Bigg Boss Kannada: ‘ದಿವ್ಯಾ ಜೊತೆ ಮದುವೆ ಆಗೋಕೆ ನಮ್ಮ ಮನೆಯಲ್ಲಿ ಒಪ್ಪಿಗೆ ಸಿಗತ್ತೆ’; ಎಲ್ಲವನ್ನೂ ಒಪ್ಪಿಕೊಂಡ ಅರವಿಂದ್​!

ಬಿಗ್​ ಬಾಸ್​ ಕನ್ನಡ ಸೀಸನ್​ 8ರಲ್ಲಿ ಅರವಿಂದ್​ ಕೆ.ಪಿ. ಮತ್ತು ದಿವ್ಯಾ ಉರುಡುಗ ನಡುವೆ ಪ್ರೀತಿ ಚಿಗುರಿದೆ ಎಂಬುದು ಬಹುತೇಕರ ಅಭಿಪ್ರಾಯ. ಅವರಿಬ್ಬರ ಮಧ್ಯೆ ಇರುವ ಆಪ್ತತೆ ನೋಡಿದರೆ ಎಂಥವರಿಗೂ ಈ ಅನುಮಾನ ಮೂಡುವುದು ಸಹಜ. ಅಷ್ಟೇ ಅಲ್ಲದೇ, ನಟಿ ಶುಭಾ ಪೂಂಜಾ ಅವರಂತೂ ಈ ವಿಚಾರವನ್ನು ಬಿಗ್​ ಬಾಸ್​ ಮನೆಯಲ್ಲಿ ಪದೇ ಪದೇ ಪ್ರಸ್ತಾಪ ಮಾಡುತ್ತಿದ್ದಾರೆ. ಅದಕ್ಕೆ ಅರವಿಂದ್​ ಕೂಡ ಹೂಂ ಎಂಬಂತೆ ತಲೆ ಅಲ್ಲಾಡಿಸಿದ್ದಾರೆ.

ದಿವ್ಯಾ-ಅರವಿಂದ್​ಗೆ ಮದುವೆ ಮಾಡಿಸುವ ಬಗ್ಗೆ ಶುಭಾ ಆಸಕ್ತಿ ತೋರಿಸಿದ್ದಾರೆ. ‘ಈ ಮದುವೆಗೆ ನಿಮ್ಮ ಮನೆಯಲ್ಲಿ ಒಪ್ಪುತ್ತಾರಾ ಎಂದು ನಾನು ಅವಳಿಗೆ ಕೇಳಿದೆ. ಅವಳಿಗೆ ಇಷ್ಟ ಆದ್ರೆ ಮನೆಯವರು ಒಪ್ಪುತ್ತಾರಂತೆ. ಹಾಗಾದರೆ ಅರವಿಂದ್​ಗೂ ಕೇಳು ಅಂತ ಹೇಳಿದ್ದೇನೆ. ಅದಕ್ಕೂ ಒಂದು ಟೈಮ್​ ಬರತ್ತೆ ಎಂದು ದಿವ್ಯಾ ಹೇಳಿದಾಳೆ’ ಎಂದು ಅರವಿಂದ್​ ಬಳಿ ಶುಭಾ ಪೂಂಜಾ ಶಂಕ ಊದಿದ್ದಾರೆ. ಆ ಮಾತಿಗೆ ಅರವಿಂದ್​ ವಿರೋಧ ವ್ಯಕ್ತಪಡಿಸಿಲ್ಲ!

‘ನಿಮ್ಮಿಬ್ಬರಿಗೂ ನಾನು ಸಲಹೆ ನೀಡುವುದು ಏನೆಂದರೆ, ಬಿಗ್​ ಬಾಸ್​ ಮನೆಯೊಳಗೆ ನೀವು ಪರಸ್ಪರ ಇಷ್ಟಪಟ್ಟಿದ್ದರೂ ಸಹ, ಹೊರಗಡೆ ಹೋದ ಬಳಿಕ 4 ತಿಂಗಳು ಒಟ್ಟಿಗೆ ಕಳೆಯಿರಿ. ಯಾಕೆಂದರೆ ಇಲ್ಲಿ ವಾತಾವರಣ ಬೇರೆ ಇರುತ್ತದೆ. ದಿವ್ಯಾ ನಿನಗೆ ನಿಜಕ್ಕೂ ಇಷ್ಟ ಆಗಿದ್ದರೆ ನಿಮ್ಮ ಮನೆಯಲ್ಲಿ ಒಪ್ಪುತ್ತಾರಾ?’ ಎಂದು ಅರವಿಂದ್​ಗೆ ಶುಭಾ ಕೇಳಿದ್ದಾರೆ. ಅದಕ್ಕೆ ಉತ್ತರಿಸಿದ ಅರವಿಂದ್​, ‘ಖಂಡಿತಾ ಒಪ್ಪಿಕೊಳ್ಳುತ್ತಾರೆ. ಅಂತಿಮವಾಗಿ ನಮಗೆ ಇಷ್ಟ ಆಗಿದೆ ಎಂಬುದು ಮುಖ್ಯವಾಗುತ್ತದೆ’ ಎಂದಿದ್ದಾರೆ.

