Family Business: ಮುಂದಿನ ಪೀಳಿಗೆ ನಾಯಕ ಸುದರ್ಶನ್ ವೇಣು, ಉದಯೋನ್ಮುಖ ಮಹಿಳಾ ಉದ್ಯಮಿ ರೋಷನಿ ನಾದರ್ಗೆ ಪ್ರಶಸ್ತಿ

Indian Family Business Awards 2022: ಮನಿಕಂಟ್ರೋಲ್ನ ಇಂಡಿಯನ್ ಫ್ಯಾಮಿಲಿ ಬಿಸಿನೆಸ್ ಅವಾರ್ಡ್ ಕಾರ್ಯಕ್ರಮದಲ್ಲಿ ಸನ್ ಫಾರ್ಮಸ್ಯೂಟಿಕಲ್ಸ್ ಸಂಸ್ಥೆಯ ಸಂಸ್ಥಾಪಕ ದಿಲೀಪ್ ಶಾಂಘವಿ ಅವರಿಗೆ ಜೀವಿತಾವಧಿ ಸಾಧನೆ ಪ್ರಶಸ್ತಿ ನೀಡಿ ಸನ್ಮಾನಿಸಲಾಗಿದೆ. ಎಚ್ಸಿಎಲ್ ಟೆಕ್ನಾಲಜೀಸ್ನ ರೋಷನಿ ನಾದರ್ ಸೇರಿದಂತೆ ಹಲವರಿಗೆ ವಿವಿಧ ವಿಭಾಗಗಳ ಫ್ಯಾಮಿಲಿ ಬಿಸಿನೆಸ್ ಅವಾರ್ಡ್ ಸಿಕ್ಕಿದೆ.

ರೋಷನಿ ನಾದರ್

ಸುಗ್ಗನಹಳ್ಳಿ ವಿಜಯಸಾರಥಿ |
Updated on: Aug 20, 2023 | 3:33 PM

ನವದೆಹಲಿ, ಆಗಸ್ಟ್ 20: ಮಾಧ್ಯಮ ಸಂಸ್ಥೆ ಮನಿಕಂಟ್ರೋಲ್ನ 2022ರ ಸಾಲಿನ ಇಂಡಿಯನ್ ಫ್ಯಾಮಿಲಿ ಬ್ಯುಸಿನೆಸ್ ಅವಾರ್ಡ್ನಲ್ಲಿ (Indian Family Business Awards 2022) ವಿವಿಧ ವಿಭಾಗಗಳಲ್ಲಿ ಪ್ರಶಸ್ತಿ ನೀಡಲಾಗಿದೆ. ಭಾರತದಲ್ಲಿ ಬಹಳ ಸಂಖ್ಯೆಯಲ್ಲಿ ಇರುವ ಫ್ಯಾಮಿಲಿ ಬ್ಯುಸಿನೆಸ್ಗಳಲ್ಲಿರುವ ಪ್ರತಿಭಾನ್ವಿತರನ್ನು ಗುರುತಿಸಿ ಸನ್ಮಾನಿಸಲಾಗಿದೆ. ಎಚ್ಸಿಎಲ್ ಟೆಕ್ನಾಲಜೀಸ್ನ ಅಧ್ಯಕ್ಷೆ ರೋಷನಿ ನಾದರ್ ಮಲ್ಹೋತ್ರಾ (Roshni Nadar Malhotra) ಅವರು ಉದಯೋನ್ಮುಖ ಮಹಿಳಾ ಉದ್ಯಮನಾಯಕಿ ಪ್ರಶಸ್ತಿ ಗೆದ್ದಿದ್ದಾರೆ. ಟಿವಿಎಸ್ ಮೋಟಾರ್ ಕಂಪನಿಯ ಎಕ್ಸಿಕ್ಯೂಟಿವ್ ಸುದರ್ಶನ್ ವೇಣು ಅವರು ಮುಂದಿನ ಪೀಳಿಗೆ ನಾಯಕ ಪ್ರಶಸ್ತಿಗೆ ಬಾಜನರಾಗಿದ್ದಾರೆ. ಇನ್ನು, ಸನ್ ಫಾರ್ಮಸ್ಯೂಟಿಕಲ್ಸ್ ಸಂಸ್ಥೆಯ ಸ್ಥಾಪಕ ದಿಲೀಪ್ ಶಾಂಘವಿ ಅವರನ್ನು ಜೀವಿತಾವಧಿ ಸಾಧನೆ ಪ್ರಶಸ್ತಿಗೆ ಆಯ್ಕೆ ಮಾಡಲಾಗಿದೆ. ಕೇಂದ್ರ ವಾಣಿಜ್ಯ ಸಚಿವ ಪೀಯುಶ್ ಗೋಯಲ್ ಆಗಸ್ಟ್ 19ರಂದು ಎಲ್ಲಾ ಪ್ರಶಸ್ತಿ ಪುರಸ್ಕೃತರಿಗೆ ಸನ್ಮಾನ ಮಾಡಿದರು.

ಮನಿಕಂಟ್ರೋಲ್ನಿಂದ ಆಯೋಜಿಸಲಾದ ಇಂಡಿಯನ್ ಫ್ಯಾಮಿಲಿ ಬ್ಯುಸಿನೆಸ್ ಅವಾರ್ಡ್ಸ್ ಇದು ಎರಡನೇ ಆವೃತ್ತಿದ್ದಾಗಿದೆ. 17 ವಿಭಾಗಗಳಲ್ಲಿರುವ ಕುಟುಂಬ ಉದ್ದಿಮೆಗಳನ್ನು ಅವಲೋಕಿಸಲಾಗಿದೆ. ರಾಷ್ಟ್ರ ನಿರ್ಮಾಣದಲ್ಲಿ ಈ ಕುಟುಂಬ ವ್ಯವಹಾರಸ್ಥರ ಪಾತ್ರದ ಬಗ್ಗೆ ಮೆಚ್ಚುಗೆ ಮಾಡಲಾಗಿದೆ. ಭಾರತದಲ್ಲಿ ಫ್ಯಾಮಿಲಿ ಬಿಸಿನೆಸ್ಗಳು ಶೇ. 70ರಷ್ಟು ಜಿಡಿಪಿಗೆ ಕೊಡುಗೆ ನೀಡಿವೆ. ಶೇ. 60ರಷ್ಟು ಉದ್ಯೋಗಸೃಷ್ಟಿಗೆ ಕಾರಣವಾಗಿರುವ ಸಂಗತಿಯನ್ನು ಎತ್ತಿತೋರಿಸಲಾಗಿದೆ.