‘ಜವಾನ್’ ಅಲ್ಲ, ಮತ್ಯಾವುದು ಭಾರತದ ಅತಿ ಹೆಚ್ಚು ಬಜೆಟ್​ನ ಹಾಡು?

ಶಾರುಖ್ ಖಾನ್ (Shah Rukh Khan) ನಟನೆಯ ‘ಜವಾನ್‘ (Jawan) ಸಿನಿಮಾದ ಹಾಡೊಂದು ಕೆಲವು ದಿನಗಳ ಹಿಂದೆಯಷ್ಟೆ ಬಿಡುಗಡೆ ಆಗಿದೆ. ದೊಡ್ಡ ಸೆಟ್​ಗಳಲ್ಲಿ ಭಾರಿ ಸಂಖ್ಯೆಯ ಹಿನ್ನೆಲೆ ಡ್ಯಾನ್ಸರ್​ಗಳ ಮಧ್ಯೆ ಶಾರುಖ್ ಖಾನ್ ಡ್ಯಾನ್ಸ್ ಮಾಡುತ್ತಿರುವ ಈ ಹಾಡು ಇದೀಗ ಸಖತ್ ವೈರಲ್ ಆಗಿದೆ. ಹಾಡಿನ ಸ್ಟೆಪ್ಪುಗಳು ಸಹ ಸಖತ್ ವೈರಲ್ ಆಗುತ್ತಿವೆ. ಇದರ ಜೊತೆಗೆ ಈ ಹಾಡು ಈವರೆಗಿನ ಭಾರತದ ಅತ್ಯಂತ ದುಬಾರಿ ಹಾಡು ಎಂಬ ಮಾತುಗಳು ಸಹ ಕೇಳಿ ಬರುತ್ತಿದೆ. ಆದರೆ ಅದು ನಿಜವಲ್ಲ, ಭಾರತೀಯ ಸಿನಿಮಾದ ಅತ್ಯಂತ ದುಬಾರಿ ಹಾಡಿನ ಶ್ರೇಯ ಇರುವುದು ಬಾಲಿವುಡ್ (Bollywood)​ ಸಿನಿಮಾಕ್ಕಲ್ಲ ಬದಲಿಗೆ ದಕ್ಷಿಣದ ತಮಿಳು ಸಿನಿಮಾಕ್ಕೆ.

ರಜನೀಕಾಂತ್ ನಟನೆಯ ಸಿನಿಮಾ ಒಂದರ ಹಾಡು ಭಾರತದ ಈ ವರೆಗಿನ ಅತ್ಯಂತ ದುಬಾರಿ ಬಜೆಟ್​ನ ಹಾಡು. ರಜನೀಕಾಂತ್, ಅಕ್ಷಯ್ ಕುಮಾರ್, ಆಮಿ ಜಾಕ್ಸನ್ ನಟಿಸಿದ್ದ ‘ರೋಬೊ 2.0’ ಸಿನಿಮಾದ ಹಾಡೊಂದು ಭಾರತದ ಈವರೆಗಿನ ಅತ್ಯಂತ ದುಬಾರಿ ಹಾಡಾಗಿದೆ. ‘ರೋಬೊ 2.0’ ಸಿನಿಮಾದ ‘ಎಂಥಿರ ಲೋಕತ್ತು ಸುಂದರಿಯೇ’ ಹಾಡು ಈವೆರಗಿನ ಅತಿ ಹೆಚ್ಚು ಬಜೆಟ್​ನ ಹಾಡಾಗಿದೆ.

‘ಎಂಥಿರ ಲೋಕತ್ತು ಸುಂದರಿಯೇ’ ಹಾಡಿಗೆ ನಿರ್ಮಾಪಕರು ಖರ್ಚು ಮಾಡಿರುವುದು 20 ಕೋಟಿ ರೂಪಾಯಿಗಳು. 12 ದಿನಗಳ ಕಾಲ ಈ ಹಾಡಿನ ಚಿತ್ರೀಕರಣ ನಡೆದಿತ್ತು. ಹಲವು ಭಿನ್ನ ಅದ್ಧೂರಿ ಸೆಟ್​ಗಳಲ್ಲಿ ವಿದೇಶಿ ನೃತ್ಯಗಾರರು, ಕೆಲವು ದೇಸೀ ನೃತ್ಯಗಾರರು, ಮೇಕಪ್, ಹೇರ್​ಸ್ಟೈಲಿಸ್ಟ್, ಡಿಸೈನರ್​ಗಳು, ವಿಎಫ್​ಎಕ್ಸ್, ಗ್ರಾಫಿಕ್ಸ್ ಕಲಾವಿದರು ಈ ಹಾಡಿಗಾಗಿ ಕೆಲಸ ಮಾಡಿದ್ದರು. ಈ ಹಾಡಿನಲ್ಲಿ ಮುಖ್ಯ ನಟ-ನಟಿ ಹಾಗೂ ಇತರೆ ನೃತ್ಯಗಾರರು ಧರಿಸಿದ್ದ ಬಟ್ಟೆಗಳಿಗೆ ಕೋಟ್ಯಂತರ ಹಣವನ್ನು ವ್ಯವಯಿಸಲಾಗಿತ್ತಂತೆ. ನೆನಪಿರಲಿ ಕನ್ನಡದ ಸೂಪರ್ ಹಿಟ್ ಸಿನಿಮಾ ‘ಕಾಂತಾರ’ದ ಬಜೆಟ್ 15 ಕೋಟಿ. ಒಂದು ಗುಣಮಟ್ಟದ ಸಿನಿಮಾ ಮಾಡಬಹುದಾದ ಬಜೆಟ್​ ಅನ್ನು ‘ಎಂಥಿರ ಲೋಕತ್ತು ಸುಂದರಿಯೇ’ ಹಾಡಿಗೆ ಸುರಿಯಲಾಗಿತ್ತು.

