ಎನ್ಟಿಆರ್ ಪುಣ್ಯಭೂಮಿಗೆ ನಮಿಸಿದ ಜೂ ಎನ್ಟಿಆರ್, ರಾಜಕೀಯದ ಸುಳಿವು ಕೊಟ್ಟ ಅಭಿಮಾನಿಗಳ ಘೋಷಣೆ
Jr NTR: ತೆಲುಗು ಚಿತ್ರರಂಗದ ದಂತಕತೆ ಎನ್ಟಿಆರ್ ಜನ್ಮ ಶತಮಾನೋತ್ಸವ ಇಂದು (ಮೇ 28) ತಾತನ ಸಮಾಧಿಗೆ ಜೂ ಎನ್ಟಿಆರ್ ಭೇಟಿ ನೀಡಿದಾಗ ಅವರ ಅಭಿಮಾನಿಗಳು ಹಾಕಿರುವ ಕೆಲವು ಘೋಷಣೆ ಇದೀಗ ರಾಜಕೀಯ ಚರ್ಚೆಯನ್ನು ಆರಂಭಿಸಿವೆ.
ಅವಿಭಜಿತ ಆಂಧ್ರ ಪ್ರದೇಶ (Andhra Pradesh) ಮಾಜಿ ಸಿಎಂ, ತೆಲುಗು ಚಿತ್ರರಂಗದ ದಂತಕತೆ ಎನ್ಟಿಆರ್ (NTR) ಅವರ ನೂರನೇ ಜಯಂತಿ ಇಂದು (ಮೇ 28). ಎನ್ಟಿಆರ್ ಜನ್ಮಶತಾಬ್ಧಿಯನ್ನು ನಂದಮೂರಿ ಕುಟುಂಬದವರು ಅದ್ಧೂರಿಯಾಗಿ ಆಚರಿಸುತ್ತಿದ್ದಾರೆ. ಎನ್ಟಿಆರ್ ಪುತ್ರ ಬಾಲಕೃಷ್ಣ ಹಾಗೂ ಅಳಿಯ ಚಂದ್ರಬಾಬು ನಾಯ್ಡು ಒಟ್ಟಾಗಿ ಸೇರಿ ಈಗಾಗಲೇ ಕೆಲವು ಕಾರ್ಯಕ್ರಮಗಳನ್ನು ಮಾಡಿದ್ದಾರೆ. ಆದರೆ ಈ ಕಾರ್ಯಕ್ರಮಗಳಿಗೆ ಜೂ ಎನ್ಟಿಆರ್ (Jr NTR) ಅನ್ನು ಇವರು ಆಹ್ವಾನಿಸಿರಲಿಲ್ಲ. ಆದರೆ ಇಂದು ಎನ್ಟಿಆರ್ ಹುಟ್ಟುಹಬ್ಬದಂದು ಅವರ ಪುಣ್ಯಭೂಮಿಗೆ ಏಕಾಂಗಿಯಾಗಿ ಭೇಟಿ ನೀಡಿದ್ದ ಜೂ ಎನ್ಟಿಆರ್ ತಾತನಿಗೆ ನಮಿಸಿದರು. ಈ ಸಂದರ್ಭದಲ್ಲಿ ಅವರ ಅಭಿಮಾನಿಗಳು ಹಾಕಿದ ಘೋಷಣೆ ರಾಜಕೀಯದ ಸುಳಿವೊಂದನ್ನು ನೀಡಿವೆ.
ಹೈದರಾಬಾದ್ನ ಖೈತರಾಬಾದ್ನಲ್ಲಿನ ಎನ್ಟಿಆರ್ ಸಮಾಧಿಗೆ ಜೂ ಎನ್ಟಿಆರ್ ಇಂದು ಬೆಳಿಗ್ಗೆ ಭೇಟಿ ನೀಡಿದರು. ಈ ಸಮಯ ಭಾರಿ ಸಂಖ್ಯೆಯಲ್ಲಿ ಅಭಿಮಾನಿಗಳು ಅಲ್ಲಿ ನೆರೆದಿದ್ದರು. ನೂಕು ನುಗ್ಗಲಿನ ನಡುವೆ ಸಮಾಧಿ ಬಳಿ ಬಂದ ಜೂ ಎನ್ಟಿಆರ ಪುಷ್ಪಗಳನ್ನು ಹಾಕಿ ತಲೆಬಾಗಿ ನಮಿಸಿದರು. ಈ ಸಮಯ ಜೂ ಎನ್ಟಿಆರ್ಗೆ ಕೆಲವರು ಹೂಗುಚ್ಛವನ್ನು ಕೊಡಲು ಬಂದರೆ ಅವನ್ನು ಸಿಟ್ಟಿಗೆ ಬದಿಗೆ ತಳ್ಳಿದರು ಜೂ ಎನ್ಟಿಆರ್.
