ಸೂಪರ್​ಸ್ಟಾರ್ ಆದರೂ ಪತ್ನಿಯಿಂದ ಹಣ ಪಡೆಯುತ್ತಾರೆ ಅಮಿತಾಭ್ ಬಚ್ಚನ್

ಜನಪ್ರಿಯ ರಿಯಾಲಿಟಿ ಶೋ ‘ಕೌನ್ ಬನೇಗಾ ಕರೋಡ್ಪತಿ’ ಶೋನಲ್ಲಿ ನಿರೂಪಕನಾಗಿ ಗಮನ ಸೆಳೆಯುತ್ತಿರುವ ಅಮಿತಾಭ್​ ಬಚ್ಚನ್ ಆಗಾಗ್ಗೆ ತಮ್ಮ ವೈಯಕ್ತಿಕ ಜೀವನದ ಕಥೆಗಳನ್ನು ಸ್ಪರ್ಧಿಗಳಿಗೆ ಹೇಳುತ್ತಾರೆ. ಇತ್ತೀಚಿನ ಸಂಚಿಕೆಯಲ್ಲಿ, ಅವರು ತಮ್ಮ ಪತ್ನಿ ಜಯಾ ಬಚ್ಚನ್ ಬಗ್ಗೆ ಕೆಲವು ಆಸಕ್ತಿದಾಯಕ ಸಂಗತಿಗಳನ್ನು ಹಂಚಿಕೊಂಡಿದ್ದಾರೆ. ‘ಕೆಬಿಸಿ’ ಪ್ರಸ್ತುತ ತನ್ನ ಹದಿನಾರನೇ ಸೀಸನ್‌ನಲ್ಲಿದೆ. ಈ ಶೋನಲ್ಲಿ ಹಾಟ್ ಸೀಟ್​ನಲ್ಲಿ ಕುಳಿತುಕೊಳ್ಳುವ ಸ್ಪರ್ಧಿಗಳು ಬಿಗ್ ಬಿ ಅವರಿಗೆ ಅವರ ಸಿನಿಮಾಗಳು ಮತ್ತು ವೈಯಕ್ತಿಕ ಜೀವನದ ಬಗ್ಗೆ ಹಲವು ಪ್ರಶ್ನೆಗಳನ್ನು ಕೇಳಿದ್ದಾರೆ. ಅವರು ಇದಕ್ಕೆ ಉತ್ಸಾಹದಿಂದ ಉತ್ತರಿಸಿದ್ದಾರೆ.

‘ನಾನು ಕಚೇರಿಯಿಂದ ಮನೆಗೆ ಹೋಗುವಾಗ, ಅಮ್ಮ ನನಗೆ ಕೊತ್ತಂಬರಿ ಸೊಪ್ಪು ತರಲು ಕೇಳುತ್ತಾರೆ. ನೀವೂ ಜಯ ಮಾಮ್ ಅವರಿಗೆ ಮಾರುಕಟ್ಟೆಯಿಂದ ಸೊಪ್ಪು ತರಲು ಕೇಳುತ್ತೀರಾ’ ಎಂದು ಪ್ರಶ್ನೆ ಮಾಡಿದರು ಸ್ಪರ್ಧಿ. ಈ ಪ್ರಶ್ನೆಗೆ ಉತ್ತರಿಸಿದ ಅಮಿತಾಬ್ ಬಚ್ಚನ್ ತಮಾಷೆಯಾಗಿ ಉತ್ತರಿಸಿದ್ದಾರೆ.

‘ಖಂಡಿತವಾಗಿ ಅವರು ನನಗೆ ಹೇಳುತ್ತಾರೆ. ಜಯ ಅವರಿಗೆ ಮಲ್ಲಿಗೆ ಎಂದರೆ ತುಂಬಾ ಇಷ್ಟ. ಚಿಕ್ಕ ಮಕ್ಕಳು ರಸ್ತೆಯಲ್ಲಿ ಮಲ್ಲಿಗೆ ಮಾರುತ್ತಿರುವಾಗ ನಾನು ಅದನ್ನು ಖರೀದಿಸಿ ಜಯಾಗೆ ತಂದು ಕೊಡುತ್ತೇನೆ. ಕೆಲವೊಮ್ಮೆ ನಾನು ಆ ಹೂವುಗಳನ್ನು ನನ್ನ ಕಾರಿನಲ್ಲಿ ಇಡುತ್ತೇನೆ. ಏಕೆಂದರೆ ಅವುಗಳು ತುಂಬಾ ಒಳ್ಳೆಯ ಪರಿಮಳ ಹೊಂದಿರುತ್ತವೆ’ ಎಂದರು ಅವರು.