ಇದನ್ನೂ ಓದಿ:ಶಾರುಖ್ ಖಾನ್​ಗೆ ವಯಸ್ಸಾಗುವುದಿಲ್ಲ ಏಕೆ? ಆನಂದ್ ಮಹೀಂದ್ರಾ ಬಳಿ ಇದೆ ಉತ್ತರ

‘ರೋಬೊ 2.0’ ಸಿನಿಮಾದ ಒಟ್ಟಾರೆ ಬಜೆಟ್ ಸುಮಾರು 450 ಕೋಟಿಗೂ ಹೆಚ್ಚು. ರಜನೀಕಾಂತ್ ಮೂರು ಭಿನ್ನ ಅವತಾರದಲ್ಲಿ ಈ ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದಾರೆ. ಬಾಲಿವುಡ್ ಸ್ಟಾರ್ ಅಕ್ಷಯ್ ಕುಮಾರ್ ವಿಲನ್ ಪಾತ್ರದಲ್ಲಿ ನಟಿಸಿದ್ದರು. ಏಮಿ ಜಾಕ್ಸನ್ ನಾಯಕಿಯಾಗಿ ನಟಿಸಿದ್ದರು. ನಿರ್ದೇಶಕ ಶಂಕರ್, ಅತ್ಯಾಧುನಿಕ ತಂತ್ರಜ್ಞಾನ, ವಿಎಫ್​ಎಕ್ಸ್ ಗಳನ್ನು ಬಳಸಿ ಈ ಸಿನಿಮಾವನ್ನು ಸೆರೆ ಹಿಡಿದಿದ್ದರು. ಸಿನಿಮಾ ಹಿಟ್ ಆಯಿತಾದರೂ ಮೊದಲ ‘ರೋಬೊ’ವಿನಷ್ಟು ಪ್ರಶಂಸೆಯನ್ನು ಪಡೆಯಲಿಲ್ಲ.

‘ರೋಬೊ 2.0’ ಸಿನಿಮಾ ಬಾಕ್ಸ್ ಆಫೀಸ್​ನಲ್ಲಿ 800 ಕೋಟಿ ಹಣ ಗಳಿಸಿತು. ಸಿನಿಮಾವನ್ನು ಕಲಾನಿಧಿ ಮಾರನ್ ನಿರ್ಮಾಣ ಮಾಡಿದ್ದರು. ‘ರೋಬೊ’ ಮೊದಲ ಭಾಗವನ್ನು ಅವರೇ ನಿರ್ಮಾಣ ಮಾಡಿದ್ದರು. ಇದೀಗ ಆಗಸ್ಟ್ 10 ರಂದು ಬಿಡುಗಡೆ ಆಗುತ್ತಿರುವ ರಜನೀಕಾಂತ್​ರ ‘ಜೈಲರ್’ ಸಿನಿಮಾವನ್ನು ಸಹ ಕಲಾನಿಧಿ ಮಾರನ್ ಅವರೇ ನಿರ್ಮಾಣ ಮಾಡುತ್ತಿದ್ದಾರೆ. ಈ ಸಿನಿಮಾವನ್ನು ನೆಲ್ಸನ್ ನಿರ್ದೇಶಿಸಿದ್ದು, ಸಿನಿಮಾದಲ್ಲಿ ಕನ್ನಡದ ಸ್ಟಾರ್ ನಟ ಶಿವರಾಜ್ ಕುಮಾರ್ ಸಹ ಇದ್ದಾರೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ

Published On - 6:11 pm, Thu, 3 August 23