IT Raid: ಖ್ಯಾತ ನಿರ್ಮಾಪಕನ ಮನೆ, ಕಚೇರಿ ಮೇಲೆ ಐಟಿ ದಾಳಿ; ಸಿನಿಮಾ ಸೆಲೆಬ್ರಿಟಿಗಳಿಗೆ ಶುರುವಾಯ್ತು ಢವಢವ

ತಮಿಳು ಚಿತ್ರರಂಗದ ನಿರ್ಮಾಪಕ ಹಾಗೂ ಫೈನಾನ್ಶಿಯರ್​ ಅನ್ಬು ಚೆಳಿಯನ್​ ಅವರ ಮನೆ ಮತ್ತು ಕಚೇರಿ ಮೇಲೆ ಐಟಿ ದಾಳಿ (IT Raid) ಮಾಡಲಾಗಿದೆ. ಮಂಗಳವಾರ (ಆಗಸ್ಟ್​ 2) ಮುಂಜಾನೆ ಈ ದಾಳಿ ನಡೆದಿದ್ದು, ಚೆನ್ನೈ ಮತ್ತು ಮಧುರೈ ಸೇರಿ 50 ಕಡೆಗಳಲ್ಲಿ ಅಧಿಕಾರಿಗಳು ಕಾರ್ಯಚರಣೆ ನಡೆಸುತ್ತಿದ್ದಾರೆ. ಹಲವು ಸಿನಿಮಾಗಳಿಗೆ ಫೈನಾನ್ಸ್​ ಮಾಡಿದ ಅನ್ಬು ಚೆಳಿಯನ್ (Anbu Chezhiyan)​ ಅವರ ಮೇಲೆ ತೆರಿಗೆ ವಂಚನೆ ಆರೋಪ ಇದೆ. ಅಲ್ಲದೇ ಕಾಲಿವುಡ್​ನ ಅನೇಕ ಸೆಲೆಬ್ರಿಟಿಗಳ ಮೇಲೆ ಆದಾಯ ತೆರಿಗೆ ಇಲಾಖೆ (Income Tax Department) ಕಣ್ಣಿಟ್ಟಿದೆ. ಅನ್ಬು ಚೆಳಿಯನ್​ ಅವರ ದಾಖಲೆಗಳನ್ನು ಪರಿಶೀಲಿಸಲಾಗುತ್ತಿದೆ. ಅವರ ಜೊತೆ ವ್ಯವಹಾರ ಹೊಂದಿರುವ ಇತರೆ ಸೆಲೆಬ್ರಿಟಿಗಳಿಗೆ ಈಗ ಢವಢವ ಶುರುವಾಗಿದೆ.

ಅನ್ಬು ಚೆಳಿಯನ್​ ಮಾತ್ರವಲ್ಲದೇ ಇನ್ನೂ ಅನೇಕ ನಿರ್ಮಾಪಕರು ಹಾಗೂ ವಿತರಕರ ಮನೆ ಮತ್ತು ಕಚೇರಿ ಮೇಲೆ ದಾಳಿ ನಡೆದಿದೆ. ಎಸ್​. ಆರ್​. ಪ್ರಭು, ಜ್ಞಾನವೇಲ್​ ರಾಜಾ ಮುಂತಾದವರು ಹೆಸರು ಈ ಪಟ್ಟಿಯಲ್ಲಿದೆ. ​ಮುಂಜಾನೆ 6 ಗಂಟೆಗೆ ಅಧಿಕಾರಿಗಳು ದಾಖಲೆಗಳನ್ನು ಪರಿಶೀಲಿಸಲು ಆರಂಭಿಸಿದ್ದಾರೆ. ಕಾರ್ಯಚರಣೆ ವೇಳೆ ತಮಿಳು ಚಿತ್ರರಂಗದ ಅನೇಕ ಸೆಲೆಬ್ರಿಟಿಗಳ ಹೆಸರುಗಳು ಹೊರಬರುವ ಸಾಧ್ಯತೆ ದಟ್ಟವಾಗಿದೆ.

ಅನ್ಬು ಚೆಳಿಯನ್ ಫೈನಾನ್ಶಿಯರ್​ ಆಗಿರುವುದು ಮಾತ್ರವಲ್ಲದೇ ಅನೇಕ ಸಿನಿಮಾಗಳನ್ನು ವಿತರಣೆ ಮಾಡಿಯೂ ಲಾಭ ಕಂಡಿದ್ದಾರೆ. ‘ಗೋಪುರಂ ಫಿಲ್ಮ್ಸ್​’ ಬ್ಯಾನರ್​ ಮೂಲಕ ಕೆಲವು ಚಿತ್ರಗಳನ್ನು ನಿರ್ಮಿಸಿದ್ದಾರೆ. ಅವರ ಮೇಲೆ ಐಟಿ ದಾಳಿ ನಡೆದಿರುವುದು ಇದೇ ಮೊದಲೇನಲ್ಲ. 2020ರ ಫೆಬ್ರವರಿಯಲ್ಲಿ ಅವರ ಮನೆ ಮೇಲೆ ದಾಳಿ ಮಾಡಲಾಗಿತ್ತು. ಆಗ 65 ಕೋಟಿ ರೂಪಾಯಿ ನಗದು ವಶಪಡಿಸಿಕೊಳ್ಳಲಾಗಿತ್ತು.

‘ದಳಪತಿ’ ವಿಜಯ್​ ನಟನೆಯ ‘ಬಿಗಿಲ್​’ ಸಿನಿಮಾಗೆ ಅನ್ಬು ಚೆಳಿಯನ್​ ಫೈನಾನ್ಸ್​ ಮಾಡಿದ್ದರು. ಆ ಚಿತ್ರದ ಹಣಕಾಸಿನ ವಹಿವಾಟಿನ ಮೇಲೆ ಐಟಿ ಅಧಿಕಾರಿಗಳು ಕಣ್ಣಿಟ್ಟಿದ್ದರು. ನಟ ವಿಜಯ್​, ನಿರ್ಮಾಪಕರಾದ ಅಘೋರಂ, ಗಣೇಶ್​, ಸುರೇಶ್​, ವಿತರಕ ಸುಂದರ್​ ಆರುಮುಗಂ ಮುಂತಾದವರ ಮೇಲೆ ಐಟಿ ದಾಳಿ ನಡೆದಿತ್ತು.