ಅಭಿಮಾನಿಗೆ ಶಾರುಖ್ ಚಿತ್ರದಿಂದ ಮೋಸ; 15 ಸಾವಿರ ದಂಡ ವಿಧಿಸಿದ ಸುಪ್ರೀಂ ಕೋರ್ಟ್; ಇದು ಇಂಟರೆಸ್ಟಿಂಗ್ ಕೇಸ್
‘ಟ್ರೇಲರ್ನಲ್ಲಿ ಏನೋ ತೋರಿಸಿ, ಸಿನಿಮಾದಲ್ಲಿ ಮತ್ತಿನ್ನೇನೋ ತೋರಿಸಿದರೆ ಅದು ಜನರಿಗೆ ಮೋಸ ಮಾಡಿದಂತೆ ಆಗುತ್ತದೆ’ ಎಂದು ಸುಪ್ರೀಂ ಕೋರ್ಟ್ ಹೇಳಿದೆ. ಅಲ್ಲದೇ, ನೊಂದ ಅಭಿಮಾನಿಗೆ 15 ಸಾವಿರ ರೂ. ಪರಿಹಾರ ನೀಡುವಂತೆ ನಿರ್ಮಾಪಕರಿಗೆ ಆದೇಶಿಸಿದೆ.
Updated on: Sep 21, 2021 | 8:03 AM
ದೊಡ್ಡ ದೊಡ್ಡ ತಕರಾರುಗಳ ಕಾರಣಕ್ಕೆ ಸೆಲೆಬ್ರಿಟಿಗಳು ಕೋರ್ಟ್ ಮೆಟ್ಟಿಲು ಹತ್ತಬೇಕಾಗುತ್ತದೆ. ಆದರೆ ಇಲ್ಲೊಂದು ವಿಲಕ್ಷಣ ಪ್ರಕರಣದಲ್ಲಿ ಶಾರುಖ್ ಖಾನ್ ನಟನೆಯ ‘ಫ್ಯಾನ್’ ಚಿತ್ರತಂಡ ಸುಪ್ರೀಂ ಕೋರ್ಟ್ನಲ್ಲಿ ವಿಚಾರಣೆ ಎದುರಿಸಬೇಕಾಯಿತು. ಅಲ್ಲದೇ ಈ ಸಿನಿಮಾ ನಿರ್ಮಾಣ ಮಾಡಿದ ಯಶ್ ರಾಜ್ ಫಿಲ್ಮ್ಸ್ ಸಂಸ್ಥೆಗೆ ಕೋರ್ಟ್ ಛೀಮಾರಿ ಹಾಕಿದೆ. ‘ಫ್ಯಾನ್’ ಸಿನಿಮಾದಿಂದ ನಿರಾಸೆಗೊಂಡ ಅಭಿಮಾನಿಗೆ 15 ಸಾವಿರ ರೂ. ಪರಿಹಾರ ಕೊಡುವಂತೆ ಆದೇಶಿಸಿದೆ. ಅಷ್ಟಕ್ಕೂ ಈ ಸಿನಿಮಾ ಮಾಡಿದ ತಪ್ಪೇನು? ಅಭಿಮಾನಿಯನ್ನು ನಂಬಿಸಿ ಮೋಸ ಮಾಡಿದ್ದು!
ಶಾರುಖ್ ಖಾನ್ ನಟನೆಯ ಫ್ಯಾನ್ ಸಿನಿಮಾ 2016ರಲ್ಲಿ ತೆರೆಕಂಡಿತ್ತು. ಆ ಚಿತ್ರದ ಪ್ರಮೋಷನ್ಗಾಗಿ ‘ಜಬ್ರಾ ಫ್ಯಾನ್..’ ಎಂಬ ಹಾಡನ್ನು ರಿಲೀಸ್ ಮಾಡಲಾಗಿತ್ತು. ಅದನ್ನು ನೋಡಿದ ಅಫ್ರೀನ್ ಫಾತಿಮಾ ಜೈದಿ ಎಂಬ ಅಭಿಮಾನಿಯು ತುಂಬ ಖುಷಿಪಟ್ಟಿದ್ದರು. ಹಾಗಾಗಿ ಸಿನಿಮಾ ನೋಡಲು ಕುಟುಂಬ ಸಮೇತ ಅವರು ಚಿತ್ರಮಂದಿರಕ್ಕೆ ತೆರಳಿದ್ದರು. ಆದರೆ ಸಿನಿಮಾದಲ್ಲಿ ಆ ಹಾಡು ಬರಲೇ ಇಲ್ಲ! ಅದರಿಂದ ನಿರಾಸೆಗೊಂಡ ಅವರು ‘ಫ್ಯಾನ್’ ಚಿತ್ರತಂಡದ ವಿರುದ್ಧ ದೂರು ನೀಡಿದ್ದರು. ಆ ಸಂಬಂಧ ಸುಪ್ರೀಂ ಕೋರ್ಟ್ ಈಗ ತೀರ್ಪು ನೀಡಿದೆ.
