ಪಹಲ್ಗಾಮ್ ಘಟನೆ ಬಗ್ಗೆ ಅಕ್ಷಯ್ ಕುಮಾರ್ ಮಾತಾಡುವಾಗ ಅಶ್ಲೀಲ ಪದ ಬಳಸಿದ ಪ್ರೇಕ್ಷಕರು; ವಿಡಿಯೋ ವೈರಲ್

ನಟ ಅಕ್ಷಯ್ ಕುಮಾರ್ (Akshay Kumar) ಅವರು ಅನೇಕ ದೇಶಭಕ್ತಿ ಸಿನಿಮಾಗಳನ್ನು ಮಾಡಿದ್ದಾರೆ. ಇತ್ತೀಚೆಗೆ ಬಿಡುಗಡೆ ಆಗಿರುವ ‘ಕೇಸರಿ: ಚಾಪ್ಟರ್ 2’ (Kesari: Chapter 2) ಸಿನಿಮಾದಲ್ಲಿ ಕೂಡ ಅಂಥದ್ದೇ ಕಥೆ ಇದೆ. ಜಲಿಯನ್​ವಾಲಾ ಬಾಗ್ ಹತ್ಯಾಕಾಂಡದ ಬಗ್ಗೆ ಈ ಸಿನಿಮಾ ಮಾಡಲಾಗಿದೆ. ಬೇಸರದ ಸಂಗತಿ ಏನೆಂದರೆ, ಈ ಸಿನಿಮಾ ಬಿಡುಗಡೆಯಾದ ಸಂದರ್ಭದಲ್ಲೇ ಪಹಲ್ಗಾಮ್ (Pahalgam) ಹತ್ಯಾಕಾಂಡ ನಡೆದಿದೆ. ಇತ್ತೀಚೆಗೆ ಅಕ್ಷಯ್​ ಕುಮಾರ್ ಅವರು ಪ್ರೇಕ್ಷಕರ ಜೊತೆ ಮಾತನಾಡುವಾಗ ಪಹಲ್ಗಾಮ್ ಉಗ್ರರ ದಾಳಿ ಬಗ್ಗೆ ಪ್ರಸ್ತಾಪ ಮಾಡಿದರು. ಆಗ ಪ್ರೇಕ್ಷಕರು ಅಶ್ಲೀಲ ಪದ (F*** you) ಬಳಕೆ ಮಾಡಿದರು. ಆ ಸಂದರ್ಭದ ವಿಡಿಯೋ ಸಖತ್ ವೈರಲ್ ಆಗುತ್ತಿದೆ.

‘ಕೇಸರಿ: ಚಾಪ್ಟರ್ 2’ ಸಿನಿಮಾದಲ್ಲಿ ಅಕ್ಷಯ್ ಕುಮಾರ್, ಆರ್, ಮಾಧವನ್, ಅನನ್ಯಾ ಪಾಂಡೆ ಮುಂತಾದವರು ನಟಿಸಿದ್ದಾರೆ. ಹಲವು ಕಡೆಗಳಲ್ಲಿ ಈ ಸಿನಿಮಾ ಪ್ರದರ್ಶನ ಕಾಣುತ್ತಿದೆ. ಆ ಪೈಕಿ ಕೆಲವು ಚಿತ್ರಮಂದಿರಗಳಿಗೆ ಈ ಕಲಾವಿದರು ಭೇಟಿ ನೀಡುತ್ತಿದ್ದಾರೆ. ಅಕ್ಷಯ್ ಕುಮಾರ್​ ಮತ್ತು ಆರ್. ಮಾಧವನ್ ಅವರು ಚಿತ್ರಮಂದಿರವೊಂದಕ್ಕೆ ತೆರಳಿ ಮಾತನಾಡುವಾಗ ಈ ಘಟನೆ ನಡೆದಿದೆ. ಹಾಗಂತ ಪ್ರೇಕ್ಷಕರು ಅಕ್ಷಯ್​ ಕುಮಾರ್​ಗೆ ವಿರುದ್ಧವಾಗಿ ಇಂಥ ಪದ ಬಳಕೆ ಮಾಡಿಲ್ಲ.

