ಬಹುನಿರೀಕ್ಷಿತ ‘ರಾಮಾಯಣ’ ಚಿತ್ರದಲ್ಲಿ ಬಾಲ ನಟಿ ದಿಶಿತಾ ಸೆಹ್ಗಲ್ ನಟನೆ

ರಣಬೀರ್ ಕಪೂರ್ ಅಭಿನಯದ ಬಹುನಿರೀಕ್ಷಿತ ‘ರಾಮಾಯಣ’ ಸಿನಿಮಾ ತೆರೆಕಾಣಲು ಸಜ್ಜಾಗಿದೆ. ಭಾರತೀಯ ಚಿತ್ರರಂಗದಲ್ಲೇ ಅತ್ಯಂತ ವೆಚ್ಚದ ಹಾಗೂ ದುಬಾರಿ ಸಿನಿಮಾಗಳಲ್ಲಿ ಒಂದಾಗಿರುವ ಈ ಚಿತ್ರದ ಬಗ್ಗೆ ಪ್ರೇಕ್ಷಕರಲ್ಲಿ ಭಾರೀ ನಿರೀಕ್ಷೆಯಿದೆ. ಈಗಾಗಲೇ ಮುಂಗಡ ಟಿಕೆಟ್ ಬುಕಿಂಗ್‌ನಲ್ಲಿ ಹಲವು ದಾಖಲೆಗಳನ್ನು ಬರೆಯುತ್ತಿರುವ ಈ ಚಿತ್ರದಲ್ಲಿ ಯುವ ಶೂರ್ಪನಕಿಯ ಪಾತ್ರದಲ್ಲಿ ಯಾರು ಅಭಿನಯಿಸಲಿದ್ದಾರೆ ಎಂಬ ಕುತೂಹಲಕ್ಕೆ ಉತ್ತರ ಸಿಕ್ಕಿದೆ. ಮೂಲಗಳ ಪ್ರಕಾರ, ನಿರ್ದೇಶಕ ನಿತೀಶ್ ತಿವಾರಿ ಅವರ ‘ರಾಮಾಯಣ’ ಚಿತ್ರದಲ್ಲಿ ಯುವ ಶೂರ್ಪನಕಿಯ ಪಾತ್ರದಲ್ಲಿ ಜನಪ್ರಿಯ ಬಾಲನಟಿ ದಿಶಿತಾ ಸೆಹ್ಗಲ್ ಕಾಣಿಸಿಕೊಳ್ಳಲಿದ್ದಾರೆ.

ನಿರ್ಮಾಪಕರು ಈ ಪಾತ್ರಕ್ಕಾಗಿ ಜನಪ್ರಿಯ ಟಿವಿ ನಟಿ ಹಾಗೂ ಬಾಲಕಲಾವಿದೆ ದಿಶಿತಾ ಸೆಹ್ಗಲ್ ಅವರನ್ನು ಆಯ್ಕೆ ಮಾಡಿದ್ದಾರೆ. ಈ ಹಿಂದೆ ಜಾಹೀರಾತೊಂದರಲ್ಲಿ ದಿಶಿತಾ ಅವರ ಡೈಲಾಗ್ ಪ್ರತಿಯೊಬ್ಬರ ಮನಸ್ಸಿನಲ್ಲಿ ಅಚ್ಚಳಿಯದೆ ಉಳಿದಿದೆ. ಹೇರ್ ಡೈ ಜಾಹೀರಾತಿನಲ್ಲಿ ಅವರು ಹೇಳಿದ ‘ಕೇವಲ 30 ರೂಪಾಯಿ, ಮಮ್ಮಿ’ ಎಂಬ ಮಾತು ಜನಪ್ರಿಯತೆಯನ್ನು ತಂದುಕೊಟ್ಟಿತ್ತು.

‘ರಾಮಾಯಣ’ ಸಿನಿಮಾದ ಪಾತ್ರಕ್ಕಾಗಿ ಕಠಿಣ ಆಡಿಷನ್ ಹಾಗೂ ಲುಕ್ ಟೆಸ್ಟ್‌ನ ಹಲವು ಸುತ್ತುಗಳು ನಡೆದು, ಆಯ್ಕೆಗೆ ಸುಮಾರು ಒಂದು ವರ್ಷದ ಸಮಯ ಹಿಡಿದಿದೆ. ಈ ಚಿತ್ರದ ಪಾತ್ರವರ್ಗದ ಜವಾಬ್ದಾರಿಯನ್ನು ಮುಕೇಶ್ ಛಾಬ್ರಾ ವಹಿಸಿದ್ದು, ಕಾಸ್ಟಿಂಗ್ ಕೋಆರ್ಡಿನೇಟರ್ ಜ್ಯೋತಿ ಬಜಾಜ್ ಸಂಯೋಜನೆ ಮಾಡಿದ್ದಾರೆ.

