ಯಶ್ ರಿಜೆಕ್ಟ್ ಮಾಡಿದ್ದ ಚಿತ್ರದಲ್ಲಿ ಸೈಫ್ ಅಲಿ ಖಾನ್ ನಟಿಸಿ ಹೀನಾಯವಾಗಿ ಸೋತರು; ಯಾವುದು ಆ ಸಿನಿಮಾ?
ಗಾಸಿಪ್ ಮಂದಿಯ ಬಾಯಲ್ಲಿ ಈ ವಿಚಾರ ಚರ್ಚೆ ಆಗುತ್ತಿದೆ. ಹರಿದಾಡುತ್ತಿರುವ ಈ ಮಾಹಿತಿಯ ಬಗ್ಗೆ ಸೈಫ್ ಅಲಿ ಖಾನ್ ಆಗಲಿ, ಯಶ್ ಆಗಲಿ ಏನೂ ಹೇಳಿಕೆ ನೀಡಿಲ್ಲ.
Updated on: Sep 14, 2021 | 1:20 PM
ಸಿನಿಮಾಗಳ ಆಯ್ಕೆಯಲ್ಲಿ ನಟ ಯಶ್ ಸಿಕ್ಕಾಪಟ್ಟೆ ಎಚ್ಚರಿಕೆ ವಹಿಸುತ್ತಾರೆ. ಒಳ್ಳೆಯ ಕಥೆ, ಪಾತ್ರ ಮತ್ತು ಟೀಮ್ಗೆ ಅವರು ಮೊದಲ ಮಹತ್ವ ನೀಡುತ್ತಾರೆ. ಆ ಕಾರಣದಿಂದಲೇ ಯಶ್ಗೆ ‘ಕೆಜಿಎಫ್: ಚಾಪ್ಟರ್ 1’ ಸಿನಿಮಾದಿಂದ ಭರ್ಜರಿ ಯಶಸ್ಸು ಸಿಕ್ಕಿತು. ಆ ಚಿತ್ರದ ಗೆಲುವಿನ ಬಳಿಕ ಅವರು ಪ್ಯಾನ್ ಇಂಡಿಯಾ ಸ್ಟಾರ್ ಆಗಿ ಹೊರಹೊಮ್ಮಿದರು. ಅಲ್ಲದೇ, ಯಶ್ಗೆ ಎಲ್ಲ ಭಾಷೆಗಳಿಂದಲೂ ಆಫರ್ ಬರಲು ಶುರುವಾಯಿತು. ಆದರೆ ಅವರು ಎಲ್ಲ ಚಿತ್ರವನ್ನೂ ಒಪ್ಪಿಕೊಳ್ಳಲಿಲ್ಲ. ಹಾಗೆ ಯಶ್ ರಿಜೆಕ್ಟ್ ಮಾಡಿದ್ದ ಒಂದು ಸಿನಿಮಾದಲ್ಲಿ ಸೈಫ್ ಅಲಿ ಖಾನ್ ನಟಿಸಿ ಹೀನಾಯವಾಗಿ ಸೋಲು ಕಂಡರು ಎಂಬ ಸುದ್ದಿ ಈಗ ಹರಿದಾಡುತ್ತಿದೆ.
2019ರ ಅಕ್ಟೋಬರ್ನಲ್ಲಿ ಸೈಫ್ ಅಲಿ ಖಾನ್ ನಟನೆಯ ‘ಲಾಲ್ ಕಪ್ತಾನ್’ ಸಿನಿಮಾ ತೆರೆಕಂಡಿತು. ಆದರೆ ಗಲ್ಲಾಪೆಟ್ಟಿಗೆಯಲ್ಲಿ ಆ ಚಿತ್ರ ಮುಗ್ಗರಿಸಿತು. ಸೈಫ್ ಅಭಿಮಾನಿಗಳು ಆ ಸಿನಿಮಾದಿಂದ ನಿರಾಶರಾದರು. ಅಚ್ಚರಿ ಎಂದರೆ ಆ ಚಿತ್ರದಲ್ಲಿ ಹೀರೋ ಆಗಿ ನಟಿಸುವಂತೆ ಸೈಫ್ಗಿಂತಲೂ ಮುನ್ನ ಯಶ್ಗೆ ಆಫರ್ ನೀಡಲಾಗಿತ್ತಂತೆ. ಆದರೆ ಕಥೆ ಮತ್ತು ಪಾತ್ರ ಇಷ್ಟವಾಗದ ಕಾರಣ ಯಶ್ ಆ ಅವಕಾಶವನ್ನು ಸ್ವೀಕರಿಸಿರಲಿಲ್ಲ. ಅವರು ರಿಜೆಕ್ಟ್ ಮಾಡಿದ ಬಳಿಕ ಆ ಸಿನಿಮಾ ಸೈಫ್ ಮಡಿಲಿಗೆ ಹೋಯಿತು ಎನ್ನಲಾಗುತ್ತಿದೆ.