ಇದನ್ನೂ ಓದಿ: ಅಮಿತಾಭ್​ ಬಚ್ಚನ್​ ಕಾಲಿಗೆ ನಮಸ್ಕರಿಸಲು ಬಂದ ರಜನಿಕಾಂತ್; ಬಿಗ್​ ಬಿ ಪ್ರತಿಕ್ರಿಯೆ ಏನು?

‘ನೀವು ಎಂದಾದರೂ ನಿಮ್ಮ ಬ್ಯಾಂಕ್ ಬ್ಯಾಲೆನ್ಸ್ ಪರಿಶೀಲಿಸಲು ಅಥವಾ ಹಣವನ್ನು ವಿತ್ ಡ್ರಾ ಮಾಡಲು ಎಟಿಎಂಗೆ ಹೋಗಿದ್ದೀರಾ’ ಎಂದು ಬಿಗ್ ಬಿ ಕೇಳಿದ್ದಾರೆ ಸ್ಪರ್ಧಿ. ಈ ಪ್ರಶ್ನೆಗೆ ಉತ್ತರಿಸಿದ ಬಿಗ್ ಬಿ, ‘ನಾನು ಎಂದಿಗೂ ನನ್ನೊಂದಿಗೆ ಹಣವನ್ನು ತೆಗೆದುಕೊಂಡು ಹೋಗುವುದಿಲ್ಲ ಮತ್ತು ನಾನು ಎಂದಿಗೂ ಎಟಿಎಂಗೆ ಹೋಗಿಲ್ಲ. ಏಕೆಂದರೆ ನಾನು ಅಲ್ಲಿಗೆ ಬಂದಾಗ ಏನು ಮಾಡಬೇಕೆಂದು ನನಗೆ ತಿಳಿದಿಲ್ಲ. ಆದರೆ ಜಯಾ ಬಚ್ಚನ್ ಬಳಿ ಯಾವಾಗಲೂ ನಗದು ಇರುತ್ತದೆ. ನಾನು ಅವರಿಂದ ಹಣವನ್ನು ಕೇಳುತ್ತೇನೆ’ ಎಂದರು ಅಮಿತಾಭ್.

ಅಮಿತಾಭ್ ಬಚ್ಚನ್ ಅವರ ಈ ಉತ್ತರ ಕೇಳಿ ಹಾಟ್ ಸೀಟ್ ಮೇಲೆ ಕುಳಿತಿದ್ದ ಸ್ಪರ್ಧಿ ಹಾಗೂ ಪ್ರೇಕ್ಷಕರು ಕೂಡ ಬೆಚ್ಚಿ ಬಿದ್ದಿದ್ದಾರೆ. ಅಮಿತಾಭ್ ಅವರ ‘ಕೌನ್ ಬನೇಗಾ ಕರೋಡ್ ಪತಿ’ ಶೋ ಬಹಳ ಜನಪ್ರಿಯವಾಗಿದೆ. ಕಳೆದ ಹಲವು ವರ್ಷಗಳಿಂದ ಬಿಗ್ ಬಿ ಈ ಕಾರ್ಯಕ್ರಮವನ್ನು ನಡೆಸಿಕೊಡುತ್ತಿದ್ದಾರೆ. ವೀಕ್ಷಕರು KBC ಸಂಚಿಕೆಗಳನ್ನು ಸೋನಿ ಟಿವಿಯಲ್ಲಿ ಮತ್ತು OTT ಪ್ಲಾಟ್‌ಫಾರ್ಮ್ ಸೋನಿ ಲೈವ್‌ನಲ್ಲಿ ವೀಕ್ಷಿಸಬಹುದು.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.