‘ರಸೋಡೆ ಮೇ ಕೌನ್ ಥಾ’ ಎಂದಿದ್ದ ಹಿರಿಯ ನಟಿ ರೂಪಾಲ್​ ಪಟೇಲ್​ ಆಸ್ಪತ್ರೆಗೆ ದಾಖಲು

ಹಿಂದಿಯ ‘ಸಾಥ್​​ ನಿಭಾನಾ ಸಾಥಿಯಾ’ ಧಾರಾವಾಹಿ ಖ್ಯಾತಿಯ ಹಿರಿಯ ನಟಿ ರೂಪಾಲ್ ಪಟೇಲ್​ಗೆ ಈಗ ಅನಾರೋಗ್ಯ ಕಾಡಿದೆ. ಹೀಗಾಗಿ, ಅವರನ್ನು ಮುಂಬೈನ ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ. ಅವರಿಗೆ ಯಾವ ಸಮಸ್ಯೆ ಕಾಡುತ್ತಿದೆ ಎಂಬ ವಿಚಾರ ಇನ್ನೂ ಬಹಿರಂಗಗೊಂಡಿಲ್ಲ. ಅವರ ಪತಿ ರಾಧಾ ಕೃಷ್ಣ ದತ್​​ ಅವರು ಈ ಬಗ್ಗೆ ಮಾಹಿತಿ ನೀಡಿದ್ದಾರೆ.

ಕೆಲ ದಿನಗಳ ಹಿಂದೆ ರೂಪಾಲ್​ ಅವರಿಗೆ ತೀವ್ರ ಅನಾರೋಗ್ಯ ಕಾಡಿತ್ತು. ಹೀಗಾಗಿ, ಅವರನ್ನು ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ. ವೈದ್ಯರು ಪರೀಕ್ಷೆ ನಡೆಸುತ್ತಿದ್ದು, ರೂಪಾಲ್ ಆರೋಗ್ಯ ಸಮ ಸ್ಥಿತಿಗೆ ಬಂದಿದೆ. ಅವರು ಕೆಲವೇ ದಿನಗಳಲ್ಲಿ ಆಸ್ಪತ್ರೆಯಿಂದ ಡಿಸ್ಚಾರ್ಜ್​ ಆಗಲಿದ್ದಾರೆ ಎಂದು ತಿಳಿದು ಬಂದಿದೆ. ‘ಮುಂದಿನ ಮೂರ್ನಾಲ್ಕು ದಿನಗಳಲ್ಲಿ ರೂಪಾಲ್​ ಆರೋಗ್ಯ ಸಂಪೂರ್ಣವಾಗಿ ಚೇತರಿಕೆ ಕಾಣಲಿದೆ. ಆ ನಂತರವೇ ಅವರು ಆಸ್ಪತ್ರೆಯಿಂದ ಮನೆಗೆ ತೆರಳಲಿದ್ದಾರೆ’ ಎಂದು ಮೂಲಗಳು ಹೇಳಿವೆ.

‘ಸಾಥ್​​ ನಿಭಾನಾ ಸಾಥಿಯಾ’ ಧಾರಾವಾಹಿಯಲ್ಲಿ ಕೋಕಿಲಾ ಮೋದಿ ಪಾತ್ರಕ್ಕೆ ರೂಪಾಲ್​ ಬಣ್ಣ ಹಚ್ಚಿದ್ದರು. ಈ ಮೂಲಕ ಅವರ ಖ್ಯಾತಿ ಸಾಕಷ್ಟು ಹೆಚ್ಚಿತ್ತು. ರೂಪಾಲ್​ ಕಳೆದ ವರ್ಷ ದೊಡ್ಡ ಮಟ್ಟದಲ್ಲಿ ಸುದ್ದಿಯಾಗಿದ್ದರು. ಇದಕ್ಕೆ ಕಾರಣ ಮ್ಯುಸೀಶಿಯನ್ ಯಶ್​ರಾಜ್​ ಮುಖಟೆ. ‘ಸಾಥ್​​ ನಿಭಾನಾ ಸಾಥಿಯಾ’ದಲ್ಲಿ ಬರುವ ರಸೋಡೆ ಮೇ ಕೌನ್​ ಥಾ ಎಂಬ ಸಂಭಾಷಣೆಗೆ ರ‍್ಯಾಪ್​ ಮಾಡಿದ್ದರು. ಈ ಮೂಲಕ ಯಶ್​ರಾಜ್​ ಹಾಗೂ ರೂಪಾಲ್​ ಇಬ್ಬರೂ ದೊಡ್ಡ ಮಟ್ಟದಲ್ಲಿ ಸುದ್ದಿ ಮಾಡಿದರು. ‘ಸಾಥ್​​ ನಿಭಾನಾ ಸಾಥಿಯಾ 2’ನಲ್ಲಿ ಕೋಕಿಲಾ ಆಗಿಯೇ ರೂಪಾಲ್​ ಕಾಣಿಸಿಕೊಂಡಿದ್ದರು. ಆದರೆ, ಒಂದೇ ತಿಂಗಳಲ್ಲಿ ಅವರು ಈ ಧಾರಾವಾಹಿಯಿಂದ ಹೊರ ಬಂದಿದ್ದರು.

ಯೇ ರಿಶ್ತೆ ಹೈ ಪ್ಯಾರ್​ ಕೆ ಧಾರಾವಾಹಿಯಲ್ಲೂ ರೂಪಾಲ್​ ನಟಿಸಿದ್ದಾರೆ. ಇದಲ್ಲದೆ, ‘ಅಂತರ್ನಾದ’, ‘ಸೂರಜ್​ ಕಾ ಸತ್ವಾನ್​ ಘೋದಾ’, ಸಮರ್​ ಚಿತ್ರಗಳಲ್ಲಿ ರೂಪಾಲ್​ ನಟಿಸಿದ್ದಾರೆ. ಅವರ ಆರೋಗ್ಯದಲ್ಲಿ ಏರು ಪೇರು ಕಂಡಿರುವುದು ಅಭಿಮಾನಿಗಳಲ್ಲಿ ಆತಂಕ ಮೂಡಿಸಿದೆ.

ಇದನ್ನೂ ಓದಿ:

ಖ್ಯಾತ ಧಾರಾವಾಹಿ ನಟಿ ಬಗ್ಗೆ ಮಂಜು ಪಾವಗಡ ಹೇಳಿದ ಒಗಟನ್ನು ನಿಮ್ಮಿಂದ ಬಿಡಿಸೋಕೆ ಸಾಧ್ಯವಾ?

2020 year in review | ಸಾಮಾಜಿಕ ಮಾಧ್ಯಮಗಳಲ್ಲಿ ನಗೆಯುಕ್ಕಿಸಿದ ಮೀಮ್​ಗಳು