ಬರಲಿದೆಯಾ ‘ಈಗ 2’? ಕಿಚ್ಚ ಸುದೀಪ್​-ರಾಜಮೌಳಿ ಮತ್ತೆ ಜೊತೆಯಾಗೋದು ಯಾವಾಗ?​

ಸುದೀಪ್ ನಟನೆಯ ‘ಈಗ’ ಚಿತ್ರ ತೆರೆಕಂಡು 9 ವರ್ಷ ಕಳೆದಿದೆ. ಈ ಸಂದರ್ಭದಲ್ಲಿ ಆ ಚಿತ್ರವನ್ನು ಸುದೀಪ್​ ಮೆಲುಕು ಹಾಕಿದ್ದಾರೆ. ಅಂಥ ಅದ್ಭುತ ಸಿನಿಮಾ ನೀಡಿದ ನಿರ್ಮಾಪಕ ಸಾಯಿ ಹಾಗೂ ನಿರ್ದೇಶಕ ರಾಜಮೌಳಿ ಅವರಿಗೆ ಕಿಚ್ಚ ಧನ್ಯವಾದ ಅರ್ಪಿಸಿದ್ದಾರೆ. ಸುದೀಪ್​ ಅಭಿಮಾನಿಗಳು ‘ಈಗ’ ಚಿತ್ರದ ಬಗ್ಗೆ ಮತ್ತೆ ಮಾತನಾಡುತ್ತಿದ್ದಾರೆ. ಅದರ ಜೊತೆಗೆ ‘ಈಗ 2’ ಯಾವಾಗ ಬರಲಿದೆ ಎಂಬ ಪ್ರಶ್ನೆ ಕೂಡ ಹಲವರ ಮನಸ್ಸಿನಲ್ಲಿ ಕೊರೆಯುತ್ತಿದೆ. ಮತ್ತೆ ರಾಜಮೌಳಿ ಮತ್ತು ಸುದೀಪ್​ ಕಾಂಬಿನೇಷನ್​ಗಾಗಿ ಸಿನಿಪ್ರಿಯರು ಕಾದಿದ್ದಾರೆ. ‘ಈಗ 2’ ಮಾಡಬೇಕು ಎಂಬುದು ಚಿತ್ರತಂಡದ ಹಳೇ ಪ್ಲ್ಯಾನ್​.

‘ಈಗ’ ಸಿನಿಮಾದಲ್ಲಿ ಒಂದು ನೊಣವೇ ಹೀರೋ. ಇಂಥ ಡಿಫರೆಂಟ್​ ಆದಂತಹ ಕಾನ್ಸೆಪ್ಟ್​ ಇಟ್ಟುಕೊಂಡು ಸಿನಿಮಾ ಮಾಡಿದ್ದು ನಿರ್ದೇಶಕ ರಾಜಮೌಳಿ ಅವರ ಹೆಚ್ಚುಗಾರಿಕೆ. ಅತ್ಯಾಧುನಿಕ ಗ್ರಾಫಿಕ್ಸ್​ ತಂತ್ರಜ್ಞಾನ ಬಳಸಿಕೊಂಡು ಆ ನೊಣವನ್ನು ಕ್ರಿಯೇಟ್​ ಮಾಡಲಾಯಿತು. ಶೂಟಿಂಗ್​ ಸಮಯದಲ್ಲಿ ಇಲ್ಲದ ನೊಣವನ್ನು ಇದೆ ಎಂದು ಕಲ್ಪಿಸಿಕೊಂಡು ನಟಿಸಿದ್ದು ಸುದೀಪ್​ ಪ್ರತಿಭೆಗೆ ಹಿಡಿದ ಕನ್ನಡಿ ಆಗಿತ್ತು. ಬಾಕ್ಸ್​ ಆಫೀಸ್​ನಲ್ಲಿ ‘ಈಗ’ ಉತ್ತಮ ಕಮಾಯಿ ಮಾಡಿತು. ಆ ಬಳಿಕ ‘ಈಗ’ ಚಿತ್ರಕ್ಕೆ ‘ಪಾರ್ಟ್​ 2’ ಮಾಡುವ ಬಗ್ಗೆ ಮಾತುಕತೆ ಶುರುವಾಯಿತು.

