ಜಿಎಸ್​ಟಿ ದರ ಪರಿಷ್ಕರಣೆ: ಸಿನಿಮಾ ಟಿಕೆಟ್ ದರ ಇಳಿಕೆ, ಆದರೆ…

ಕೇಂದ್ರ ಸರ್ಕಾರ ಇಂದು (ಸೆಪ್ಟೆಂಬರ್ 04) ಜಿಎಸ್​ಟಿ ದರ ಪರಿಷ್ಕರಣೆ ಮಾಡಿದೆ. ಹಲವು ಅವಶ್ಯಕ ವಸ್ತುಗಳ ಮೇಲಿನ ತೆರಿಗೆ ಇಳಿಸಲಾಗಿದೆ. ಐಶಾರಾಮಿ ವಸ್ತುಗಳ ಮೇಲಿನ ತೆರಿಗೆ ಹೆಚ್ಚಿಸಲಾಗಿದೆ. ಸಿನಿಮಾ ಟಿಕೆಟ್ ದರ ಇಳಿಕೆ ಬಗ್ಗೆ ಹಲವು ಚಿತ್ರರಂಗಗಳಲ್ಲಿ ಚರ್ಚೆ ಜಾರಿಯಲ್ಲಿತ್ತು. ಮಲ್ಟಿಪ್ಲೆಕ್ಸ್ ಅಸೋಸಿಯೇಷನ್​​ನವರು ಕೇಂದ್ರ ಸರ್ಕಾರಕ್ಕೆ ಈ ಬಗ್ಗೆ ಮನವಿ ಸಲ್ಲಿಸಿ, ಮನೊರಂಜನಾ ತೆರಿಗೆ ಇಳಿಸುವಂತೆ ಮನವಿ ಮಾಡಿದ್ದರು. ಹಾಗಾಗಿ ಚಿತ್ರರಂಗಕ್ಕೆ ಇಂದಿನ ಸಭೆಯ ಬಗ್ಗೆ ಭಾರಿ ನಿರೀಕ್ಷೆ ಇತ್ತು. ಇಂದಿನ ಸಭೆಯ ನಿರ್ಣಯ ಚಿತ್ರರಂಗಕ್ಕೆ ಅಲ್ಪ ಖುಷಿಯನ್ನಷ್ಟೆ ತಂದಿದೆ.

ಚಿತ್ರರಂಗದ ಮನವಿಯಂತೆ ಟಿಕೆಟ್ ದರದ ಮೇಲಿನ ಜಿಎಸ್​​ಟಿಯನ್ನು ಕಡಿತಗೊಳಿಸಲಾಗಿದೆ. ಆದರೆ ಎಲ್ಲ ಟಿಕೆಟ್​ಗಳ ಮೇಲೂ ಅಲ್ಲ. ಈ ಹಿಂದೆ 100 ರೂಪಾಯಿಗಳಿಗಿಂತಲೂ ಕಡಿಮೆ ದರದ ಟಿಕೆಟ್​ಗೆ 12% ಜಿಎಸ್​​ಟಿ ಹೇರಲಾಗುತ್ತಿತ್ತು. 100 ರೂಪಾಯಿಗಿಂತಲೂ ಹೆಚ್ಚಿನ ಟಿಕೆಟ್ ದರಕ್ಕೆ 18% ಟಿಕೆಟ್ ದರ ಹೇರಲಾಗುತ್ತಿತ್ತು. ಎರಡೂ ಟಿಕೆಟ್ ದರಗಳ ಮೇಲಿನ ಜಿಎಸ್​​ಟಿಯನ್ನು ತಲಾ 7% ಇಳಿಕೆ ಮಾಡುವಂತೆ ಮಲ್ಟಿಪ್ಲೆಕ್ಸ್ ಅಸೋಸಿಯೇಷನ್ ಸೇರಿದಂತೆ ಚಿತ್ರಮಂದಿರ ಹಾಗೂ ನಿರ್ಮಾಪಕ, ವಿತರಕರ ಮನವಿ ಆಗಿತ್ತು.

ಇಂದಿನ ಸಭೆಯಲ್ಲಿ ಟಿಕೆಟ್ ದರದ ಮೇಲಿನ ಜಿಎಸ್​​ಟಿ ಇಳಿಕೆ ಮಾಡಲಾಗಿದೆ. ಆದರೆ 100 ರೂಪಾಯಿಗೂ ಕಡಿಮೆ ದರದ ಟಿಕೆಟ್​ಗಳ ಮೇಲಿನ ಜಿಎಸ್​​ಟಿಯನ್ನು ಮಾತ್ರವೇ ಕಡಿತಗೊಳಿಸಲಾಗಿದೆ. ಈ ಹಿಂದೆ 12% ಇದ್ದ ಜಿಎಸ್​​ಟಿಯನ್ನು ಇಳಿಕೆ ಮಾಡಿ 5% ಮಾಡಲಾಗಿದೆ. ಆದರೆ 100 ರೂಪಾಯಿಗಳಿಗೂ ಹೆಚ್ಚು ದರ ಇರುವ ಟಿಕೆಟ್​ಗಳ ಮೇಲೆ ಈ ಹಿಂದೆ ಇದ್ದ 18% ಜಿಎಸ್​​ಟಿಯನ್ನು ಹಾಗೆಯೇ ಮುಂದುವರೆಸಲಾಗಿದೆ.

ಇದನ್ನೂ ಓದಿ:‘ಹರಿ ಹರ ವೀರ ಮಲ್ಲು’ ಸಿನಿಮಾ ಟಿಕೆಟ್ ದರ: ಯಾವ ರಾಜ್ಯದಲ್ಲಿ ಎಷ್ಟಿದೆ?

ಅಸಲಿಗೆ ಈಗ 100 ರೂಪಾಯಿಗೂ ಕಡಿಮೆ ದರದ ಟಿಕೆಟ್​ಗಳು ಮಾರಾಟ ಆಗುವುದು ವಿರಳದಲ್ಲಿ ವಿರಳ. ತಮಿಳುನಾಡು, ತೆಲಂಗಾಣ, ಕೇರಳದ ಕೆಲವು ನಗರಗಳು, ಬಿಹಾರ, ಉತ್ತರ ಪ್ರದೇಶ ಇನ್ನೂ ಕೆಲವು ರಾಜ್ಯಗಳ ಸಣ್ಣ-ಪುಟ್ಟ ನಗರಗಳಲ್ಲಿ ಮಾತ್ರವೇ ಸಿನಿಮಾ ಟಿಕೆಟ್ ದರಗಳು 100 ರೂಪಾಯಿಗೂ ಕಡಿಮೆ ಇವೆ. ಕರ್ನಾಟಕದಲ್ಲಂತೂ ತಾಲ್ಲೂಕು, ಪಟ್ಟಣ ಪ್ರದೇಶಗಳ ಚಿತ್ರಮಂದಿರಗಳಲ್ಲಿಯೂ ಸಹ ಟಿಕೆಟ್ ದರ 100 ರೂಪಾಯಿಗೂ ಹೆಚ್ಚಿಗೆ ಇದೆ. ಹಾಗಾಗಿ ಕೇಂದ್ರ ಸರ್ಕಾರದ ಈ ನಿರ್ಣಯದಿಂದ ಹೆಚ್ಚಿನ ಸಿನಿಮಾ ಪ್ರೇಕ್ಷಕರಿಗೆ ಸಹಾಯ ಆಗುವುದಿಲ್ಲ ಎಂದೇ ಹೇಳಬೇಕಾಗುತ್ತದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