ಐಶಾರಾಮಿ ಮನೆ ‘ಮನ್ನತ್’ ಬಿಟ್ಟು ಬಾಡಿಗೆ ಮನೆಗೆ ಹೋಗುತ್ತಿರುವುದೇಕೆ ಶಾರುಖ್

ಮುಂಬೈನ ಅತ್ಯಂತ ಜನಪ್ರಿಯ ಮನೆಗಳಲ್ಲಿ ಶಾರುಖ್ ಖಾನ್​ರ ಮನ್ನತ್ ಮನೆ ಪ್ರಮುಖ ಸ್ಥಾನದಲ್ಲಿದೆ. ಅಂಬಾನಿಯವರ ಆಂಟಿಲ್ಲಾ ಮುಂಬೈನ ಅತ್ಯಂತ ದುಬಾರಿ ಮನೆ ಆದರೆ ಅತ್ಯಂತ ಜನಪ್ರಿಯ ಮನೆ ಎಂದರೆ ಅದು ಶಾರುಖ್ ಖಾನ್​ರ ಮನ್ನತ್, ಇದು ಜನಪ್ರಿಯ ಮಾತ್ರವಲ್ಲ ಮುಂಬೈನ ದುಬಾರಿ ಮನೆಗಳಲ್ಲಿ ಒಂದು ಸಹ. ಹಲವು ವರ್ಷಗಳಿಂದಲೂ ಶಾರುಖ್ ಖಾನ್ ಮನ್ನತ್ ಮನೆಯಲ್ಲಿ ಕುಟುಂಬದೊಡನೆ ವಾಸವಿದ್ದಾರೆ. ಶಾರುಖ್ ಖಾನ್​ ಒಡೆತನದ ಅತ್ಯಂತ ದುಬಾರಿ ಮತ್ತು ಪ್ರಮುಖವಾದ ಆಸ್ತಿಯೆಂದರೆ ಮನ್ನತ್, ಈ ಬಗ್ಗೆ ಅವರೇ ಹಲವು ಬಾರಿ ಹೇಳಿಕೊಂಡಿದ್ದಾರೆ. ಆದರೆ ಈಗ ಮನ್ನತ್ ಅನ್ನು ಬಿಡುತ್ತಿದ್ದಾರೆ ಶಾರುಖ್ ಖಾನ್.

ನಿನ್ನೆಯಷ್ಟೆ ವರದಿ ಆಗಿರುವಂತೆ ಶಾರುಖ್ ಖಾನ್​ ಮುಂಬೈನ ಪಾಲಿ ಹಿಲ್ಸ್ ಏರಿಯಾನಲ್ಲಿ ಎರಡು ಡ್ಯೂಪ್ಲೆಕ್ಸ್ ಮನೆಗಳನ್ನು ಬಾಡಿಗೆಗೆ ಪಡೆದುಕೊಂಡಿದ್ದಾರೆ. ಈ ಎರಡು ಮನೆಗಳಿಗೆ ವರ್ಷಕ್ಕೆ 8.70 ಕೋಟಿ ಬಾಡಿಗೆಯನ್ನು ಶಾರುಖ್ ಖಾನ್ ಪಾವತಿ ಮಾಡಲಿದ್ದಾರೆ. ಮನ್ನತ್ ಅಂಥಹಾ ಅದ್ಭುತವಾದ ಮನೆಯಲ್ಲಿದ್ದರೂ ಸಹ ಶಾರುಖ್ ಖಾನ್ ಈ ಎರಡು ಮನೆಗಳನ್ನು ಬಾಡಿಗೆಗೆ ಪಡೆದುಕೊಂಡಿದ್ದು ಏಕೆ ಎಂಬುದು ಪ್ರಶ್ನೆಯಾಗಿತ್ತು. ಆದರೆ ಈ ಬಗ್ಗೆ ಕೆಲ ಬಾಲಿವುಡ್ ಪತ್ರಿಕೆಗಳು ವರದಿ ಮಾಡಿವೆ.

