‘ಕಾಂತಾರ’ ಕಲೆಕ್ಷನ್ ಮೀರಿಸಿದ ‘ಹನುಮಾನ್ ಅಂಶ್’: ವಿಶ್ವಾದ್ಯಂತ 400 ಕೋಟಿ ರೂಪಾಯಿ ಗಳಿಕೆ
ಪ್ರಸ್ತುತ ಬಾಕ್ಸ್ ಆಫೀಸ್ ಓಟವನ್ನು ಗಮನಿಸಿದರೆ ‘ಹನುಮಾನ್ ಅಂಶ್’ ಚಿತ್ರವು 450 ಕೋಟಿ ರೂಪಾಯಿ ಗಡಿ ದಾಟುವ ಮುನ್ಸೂಚನೆ ನೀಡಿದೆ. ಈಗಾಗಲೇ ‘ಕಾಂತಾರ’, 3 ಈಡಿಯಟ್ಸ್ ’, ‘ಕ್ರಿಶ್ 3’ ಮುಂತಾದ ಸಿನಿಮಾಗಳ ದಾಖಲೆಯನ್ನು ಈ ಸಿನಿಮಾ ಮುರಿದುಹಾಕಿದೆ. ಆ ಬಗ್ಗೆ ಇಲ್ಲಿದೆ ವಿವರ..
ಬಾಕ್ಸ್ ಆಫೀಸ್ನಲ್ಲಿ ಭಾರತದ ಅತ್ಯಂತ ಯಶಸ್ವಿ ಹಾಗೂ ಲಾಭದಾಯಕ ಸಿನಿಮಾವಾಗಿ ಹೊರಹೊಮ್ಮಿರುವ ಭಕ್ತಿಪ್ರಧಾನ ಚಿತ್ರ ‘ಹನುಮಾನ್ ಅಂಶ್’ ತೆರೆಕಂಡು ಏಳು ವಾರಗಳು ಕಳೆದರೂ ತನ್ನ ಅಬ್ಬರವನ್ನು ಮುಂದುವರಿಸಿದೆ. ಎಂಟನೇ ವಾರಾಂತ್ಯದಲ್ಲೂ ಚಿತ್ರಮಂದಿರಗಳಲ್ಲಿ ಭಾರಿ ಜನಸ್ತೋಮವನ್ನು ಸೆಳೆಯುವ ಮೂಲಕ ಈ ಸಿನಿಮಾ ಹೊಸ ಮೈಲಿಗಲ್ಲುಗಳನ್ನು ಸ್ಥಾಪಿಸಿದೆ. ಇದರೊಂದಿಗೆ ಭಾರತೀಯ ಚಿತ್ರರಂಗದ ಇತಿಹಾಸದಲ್ಲಿ ಸಾರ್ವಕಾಲಿಕ ಹೆಚ್ಚು ಗಳಿಕೆ ಮಾಡಿದ ಟಾಪ್ 50 ಸಿನಿಮಾಗಳ ಪಟ್ಟಿಗೂ ‘ಹನುಮಾನ್ ಅಂಶ್’ ಅಧಿಕೃತವಾಗಿ ಸೇರ್ಪಡೆಯಾಗಿದೆ.
‘ಹನುಮಾನ್ ಅಂಶ್’ ಬಿಡುಗಡೆಯಾದ ಆರಂಭದ ದಿನಗಳಲ್ಲಿ ಈ ಮಟ್ಟದ ಅಭೂತಪೂರ್ವ ಯಶಸ್ಸು ಸಿಗಲಿದೆ ಎಂದು ಯಾರೂ ಊಹಿಸಿರಲಿಲ್ಲ. ಮೊದಲ ದಿನ ಕೇವಲ 10 ಲಕ್ಷ ರೂಪಾಯಿ ಗಳಿಕೆ ಕಂಡಿದ್ದ ಈ ಸಿನಿಮಾ, ಮೊದಲ ಎರಡು ವಾರಗಳಲ್ಲಿ ಗಳಿಸಿದ್ದು ಕೇವಲ 1.50 ಕೋಟಿ ರೂಪಾಯಿ ಮಾತ್ರ. ಈ ಹಿನ್ನೆಲೆಯಲ್ಲಿ ಸಿನಿಮಾ ಬಾಕ್ಸ್ ಆಫೀಸ್ನಲ್ಲಿ ಫ್ಲಾಪ್ ಎಂದು ನಿರ್ಧರಿಸಲಾಗಿತ್ತು. ಆದರೆ, ಪ್ರೇಕ್ಷಕರಿಂದ ವ್ಯಕ್ತವಾದ ಅತ್ಯುತ್ತಮ ಅಭಿಪ್ರಾಯದಿಂದಾಗಿ ಮೂರನೇ ವಾರದಿಂದ ಚಿತ್ರದ ಟಿಕೆಟ್ ಮಾರಾಟ ಹಠಾತ್ ಏರಿಕೆ ಕಂಡಿತು. ನಾಲ್ಕನೇ ವಾರದಿಂದೀಚೆಗೆ ‘ಹನುಮಾನ್ ಅಂಶ್’ ಭಾರತೀಯ ಬಾಕ್ಸ್ ಆಫೀಸ್ನಲ್ಲಿ ಪ್ರತಿ ವಾರ ಸರಾಸರಿ 60 ಕೋಟಿ ರೂಪಾಯಿಗೂ ಅಧಿಕ ನಿವ್ವಳ ಗಳಿಕೆ ಮಾಡುತ್ತಾ ಬಂದಿದೆ.