ದಿವ್ಯಾ ಮತ್ತು ಅರವಿಂದ್​ ತಂದೆ-ತಾಯಿ ಈ ಎಪಿಸೋಡ್​ಗಳನ್ನು ನೋಡುತ್ತಿದ್ದಾರೆ. ಅವರ ತಲೆಯಲ್ಲಿ ಏನು ಓಡುತ್ತಿದೆಯೋ ಗೊತ್ತಿಲ್ಲ. ಸದ್ಯ ಬಿಗ್​ ಬಾಸ್​ ಮನೆಯಲ್ಲಿ ನಡೆಯುತ್ತಿರುವ ಘಟನೆಗಳಿಂದ ದಿವ್ಯಾ ಇಮೇಜ್​ಗೆ ಏನಾದರೂ ತೊಂದರೆ ಆಗಬಹುದಾ ಎಂಬುದನ್ನೂ ಅರವಿಂದ್​ ಆಲೋಚಿಸಿದ್ದಾರೆ. ‘ನಾನು ಈ ಶೋ ಮುಗಿದ ಬಳಿಕ ಎಲ್ಲೋ ಇರುವವನು. ಆದರೆ, ಅವಳು ಸಿನಿಮಾ ಇಂಡಸ್ಟ್ರಿಯಲ್ಲಿ ಇರುವವಳು. ಅವಳಿಗೆ ಆಗಾಗ ಇದರ ಬಗ್ಗೆ ಪ್ರಶ್ನೆ ಎದುರಾಗುತ್ತದೆ’ ಎಂದು ಅರವಿಂದ್​ ಹೇಳಿದ್ದಾರೆ.

ಬಿಗ್​ ಬಾಸ್​ 8ನೇ ಸೀಸನ್​ ಆರಂಭವಾಗಿ ನಾಲ್ಕನೇ ವಾರಕ್ಕೆ ಕಾಲಿಟ್ಟಿದೆ. ಇಷ್ಟು ಕಡಿಮೆ ಅವಧಿಯಲ್ಲಿ ಇಬ್ಬರ ನಡುವೆ ಮೂಡಿದ ಆಪ್ತತೆಗೆ ಪ್ರೀತಿ ಎಂದು ಕರೆಯುವುದು ಸರಿಯೋ ತಪ್ಪೋ ಎಂಬ ಬಗ್ಗೆ ಅರವಿಂದ್​ಗೆ ಸ್ವಲ್ಪ ಗೊಂದಲ ಇದೆ. ‘ಬಿಗ್​ ಬಾಸ್​ ಮನೆಯಲ್ಲಿ ಇರುವವರಲ್ಲಿ ದಿವ್ಯಾ ನನಗೆ ಹೆಚ್ಚು ಇಷ್ಟ. ಕ್ಯೂಟ್​ ಆಗಿದ್ದಾಳೆ. 25 ದಿನದಲ್ಲಿ ಏನು ಅಂತ ನಿರ್ಧಾರ ಮಾಡೋಕೆ ಆಗಲ್ಲ. ಮುಂದೆ ಏನೋ ಗೊತ್ತಿಲ್ಲ’ ಎಂದು ಅರವಿಂದ್​ ಹೇಳಿದ್ದಾರೆ.

ಇದನ್ನೂ ಓದಿ: ದಿವ್ಯಾ ಸುರೇಶ್​ಗೇಕೆ ಇಷ್ಟೊಂದು ಹೊಟ್ಟೆ ಉರಿ? ದಿವ್ಯಾ ಉರುಡುಗ-ಅರವಿಂದ್ ಪ್ರೀತಿಗೆ ಇವರೇ ವಿಲನ್​!