ಜೂ ಎನ್ಟಿಆರ್, ಎನ್ಟಿಆರ್ ಅವರ ಸಮಾಧಿ ಸ್ಥಳಕ್ಕೆ ಬಂದಾಗ ಅಭಿಮಾನಿಗಳು ಕೂಗಿದ ಘೋಷಣೆ ರಾಜಕೀಯ ಚರ್ಚೆಗೆ ನಾಂದಿ ಹಾಡಿವೆ. ಜೂ ಎನ್ಟಿಆರ್ ಬಂದ ಸಮಯ ಸಿಎಂ ಎನ್ಟಿಆರ್ ಎಂಬ ಘೋಷಣೆಗಳನ್ನು ಅಭಿಮಾನಿಗಳು ಕೂಗಿದರು. ಜೂ ಎನ್ಟಿಆರ್, ಸಮಾಧಿ ಸ್ಥಳದಿಂದ ಹೋಗುವವರೆಗೆ ಸಿಎಂ ಎನ್ಟಿಆರ್ ಘೋಷಣೆಗಳು ಮೊಳಗಿದವು. ಘೋಷಣೆ ಹಾಕುತ್ತಿದ್ದವರನ್ನು ಸುಮ್ಮನಿರುವಂತೆ ಸಹ ಜೂ ಎನ್ಟಿಆರ್ ಹೇಳಲಿಲ್ಲ. ಈ ಘಟನೆ ಇದೀಗ ತೆಲುಗು ರಾಜ್ಯಗಳಲ್ಲಿ ಚರ್ಚೆಗೆ ಕಾರಣವಾಗಿದೆ.
ನಂದಮೂರಿ ಕುಟುಂಬದಿಂದ ಟಿಡಿಪಿ ಪಕ್ಷದ ರಾಜಕೀಯದಿಂದ ಜೂ ಎನ್ಟಿಆರ್ ಅನ್ನು ಚಂದ್ರಬಾಬು ನಾಯ್ಡು ಹಾಗೂ ಬಾಲಕೃಷ್ಣ ದೂರ ಇಟ್ಟಿದ್ದಾರೆ. ಟಿಡಿಪಿ ಪಕ್ಷದಲ್ಲಿ ಚಂದ್ರಬಾಬು ನಾಯ್ಡು ಪುತ್ರನನ್ನು ಬೆಳೆಸುವ ಸಲುವಾಗಿ ಜೂ ಎನ್ಟಿಆರ್ ಅನ್ನು ದೂರ ಇಡಲಾಗಿದೆ ಎಂಬ ಮಾತುಗಳು ಕೇಳಿ ಬರುತ್ತಿವೆ.
ಇದನ್ನೂ ಓದಿ:ಮತ್ತೆ ಜೂ ಎನ್ಟಿಆರ್ ಅನ್ನು ದೂರವಿಟ್ಟ ನಂದಮೂರಿ ಬಾಲಕೃಷ್ಣ-ಚಂದ್ರಬಾಬು ನಾಯ್ಡು
ಟಿಡಿಪಿ ಪಕ್ಷದಿಂದ ತಮ್ಮನ್ನು ದೂರ ಇರಿಸಿರುವ ಬಗ್ಗೆ ಜೂ ಎನ್ಟಿಆರ್ ಏನೂ ಪ್ರತಿಕ್ರಿಯೆ ನೀಡಿರಲಿಲ್ಲ. ಈಗ ಅಭಿಮಾನಿಗಳು ಸಿಎಂ ಎನ್ಟಿಆರ್ ಘೋಷಣೆಗಳಿಂದ ಜೂ ಎನ್ಟಿಆರ್ ಹೊಸ ಪಕ್ಷ ಸ್ಥಾಪನೆ ಮಾಡುತ್ತಾರೆಯೇ ಎಂಬ ಅನುಮಾನ ಮೂಡಿದೆ. ಅವರ ತಾತ ಸೀನಿಯರ್ ಎನ್ಟಿಆರ್ ಸಹ ಮೊದಲ ಬಾರಿಗೆ ಟಿಡಿಪಿ ಪಕ್ಷ ಸ್ಥಾಪನೆ ಮಾಡಿದಾಗ ಕಾಂಗ್ರೆಸ್ ವಿರುದ್ಧ ಸ್ವಾಭಿಮಾನ ಕೆರಳಿಸುವ ಕಾರ್ಯ ಮಾಡಿದ್ದರು. ಈಗ ಜೂ ಎನ್ಟಿಆರ್ ಸಹ ಸ್ವಾಭಿಮಾನಕ್ಕೆ ಕಟ್ಟುಬಿದ್ದು ಹೊಸ ಪಕ್ಷ ಸ್ಥಾಪನೆ ಮಾಡುತ್ತಾರೆಯೇ ನೋಡಬೇಕಿದೆ.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