ಕೋಲ್ಕತಾ ಬಳಿಕ ದೆಹಲಿಯಲ್ಲಿ ಊಬರ್​ನಿಂದ ಬಸ್ ಸೇವೆ; ಸಾರಿಗೆ ಇಲಾಖೆಯಿಂದ ಸಿಕ್ಕಿತು ಲೈಸೆನ್ಸ್

ಬೆಂಗಳೂರು, ಮೇ 21: ಊಬರ್ ಈಗ ಕೋಲ್ಕತಾ ಬಳಿಕ ದೆಹಲಿಯಲ್ಲಿ ಬಸ್ ಸರ್ವಿಸ್ (Uber bus service) ಆರಂಭಿಸುತ್ತಿದೆ. ದೆಹಲಿ ಸಾರಿಗೆ ಸಂಸ್ಥೆಯಿಂದ ಲೈಸೆನ್ಸ್ ಪಡೆದಿರುವ ಊಬರ್ ಈಗ ರಾಷ್ಟ್ರ ರಾಜಧಾನಿಯಲ್ಲಿ ಶಟಲ್ ಸರ್ವಿಸ್ ಚಾಲನೆಗೊಳಿಸಲಿದೆ. ದೆಹಲಿಯ ಪ್ರೀಮಿಯಮ್ ಬಸ್ ಸ್ಕೀಮ್ ಬಳಸಿ ಊಬರ್ ಈ ಸೇವೆ ಆರಂಭಿಸಲಿರುವುದು ಗೊತ್ತಾಗಿದೆ. ಕಳೆದ ಒಂದು ವರ್ಷದಿಂದಲೂ ಕೋಲ್ಕತಾದಲ್ಲಿ ಊಬರ್ ಶಟಲ್ ಸೇವೆ ಚಾಲನೆಯಲ್ಲಿದೆ. ದೆಹಲಿಯಲ್ಲಿ ಊಬರ್ ಈಗಾಗಲೇ ಪ್ರಯೋಗ ನಡೆಸಿ ಯಶಸ್ವಿಯಾಗಿದೆ. ಪ್ರಯೋಗದ ವೇಳೆ ಈ ಸರ್ವಿಸ್​ಗೆ ಉತ್ತಮ ಸ್ಪಂದನೆ ಸಿಕ್ಕಿದೆ. ಸದ್ಯದಲ್ಲೇ ಇಲ್ಲಿಯೂ ಬಸ್ ಸರ್ವಿಸ್ ಶುರುವಾಗಲಿದೆ. ದೆಹಲಿಯಲ್ಲಿ ಊಬರ್ ಮಾತ್ರವಲ್ಲ ಆವೆಗ್ ಎಂಬ ಮತ್ತೊಂದು ಆ್ಯಪ್ ಆಧಾರಿತ ಬಸ್ ಸರ್ವಿಸ್ ಸಂಸ್ಥೆಗೂ ಲೈಸೆನ್ಸ್ ಸಿಕ್ಕಿದೆ.

ಊಬರ್ ಆ್ಯಪ್​ನಲ್ಲಿ ದೆಹಲಿ ಮತ್ತು ಕೋಲ್ಕತಾ ಪ್ರದೇಶದ ಜನರು ಶಟಲ್ ಸರ್ವಿಸ್ ಅನ್ನು ಕಾಣಬಹುದು. ಅದರಲ್ಲಿ ಒಂದು ವಾರದವರೆಗೂ ಮುಂಗಡವಾಗಿ ಬಸ್ ಮತ್ತು ಸೀಟುಗಳನ್ನು ಬುಕ್ ಮಾಡಬಹುದು. ನಿಮ್ಮ ಬಸ್​ನ ಲೈವ್ ಲೊಕೇಶನ್ ಅನ್ನು ಟ್ರ್ಯಾಕ್ ಮಾಡಬಹುದು. ಬಸ್ ಬರುವ ಸಮಯ ಇತ್ಯಾದಿ ವಿವರ ಕಾಣಬಹುದು.

