ಅಮೆರಿಕಕ್ಕೆ ಪೆಟ್ರೋಲ್ ಕಾಟ; ಆಗಸ್ಟ್​ನಲ್ಲಿ ಹಣದುಬ್ಬರ ಏರಿಕೆ; ಭಾರತ ಸೇರಿದಂತೆ ಜಾಗತಿಕವಾಗಿ ಏನು ಪರಿಣಾಮ?

ವಾಷಿಂಗ್ಟನ್, ಸೆಪ್ಟೆಂಬರ್ 14: ಅಮೆರಿಕದಲ್ಲಿ ಹಣದುಬ್ಬರ ಏರಿಕೆ (US Inflation) ಮುಂದುವರಿದಿದೆ. ಆಗಸ್ಟ್ ತಿಂಗಳಲ್ಲಿ ಹಣದುಬ್ಬರ ಶೇ. 3.7ಕ್ಕೆ ಏರಿದೆ. ಇದು ಒಂದು ವರ್ಷದ ಅವಧಿಯಲ್ಲಿ ಆಗಿರುವ ಹಣದುಬ್ಬರ ಏರಿಕೆ. ಕಳೆದ ವರ್ಷದ ಆಗಸ್ಟ್ ತಿಂಗಳಲ್ಲಿನ ಬೆಲೆಗೆ ಹೋಲಿಸಿದರೆ ಈ ಆಗಸ್ಟ್​ನಲ್ಲಿ ಆಗಿರುವ ಬೆಲೆ ವ್ಯತ್ಯಯ ಇದಾಗಿದೆ. ಕಳೆದ ತಿಂಗಳಾದ ಜುಲೈನಲ್ಲಿ ಹಣದುಬ್ಬರ ಶೇ. 3.2ರಷ್ಟಿತ್ತು. ಆಗಸ್ಟ್​ನಲ್ಲಿ ಹಣದುಬ್ಬರ ಏರಿಕೆಗೆ ಪ್ರಮುಖವಾಗಿ ಕಾರಣವಾಗಿರುವುದು ಗ್ಯಾಸೋಲಿನ್ (Gasoline or Petrol) ಬೆಲೆ ಏರಿಕೆ. ಗ್ಯಾಸೋಲಿನ್ ಎಂಬುದು ಅಮೆರಿಕದಲ್ಲಿ ಪೆಟ್ರೋಲ್​ಗೆ ಬಳಸುವ ಪದ. ಆಗಸ್ಟ್ ತಿಂಗಳಲ್ಲಿ ಗ್ಯಾಸೋಲಿನ್ ಬೆಲೆ ಬರೋಬ್ಬರಿ ಶೇ. 10.6ರಷ್ಟು ಹೆಚ್ಚಾಗಿ ಹೋಗಿದೆ. ಇದು ಅಮೆರಿಕದಲ್ಲಿ ನಿರೀಕ್ಷೆಮೀರಿದ ಮಟ್ಟಕ್ಕೆ ಹಣದುಬ್ಬರ ಏರಿಕೆಗೆ ಎಡೆ ಮಾಡಿಕೊಟ್ಟಿದೆ.

ಗ್ಯಾಸೋಲಿನ್ ಬೆಲೆ ಮಾತ್ರವೇ ಅಮೆರಿಕ ಪಾಲಿಗೆ ವಿಲನ್ ಅಗಿರುವುದು. ಭಾರತದ ಹಣದುಬ್ಬರ ಎತ್ತರದಲ್ಲಿರಲು ಕಾರಣವಾಗಿರುವ ಆಹಾರವಸ್ತುಗಳ ಬೆಲೆ ಅಮೆರಿಕದಲ್ಲಿ ಅಷ್ಟೇನೂ ಕಾಡಿಲ್ಲ. ಅಲ್ಲಿ ಆಹಾರ ಬೆಲೆ ಕೇವಲ ಶೇ. 0.2 ಮಾತ್ರವೇ ಏರಿದೆ. ಇನ್ನು, ದಿನಸಿ ವಸ್ತುಗಳ ಬೆಲೆ ಏರಿಕೆಯೂ ಶೇ. 0.2 ಮಾತ್ರವೇ ಇದೆ. ಕಳೆದ ವರ್ಷ (2022ರ ಜೂನ್) ಅಮೆರಿಕದಲ್ಲಿ ಹಣದುಬ್ಬರ ಶೇ. 9ಕ್ಕಿಂತಲೂ ಹೆಚ್ಚಿನ ಮಟ್ಟದಲ್ಲಿತ್ತು. ಕಳೆದ ಒಂದು ವರ್ಷದಿಂದ ಅಲ್ಲಿನ ಹಣದುಬ್ಬರ ಪ್ರಮಾಣ ಸಾಕಷ್ಟು ಕಡಿಮೆ ಆಗಿದೆ.

