ಸಿನಿಮಾ ಪ್ರಚಾರಕ್ಕೆ ಪಬ್ಲಿಕ್​ನಲ್ಲಿ ಪ್ರಾಂಕ್ ವಿಡಿಯೋ ಮಾಡಿದ ಹೀರೋ; ಏನೋ ಮಾಡಲು ಹೋಗಿ ಇನ್ನೇನೋ ಆಯ್ತು

ಟ್ರಾಫಿಕ್​ನಲ್ಲಿ (Traffic) ವಾಹನಗಳು ಸಾಲಾಗಿ ನಿಂತಿವೆ. ಈ ವಾಹನಗಳ ಮಧ್ಯೆ ಬರುವ ವ್ಯಕ್ತಿಯೋರ್ವ ಮೈಮೇಲೆ ಏನನ್ನೋ ಸುರಿದುಕೊಳ್ಳುತ್ತಾನೆ. ನೋಡಲು ಅದು ಪೆಟ್ರೋಲ್ (Petrol)​ ರೀತಿಯಲ್ಲೇ ಇದೆ. ನಂತರ ಕೈಯಲ್ಲಿರುವ ಬೆಂಕಿ ಪೊಟ್ಟಣವನ್ನು ತೆಗೆದುಕೊಂಡು ಕಡ್ಡಿ ಗೀರಲು ಮುಂದಾಗುತ್ತಾನೆ. ಈ ದೃಶ್ಯವನ್ನು ಸ್ಥಳದಲ್ಲಿದ್ದುಕೊಂಡು ನೀವು ನೋಡುತ್ತಿದ್ದೀರಿ ಎಂದಾದರೆ ಒಮ್ಮೆ ಭಯ ಆಗೋದು ಗ್ಯಾರಂಟಿ. ಈ ರೀತಿ ಮಾಡಲು ಹೋಗಿ ನಟನಿಗೆ (Tollywood Hero)  ಸಂಕಷ್ಟ ಎದುರಾಗಿದೆ. ಸಿನಿಮಾ ಪ್ರಚಾರಕ್ಕೆ ಪ್ರಾಂಕ್ ಮಾಡಿದ ಹೀರೋ ವಿರುದ್ಧ ಕೇಸ್ ದಾಖಲಾಗಿದೆ.

ಜನರು ಹೆಚ್ಚು ಇಂಟರ್​ನೆಟ್ ಬಳಸಲು ಆರಂಭಿಸಿದ ನಂತರ ಯೂಟ್ಯೂಬ್ ನೋಡುಗರ ಸಂಖ್ಯೆ ಕೂಡ ಹೆಚ್ಚಿದೆ. ಈ ಕಾರಣಕ್ಕೆ ವಿಡಿಯೋ ಕ್ರಿಯೇಟ್ ಮಾಡಲು ನಾನಾ ರೀತಿಯ ಕಸರತ್ತಿನ ಮೊರೆ ಹೋಗಲಾಗುತ್ತದೆ. ಇನ್ನೂ ಕೆಲವರು ಪ್ರಾಂಕ್ ವಿಡಿಯೋ ಮಾಡಿ ಪ್ರಚಾರ ಹಾಗೂ ಹಣ ಎರಡನ್ನೂ ಮಾಡಿಕೊಳ್ಳುತ್ತಾರೆ. ಈಗ ಸಿನಿಮಾ ಪ್ರಚಾರಕ್ಕೆ ತೆಲುಗು ನಟ ವಿಶ್ವಕ್​ ಸೇನ್ ಪ್ರಾಂಕ್ ವಿಡಿಯೋ ಮಾಡಿದ್ದಾರೆ. ಇದರಿಂದ ಅವರು ಸಂಕಷ್ಟ ಎದುರಿಸಿದ್ದಾರೆ.