ಊಬರ್ ಶಟಲ್ ಸರ್ವಿಸ್​ನಲ್ಲಿರುವ ಬಸ್ಸು ಎಸಿ ಇರುವ ಲಕ್ಷುರಿ ಬಸ್ ಆಗಿರಲಿವೆ. ವೈಫೈ, ಜಿಪಿಎಸ್, ಸಿಸಿಟಿವಿ, ಪ್ಯಾನಿಕ್ ಬಟನ್, 2×2 ರೀಕ್ಲೈನಿಂಗ್ ಸೀಟ್ ಇತ್ಯಾದಿ ಸೌಲಭ್ಯಗಳು ಇದರಲ್ಲಿ ಇರಲಿವೆ. ಪ್ರತೀ ಬಸ್ಸಿನಲ್ಲಿ 19ರಿಂದ 50 ಸೀಟುಗಳಿರಲಿವೆ ಎನ್ನಲಾಗಿದೆ.

ಇದನ್ನೂ ಓದಿ: ಸೈಬರ್ ವಂಚಕರ ಬಾಲ ಕತ್ತರಿಸಲು ಸರ್ಕಾರ ಪ್ಲಾನ್; 18 ಲಕ್ಷ ಮೊಬೈಲ್ ನಂಬರ್​ಗಳು ರದ್ದಾಗುವ ಸಾಧ್ಯತೆ

ವರ್ಷದ ಬಳಿಕ ಲಾಭ ಸಿಗುವ ನಿರೀಕ್ಷೆ…

ಊಬರ್ ಸಂಸ್ಥೆ ಮಾಡಿರುವ ಅಂದಾಜು ಪ್ರಕಾರ ಅದರ ಬಸ್ ಸರ್ವಿಸ್ ಒಂದಷ್ಟು ಜನಪ್ರಿಯತೆ ಅಥವಾ ಜನಬಳಕೆ ಗಳಿಸಬೇಕಾದರೆ 12 ತಿಂಗಳಾಗಬಹುದು. ಎರಡು ವರ್ಷದೊಳಗೆ ಲಾಭ ಸಿಗಬಹುದು ಎಂದು ಊಬರ್ ನಿರೀಕ್ಷಿಸಿದೆ. ಅಮೆರಿಕ ಮೂಲದ ಊಬರ್ ಸಂಸ್ಥೆಯ ಈ ಶಟಲ್ ಸರ್ವಿಸ್ ಭಾರತ ಸೇರಿ ಮೂರು ದೇಶಗಳಲ್ಲಿವೆ. ಬ್ರೆಜಿಲ್ ಮತ್ತು ಈಜಿಪ್ಟ್​ನಲ್ಲಿ ಊಬರ್​ನಿಂದ ಈ ಸೇವೆ ನೀಡಲಾಗುತ್ತಿದೆ.

ಬೆಂಗಳೂರಿನಲ್ಲೂ ಊಬರ್ ಶಟಲ್ ಸರ್ವಿಸ್ ಆರಂಭಿಸಲು ಹೊರಡಲಾಗಿತ್ತು. ಊಬರ್ ಸಿಇಒ ಕೂಡ ಬೆಂಗಳೂರಿಗೆ ಬಂದು ಊಬರ್ ಬಸ್​ನಲ್ಲಿ ಪ್ರಯಾಣಿಸಿದ್ದರು. ಏರ್ಪೋರ್ಟ್ ಮಾರ್ಗದಲ್ಲಿ ಇದರ ಸೇವೆ ಆರಂಭಿಸಬಹುದು ಎಂದು ಹೇಳಲಾಗಿತ್ತು. ಅದಿನ್ನೂ ಕೈಗೂಡಿಲ್ಲ.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ

ಬಿಸಿನೆಸ್ ವೆಬ್ ಸ್ಟೋರಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