ಜೂ ಎನ್ಟಿಆರ್ ಧರಿಸಿರುವ ಈ ವಾಚ್ನ ಬೆಲೆ 7.47 ಕೋಟಿ, ಏನಿದರ ವಿಶೇಷತೆ?
Jr NTR: ಜೂ ಎನ್ಟಿಆರ್ ಪ್ರಸ್ತುತ ಹಿಂದಿಯ ‘ವಾರ್ 2’ ಸಿನಿಮಾದ ಶೂಟಿಂಗ್ನಲ್ಲಿ ಬ್ಯುಸಿಯಾಗಿದ್ದಾರೆ. ಇತ್ತೀಚೆಗೆ ಮುಂಬೈ ವಿಮಾನ ನಿಲ್ದಾಣದಲ್ಲಿ ಕಾಣಿಸಿಕೊಂಡ ಜೂ ಎನ್ಟಿಆರ್ ಸಖತ್ ಸ್ಟೈಲಿಷ್ ಆಗಿ ಕಾಣುತ್ತಿದ್ದರು. ವಿಶೇಷವಾಗಿ ಗಮನ ಸೆಳೆದಿದ್ದು ಜೂ ಎನ್ಟಿಆರ್ ಕೈಯಲ್ಲಿದ್ದ ವಾಚು. ಜೂ ಎನ್ಟಿಆರ್ ತೊಟ್ಟಿದ್ದ ವಾಚಿನ ಬೆಲೆ 7.47 ಕೋಟಿ ರೂಪಾಯಿ. ಈ ವಾಚಿನ ವಿಶೇಷತೆ ಏನು?
Updated on: Mar 12, 2025 | 1:43 PM
ಜೂ ಎನ್ಟಿಆರ್ ಭಾರತದಲ್ಲಿ ಅತಿ ಹೆಚ್ಚು ಸಂಭಾವನೆ ಪಡೆವ ನಟರಲ್ಲಿ ಒಬ್ಬರು. ಪ್ರತಿ ಸಿನಿಮಾಕ್ಕೆ ನೂರಾರು ಕೋಟಿ ಸಂಭಾವನೆಯನ್ನು ಅವರು ಪಡೆಯುತ್ತಾರೆ. ಪಡೆವ ದುಬಾರಿ ಸಂಭಾವನೆಗೆ ತಕ್ಕಂತೆ ಅವರ ಜೀವನ ಶೈಲಿಯೂ ಬಲು ಐಶಾರಾಮಿ ಆಗಿದೆ. ಹೈದರಾಬಾದ್ನಲ್ಲಿ ಐಶಾರಾಮಿ ಮನೆ, ಆಂಧ್ರ, ತೆಲಂಗಾಣ, ತಮಿಳುನಾಡು, ಬೆಂಗಳೂರು, ಮುಂಬೈ, ದುಬೈ ಸೇರಿದಂತೆ ಹಲವು ಕಡೆ ಆಸ್ತಿಗಳನ್ನು ಹೊಂದಿರುವ ಜೂ ಎನ್ಟಿಆರ್ ಐಶಾರಾಮಿ ಕಾರುಗಳ ದೊಡ್ಡ ಕಲೆಕ್ಷನ್ ಅನ್ನೇ ಹೊಂದಿದ್ದಾರೆ. ಅದಿರಲಿ ಜೂ ಎನ್ಟಿಆರ್ ಕೈಗೆ ಕಟ್ಟುವ ವಾಚಿನ ಬೆಲೆಯೂ ಕೋಟ್ಯಂತರ ರೂಪಾಯಿ ಮೌಲ್ಯದ್ದು.
ಜೂ ಎನ್ಟಿಆರ್ಗೆ ಬಳಿ ಕೋಟ್ಯಂತರ ಬೆಲೆಯ ಹಲವು ವಾಚುಗಳ ಸಂಗ್ರಹ ಇದೆ. ಒಮ್ಮೊಮ್ಮೆ ಒಂದೊಂದು ರೀತಿಯ ಬಲು ದುಬಾರಿ ವಾಚುಗಳನ್ನು ಅವರು ಧರಿಸುತ್ತಾರೆ. ಇದೀಗ ಹಿಂದಿಯ ‘ವಾರ್ 2’ ಸಿನಿಮಾದ ಚಿತ್ರೀಕರಣದಲ್ಲಿ ಬ್ಯುಸಿಯಾಗಿರುವ ನಟ ಜೂ ಎನ್ಟಿಆರ್, ಮುಂಬೈನ ವಿಮಾನ ನಿಲ್ದಾಣದಲ್ಲಿ ಸಖತ್ ಸ್ಟೈಲಿಷ್ ಆಗಿ ಕಾಣಿಸಿಕೊಂಡರು. ಜೂ ಎನ್ಟಿಆರ್ ಅವರ ಹೊಸ ಲುಕ್ನ ಜೊತೆಗೆ ಅವರು ಕೈಗೆ ಕಟ್ಟಿದ್ದ ವಾಚ್ ಸಹ ಬಹಳ ಗಮನ ಸೆಳೆಯಿತು. ಈ ಚಿತ್ರದಲ್ಲಿ ಜೂ ಎನ್ಟಿಆರ್ ಧರಿಸಿರುವ ವಾಚಿನ ಬೆಲೆ ಬರೋಬ್ಬರಿ 7.47 ಕೋಟಿ ರೂಪಾಯಿಗಳು!