ಬಾಲಿವುಡ್‌ನ ದೊಡ್ಡ ಸಿನಿಮಾಗಳಲ್ಲಿ ಬಾಲಕಲಾವಿದೆಯಾಗಿ ಕೆಲಸ ಮಾಡಿರುವ ದಿಶಿತಾ, ಸಾಮಾಜಿಕ ಜಾಲತಾಣಗಳಲ್ಲೂ ಸಖತ್ ಆಕ್ಟಿವ್ ಆಗಿದ್ದಾರೆ. ಪ್ರಸ್ತುತ ಬಾಂಬೆ ಸ್ಕಾಟಿಷ್ ಶಾಲೆಯಲ್ಲಿ 11ನೇ ತರಗತಿ ಓದುತ್ತಿರುವ ಇವರು, ಈಗಾಗಲೇ ಟಿವಿ ಸೀರೀಸ್‌ಗಳು, ಶಾರ್ಟ್ ಫಿಲ್ಮ್‌ಗಳು, ‘ಸೇಕ್ರೆಡ್ ಗೇಮ್ಸ್’ ವೆಬ್ ಸೀರೀಸ್ ಹಾಗೂ 100ಕ್ಕೂ ಹೆಚ್ಚು ಟಿವಿ ಜಾಹೀರಾತುಗಳಲ್ಲಿ ನಟಿಸಿದ್ದಾರೆ.

‘ರಾಮಾಯಣ’ ಚಿತ್ರದಲ್ಲಿ ಯಶ್ ರಾವಣನ ಪಾತ್ರ ಮಾಡಿದ್ದಕ್ಕೆ ಯಥರ್ವ್ ಬೇಸರ

ಮೂರೂವರೆ ವರ್ಷದ ವಯಸ್ಸಿನಿಂದಲೇ ಚಿತ್ರರಂಗದಲ್ಲಿ ಸಕ್ರಿಯವಾಗಿರುವ ದಿಶಿತಾ, ‘ಬೇಬಿ’, ‘ಡಿಯರ್ ಜಿಂದಗಿ’, ‘ಹಿಂದಿ ಮೀಡಿಯಂ’, ‘ವಾರ್ 1’, ತೆಲುಗು ಚಿತ್ರ ‘ಸವ್ಯಸಾಚಿ’, ಹಾಗೂ ‘ಹಿಟ್: ದಿ ಫಸ್ಟ್ ಕೇಸ್’ ಸೇರಿದಂತೆ ಹಲವು ಚಿತ್ರಗಳಲ್ಲಿ ಅಭಿನಯಿಸಿದ್ದಾರೆ. ‘ರಾಮಾಯಣ’ ಚಿತ್ರದಲ್ಲಿ 16 ವರ್ಷದ ದಿಶಿತಾ ಸೆಹ್ಗಲ್ ಯುವ ಶೂರ್ಪಣಕಿಯಾಗಿ ಕಾಣಿಸಿಕೊಳ್ಳಲಿದ್ದು, ಈ ಪಾತ್ರದ ಮುಂದುವರಿದ ಭಾಗದಲ್ಲಿ ನಟಿ ರಕುಲ್ ಪ್ರೀತ್ ಸಿಂಗ್ ನಟಿಸಿದ್ದಾರೆ.

‘ರಾಮಾಯಣ’ ಚಿತ್ರದಲ್ಲಿ ನಟಿ ಸಾಯಿ ಪಲ್ಲವಿ ಅವರು ಸೀತೆಯ ಪಾತ್ರದಲ್ಲಿ, ರಾವಣನಾಗಿ ಯಶ್, ರಾಮನಾಗಿ ರಣಬೀರ್ ಕಪೂರ್, ಸನ್ನಿ ಡಿಯೋಲ್ ಹನುಮಂತನಾಗಿ ಮತ್ತು ರವಿ ದುಬೆ ಲಕ್ಷ್ಮಣನಾಗಿ ಕಾಣಿಸಿಕೊಳ್ಳಲಿದ್ದಾರೆ. ಚಿತ್ರದ ಮೊದಲ ಭಾಗವು ದೀಪಾವಳಿ ಪ್ರಯುಕ್ತ ನವೆಂಬರ್ 5ರಂದು ತೆರೆಕಾಣಲಿದೆ. ಮುಂಗಡ ಬುಕಿಂಗ್ ಭರ್ಜರಿಯಾಗಿ ಸಾಗಿದ್ದು, ಈಗಾಗಲೇ ಲಕ್ಷಾಂತರ ಟಿಕೆಟ್‌ಗಳು ಮಾರಾಟವಾಗಿವೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.