ಪ್ರದರ್ಶನದ 52ನೇ ದಿನ ಅಂದರೆ ಎಂಟನೇ ವಾರಾಂತ್ಯದಲ್ಲಿ ಈ ಭಕ್ತಿಪ್ರಧಾನ ಸಿನಿಮಾ 18.95 ಕೋಟಿ ರೂಪಾಯಿ ನಿವ್ವಳ ಗಳಿಕೆ ಮಾಡಿದೆ. ಇದರಲ್ಲಿ ಭಾನುವಾರ ಒಂದೇ ದಿನ ಭಾರಿ ಪ್ರಮಾಣದ 9 ಕೋಟಿ ರೂಪಾಯಿ ಹರಿದುಬಂದಿದೆ. ಇದರೊಂದಿಗೆ ಭಾರತದಲ್ಲಿ ಚಿತ್ರದ ಒಟ್ಟು ನಿವ್ವಳ ಗಳಿಕೆ 307 ಕೋಟಿ ರೂಪಾಯಿ ತಲುಪಿದ್ದು, ಗ್ರಾಸ್ ಗಳಿಕೆ 362 ಕೋಟಿಯಾಗಿದೆ. ಭಾರತೀಯ ಚಿತ್ರರಂಗದಲ್ಲಿ 300 ಕೋಟಿ ನಿವ್ವಳ ಗಳಿಕೆಯ ಮೈಲಿಗಲ್ಲು ದಾಟಿದ ಕೆಲವೇ ಕೆಲವು ಹಿಂದಿ ಸಿನಿಮಾಗಳ ಸಾಲಿಗೆ ಈಗ ‘ಹನುಮಾನ್ ಅಂಶ್’ ಕೂಡ ಸೇರ್ಪಡೆಯಾಗಿದೆ.
ವಿದೇಶಗಳಲ್ಲೂ ‘ಹನುಮಾನ್ ಅಂಶ್’ ತನ್ನ ಜಾದೂ ಮುಂದುವರಿಸಿದೆ. ಭಾರತದಲ್ಲಿ ಬಿಡುಗಡೆಯಾದ ಆರು ವಾರಗಳ ಬಳಿಕ ವಿದೇಶಗಳಲ್ಲಿ ಬಿಡುಗಡೆಯಾಗಿದ್ದರೂ, ಅತ್ಯಲ್ಪ ಅವಧಿಯಲ್ಲಿ ಭಾರಿ ಪ್ರೇಕ್ಷಕರನ್ನು ತಲುಪಿದೆ. ಪ್ರಸ್ತುತ ವಿದೇಶಿ ಮಾರುಕಟ್ಟೆಯಿಂದ 4 ಮಿಲಿಯನ್ ಡಾಲರ್ಗೂ ಅಧಿಕ ಗಳಿಕೆ ಮಾಡಿದ್ದು, ಇದರೊಂದಿಗೆ ಚಿತ್ರದ ಜಾಗತಿಕ ಒಟ್ಟು ಗಳಿಕೆ 402 ಕೋಟಿ ರೂಪಾಯಿ ತಲುಪಿದೆ.
ಇದನ್ನೂ ಓದಿ: ಶತದಿನೋತ್ಸವ ಆಚರಿಸಿದ ಬಳಿಕವೇ ‘ಹನುಮಾನ್ ಅಂಶ್’ ಒಟಿಟಿಗೆ; 100 ಕೋಟಿ ರೂ ಡೀಲ್?
ಎಂಟನೇ ವಾರಾಂತ್ಯದ ಭಾರಿ ಗಳಿಕೆಯೊಂದಿಗೆ ‘ಹನುಮಾನ್ ಅಂಶ್’ ಭಾರತದ ಸಾರ್ವಕಾಲಿಕ ಗರಿಷ್ಠ ಗಳಿಕೆಯ ಟಾಪ್ 50 ಸಿನಿಮಾಗಳ ಸಾಲಿಗೆ ಸೇರಿದೆ. ಭಾನುವಾರದ ಗಳಿಕೆಯೊಂದಿಗೆ ‘ಕ್ರಿಶ್ 3’ (393 ಕೋಟಿ) ಹಾಗೂ ‘ಚೆನ್ನೈ ಎಕ್ಸ್ಪ್ರೆಸ್’ (392 ಕೋಟಿ) ಸಿನಿಮಾಗಳ ದಾಖಲೆಯನ್ನು ಮುರಿದು 400 ಕೋಟಿಯ ಗಡಿಯನ್ನು ದಾಟಿದೆ. ತದನಂತರ ‘3 ಈಡಿಯಟ್ಸ್’ (400 ಕೋಟಿ) ಹಾಗೂ ‘ಕಾಂತಾರ’ (401 ಕೋಟಿ) ಸಿನಿಮಾಗಳ ಜೀವಮಾನದ ಗಳಿಕೆಯನ್ನೂ ಇದು ಹಿಂದಿಕ್ಕಿದೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.