ಶಾರುಖ್ ಖಾನ್ ಹೊಸ ಸಿನಿಮಾ ಬಿಡುಗಡೆಗೆ ಮುಹೂರ್ತ ನಿಗದಿ: ಸೂಪರ್ ಹಿಟ್ ಗ್ಯಾರೆಂಟಿ

ಶಾರುಖ್ ಖಾನ್ (Shah Rukh Khan)​ ಮುಟ್ಟಿದ್ದೆಲ್ಲವೂ ಚಿನ್ನವಾಗುತ್ತಿದೆ. ಕಳೆದ ಕೆಲ ವರ್ಷಗಳಿಂದ ಅನುಭವಿಸಿದ್ದ ಸತತ ಸೋಲು, ಮಗನ ಬಂಧನ ಇನ್ನಿತರೆ ನೋವುಗಳಿಂದ ತತ್ತರಿಸಿದ್ದ ಶಾರುಖ್ ಖಾನ್​ಗೆ 2023 ವೃತ್ತಿ ಜೀವನದಲ್ಲಿಯೇ ಅದೃಷ್ಟದ ವರ್ಷವಾಗಿ ಮಾರ್ಪಟ್ಟಂತಿದೆ.

2023ರಲ್ಲಿ ಈವರೆಗೆ ಶಾರುಖ್ ಖಾನ್​ ನಟನೆಯ ಎರಡು ಸಿನಿಮಾಗಳು ಬಿಡುಗಡೆ ಆಗಿದ್ದು, ಎರಡೂ ಸಿನಿಮಾಗಳೂ ಸೂಪರ್-ಡೂಪರ್ ಹಿಟ್ ಆಗಿದೆ. ಇದೇ ವರ್ಷದ ಜುಲೈನಲ್ಲಿ ಬಿಡುಗಡೆ ಆದ ‘ಪಠಾಣ್’ ಸಿನಿಮಾ ಬ್ಲಾಕ್ ಬಸ್ಟರ್ ಆಗಿತ್ತು. ಅದರ ಬಳಿಕ ಇತ್ತೀಚೆಗೆ ಬಿಡುಗಡೆ ಆದ ‘ಜವಾನ್’ ಸಿನಿಮಾ ಸಹ ದೊಡ್ಡ ಹಿಟ್ ಆಗಿದೆ. ‘ಜವಾನ್’ ಸಿನಿಮಾ 1000 ಕೋಟಿ ಬಾಕ್ಸ್ ಆಫೀಸ್ ಕಲೆಕ್ಷನ್ ಮಾಡಿದೆ. ಇದೇ ವರ್ಷ ಶಾರುಖ್ ಖಾನ್​ರ ಮತ್ತೊಂದು ಸಿನಿಮಾ ಸಹ ತೆರೆಗೆ ಬರಲಿದ್ದು, ಆ ಸಿನಿಮಾ ಸಹ ದೊಡ್ಡ ಬ್ಲಾಕ್ ಬಸ್ಟರ್ ಆಗುವ ಸಾಧ್ಯತೆ ದಟ್ಟವಾಗಿದೆ.

‘ಜವಾನ್’ ಸಿನಿಮಾ ಚಿತ್ರೀಕರಣ ಚಾಲ್ತಿಯಲ್ಲಿರುವಾಗಲೇ ಶಾರುಖ್ ಖಾನ್ ತಮ್ಮ ಮುಂದಿನ ಸಿನಿಮಾ ‘ಡಂಕಿ’ ಚಿತ್ರೀಕರಣವನ್ನು ಶುರು ಮಾಡಿದ್ದರು. ಭಾರತದ ಟಾಪ್ ನಿರ್ದೇಶಕರಲ್ಲಿ ಅಗ್ರಗಣ್ಯರಾಗಿರುವ ರಾಜ್​ಕುಮಾರ್ ಹಿರಾನಿ ‘ಡಂಕಿ’ಯ ನಿರ್ದೇಶಕರಾಗಿದ್ದು, ‘ಡಂಕಿ’ ಸಹ ದೊಡ್ಡ ಹಿಟ್ ಆಗುವುದು ಖಾತ್ರಿ ಎನ್ನಲಾಗುತ್ತಿದೆ.

