ಒಟಿಟಿಗೆ ಬಂದ್ಮೇಲೂ ಚಿತ್ರಮಂದಿರದಲ್ಲಿ ಕೋಟಿ ರೂಪಾಯಿ ಕಲೆಕ್ಷನ್​; ಇದು ‘12th ಫೇಲ್​’ ತಾಕತ್ತು

ಜನಸಾಮಾನ್ಯರು ಮಾತ್ರವಲ್ಲದೇ ಅನೇಕ ಸೆಲೆಬ್ರಿಟಿಗಳು ಕೂಡ ‘12th ಫೇಲ್​’ ಸಿನಿಮಾ (12th Fail Movie) ಬಗ್ಗೆ ಮೆಚ್ಚುಗೆ ಸೂಚಿಸಿದ್ದಾರೆ. ಈ ಸಿನಿಮಾದಲ್ಲಿ ನೈಜ ಘಟನೆ ಆಧಾರಿತ ಕಥೆ ಇದೆ. ಬಡವರ ಕುಟುಂಬದಲ್ಲಿ ಹುಟ್ಟಿದ, ಗ್ರಾಮೀಣ ಪ್ರದೇಶದ ಯುವಕನೊಬ್ಬ ಕಷ್ಟಪಟ್ಟು ಐಪಿಎಸ್​ ಅಧಿಕಾರಿ ಆಗುವ ಕಥೆಯನ್ನು ಈ ಸಿನಿಮಾ ಹೊಂದಿದೆ. ಚಿತ್ರಮಂದಿರದಲ್ಲಿ 50 ಕೋಟಿ ರೂಪಾಯಿಗೂ ಹೆಚ್ಚು ಕಲೆಕ್ಷನ್​ (12th Fail Collection) ಮಾಡಿದ ಈ ಸಿನಿಮಾ ಈಗಾಗಲೇ ಒಟಿಟಿಗೆ ಬಂದಿದೆ. ಹಾಗಿದ್ದರೂ ಕೂಡ ಚಿತ್ರಮಂದಿರದಲ್ಲಿ ಈ ಚಿತ್ರದ ಕಲೆಕ್ಷನ್​ ನಿಂತಿಲ್ಲ ಎಂಬುದು ವಿಶೇಷ. ‘12th ಫೇಲ್​’ ಚಿತ್ರದಲ್ಲಿ ವಿಕ್ರಾಂತ್​ ಮಾಸ್ಸಿ (Vikrant Massey) ಮುಖ್ಯ ಭೂಮಿಕೆ ನಿಭಾಯಿಸಿದ್ದಾರೆ.

ಚಿತ್ರಮಂದಿರದಲ್ಲಿ ಹವಾ ಕಡಿಮೆ ಆದ ಬಳಿಕ ಸಿನಿಮಾಗಳು ಒಟಿಟಿಗೆ ಬರುತ್ತವೆ. ಆದರೆ ಕೆಲವು ಚಿತ್ರಗಳು ಥಿಯೇಟರ್​ನಲ್ಲಿ ಇರುವಾಗಲೇ ಒಟಿಟಿಗೆ ಕಾಲಿಡುತ್ತವೆ. ಸಾಮಾನ್ಯವಾಗಿ ಒಟಿಟಿಗೆ ಬಂದ ಬಳಿಕ ಆ ಸಿನಿಮಾವನ್ನು ಯಾರೂ ಸಹ ಮತ್ತೆ ಚಿತ್ರಮಂದಿರದಲ್ಲಿ ನೋಡುವುದಿಲ್ಲ. ಆದರೆ ‘12th ಫೇಲ್​’ ಚಿತ್ರದ ವಿಚಾರದಲ್ಲಿ ಇದು ಸುಳ್ಳಾಗಿದೆ. ‘ಡಿಸ್ನಿ ಪ್ಲಸ್​ ಹಾಟ್​ ಸ್ಟಾರ್​’ ಒಟಿಟಿಯಲ್ಲಿ ರಿಲೀಸ್​ ಆದ ನಂತರ ಕೂಡ ಚಿತ್ರಮಂದಿರಗಳಲ್ಲಿ ಜನರು ಈ ಸಿನಿಮಾ ನೋಡಿ ಎಂಜಾಯ್​ ಮಾಡುತ್ತಿದ್ದಾರೆ.