ಹೌದು, ರೋಲ್ಸ್ ರಾಯ್ಸ್ ಕಾರಿಗಿಂತಲೂ ದುಬಾರಿಯಾದ ವಾಚ್ ಅನ್ನು ಜೂ ಎನ್ಟಿಆರ್ ಕೈಗೆ ಕಟ್ಟಿಕೊಂಡಿದ್ದಾರೆ. ಜೂ ಎನ್ಟಿಆರ್ ಕೈಯಲ್ಲಿರುವುದು ರಿಚರ್ಡ್ ಮೈಲ್ 40-01 ಟರ್ಬಿಲೈನ್ ಮೆಕ್ಲ್ಯಾರೆನ್ ಸ್ಪೀಡ್ಡೈಲ್ ವಾಚು. ಭಾರತದಲ್ಲಿ ಇದರ ಬೆಲೆ 7.47 ಕೋಟಿ ರೂಪಾಯಿಗಳು. ವಿದೇಶದಿಂದ ಇಲ್ಲಿಗೆ ತರಿಸಿ, ತೆರಿಗೆ ಎಲ್ಲ ಪಾವತಿಸುವಷ್ಟರಲ್ಲಿ ಇದರ ಬೆಲೆ 8 ಕೊಟಿ ದಾಟುತ್ತದೆ. ಜೂ ಎನ್ಟಿಆರ್ ಧರಿಸಿರುವ ವಾಚು ಬಲು ಅಪರೂಪದ್ದು, ಇಡೀ ವಿಶ್ವದಲ್ಲಿ ಈ ಮಾದರಿಯ ಕೇವಲ 106 ವಾಚುಗಳಷ್ಟೆ ಇವೆ. ಅದರಲ್ಲಿ ಒಂದು ಜೂ ಎನ್ಟಿಆರ್ ಕೈಯಲ್ಲಿದೆ.
ಮೆಕ್ಲರೆನ್ ಕಾರಿನಿಂದ ಸ್ಪೂರ್ತಿ ಪಡೆದು ನಿರ್ಮಿಸಲಾದ ಈ ವಾಚಿನಲ್ಲಿ, ಪ್ಲಾಟಿನಂ ಮತ್ತು ಚಿನನವನ್ನು ಸಹ ಬಳಸಲಾಗಿದೆ. ಅಪರೂಪದ ಮೆಕ್ಯಾನಿಸಮ್ ಅನ್ನು ಬಳಸಿ ಈ ವಾಚ್ ಅನ್ನು ನಿರ್ಮಿಸಲಾಗಿದ್ದು, ಒಂದು ವಾಚ್ನ ನಿರ್ಮಾಣಕ್ಕೆ 2800 ಗಂಟೆಗಳು ಹಿಡಿದಿವೆ ಎಂದಿದೆ ರಿಚರ್ಡ್ ಮೈಲ್ ಸಂಸ್ಥೆ. ಬಹಳ ಸಂಕೀರ್ಣವಾದ ಮೆಕ್ಯಾನಿಸಂ ಅನ್ನು ಬಳಸಿ ಈ ವಾಚ್ ಅನ್ನು ನಿರ್ಮಾಣ ಮಾಡಲಾಗಿದೆ, ಹಲವು ಅತ್ಯುತ್ತಮ ಪರಿಣಿತ ಎಂಜಿನಿಯರ್ಗಳು, ಡಿಸೈನರ್ಗಳು ನೂರಾರು ದಿನ ಕೆಲಸ ಮಾಡಿ ಈ ವಾಚುಗಳನ್ನು ನಿರ್ಮಾಣ ಮಾಡಿದ್ದಾರೆ ಎಂದಿದೆ ಸಂಸ್ಥೆ.
ಇದನ್ನೂ ಓದಿ:ಜೂ ಎನ್ಟಿಆರ್ ಹೊಸಬ ಎಂಬ ಬಾಲಿವುಡ್ ನಿರ್ಮಾಪಕನ ಬೆವರಿಳಿಸಿದ ಸಿದ್ಧಾರ್ಥ್
ಜೂ ಎನ್ಟಿಆರ್ ಪ್ರಸ್ತುತ ‘ವಾರ್ 2’ ಸಿನಿಮಾದ ಚಿತ್ರೀಕರಣದಲ್ಲಿ ಬ್ಯುಸಿಯಾಗಿದ್ದಾರೆ. ಈ ಸಿನಿಮಾದಲ್ಲಿ ಅವರು ಹೃತಿಕ್ ರೋಷನ್ ಜೊತೆ ನಟಿಸುತ್ತಿದ್ದಾರೆ. ಅದರ ಬಳಿಕ ಪ್ರಶಾಂತ್ ನಿರ್ದೇಶನದ ಸಿನಿಮಾದಲ್ಲಿ ಜೂ ಎನ್ಟಿಆರ್ ನಟಿಸಲಿದ್ದಾರೆ. ಈ ಎರಡು ಸಿನಿಮಾಗಳ ಬಳಿಕ ‘ದೇವರ 2’ ಸಿನಿಮಾ ಪ್ರಾರಂಭ ಮಾಡಲಿದ್ದಾರೆ. ಅದಾದ ಬಳಿಕ ಜೂ ಎನ್ಟಿಆರ್ ಮತ್ತೊಮ್ಮೆ ರಾಜಮೌಳಿಯ ಸಿನಿಮಾದಲ್ಲಿ ನಟಿಸಲಿದ್ದಾರೆ ಎಂಬ ಮಾತುಗಳು ಕೇಳಿ ಬರುತ್ತಿವೆ.
ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ
