ಆ ದೃಶ್ಯಕ್ಕೆ ಒಳ ಉಡುಪಿನಲ್ಲಿ ಬಾ ಅಂದ್ರು; ಬಾಲಿವುಡ್ ಚಿತ್ರರಂಗದ ಕರಾಳ ಮುಖ ಬಿಚ್ಚಿಟ್ಟ ರಾಧಿಕಾ ಆಪ್ಟೆ

ಚಿತ್ರರಂಗದಲ್ಲಿ ತಮ್ಮದೇ ಆದ ವಿಶಿಷ್ಟ ಹಾಗೂ ಬೋಲ್ಡ್ ಪಾತ್ರದ ಮೂಲಕ ಹೆಸರು ಮಾಡಿರುವ ನಟಿ ರಾಧಿಕಾ ಆಪ್ಟೆ ಚಿತ್ರರಂಗದ ಕರಾಳ ಮುಖವನ್ನು ಬಿಚ್ಚಿಟ್ಟಿದ್ದಾರೆ. ಕಥೆಗೆ ಅಗತ್ಯವಿಲ್ಲದಿದ್ದರೂ ಅತಿಯಾದ ಬೋಲ್ಡ್ ದೃಶ್ಯಗಳಲ್ಲಿ ನಟಿಸುವಂತೆ ಕೆಲವು ನಿರ್ದೇಶಕರು ಹೇಗೆ ಒತ್ತಡ ಹೇರುತ್ತಿದ್ದರು ಎಂಬುದನ್ನು ಅವರು ಬಹಿರಂಗಪಡಿಸಿದ್ದಾರೆ. ಇತ್ತೀಚಿನ ಸಂದರ್ಶನವೊಂದರಲ್ಲಿ ಅವರು ನೀಡಿದ ಹೇಳಿಕೆ ಭಾರೀ ಚರ್ಚೆಗೆ ಗ್ರಾಸವಾಗಿವೆ.

‘ಸಿನಿಮಾಗಳಲ್ಲಿ ಬೋಲ್ಡ್ ದೃಶ್ಯ ಮಾಡಿದ ನಂತರ ಚಿತ್ರರಂಗದಲ್ಲಿ ನನ್ನ ಬಗ್ಗೆ ತಪ್ಪು ಅಭಿಪ್ರಾಯ ಮೂಡಿತು. ನಾನು ಯಾವುದೇ ದೃಶ್ಯದಲ್ಲಾದರೂ ಸುಲಭವಾಗಿ ನಟಿಸುತ್ತೇನೆ ಎಂದು ಹಲವರು ಭಾವಿಸಿದರು. ‘ಈಕೆ ಹೇಗೆ ಬೇಕಿದ್ದರೂ ನಟಿಸುತ್ತಾಳೆ’ ಎಂಬ ಹಗುರವಾದ ಧೋರಣೆ ಅವರಲ್ಲಿತ್ತು. ಇದು ನನಗೆ ಆರಂಭದಲ್ಲಿ ದೊಡ್ಡ ಕಿರಿಕಿರಿಯನ್ನು ಉಂಟುಮಾಡಿತು’ ಎಂದಿದ್ದಾರೆ ರಾಧಿಕಾ.

‘ಅನಗತ್ಯವಾಗಿ ಸಹನಟನಿಗೆ ಕಿಸ್ ಮಾಡಲು ಹಲವು ಬಾರಿ ಒತ್ತಾಯಿಸುತ್ತಿದ್ದರು. ಸ್ವಲ್ಪ ಕಿಸ್ ಮಾಡಿ, 15 ಸೆಕೆಂಡ್ ನಟಿಸಿ ಎಂದು ಹಗುರವಾಗಿ ಹೇಳುತ್ತಿದ್ದರು. ಕಥೆಗೆ ಇದರ ಅಗತ್ಯವೇನು ಎಂದು ಕೇಳಿದರೆ ಅವರ ಬಳಿ ಉತ್ತರವೇ ಇರುತ್ತಿರಲಿಲ್ಲ. ಇಂತಹ ಅನುಭವಗಳು ನನಗೆ ಚಿತ್ರರಂಗದಲ್ಲಿ ಪದೇ ಪದೇ ಎದುರಾಗಿದ್ದವು’ ಎಂದು ಬೇಸರ ಹೊರಹಾಕಿದ್ದಾರೆ ರಾಧಿಕಾ.

‘ಒಮ್ಮೆ ಆ್ಯಕ್ಷನ್ ದೃಶ್ಯವೊಂದರಲ್ಲಿ ನಟಿಸುವಾಗ ಶರ್ಟ್ ಬಟನ್ ಹಾಕಬೇಡಿ ಎಂದು ಕೇಳಿಕೊಂಡಿದ್ದರು. ನಂತರ ಶರ್ಟ್ ತೆಗೆದು ಒಳಉಡುಪಿನಲ್ಲಿಯೇ ಫೈಟ್ ದೃಶ್ಯ ಮಾಡಿ ಎಂದು ವಿಚಿತ್ರ ಬೇಡಿಕೆ ಇಟ್ಟಿದ್ದರು. ಇದನ್ನು ಕೇಳಿ ನನಗೆ ತೀವ್ರ ಆಘಾತವಾಗಿತ್ತು. ನಾನು ತಕ್ಷಣವೇ ಆ ಬೇಡಿಕೆಯನ್ನು ನಿರಾಕರಿಸಿದೆ’ ಎಂದು ಅವರು ನೆನಪಿಸಿಕೊಂಡಿದ್ದಾರೆ.

ಇದನ್ನೂ ಓದಿ: ‘ಧುರಂದರ್’ ಸಿನಿಮಾ ಅನ್ನು ಟೀಕಿಸಿದರೇ ನಟಿ ರಾಧಿಕಾ ಆಪ್ಟೆ?

ಪ್ರಸ್ತುತ ನೆಟ್‌ಫ್ಲಿಕ್ಸ್‌ನ ‘ಲಸ್ಟ್ ಸ್ಟೋರೀಸ್ 3’ ಚಿತ್ರದಲ್ಲಿ ನಟಿ ರಾಧಿಕಾ ಆಪ್ಟೆ ಕಾಣಿಸಿಕೊಂಡಿದ್ದಾರೆ. ತಮ್ಮ ಕಲಾತ್ಮಕ ಅಭಿನಯದಿಂದಲೇ ಗುರುತಿಸಿಕೊಂಡಿರುವ ಅವರು ಇಂತಹ ಘಟನೆಗಳ ವಿರುದ್ಧ ಧ್ವನಿ ಎತ್ತಿದ್ದಾರೆ. ಸಿನಿಮಾ ರಂಗದಲ್ಲಿ ಮಹಿಳೆಯರಿಗೆ ಎದುರಾಗುವ ಇಂತಹ ಅಸಂಬದ್ಧ ಬೇಡಿಕೆಗಳ ವಿರುದ್ಧ ಅವರು ಕಿಡಿಕಾರಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.