ಇದನ್ನೂ ಓದಿ:ಶಾರುಖ್ ಖಾನ್ ಬಳಿಕ ಮತ್ತೊಬ್ಬ ಸ್ಟಾರ್ ಜೊತೆ ನಯನತಾರಾ ನಟನೆ, 16 ವರ್ಷದ ಬಳಿಕ ಮತ್ತೆ ಒಂದು

‘ಡಂಕಿ’ ಸಿನಿಮಾದ ಚಿತ್ರೀಕರಣ ಭರದಿಂದ ಸಾಗಿದ್ದು, ಆ ಸಿನಿಮಾ ಸಹ ಇದೇ ವರ್ಷ ಬಿಡುಗಡೆ ಆಗಲಿದೆ. ಸಿನಿಮಾವನ್ನು ಇದೇ ವರ್ಷ ಕ್ರಿಸ್​ಮಸ್ ವೇಳೆಗೆ ಬಿಡುಗಡೆ ಮಾಡುವ ಯೋಜನೆಯನ್ನು ಚಿತ್ರತಂಡ ಹಾಕಿಕೊಂಡಿದೆ. ಸಾಮಾನ್ಯವಾಗಿ ಕ್ರಿಸ್​ಮಸ್ ಅಥವಾ ದೀಪಾವಳಿ ವೇಳೆಗೆ ಶಾರುಖ್​ ಖಾನ್​ ತಮ್ಮ ಸಿನಿಮಾ ಬಿಡುಗಡೆ ಮಾಡುವ ಪದ್ಧತಿಯನ್ನು ಹಲವು ವರ್ಷ ಇರಿಸಿಕೊಂಡಿದ್ದರು. ಈಗ ಅದೇ ಪದ್ಧತಿಯನ್ನು ಮುಂದುವರೆಸಿ ‘ಡಂಕಿ’ ಸಿನಿಮಾವನ್ನು ಕ್ರಿಸ್​ಮಸ್ ವೇಳೆಗೆ ಬಿಡುಗಡೆ ಮಾಡಲಿದ್ದಾರೆ.

ಈ ದೀಪಾವಳಿ ಹಬ್ಬಕ್ಕೆ ಸಲ್ಮಾನ್ ಖಾನ್ ನಟನೆಯ ‘ಟೈಗರ್ 3’ ಸಿನಿಮಾ ಬಿಡುಗಡೆ ಆಗಲಿಕ್ಕಿದೆ. ಆ ಸಿನಿಮಾದ ಮೇಲೂ ಬಾಲಿವುಡ್ ಚಿತ್ರಪ್ರೇಮಿಗಳು ನಿರೀಕ್ಷೆ ಇಟ್ಟುಕೊಂಡಿದ್ದಾರೆ. ‘ಟೈಗರ್ 3’ ಸಿನಿಮಾದಲ್ಲಿ ಶಾರುಖ್ ಖಾನ್ ಅತಿಥಿ ಪಾತ್ರದಲ್ಲಿ ನಟಿಸಿದ್ದಾರೆ. ಒಂದೊಮ್ಮೆ ‘ಟೈಗರ್ 3’ ಸಿನಿಮಾ ಸಹ ಹಿಟ್ ಆದರೆ ಶಾರುಖ್ ಖಾನ್​ ಈ ವರ್ಷ ನಟಿಸಿದ ಎಲ್ಲ ಸಿನಿಮಾಗಳು ಹಿಟ್ ಆದಂತಾಗುತ್ತದೆ (‘ಡಂಕಿ’ ಪಕ್ಕಾ ಹಿಟ್ ಆಗುವ ಎಲ್ಲ ಸಾಧ್ಯತೆಗಳು ಇರುವ ಕಾರಣ).

‘ಡಂಕಿ’ ಸಿನಿಮಾವು ಅಕ್ರಮವಾಗಿ ವಲಸೆ ಮಾಡುವವರ ಕುರಿತಾದ ಕತೆಯನ್ನು ಒಳಗೊಂಡಿದೆ. ಸಿನಿಮಾದಲ್ಲಿ ತಾಪ್ಸಿ ಪನ್ನು ನಾಯಕಿ. ರಾಜ್​ಕುಮಾರ್ ಹಿರಾನಿ ಈ ಸಿನಿಮಾ ನಿರ್ದೇಶಿಸಿದ್ದಾರೆ. ‘ಮುನ್ನಾಭಾಯ್ ಎಂಬಿಬಿಎಸ್’, ‘ಲಗೇ ರಹೋ ಮುನ್ನಾಭಾಯಿ’, ‘3 ಇಡಿಯಟ್ಸ್’, ‘ಪಿಕೆ’, ‘ಸಂಜು’ ಅಂಥಹಾ ಸೂಪರ್-ಡೂಪರ್ ಹಿಟ್ ಸಿನಿಮಾಗಳನ್ನು ರಾಜ್​ಕುಮಾರ್ ಹಿರಾನಿ ಈವರೆಗೆ ನೀಡಿದ್ದಾರೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