಾಗಿದೆ. ಅದರಂತೆ 5 ವರ್ಷದ ಅವಧಿಯ ಠೇವಣಿಗೆ 4 ವರ್ಷ ಲಾಕ್ ಇನ್ ಪೀರಿಯಡ್ ನಿಗದಿ ಮಾಡಲಾಗಿದೆ. ಅಂದರೆ, 4 ವರ್ಷದವರೆಗೂ ಠೇವಣಿ ಹಣವನ್ನು ಹಿಂಪಡೆಯಲು ಆಗುವುದಿಲ್ಲ. 4 ವರ್ಷದ ಬಳಿಕ ಹಣ ಹಿಂಪಡೆದರೂ ಬಡ್ಡಿ ಬಹಳ ಕಡಿಮೆ ಸಿಗುತ್ತದೆ.
ನವೆಂಬರ್ 7ರಂದು ಈ ಸಂಬಂಧ ಹಣಕಾಸು ಸಚಿವಾಲಯ ಅಧಿಸೂಚನೆ ಹೊರಡಿಸಿತ್ತು. ಈ ಹೊಸ ನಿಯಮವು 2023ರ ನವೆಂಬರ್ 10ರಂದು ಹಾಗೂ ಆ ಬಳಿಕ ಆರಂಭಿಸಲಾದ ಪೋಸ್ಟ್ ಆಫೀಸ್ ಫಿಕ್ಸೆಡ್ ಡೆಪಾಸಿಟ್ ಸ್ಕೀಮ್ಗಳಿಗೆ ಅನ್ವಯ ಆಗುತ್ತದೆ. ನವೆಂಬರ್ 10ಕ್ಕೆ ಮುಂಚಿನ ಠೇವಣಿಗಳ ವಿಚಾರದಲ್ಲಿ ಹಳೆಯ ನಿಯಮಗಳೇ ಅನ್ವಯ ಆಗುತ್ತವೆ.
ಇದನ್ನೂ ಓದಿ: ಪೋಸ್ಟ್ ಆಫೀಸ್ನಲ್ಲಿ ನಿಮ್ಮ ಹಳೆಯ ನಿಷ್ಕ್ರಿಯ ಸೇವಿಂಗ್ಸ್ ಖಾತೆ ಮತ್ತೆ ಸಕ್ರಿಯಗೊಳಿಸುವ ಕ್ರಮ ತಿಳಿಯಿರಿ
ಪೋಸ್ಟ್ ಆಫೀಸ್ ಎಫ್ಡಿ ನಿಯಮಗಳಿವು
ಐದು ವರ್ಷದ ಪೋಸ್ಟ್ ಆಫೀಸ್ ಫಿಕ್ಸೆಡ್ ಡೆಪಾಸಿಟ್ ಹಣವನ್ನು ನಾಲ್ಕು ವರ್ಷ ಪೂರ್ಣಗೊಳ್ಳುವವರೆಗೂ ವಿತ್ಡ್ರಾ ಮಾಡಲು ಆಗುವುದಿಲ್ಲ. ನಾಲ್ಕು ವರ್ಷದ ಬಳಿಕ ಎಫ್ಡಿ ಹಣ ವಿತ್ಡ್ರಾ ಮಾಡುವುದಾದರೆ ಸೇವಿಂಗ್ಸ್ ಅಕೌಂಟ್ಗೆ ಸಿಗುವ ಬಡ್ಡಿದರ ಮಾತ್ರವೇ ಅನ್ವಯ ಆಗುತ್ತದೆ.
ಒಂದು ವರ್ಷ, ಎರಡು ವರ್ಷ ಅಥವಾ ಮೂರು ವರ್ಷದ ಪೋಸ್ಟ್ ಆಫೀಸ್ ಫಿಕ್ಸೆಡ್ ಡೆಪಾಸಿಟ್ ಹಣವನ್ನು 6 ತಿಂಗಳಿಂದ ಒಂದು ವರ್ಷದಲ್ಲಿ ವಿತ್ಡ್ರಾ ಮಾಡಿದರೆ ಅದಕ್ಕೂ ಕೂಡ ಸೇವಿಂಗ್ಸ್ ಅಕೌಂಟ್ನ ಬಡ್ಡಿದರ ಮಾತ್ರವೇ ಅನ್ವಯ ಆಗುತ್ತದೆ.
ಎರಡು ವರ್ಷ ಅಥವಾ ಮೂರು ವರ್ಷದ ಪೋಸ್ಟ್ ಆಫೀಸ್ ಫಿಕ್ಸೆಡ್ ಡೆಪಾಸಿಟ್ ಹಣವನ್ನು ಒಂದು ವರ್ಷದ ಬಳಿಕ ವಿತ್ಡ್ರಾ ಮಾಡುವುದಾದರೆ ಬಡ್ಡಿದರ ಕ್ರಮವಾಗಿ ಒಂದು ವರ್ಷದ ಅವಧಿಯ ಅಥವಾ ಎರಡು ವರ್ಷದ ಅವಧಿಯ ಬಡ್ಡಿದರ ಅನ್ವಯ ಆಗುತ್ತದೆ. ಜೊತೆಗೆ ಶೇ. 2ರಷ್ಟು ಬಡ್ಡಿಯನ್ನು ದಂಡವಾಗಿ ಮುರಿದುಕೊಳ್ಳಲಾಗುತ್ತದೆ.
ಇದನ್ನೂ ಓದಿ: ನಿಮ್ಮ ಖಾತೆಯಲ್ಲಿರುವ ಹಣಕ್ಕೆ ಯಾವ್ಯಾವ ಬ್ಯಾಂಕುಗಳಲ್ಲಿ ಎಷ್ಟೆಷ್ಟು ಬಡ್ಡಿ ಸಿಗುತ್ತದೆ, ಇಲ್ಲಿದೆ ಡೀಟೇಲ್ಸ್
ಅಂಚೆ ಕಚೇರಿ ಎಫ್ಡಿಯಲ್ಲಿ ಬಡ್ಡಿದರಗಳೆಷ್ಟು?
ಪೋಸ್ಟ್ ಆಫೀಸ್ ಫಿಕ್ಸೆಡ್ ಡೆಪಾಸಿಟ್ ಒಂದು ವರ್ಷ, ಎರಡು ವರ್ಷ, ಮೂರು ವರ್ಷ ಮತ್ತು ಐದು ವರ್ಷದ ಸ್ಕೀಮ್ಗಳಿವೆ.
- ಒಂದು ವರ್ಷದ ಅವಧಿ ಠೇವಣಿ: ಶೇ. 6.90ರಷ್ಟು ಬಡ್ಡಿ
- ಎರಡು ವರ್ಷದ ಅವಧಿ ಠೇವಣಿ: ಶೇ. 7ರಷ್ಟು ಬಡ್ಡಿ
- ಮೂರು ವರ್ಷದ ಅವಧಿ ಠೇವಣಿ: ಶೇ. 7ರಷ್ಟು ಬಡ್ಡಿ
- ಐದು ವರ್ಷದ ಅವಧಿ ಠೇವಣಿ: ಶೇ. 7.50ರಷ್ಟು ಬಡ್ಡಿ
ಇನ್ನಷ್ಟು ಪರ್ಸನಲ್ ಫೈನಾನ್ಸ್ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ
Published On - 12:08 pm, Wed, 6 December 23
