ಅಕ್ಷಯ್​​ ಕುಮಾರ್ ನಟನೆಯ ‘ಬಚ್ಚನ್​ ಪಾಂಡೆ’ಯಲ್ಲಿ ‘ಕೆಜಿಎಫ್​’ ಚಿತ್ರದ ಬಗ್ಗೆ ಉಲ್ಲೇಖ; ಇಲ್ಲಿದೆ ವಿಡಿಯೋ

‘ಕೆಜಿಎಫ್​’ ಚಿತ್ರ (KGF Movie) ಭಾರತೀಯ ಚಿತ್ರರಂಗದಲ್ಲಿ ಮಾಡಿದ ಹವಾ ಅಷ್ಟಿಷ್ಟಲ್ಲ. ಈ ಸಿನಿಮಾದಿಂದ ಯಶ್​ (Yash) ಹಾಗೂ ನಿರ್ದೇಶಕ ಪ್ರಶಾಂತ್​ ನೀಲ್​ ಅವರ ಖ್ಯಾತಿ ಹೆಚ್ಚಾಗಿದೆ. ಏಪ್ರಿಲ್​ನಲ್ಲಿ ತೆರೆಗೆ ಬರುತ್ತಿರುವ ‘ಕೆಜಿಎಫ್​ 2’ ಚಿತ್ರದ ಬಗ್ಗೆ ದೊಡ್ಡಮಟ್ಟದ ನಿರೀಕ್ಷೆ ಹುಟ್ಟಿಕೊಂಡಿದೆ. ಹಲವು ಚಿತ್ರಗಳಲ್ಲಿ ‘ಕೆಜಿಎಫ್​’ ಸಿನಿಮಾದ ಬಗ್ಗೆ ಉಲ್ಲೇಖ ಮಾಡಲಾಗುತ್ತಿದೆ. ಏಪ್ರಿಲ್​ನಲ್ಲಿ ತೆರೆಗೆ ಬರುತ್ತಿರುವ ‘ಕೆಜಿಎಫ್​ 2’ ಬಗ್ಗೆ ಬಾಲಿವುಡ್​ ಅಂಗಳದಲ್ಲೂ ದೊಡ್ಡ ಮಟ್ಟದ ಚರ್ಚೆ ಆಗುತ್ತಿದೆ. ಅಚ್ಚರಿ ಎಂದರೆ, ಅಕ್ಷಯ್ ಕುಮಾರ್ (Akshay Kumar) ನಟನೆಯ ‘ಬಚ್ಚನ್​ ಪಾಂಡೆ’ ಸಿನಿಮಾದಲ್ಲಿ ‘ಕೆಜಿಎಫ್​’ ಚಿತ್ರವನ್ನು ಮಾದರಿಯಾಗಿ ತೆಗೆದುಕೊಳ್ಳಲಾಗಿದೆ. ಈ ಬಗ್ಗೆ ವಿಡಿಯೋ ಒಂದು ಸಖತ್ ವೈರಲ್ ಆಗುತ್ತಿದೆ.

ಸಾಲುಸಾಲು ಚಿತ್ರಗಳನ್ನು ಒಪ್ಪಿಕೊಂಡರೂ ಅಕ್ಷಯ್ ಪಾತ್ರಗಳ ಆಯ್ಕೆಯಲ್ಲಿ ಭಿನ್ನತೆಯನ್ನು ಕಾಯ್ದುಕೊಳ್ಳುತ್ತಾರೆ. ಒಂದು ಚಿತ್ರದಿಂದ ಮತ್ತೊಂದು ಚಿತ್ರಕ್ಕೆ ಭಿನ್ನ ಗೆಟಪ್​ನಲ್ಲಿ ಮಿಂಚುತ್ತಾರೆ. ಈಗ ಅವರ ನಟನೆಯ ‘ಬಚ್ಚನ್ ಪಾಂಡೆ’ ಸಿನಿಮಾ ತೆರೆಗೆ ಬಂದಿದೆ. ಅಕ್ಷಯ್ ಕುಮಾರ್, ಕೃತಿ ಸನೋನ್, ಜಾಕ್ವೆಲಿನ್ ಫರ್ನಾಂಡೀಸ್ ಮೊದಲಾದವರು ಈ ಸಿನಿಮಾದಲ್ಲಿ ನಟಿಸಿದ್ದಾರೆ. ತಮಿಳಿನ ‘ಜಿಗರ್​​ಥಂಡ’ ಚಿತ್ರದ ರಿಮೇಕ್​ ಇದಾಗಿದೆ. ‘ಜಿಗರ್​​ಥಂಡ’ ಕನ್ನಡಕ್ಕೂ ರಿಮೇಕ್​ ಆಗಿ ರಿಲೀಸ್ ಆಗಿತ್ತು. ಹಾಗಾದರೆ ‘ಬಚ್ಚನ್​ ಪಾಂಡೆ’ ಸಿನಿಮಾದಲ್ಲಿ ‘ಕೆಜಿಎಫ್​’ ಚಿತ್ರವನ್ನು ಉಲ್ಲೇಖ ಮಾಡಿದ್ದು ಏಕೆ? ಆ ಪ್ರಶ್ನೆಗೆ ಇಲ್ಲಿದೆ ಉತ್ತರ.