ತೆಲುಗಿನ ‘ಅಶೋಕ ವನಮ್ಲೋ ಅರ್ಜುನ ಕಲ್ಯಾಣಂ’ ಸಿನಿಮಾ ಮೇ 6ರಂದು ತೆರೆಗೆ ಬರುತ್ತಿದೆ. ಈ ಸಿನಿಮಾದ ಪ್ರಚಾರ ಕಾರ್ಯದಲ್ಲಿ ವಿಶ್ವಕ್​ ಸೇನ್ ಬ್ಯುಸಿ ಆಗಿದ್ದಾರೆ. ಈ ಸಿನಿಮಾ ಪ್ರಚಾರಕ್ಕೆ ಚಿತ್ರ ತಂಡ ಹೊಸ ಮಾರ್ಗ ತುಳಿಯಲು ಮುಂದಾಗಿತ್ತು. ಆತ್ಮಹತ್ಯೆಯ ಪ್ರಾಂಕ್ ವಿಡಿಯೋ ಮಾಡಿತ್ತು. ಈ ವಿಡಿಯೋ ಶೂಟ್ ಮಾಡುವಾಗ ಸ್ಥಳದಲ್ಲಿದ್ದ ಕೆಲವರು ಆತಂಕಗೊಂಡಿದ್ದರು. ಈ ವಿಡಿಯೋ ಯೂಟ್ಯೂಬ್​ನಲ್ಲಿ ವೈರಲ್ ಆಗಿತ್ತು. ನಟನಿಗೆ ಮೆಚ್ಚುಗೆ ವ್ಯಕ್ತಪಡಿಸುವ ಬದಲು ಛೀಮಾರಿ ಹಾಕಿದ್ದರು.

ಈ ಘಟನೆಗೆ ಸಂಬಂಧಿಸಿದಂತೆ ಹೈಕೋರ್ಟ್​ ವಕೀಲರೊಬ್ಬರು ಮಾನವ ಹಕ್ಕು ಆಯೋಗಕ್ಕೆ ದೂರು ನೀಡಿದ್ದಾರೆ. ‘ವಿಶ್ವಕ್ ಸೇನ್ ಮಾಡಿದ ವಿಡಿಯೋದಿಂದ ಸಾರ್ವಜನಿಕರಿಗೆ ತೊಂದರೆ ಉಂಟಾಗಿದೆ. ಈ ವಿಡಿಯೋವನ್ನು ತೆಗೆದು ಹಾಕಬೇಕು. ಈ ರೀತಿಯ ಹಲವು ಪ್ರಾಂಕ್ ವಿಡಿಯೋಗಳು ಯೂಟ್ಯೂಬ್​ನಲ್ಲಿವೆ. ಅದನ್ನು ಡಿಲೀಟ್ ಮಾಡಲು ಸೂಚನೆ ನೀಡಬೇಕು’ ಎಂದು ಆಯೋಗದ ಬಳಿ ಹೈಕೋರ್ಟ್​ ವಕೀಲರು ಮನವಿ ಮಾಡಿಕೊಂಡಿದ್ದಾರೆ.

ನ್ಯೂಸ್​ ಚಾನೆಲ್​ ಆ್ಯಂಕರ್ ಜತೆ ವಿಶ್ವಕ್​ ಸೇನ್ ಜಗಳಕ್ಕೆ ಇಳಿದಿದ್ದರು. ಈ ವಿಡಿಯೋ ಕೂಡ ವೈರಲ್ ಆಗಿದೆ. ಇದು ಸಾಕಷ್ಟು ವಿವಾದ ಸೃಷ್ಟಿ ಮಾಡಿತ್ತು. ಹೀಗಿರುವಾಗಲೇ ಮತ್ತೊಂದು ಸಂಕಷ್ಟ ವಿಶ್ವಕ್​ ಸೇನ್​ಗೆ ಎದುರಾಗಿದೆ. ಇದೆಲ್ಲವೂ ಸಿನಿಮಾ ಪ್ರಚಾರದ ಗಿಮಿಕ್ ಎಂದು ಕೆಲವರು ದೂರಿದ್ದಾರೆ.

ಇತರೆ ಮನರಂಜನೆಯ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ. ಪ್ರಮುಖ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ. 

ಇದನ್ನೂ ಓದಿ:  ‘ಮಗಳ ಪ್ರೊಡಕ್ಷನ್​ನಲ್ಲಿ ನಾನೂ ಒಂದು ವೆಬ್ ಸೀರಿಸ್ ಮಾಡ್ತಾ ಇದೀನಿ’; ಶಿವರಾಜ್​ಕುಮಾರ್ ಅಚ್ಚರಿಯ ಘೋಷಣೆ

Meghana Raj Birthday: ಮೇಘನಾ ರಾಜ್​ಗೆ ಜನ್ಮದಿನದ ಸಂಭ್ರಮ; ಪತಿ ಚಿರು ಜತೆ ವಯಸ್ಸಿನ ಅಂತರ ಎಷ್ಟಿತ್ತು?