ಖ್ಯಾತ ನಿರ್ದೇಶಕ ವಿಧು ವಿನೋದ್​ ಚೋಪ್ರಾ ಅವರು ‘12th ಫೇಲ್​’ ಸಿನಿಮಾಗೆ ಆ್ಯಕ್ಷನ್​-ಕಟ್​ ಹೇಳಿದ್ದಾರೆ. ವಿಕ್ರಾಂತ್​ ಮಾಸ್ಸಿ ಅವರಿಗೆ ಜೋಡಿಯಾಗಿ ಮೇಧಾ ಶಂಕರ್​ ನಟಿಸಿದ್ದಾರೆ. ಇವರಿಬ್ಬರ ನಟನೆಗೆ ಪ್ರೇಕ್ಷಕರು ಭೇಷ್​ ಎಂದಿದ್ದಾರೆ. ಒಟಿಟಿಯಲ್ಲಿ ತೆರೆಕಂಡ ನಂತರ ಈ ಸಿನಿಮಾಗೆ ಬಾಕ್ಸ್ ಆಫೀಸ್​ನಲ್ಲಿ ಅಂದಾಜು ಒಂದೂವರೆ ಕೋಟಿ ರೂಪಾಯಿ ಕಮಾಯಿ ಆಗಿದೆ. ಚಿತ್ರದ ಒಟ್ಟು ಕಲೆಕ್ಷನ್​ 54.18 ಕೋಟಿ ರೂಪಾಯಿ ಆಗಿದೆ.

ಇದನ್ನೂ ಓದಿ: 12 Fail Movie: ಆಸ್ಕರ್​ ಪ್ರಶಸ್ತಿ ರೇಸ್​ನಲ್ಲಿ ‘12th ಫೇಲ್​’ ಸಿನಿಮಾ; ಕನ್ನಡದಲ್ಲೂ ಬಿಡುಗಡೆ ಆದ ಈ ಚಿತ್ರದ ವಿಶೇಷತೆ ಏನು?

ಒಟಿಟಿಯಲ್ಲಿ ‘12th ಫೇಲ್​’ ಸಿನಿಮಾ ನೋಡಿದ ಅನೇಕರು ಪ್ರಶಂಸೆ ವ್ಯಕ್ತಪಡಿಸಿದ್ದಾರೆ. ಇತ್ತೀಚೆಗೆ ನಟ ಹೃತಿಕ್​ ರೋಷನ್​ ಅವರು ಈ ಚಿತ್ರದ ಬಗ್ಗೆ ಪೋಸ್ಟ್​ ಮಾಡಿದ್ದರು. ಈ ಸಿನಿಮಾದಲ್ಲಿನ ಎಲ್ಲರ ನಟನೆ ಅವರಿಗೆ ಇಷ್ಟ ಆಗಿದೆ. ಸೌಂಡ್​ ಬಗ್ಗೆ ವಿಶೇಷವಾಗಿ ಅವರು ಮೆಚ್ಚುಗೆ ಸೂಚಿಸಿದ್ದಾರೆ. ಮೇಕಿಂಗ್​ ವಿಚಾರದಲ್ಲಿ ಇದೊಂದು ಮಾಸ್ಟರ್​ ಕ್ಲಾಸ್​ ಸಿನಿಮಾ ಎಂದು ಅವರು ಹೊಗಳಿದ್ದಾರೆ. ಕತ್ರಿನಾ ಕೈಫ್​, ಅನುರಾಗ್​ ಕಶ್ಯಪ್​, ಜಾನ್ವಿ ಕಪೂರ್​, ಕಂಗನಾ ರಣಾವತ್​ ಮುಂತಾದವರಿಗೂ ಈ ಸಿನಿಮಾ ಇಷ್ಟ ಆಗಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