‘ಶಾರುಖ್ ನಟನೆಯ ‘ಫ್ಯಾನ್’ ಸಿನಿಮಾದಿಂದ ನನಗೆ ಮೋಸ ಆಗಿದೆ. ಬಹಳ ಆಸೆಯಿಂದ ಚಿತ್ರಮಂದಿರಕ್ಕೆ ಹೋಗಿ ನೋಡಿದರೆ ಸಿನಿಮಾದಲ್ಲಿ ‘ಜಬ್ರಾ ಫ್ಯಾನ್..’ ಸಾಂಗ್ ಬರಲೇ ಇಲ್ಲ. ಇದರಿಂದ ನನ್ನ ಮಕ್ಕಳಿಗೆ ತುಂಬ ನಿರಾಸೆ ಆಯಿತು. ಅಂದು ರಾತ್ರಿ ಮಕ್ಕಳು ಊಟ ಮಾಡಲೇ ಇಲ್ಲ. ಇದರಿಂದ ಅವರಿಗೆ ಆ್ಯಸಿಡಿಟಿ ಹೆಚ್ಚಾಗಿ, ಆಸ್ಪತ್ರೆಗೆ ಸೇರಿಸಬೇಕಾಯಿತು’ ಎಂದು ತಮ್ಮ ದೂರಿನಲ್ಲಿ ಅಫ್ರೀನ್ ಫಾತಿಮಾ ಜೈದಿ ಉಲ್ಲೇಖಿಸಿದ್ದರು.
‘ಈ ರೀತಿ ಪ್ರಮೋಷನಲ್ ಸಾಂಗ್ ಮಾಡುವುದು ಸಹಜ ಸಂಗತಿ’ ಎಂದು ‘ಫ್ಯಾನ್’ ಸಿನಿಮಾ ನಿರ್ಮಾಪಕರ ಪರ ವಕೀಲರು ವಾದ ಮಾಡಿದರು. ಆದರೆ ಅದನ್ನು ಸುಪ್ರೀಂ ಕೋರ್ಟ್ ನ್ಯಾಯಾಧೀಶರು ಒಪ್ಪಲಿಲ್ಲ. ‘ಟ್ರೇಲರ್ನಲ್ಲಿ ಏನೋ ತೋರಿಸಿ, ಸಿನಿಮಾದಲ್ಲಿ ಮತ್ತಿನ್ನೇನೋ ತೋರಿಸಿದರೆ ಅದು ಜನರಿಗೆ ಮೋಸ ಮಾಡಿದಂತೆ ಆಗುತ್ತದೆ. ಸಿನಿಮಾದಲ್ಲಿ ಆ ಸಾಂಗ್ ಇಲ್ಲ ಎಂದಮೇಲೆ ಅದರನ್ನು ಪ್ರಚಾರಕ್ಕಾಗಿ ಯಾಕೆ ಬಳಸಿಕೊಳ್ಳಬೇಕು? ಇಂಥ ಸಂಗತಿಗಳು ನಿಲ್ಲಬೇಕು’ ಎಂದು ಹೇಳಿರುವ ಕೋರ್ಟ್, ಆ ಅಭಿಮಾನಿಗೆ 15 ಸಾವಿರ ರೂ. ಪರಿಹಾರ ನೀಡುವಂತೆ ‘ಫ್ಯಾನ್’ ಚಿತ್ರದ ನಿರ್ಮಾಪಕರಿಗೆ ಆದೇಶಿಸಿದೆ.
ಭಾರಿ ನಿರೀಕ್ಷೆಯೊಂದಿಗೆ ಬಿಡುಗಡೆ ಆಗಿದ್ದ ‘ಫ್ಯಾನ್’ ಚಿತ್ರ ಬಾಕ್ಸ್ಆಫೀಸ್ನಲ್ಲಿ ಹೀನಾಯವಾಗಿ ಸೋತಿತ್ತು. ಈಗ ಸುಪ್ರೀಂ ಕೋರ್ಟ್ನಿಂದ ದಂಡ ಹಾಕಿಸಿಕೊಂಡು ಮತ್ತೆ ನಷ್ಟ ಅನುಭವಿಸುವಂತಾಗಿದೆ. ಯಶ್ ರಾಜ್ ಫಿಲ್ಮ್ಸ್ ಸಂಸ್ಥೆಗೆ 15 ಸಾವಿರ ರೂ. ದಂಡ ದೊಡ್ಡ ಮೊತ್ತವೇನಲ್ಲ. ಆದರೆ ರಾಷ್ಟ್ರಮಟ್ಟದಲ್ಲಿ ಮುಖಭಂಗ ಆಗಿರುವುದು ಆ ಸಂಸ್ಥೆಯ ಪ್ರತಿಷ್ಠೆಗೆ ಪೆಟ್ಟು ಬಿದ್ದಂತೆಯೇ ಸರಿ.
ಇದನ್ನೂ ಓದಿ:
‘ಶಾರುಖ್ ಖಾನ್ರದ್ದು ಅತಿ ಕೆಟ್ಟ ಮತ್ತು ಸಹಿಸಲಾಗದ ನಟನೆ’; ಪತ್ನಿ ಗೌರಿ ಹೀಗೆ ಹೇಳಿದ್ದು ಯಾಕೆ?
ಸೋತು ಸುಣ್ಣವಾದ ಶಾರುಖ್ಗೆ ಈಗ ಓಟಿಟಿ ಅನಿವಾರ್ಯ; ಸತ್ಯ ಒಪ್ಪಿಕೊಂಡು ವಿಡಿಯೋ ಶೇರ್ ಮಾಡಿದ ನಟ