ಅಕ್ಷಯ್ ಕುಮಾರ್ ಅವರು ಇದೇ ಮೊದಲ ಬಾರಿಗೆ ತೆರೆಮೇಲೆ ‘F*** you’ ಎಂಬ ಪದ ಬಳಕೆ ಮಾಡಿದ್ದಾರೆ. ಬ್ರಿಟಿಷ್ ಅಧಿಕಾರಿಗೆ ಬೈಯ್ಯುವ ದೃಶ್ಯದಲ್ಲಿ ಈ ಸಂಭಾಷಣೆ ಇದೆ. ಅದನ್ನೇ ಉಲ್ಲೇಖಿಸಿ ಅವರು ಈಗ ಪಹಲ್ಗಾಮ್ ಉಗ್ರರ ದಾಳಿಯನ್ನು ಕೂಡ ಖಂಡಿಸಿದ್ದಾರೆ.

‘ಅಂಥವರ ಬಗ್ಗೆ ನಮಗೆಲ್ಲ ಕೋಪ ಇದೆ. ಈಗ ಆ ಸಿಟ್ಟು ಮತ್ತೆ ಎಚ್ಚರಗೊಂಡಿದೆ. ನಾನು ಯಾರ ಬಗ್ಗೆ ಮಾತನಾಡುತ್ತಿದ್ದೇನೆ ಎಂಬುದು ನಿಮಗೆಲ್ಲ ಚೆನ್ನಾಗಿ ಗೊತ್ತು. ಇಂದು ನಾನು ಆ ಭಯೋತ್ಪಾದಕರಿಗೆ ಒಂದೇ ಮಾತು ಹೇಳಲು ಬಯಸುತ್ತೇನೆ. ಸಿನಿಮಾದಲ್ಲೂ ಅದನ್ನು ಹೇಳಿದ್ದೇನೆ. ಅದೇನು?’ ಎಂದು ಪ್ರಶ್ನಿಸುತ್ತ ಅಕ್ಷಯ್ ಕುಮಾರ್​ ಅವರು ಪ್ರೇಕ್ಷಕರ ಕಡೆಗೆ ಮೈಕ್ ಹಿಡಿದರು. ಆಗ ಚಿತ್ರಮಂದಿರದಲ್ಲಿ ಇದ್ದ ಪ್ರೇಕ್ಷಕರೆಲ್ಲರೂ ‘F*** you’ ಎಂದು ಜೋರಾಗಿ ಕೂಗಿದರು.

ಇದನ್ನೂ ಓದಿ: ‘ಕರೀನಾ ಕಪೂರ್ ಸಹವಾಸ ಮಾಡಬೇಡ’: ಸೈಫ್​ಗೆ ಎಚ್ಚರಿಕೆ ನೀಡಿದ್ದ ಅಕ್ಷಯ್ ಕುಮಾರ್

ಅಂದಹಾಗೆ, ‘ಕೇಸರಿ 2’ ಸಿನಿಮಾದಲ್ಲಿ ಇಂಥ ಪದ ಬಳಕೆ ಮಾಡಿದ್ದರ ಬಗ್ಗೆ ಅಕ್ಷಯ್ ಕುಮಾರ್ ಅವರು ಈ ಮೊದಲು ಸಮರ್ಥನೆ ನೀಡಿದ್ದರು. ‘ಹೌದು, ನಾನು ಆ ಪದ ಬಳಸಿದ್ದೇನೆ. ಆದರೆ ಅದೇ ದೃಶ್ಯದಲ್ಲಿ ಬ್ರಿಟಿಷ್ ಅಧಿಕಾರಿ ನಮ್ಮನ್ನು ಗುಲಾಮ ಅಂತ ಕರೆದಿದ್ದು ತಪ್ಪು ಅಂತ ನಿಮಗೆ ಅನಿಸುತ್ತಿಲ್ಲವೇ? ನನ್ನ ಪ್ರಕಾರ ಅದಕ್ಕಿಂತ ಕೆಟ್ಟ ಪದ ಬೇರೊಂದಿಲ್ಲ’ ಎಂದು ಅಕ್ಷಯ್ ಕುಮಾರ್ ಅವರು ಹೇಳಿದ್ದರು.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.