‘ಈಗ 2’ ಬಗ್ಗೆ ಹಲವು ಲೇಖನಗಳು ಪ್ರಕಟ ಆದವು. ಆದರೆ ಈವರೆಗೂ ಸೀಕ್ವೆಲ್​ ಸೆಟ್ಟೇರಿಲ್ಲ. ಹಾಗಂತ ‘ಈಗ 2’ ಬಗ್ಗೆ ಅಭಿಮಾನಿಗಳು ಆಸೆ ಬಿಟ್ಟುಬಿಡಬೇಕು ಎಂದೇನಿಲ್ಲ. ಈ ಕುರಿತು ಕಥೆಗಾರ ವಿಜಯೇಂದ್ರ ಪ್ರಸಾದ್​ ಅವರಿಗೆ ಪ್ರಶ್ನೆ ಮಾಡಿದಾಗ ಅವರಿಂದ ಖುಷಿಯ ವಿಚಾರ ಹೊರಬಿದ್ದಿತ್ತು. ‘ನಮಗೆ ‘ಈಗ’ ಚಿತ್ರದ ಸೀಕ್ವೆಲ್​ ಮಾಡುವ ಬಗ್ಗೆ ಆಲೋಚನೆ ಇದೆ. ಆದರೆ ಅದು ಶೀಘ್ರದಲ್ಲೇ ಆಗುವುದಿಲ್ಲ’ ಎಂದು ಹೇಳಿದ್ದರು. ಹಾಗಾಗಿ ಇನ್ನೂ ಒಂದಷ್ಟು ವರ್ಷಗಳ ಕಾಲ ಅಭಿಮಾನಿಗಳು ಕಾಯಬೇಕಾಗಿರುವುದು ಅನಿವಾರ್ಯ.

ಸದ್ಯ ರಾಜಮೌಳಿ ಅವರು ‘ಆರ್​ಆರ್​ಆರ್​’ ಸಿನಿಮಾದ ಶೂಟಿಂಗ್​ನಲ್ಲಿ ಬ್ಯುಸಿ ಆಗಿದ್ದಾರೆ. ನಂತರ ಮಹೇಶ್​ ಬಾಬು ಜೊತೆ ಅವರು ಹೊಸ ಸಿನಿಮಾ ಮಾಡುವ ಬಗ್ಗೆ ಸುದ್ದಿ ಕೇಳಿಬರುತ್ತಿದೆ. ಇತ್ತ, ಸುದೀಪ್​ ಅವರು ‘ವಿಕ್ರಾಂತ್​ ರೋಣ’ ಸಿನಿಮಾದ ಪೋಸ್ಟ್​ ಪ್ರೊಡಕ್ಷನ್​ ಕೆಲಸಗಳಲ್ಲಿ ಭಾಗಿ ಆಗಿದ್ದಾರೆ. ಪ್ಯಾನ್​ ಇಂಡಿಯಾ ಮಟ್ಟದಲ್ಲಿ ಆ ಚಿತ್ರ ಮೂಡಿಬರುತ್ತಿದೆ. ಹೀಗೆ ಬೇರೆ ಬೇರೆ ಪ್ರಾಜೆಕ್ಟ್​ಗಳಲ್ಲಿ ಸುದೀಪ್​ ಹಾಗೂ ರಾಜಮೌಳಿ ಬ್ಯುಸಿ ಆಗಿರುವುದರಿಂದ ಅವರು ‘ಈಗ 2’ ಬಗ್ಗೆ ಯಾವಾಗ ಗಮನ ಹರಿಸುತ್ತಾರೆ ಎಂಬುದನ್ನು ಕಾದು ನೋಡಬೇಕು.

ಇದನ್ನೂ ಓದಿ:

‘ಈಗ’, ‘ಹುಚ್ಚ’; ಸುದೀಪ್​ ಜೀವನದಲ್ಲಿ ಮರೆಯಲಾಗದ ಈ 2 ಸಿನಿಮಾಗಳಿಗೆ ಸ್ಪೆಷಲ್​ ದಿನವಿದು

ರಾಜಮೌಳಿ ವಿರುದ್ಧ ಸಿಡಿದೆದ್ದ ಶ್ವಾನಪ್ರಿಯರು; ಅಸಲಿಗೆ ಇಲ್ಲಿ ತಪ್ಪು ಯಾರದ್ದು?