ಇದನ್ನೂ ಓದಿ: ಆಹಾರವಸ್ತುಗಳ ಬೆಲೆ ಇಳಿಕೆಯ ಎಫೆಕ್ಟ್; ಭಾರತದ ರೀಟೇಲ್ ಹಣದುಬ್ಬರ ಆಗಸ್ಟ್​ನಲ್ಲಿ ಶೇ. 6.83ಕ್ಕೆ ಇಳಿಕೆ

ಅಮೆರಿಕದ ಹಣದುಬ್ಬರದ ಪರಿಣಾಮಗಳೇನು?

ಅಮೆರಿಕದಲ್ಲಿ ಶೀತವಾದರೆ ಬೇರೆ ದೇಶಗಳಿಗೆ ನೆಗಡಿ ಆಗುತ್ತದೆ ಎನ್ನುವ ಮಾತಿನಂತೆ, ವಿಶ್ವದ ದೊಡ್ಡಣ್ಣನ ಮನೆಯಲ್ಲಿ ನಡೆಯುವ ವಿದ್ಯಮಾನ ಬೇರೆ ದೇಶಗಳ ಮೇಲೆ ಪರಿಣಾಮ ಬೀರುವುದು ನಿಜ. ಈಗ ಅಮೆರಿಕದಲ್ಲಿ ಹಣದುಬ್ಬರ ಹೆಚ್ಚಾದರೆ ಬೇರೆ ಕಡೆ ಆಗುವ ಪರಿಣಾಮಗಳೇನು ಎಂಬ ಸಂಕ್ಷಿಪ್ತ ಮಾಹಿತಿ ಇಲ್ಲಿ ನೀಡಬಹುದು.

ಬಡ್ಡಿ ದರ ಇಳಿಮುಖ ಇಲ್ಲ

ಹಣದುಬ್ಬರ ಹೆಚ್ಚಿದ್ದರೆ ಬ್ಯಾಂಕ್​ನ ಬಡ್ಡಿದರ ಇಳಿಕೆಯಾಗುವ ಸಾಧ್ಯತೆ ಇಲ್ಲ. ಕೆಲವೊಮ್ಮೆ ಬಡ್ಡಿದರ ಹೆಚ್ಚು ಮಾಡಬಹುದು. ಸದ್ಯ ಅಮೆರಿಕ ಮುಂದಿನ ಕೆಲ ತಿಂಗಳು ಬಡ್ಡಿದರ ಹೆಚ್ಚಿಸುವ ಸಾಧ್ಯತೆ ಕಡಿಮೆಯಾದರೂ, ದರ ಇಳಿಸುವ ಸಾಧ್ಯತೆಯೂ ಇಲ್ಲ.

ಇದನ್ನೂ ಓದಿ: ಟೆಸ್ಲಾ ಸಂಸ್ಥೆಗೆ ಈ ವರ್ಷ ಭಾರತದಿಂದ 15,000 ಕೋಟಿ ರೂನಷ್ಟು ಮೌಲ್ಯದ ವಾಹನ ಬಿಡಿಭಾಗಗಳು ಸರಬರಾಜಾಗಲಿವೆ: ಸಚಿವ ಗೋಯಲ್

ಹೆಚ್ಚಿನ ಬ್ಯಾಂಕ್ ಬಡ್ಡಿದರದಿಂದಾಗಿ ಜನರು ಚಿನ್ನದ ಮೇಲೆ ಹೂಡಿಕೆ ಮಾಡುವುದಕ್ಕೆ ಹಿಂಜರಿಯಬಹುದು. ಇದರಿಂದ ಚಿನ್ನದ ಬೆಲೆ ಸಾಧಾರಣ ಮಟ್ಟದಲ್ಲಿ ಇರಬಹುದು. ಚಿನ್ನವನ್ನು ಖರೀದಿಸಲು ಬಯಸುವ ಭಾರತೀಯರಿಗೆ ಇದು ಶುಭ ಕಾಲ ಎನಿಸಬಹುದು.

ಇನ್ನಷ್ಟು ವಾಣಿಜ್ಯ ಸುದ್ದಿಗಳಿಗೆ ಇಲ್ಲಿ ಕ್ಲಿಕ್ ಮಾಡಿ