ಇಲಾನ್ ಮಸ್ಕ್ ಅವರ ಸ್ಟಾರ್​ಲಿಂಕ್ ಭಾರತಕ್ಕೆ ಬರಲಿ, ಸ್ಪರ್ಧಿಸಲು ನಾವ್ ರೆಡಿ; ತೊಡೆ ತಟ್ಟಿದ ಜಿಯೋ ಮತ್ತು ಏರ್​ಟೆಲ್

ಮುಂಬೈ, ಅಕ್ಟೋಬರ್ 16: ಸೆಟಿಲೈಟ್ ಇಂಟರ್ನೆಟ್ ಸರ್ವಿಸ್ ನೀಡುವ ಇಲಾನ್ ಮಸ್ಕ್ ಅವರ ಸ್ಟಾರ್​ಲಿಂಕ್ ಸಂಸ್ಥೆ ಭಾರತದಲ್ಲಿ ಕಾರ್ಯಾಚರಣೆ ನಡೆಸಿದರೆ, ಅದರೊಂದಿಗೆ ಸ್ಪರ್ಧಿಸಲು ಭಾರತದ ಟೆಲಿಕಾಂ ಕಂಪನಿಗಳು ತಯಾರಾಗಿವೆ. ಸ್ಟಾರ್​ಲಿಂಕ್ ಅನ್ನು ಸ್ವಾಗತಿಸಿ ಎರಡೂ ಕಂಪನಿಗಳು ಹೇಳಿಕೆ ನೀಡಿವೆ. ಭಾರತದ ಸೆಟಿಲೈಟ್ ಸಂವಹನ ಮಾರುಕಟ್ಟೆಯಲ್ಲಿ ಸ್ಟಾರ್​ಲಿಂಕ್ ಬರಲಿ, ಯಾರೇ ಬರಲಿ, ಪೈಪೋಟಿ ಆಗುವುದನ್ನು ತಾನು ಸ್ವಾಗತಿಸುತ್ತೇನೆ ಎಂದು ರಿಲಯನ್ಸ್ ಇಂಡಸ್ಟ್ರೀಸ್ ಹೇಳಿದೆ.

ಮುಕೇಶ್ ಅಂಬಾನಿ ವಿರುದ್ಧ ನೇರವಾಗಿ ಮತ್ತು ಪರೋಕ್ಷವಾಗಿ ಇಲಾನ್ ಮಸ್ಕ್ ಟೀಕಿಸಿದ ಬಳಿಕ ರಿಲಯನ್ಸ್ ಇಂಡಸ್ಟ್ರೀಸ್ ಸ್ಟಾರ್​ಲಿಂಕ್ ವಿಚಾರವಾಗಿ ನೀಡಿದ ಮೊದಲ ಬಹಿರಂಗ ಪ್ರತಿಕ್ರಿಯೆ ಇದು. ಭಾರತದಲ್ಲಿ ಇರುವ ಕಾನೂನು ಮತ್ತು ನಿಯಮಗಳಿಗೆ ಬದ್ಧವಾಗಿ ಯಾವುದೇ ದೇಶಿ, ವಿದೇಶೀ ಸಂಸ್ಥೆಗಳು ಬಂದು ಹೂಡಿಕೆ ಮಾಡುತ್ತೇವೆಂದರೆ ಅದಕ್ಕೆ ನಮ್ಮ ಬೆಂಬಲ ಮತ್ತು ಸ್ವಾಗತ ಇರುತ್ತದೆ ಎಂದು ಆರ್​ಐಎಲ್ ಹೇಳಿದೆ.

ಇದನ್ನೂ ಓದಿ: ನವೆಂಬರ್ 1ರಿಂದ ಮೊಬೈಲ್ ಕರೆ ಮಾಡುವವರ ಅಧಿಕೃತ ಹೆಸರು ಪ್ರದರ್ಶಿಸಬೇಕು; ಟೆಲಿಕಾಂ ಕಂಪನಿಗಳಿಗೆ ನಿರ್ದೇಶನ

‘ಸೆಟಿಲೈಟ್ ಕಮ್ಯೂನಿಕೇಶನ್ಸ್ ಕ್ಷೇತ್ರದಲ್ಲಿ ಸ್ಟಾರ್​ಲಿಂಕ್​ನದ್ದು ಸೇರಿ ಪೈಪೋಟಿಯನ್ನು ಸ್ವಾಗತಿಸುತ್ತೇವೆ. ಜಿಯೋವನ್ನೂ ಒಳಗೊಂಡು ಪ್ರತಿಯೊಂದು ಸಂಸ್ಥೆಯೂ ಈ ನೆಲದ ಕಾನೂನು ಮತ್ತು ನೀತಿಗಳಿಗೆ ಬದ್ಧವಾಗಿರಬೇಕು ಮತ್ತು ಭಾರತೀಯ ಜನರಿಗೆ ಸೇವೆ ಒದಗಿಸಬೇಕು’ ಎಂದು ರಿಲಯನ್ಸ್ ತಿಳಿಸಿದೆ.