ಗಾಸಿಪ್ ಮಂದಿಯ ಬಾಯಲ್ಲಿ ಈ ವಿಚಾರ ಚರ್ಚೆ ಆಗುತ್ತಿದೆ. ಹರಿದಾಡುತ್ತಿರುವ ಈ ಮಾಹಿತಿಯ ಬಗ್ಗೆ ಸೈಫ್ ಆಗಲಿ, ಯಶ್ ಆಗಲಿ ಏನೂ ಹೇಳಿಕೆ ನೀಡಿಲ್ಲ. ‘ಲಾಲ್ ಕಪ್ತಾನ್’ ಸಿನಿಮಾದಲ್ಲಿ ಸೈಫ್ ಅಲಿ ಖಾನ್ಗೆ ವಿಭಿನ್ನ ಪಾತ್ರ ಇತ್ತು. ಅಘೋರಿಯ ರೂಪದಲ್ಲಿ ಅವರು ಕಾಣಿಸಿಕೊಂಡಿದ್ದರು. 1700ನೇ ಇಸವಿ ಸಂದರ್ಭದಲ್ಲಿ ನಡೆಯುವ ಕಥೆಯನ್ನು ಆ ಚಿತ್ರ ಒಳಗೊಂಡಿತ್ತು. ನವದೀಪ್ ಸಿಂಗ್ ನಿರ್ದೇಶನ ಮಾಡಿದ್ದರು.
ಸದ್ಯ ಯಶ್ ಗಮನವೆಲ್ಲ ‘ಕೆಜಿಎಫ್: ಚಾಪ್ಟರ್ 2’ ಸಿನಿಮಾ ಮೇಲಿದೆ. ಕೊರೊನಾ ವೈರಸ್ ಹಾವಳಿಯಿಂದಾಗಿ ಆ ಚಿತ್ರದ ರಿಲೀಸ್ ದಿನಾಂಕ ಮುಂದೂಡಲ್ಪಟ್ಟಿದೆ. 2022ರ ಏಪ್ರಿಲ್ 14ರಂದು ‘ಕೆಜಿಎಫ್ 2’ ಬಿಡುಗಡೆ ಆಗಲಿದೆ. ಪ್ರಶಾಂತ್ ನೀಲ್-ಯಶ್ ಕಾಂಬಿನೇಷನ್ನ ಈ ಬಹುನಿರೀಕ್ಷಿತ ಸಿನಿಮಾದಲ್ಲಿ ಬಾಲಿವುಡ್ ಕಲಾವಿದರಾದ ರವೀನಾ ಟಂಡನ್, ಸಂಜಯ್ ದತ್ ಕಾಣಿಸಿಕೊಳ್ಳುವುದರಿಂದ ಉತ್ತರ ಭಾರತದ ಸಿನಿಪ್ರಿಯರಲ್ಲೂ ಕಾತರ ಹೆಚ್ಚಿದೆ.
ಇದನ್ನೂ ಓದಿ:
ಸೌತ್ ಹೀರೋಗಳಲ್ಲಿ ಅಲ್ಲು ಅರ್ಜುನ್ ನಂ.1, ಯಶ್ಗೆ 5ನೇ ಸ್ಥಾನ; ಇದು ಯಾವ ಹಣಾಹಣಿ?
ಯಶ್-ರಾಧಿಕಾ ಪಂಡಿತ್ ಚಿತ್ರರಂಗದ ಬೆಸ್ಟ್ ಕಪಲ್; ಮನಃಪೂರ್ವಕವಾಗಿ ಹೊಗಳಿದ ಪರಭಾಷಾ ನಟಿ
