‘ಅದು ನನ್ನ ವೈಯಕ್ತಿಕ ವಿಚಾರ’; ಸಾಲ ಮರು ಪಾವತಿ ಮಾಡದ ಬಗ್ಗೆ ಕೇಳಿದ್ದಕ್ಕೆ ಸಿಟ್ಟಾದ ಸನ್ನಿ ಡಿಯೋಲ್

ನಟ, ಸಂಸದ ಸನ್ನಿ ಡಿಯೋಲ್ (Sunny Deol) ಅವರು ಸದ್ಯ ಸುದ್ದಿಯಲ್ಲಿದ್ದಾರೆ. 56 ಕೋಟಿ ರೂಪಾಯಿ ಸಾಲ ಮರುಪಾವತಿ ಮಾಡದ ಕಾರಣ ಅವರ ಒಡೆತನದ ಬಂಗಲೆ ಹರಾಜು ಹಾಕಲು ಬ್ಯಾಂಕ್​ನವರು ಮುಂದಾಗಿದ್ದರು. ಆದರೆ ತಾಂತ್ರಿಕ ಸಮಸ್ಯೆಯ ಕಾರಣ ನೀಡಿ ಹರಾಜು ಪ್ರಕ್ರಿಯೆಯನ್ನು ಹಿಂಪಡೆಯಲಾಗಿದೆ. ಈ ಬಗ್ಗೆ ಸನ್ನಿ ಡಿಯೋಲ್ ಅವರು ಪ್ರತಿಕ್ರಿಯೆ ನೀಡಲು ನಿರಾಕರಿಸಿದ್ದಾರೆ. ‘ಅದು ನನ್ನ ವೈಯಕ್ತಿಕ ವಿಚಾರ’ ಎಂದಷ್ಟೇ ಹೇಳಿ ಸುಮ್ಮನಾಗಿದ್ದಾರೆ. ಸದ್ಯ ಸನ್ನಿ ‘ಗದರ್ 2’ ಯಶಸ್ಸಿನ ಅಲೆಯಲ್ಲಿ ತೇಲುತ್ತಿದ್ದಾರೆ.

ಸನ್ನಿ ಡಿಯೋಲ್ ಅವರು ಈ ಮೊದಲು 56 ಕೋಟಿ ರೂಪಾಯಿ ಸಾಲ ಮಾಡಿದ್ದರು. ಈ ಸಾಲವನ್ನು ಅವರು ಪಡೆದಿದ್ದು ಏಳು ವರ್ಷದ ಹಿಂದೆ ಎನ್ನಲಾಗಿದೆ. ಆದರೆ, ಅವರು ಸಾಲವನ್ನು ಹಿಂದಿರುಗಿಸಿಲ್ಲ. ಸಾಲ ಪಡೆಯುವಾಗ ಅವರು ತಮ್ಮ ಒಡೆತನದ ‘ಸನ್ನಿ ವಿಲ್ಲಾ’ ಬಂಗಲೆಯನ್ನು ಅಡ ಇಟ್ಟಿದ್ದರು. ಈ ಕಾರಣಕ್ಕೆ ಬ್ಯಾಂಕ್​ನವರು ಮನೆ ಹರಾಜಿಗೆ ಮುಂದಾಗಿದ್ದರು. ಈ ಬಗ್ಗೆ ಸನ್ನಿಗೆ ಮಾಧ್ಯಮದವರು ಪ್ರಶ್ನೆ ಮಾಡಿದ್ದಾರೆ.

‘ನಾನು ಈ ಬಗ್ಗೆ ಮಾತನಾಡಲು ಇಷ್ಟಪಡುವುದಿಲ್ಲ. ಇದು ನನ್ನ ವೈಯಕ್ತಿಕ ವಿಚಾರ. ನಾನು ಏನೇ ಹೇಳಿದರೂ ಜನರು ತಪ್ಪು ಅರ್ಥವನ್ನೇ ಹುಡುಕುತ್ತಾರೆ’ ಎಂದು ಸನ್ನಿ ಡಿಯೋಲ್ ಅವರು ಎಎನ್​ಐಗೆ ಹೇಳಿಕೆ ನೀಡಿದ್ದಾರೆ. ಈ ವೇಳೆ ಅವರು ಸಖತ್ ಸಿಟ್ಟಾಗಿದ್ದರು ಎನ್ನಲಾಗಿದೆ.

ಇನ್ನು ಬ್ಯಾಂಕ್​ನವರ ನಡೆ ಕೂಡ ಸಾಕಷ್ಟು ಪ್ರಶ್ನೆಗಳನ್ನು ಹುಟ್ಟುಹಾಕಿದೆ. ಈ ಮೊದಲು ಹರಾಜು ನೋಟಿಸ್ ಹೊರಡಿಸಿದ್ದ ಬ್ಯಾಂಕ್ ಆಫ್ ಬರೋಡಾ, 24 ಗಂಟೆ ಕಳೆಯುವುದರೊಳಗೆ ಆ ನೋಟಿಸ್​ನ ಹಿಂಪಡೆದಿತ್ತು. ಇದು ಚರ್ಚೆಗೆ ಕಾರಣವಾಗಿತ್ತು. ಕಾಂಗ್ರೆಸ್ ನಾಯಕರು ಈ ಬಗ್ಗೆ ಪ್ರಶ್ನೆ ಮಾಡಿದ್ದಾರೆ.

ಇದನ್ನೂ ಓದಿ: ‘ಗದರ್​ 2’ ನಾನ್​-ಸ್ಟಾಪ್​ ಕಮಾಯಿ; 400 ಕೋಟಿ ರೂ. ಗಡಿ ಮುಟ್ಟಲಿದೆ ಸನ್ನಿ ಡಿಯೋಲ್​ ಸಿನಿಮಾ

Another New All Time Record for #Gadar2

HIGHEST SECOND MONDAY EVER [ Non Holiday ]

DAY 11 Estimates | ₹ 14-15 cr nett#SunnyDeol pic.twitter.com/wyS0Wfb4d1

— Sumit Kadel (@SumitkadeI) August 21, 2023

‘ಗದರ್ 2’ ಸಿನಿಮಾ ಸದ್ಯ ಸದ್ದು ಮಾಡುತ್ತಿದೆ. ಈ ಚಿತ್ರ ಮೂರನೇ ಸೋಮವಾರ (ಆಗಸ್ಟ್ 21) 14 ಕೋಟಿ ರೂಪಾಯಿ ಗಳಿಕೆ ಮಾಡಿದೆ. ಈ ಮೂಲಕ ಚಿತ್ರದ ಒಟ್ಟೂ ಗಳಿಕೆ 389 ಕೋಟಿ ರೂಪಾಯಿ ಆಗಿದೆ. ಅನಾಯಾಸವಾಗಿ ಈ ಸಿನಿಮಾ ‘ಕೆಜಿಎಫ್ 2’ (ಹಿಂದಿ) ಲೈಫ್​ಟೈಮ್ ಕಲೆಕ್ಷನ್​ನ ಹಿಂದಿಕ್ಕಲಿದೆ. ‘ಕೆಜಿಎಫ್ 2’ ಹಿಂದಿ ಅವತರಣಿಕೆ 432 ಕೋಟಿ ರೂಪಾಯಿ ಬಾಚಿಕೊಂಡಿತ್ತು.

ಇನ್ನಷ್ಟು ಸಿನಿಮಾ ಸುದ್ದಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