ರಿಲಯನ್ಸ್ ಇಂಡಸ್ಟ್ರೀಸ್​ನ ಹೇಳಿಕೆ

ಜಿಯೋಗೂ ಅನುಮತಿ ಸಿಕ್ಕಿಲ್ಲ: ರಿಲಯನ್ಸ್

ಇನ್ನು ತನಗೆ ಭಾರತದಲ್ಲಿ ಕಾರ್ಯಾಚರಿಸಲು ಸರ್ಕಾರ ಅವಕಾಶ ಕೊಡುತ್ತಿಲ್ಲ ಎನ್ನುವ ಸ್ಟಾರ್​ಲಿಂಕ್ ಆರೋಪವನ್ನು ರಿಲಯನ್ಸ್ ಪರೋಕ್ಷವಾಗಿ ತಳ್ಳಿಹಾಕಿದೆ. ತಮ್ಮ ಜಿಯೋ ಸಂಸ್ಥೆಯೂ ಕೂಡ ಸ್ಯಾಟ್​ಕಾಮ್ ಸರ್ವಿಸ್​ಗಳಿಗೆ ಸರಕಾರದಿಂದ ಅನುಮತಿಗಾಗಿ ಕಾಯುತ್ತಿದೆ. ಭಾರತೀಯ ಕಂಪನಿಗಳಿಗೂ ಮತ್ತು ವಿದೇಶೀ ಕಂಪನಿಗಳಿಗೂ ಒಂದೇ ಕಾನೂನು ಅನ್ವಯ ಆಗುತ್ತದೆ ಎಂದು ರಿಲಯನ್ಸ್ ತಿಳಿಸಿದೆ.

ಏರ್ಟೆಲ್ ಸ್ಪಷ್ಟನೆ: ಭಾರ್ತಿ ಏರ್ಟೆಲ್ ಕೂಡ ಇದೇ ಅಭಿಪ್ರಾಯವನ್ನು ದಿನಗಳ ಹಿಂದೆಯೇ ಹೇಳಿತ್ತು. ತಾವು ಐದು ವರ್ಷದ ಹಿಂದೆಯೇ ಅರ್ಜಿ ಸಲ್ಲಿಸಿದ್ದೇವೆ. ಅನುಮತಿಗಾಗಿ ಸರದಿಯಲ್ಲಿದ್ದೇವೆ ಎಂದು ಏರ್ಟೆಲ್ ಛೇರ್ಮನ್ ಸುನಿಲ್ ಮಿಟ್ಟಲ್ ಸ್ಪಷ್ಟಪಡಿಸಿದ್ದಾರೆ.

ಇದನ್ನೂ ಓದಿ: 5ಜಿ ನೆಟ್ವರ್ಕ್ ಅಳವಡಿಕೆ; ಜಿಯೋ ವೇಗಕ್ಕೆ ಇಲ್ಲ ಸಾಟಿ: ಆಕಾಶ್ ಅಂಬಾನಿ

ಮೂರು ಸಂಸ್ಥೆಗಳಿಗೆ ಸ್ಯಾಟ್​ಕಾಮ್ ಸರ್ವಿಸ್​ಗೆ ಸಿಕ್ಕಿದೆ ಲೈಸೆನ್ಸ್

ಭಾರತದಲ್ಲಿ ಸೆಟಿಲೈಟ್ ಕಮ್ಯೂನಿಕೇಶನ್ಸ್ ಸರ್ವಿಸ್ ನೀಡಲು ಸರ್ಕಾರ ಮೂರು ಸಂಸ್ಥೆಗಳಿಗೆ ಲೈಸೆನ್ಸ್ ನೀಡಿದೆ. ರಿಲಯನ್ಸ್, ಭಾರ್ತಿ ಏರ್ಟೆಲ್​ನ ಯೂಟೆಲ್​ಸ್ಯಾಟ್ ಒನ್​ವೆಬ್ ಮತ್ತು ಇಲಾನ್ಸ್ ಮಸ್ಕ್ ಅವರ ಸ್ಟಾರ್​ಲಿಂಕ್ ಸಂಸ್ಥೆಗಳಿಗೆ ಪರವಾನಿಗೆ ಸಿಕ್ಕಿದೆ. ಆದರೆ, ಆಪರೇಷನ್ಸ್ ಶುರು ಮಾಡಲು ಸರ್ಕಾರದಿಂದ ಒಂದಷ್ಟು ಕಟ್ಟುಪಾಡುಗಳು, ನಿಯಮಗಳು ಇವೆ. ಅವುಗಳನ್ನು ಪಾಲಿಸಿದಲ್ಲಿ ಮಾತ್ರ ಸೇವೆ ಆರಂಭಿಸುವ ಅನುಮತಿ ಸಿಗುತ್ತದೆ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