ಕೆಲ ತಿಂಗಳ ಹಿಂದೆ, ಶಾರುಖ್ ಖಾನ್​ರ ಪತ್ನಿ ಗೌರಿ ಖಾನ್, ಮುಂಬೈ ಮಹಾನಗರ ಪಾಲಿಕೆಗೆ ಪತ್ರ ಬರೆದು ಮನ್ನತ್ ಮೇಲೆ ಎರಡು ದೊಡ್ಡ ಬಿಲ್ಡಿಂಗ್ ಕಟ್ಟಲು ಅನುಮತಿ ಕೇಳಿದ್ದರು. ಆದರೆ ಬಿಎಂಸಿ ಗೌರಿ ಖಾನ್​ ಅವರ ಮನವಿಯನ್ನು ತಿರಸ್ಕರಿಸಿತ್ತಂತೆ. ಅದಕ್ಕೆ ಈಗ ಮನ್ನತ್​ ಮನೆಯ ಹಲವು ಭಾಗಗಳನ್ನು ಒಡೆದು ಹಾಕಿ, ಶಾರುಖ್ ಖಾನ್​ ಕುಟುಂಬದ ಈಗಿನ ಅವಶ್ಯಕತೆಗೆ ತಕ್ಕಂತೆ ಮತ್ತೆ ಬಿಲ್ಡಿಂಗ್ ಅನ್ನು ಕಟ್ಟಲಾಗುತ್ತದೆಯಂತೆ. ಈ ನಿರ್ಮಾಣ ಕಾಮಗಾರಿ ಮುಂದಿನ ಕೆಲ ವರ್ಷಗಳ ವರೆಗೆ ನಡೆಯಲಿದ್ದು, ಇದೇ ಕಾರಣಕ್ಕೆ ಶಾರುಖ್ ಖಾನ್ ಹೊಸ ಮನೆಗೆ ಕುಟುಂಬ ಸಮೇತ ಸ್ಥಳಾಂತರ ಆಗುತ್ತಿದ್ದಾರೆ ಎನ್ನಲಾಗುತ್ತಿದೆ.

ಇದನ್ನೂ ಓದಿ:ಅವೆಂಜರ್ಸ್ ಸರಣಿಯಲ್ಲಿ ಶಾರುಖ್ ಖಾನ್? ದೊಡ್ಡ ಹಿಂಟ್ ಕೊಟ್ಟ ಹಾಲಿವುಡ್​ ನಟ

ಶಾರುಖ್ ಖಾನ್ ಸ್ವತಃ ಮುಂಬೈನಲ್ಲಿ ಕೆಲವು ಅಪಾರ್ಟ್​ಮೆಂಟ್​ಗಳನ್ನು ಹೊಂದಿದ್ದಾರೆ. ಅಲ್ಲದೆ ಕೆಲವು ಕಮರ್ಶಿಯಲ್ ಸ್ಪೇಸ್ ಸಹ ಅವರಿಗೆ ಇದೆ. ದುಬೈ, ಲಂಡನ್ ಇನ್ನೂ ಹಲವು ದೇಶಗಳಲ್ಲಿ ಶಾರುಖ್ ಖಾನ್ ಆಸ್ತಿಯನ್ನು ಹೊಂದಿದ್ದಾರೆ. ಆದರೆ ಮನ್ನತ್ ಮನೆಗೆ ಹತ್ತಿರವಾಗಿಯೇ ಇರಬೇಕು ಎಂಬ ಕಾರಣಕ್ಕೆ ಈಗ ಪಾಲಿ ಹಿಲ್ಸ್​ನಲ್ಲಿ ಎರಡು ಮನೆಗಳನ್ನು ಸೀಮಿತ ಅವಧಿಗೆ ಬಾಡಿಗೆಗೆ ಪಡೆದಿದ್ದಾರೆ. ಶಾರುಖ್ ಖಾನ್​ರ ಕುಟುಂಬ ಮತ್ತು ಅವರ ಸಿಬ್ಬಂದಿ ಮುಂದಿನ ಕೆಲ ವರ್ಷಗಳ ಕಾಲ ಪಾಲಿ ಹಿಲ್ಸ್​ನ ಡ್ಯೂಪ್ಲೆಕ್ಸ್​ ಮನೆಯಲ್ಲಿ ವಾಸ ಇರಲಿದ್ದಾರೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಮ್ ಮಾಡಿ