‘ಬಚ್ಚನ್​ ಪಾಂಡೆ’ ಸಿನಿಮಾದ ಕಥೆ ಹೀಗಿದೆ. ಬಚ್ಚನ್​ ಪಾಂಡೆ ಹೆಸರಿನ ವಿಲನ್ ಬಗ್ಗೆ ಸಿನಿಮಾ ಮಾಡೋಕೆ ಯುವ ನಿರ್ದೇಶಕನೋರ್ವ ನಿರ್ಧರಿಸುತ್ತಾನೆ. ಬಚ್ಚನ್​ ಪಾಂಡೆಯದ್ದು ದೊಡ್ಡ ಹೆಸರು. ಈ ಚಿತ್ರಕ್ಕೆ ನಾನೇ ಹೀರೋ ಆಗುತ್ತೇನೆ ಎಂದು ಹಠ ಬೀಳುತ್ತಾನೆ ವಿಲನ್​. ನಿರ್ದೇಶಕ ಇದಕ್ಕೆ ಅನಿವಾರ್ಯವಾಗಿ ಒಪ್ಪ ಬೇಕಾಗುತ್ತದೆ. ಹೀಗೆ ವಿಲನ್ ಕುರಿತು ತೆಗೆದ ಸಿನಿಮಾಗೆ ನಿರ್ದೇಶಕ ‘ಬಿ.ಪಿ.’ ಎಂದು ಶೀರ್ಷಿಕೆ ಇಟ್ಟಿರುತ್ತಾನೆ. ಈ ಬಿ.ಪಿ. ಎಂದರೇನು ಎನ್ನುವ ಬಗ್ಗೆ ಚರ್ಚೆ ಬರುತ್ತದೆ. ಅಷ್ಟೇ ಅಲ್ಲ, ಈ ಸಿನಿಮಾಗೆ ಶಾರ್ಟ್​ಫಾರ್ಮ್​ನಲ್ಲಿ ಟೈಟಲ್​​ ಇಟ್ಟಿದ್ದೇಕೆ ಎನ್ನುವ ಪ್ರಶ್ನೆಯೂ ಎದುರಾಗುತ್ತದೆ. ಆಗ, ಕೆಜಿಎಫ್​’ ಬಗ್ಗೆ ಉಲ್ಲೇಖ ಮಾಡಲಾಗಿದೆ.

See this is what I found yesterday while watching #bachanpanday The craze of #KGF2 if there is name of KGF Behind your Movie it will be blockbuster #KGFChapter2 pic.twitter.com/JwiH5tKQXm

— Movie Holic (@MOVIEHOLIC149) March 19, 2022

ಈ ಸಿನಿಮಾದಲ್ಲಿ ಬರುವ ಸಂಭಾಷಣೆ ಹೀಗಿದೆ. ‘ನಿರ್ದೇಶಕರು ಈ ಸಿನಿಮಾಗೆ ಬಿ.ಪಿ. ಎಂದು ಯಾಕೆ ಇಟ್ಟಿದ್ದಾರೆ? ಬಚ್ಚನ್ ಪಾಂಡೆ ಎಂದು ನೇರವಾಗೇ ಇಡಬಹುದಿತ್ತಲ್ಲ’ ಎಂದು ಬಚ್ಚನ್ ಪಾಂಡೆಯ ಸಹಾಯಕ ಓರ್ವ ಕೇಳುತ್ತಾನೆ. ‘ಕೋಲಾರ್​ ಗೋಲ್ಡ್​ ಫೀಲ್ಡ್​ ಚಿತ್ರವನ್ನು ಕೆಜಿಎಫ್​ ಎಂದು ಶಾರ್ಟ್​ ಆಗಿ ಕರೆಯುತ್ತಾರಲ್ಲ, ಅದೇ ರೀತಿ ಬಚ್ಚನ್ ಪಾಂಡೆಗೆ ಬಿಪಿ ಎಂದು ಕರೆಯಲಾಗುತ್ತದೆ’ ಎನ್ನುತ್ತಾನೆ ಮತ್ತೊಬ್ಬ. ಈ ವೇಳೆ ಅಲ್ಲಿದ್ದವರು ‘ಹಾಗಿದ್ದರೆ ಬಿ.ಪಿ. ಕೇವಲ ಹಿಟ್ ಅಲ್ಲ ಸೂಪರ್ ಹಿಟ್​’ ಎಂದು ಸಂಭ್ರಮಿಸುತ್ತಾರೆ. ಸದ್ಯ, ಈ ವಿಡಿಯೋ ಸಖತ್​ ವೈರಲ್ ಆಗುತ್ತಿದೆ. ಇತ್ತೀಚೆಗೆ ರಿಲೀಸ್​ ಆದ ‘ಮಿಷನ್​ ಇಂಪಾಸಿಬಲ್​’ ಟ್ರೇಲರ್​ನಲ್ಲೂ ‘ಕೆಜಿಎಫ್​’ ಸಿನಿಮಾ ಬಗ್ಗೆ ಉಲ್ಲೇಖ ಮಾಡಲಾಗಿತ್ತು.

ಇದನ್ನೂ ಓದಿ: KGF Chapter 2: ಯಶ್​ ನಟನೆಯ ‘ಕೆಜಿಎಫ್​ 2’ ತಂಡದಿಂದ ಸರ್​ಪ್ರೈಸ್​; ಪವರ್​ಫುಲ್​ ಪೋಸ್ಟರ್​ ರಿಲೀಸ್​

ಮಾ.21ಕ್ಕೆ ಬರಲಿದೆ ದೊಡ್ಡ ‘ತೂಫಾನ್​..’; ಮೊದಲೇ ಸೂಚನೆ ನೀಡಿದ ‘ಕೆಜಿಎಫ್​: ಚಾಪ್ಟರ್​ 2’ ಟೀಮ್​