ಆರ್​ಆರ್​​ಆರ್ ಸಿನಿಮಾಕ್ಕೆ ಗೌರವ ನೀಡಿದ ಆಸ್ಕರ್, ರಾಜಮೌಳಿಗೆ ಖುಷಿ

ರಾಜಮೌಳಿ (SS Rajamouli) ನಿರ್ದೇಶಿಸಿ ಜೂ ಎನ್​ಟಿಆರ್-ರಾಮ್ ಚರಣ್ (Jr NTR-Ram Charan) ನಟಿಸಿದ್ದ ‘ಆರ್​ಆರ್​ಆರ್’ (RRR) ಸಿನಿಮಾ ಹಲವು ದಾಖಲೆಗಳನ್ನು ಮಾಡಿದೆ. ಮುಖ್ಯವಾಗಿ ಭಾರತಕ್ಕೆ ಆಸ್ಕರ್ ತಂದುಕೊಟ್ಟಿದೆ. ವಿದೇಶಿ ಸಿನಿಮಾ ಪ್ರಮುಖರು, ನಿರ್ಮಾಣ ಸಂಸ್ಥೆಗಳು ಭಾರತ ಚಿತ್ರರಂಗದತ್ತ ತಿರುಗಿ ನೋಡುವಂತೆ ಮಾಡಿದೆ. ಈಗಾಗಲೇ ‘ಆರ್​ಆರ್​ಆರ್’ ಸಿನಿಮಾದ ‘ನಾಟು ನಾಟು’ ಹಾಡಿಗೆ ಆಸ್ಕರ್ ಧಕ್ಕಿದೆ. ಆದರೆ ಇದೀಗ ಮತ್ತೊಮ್ಮೆ ಆಸ್ಕರ್, ‘ಆರ್​ಆರ್​ಆರ್’ ಸಿನಿಮಾ ಅನ್ನು ನೆನಪು ಮಾಡಿಕೊಂಡಿದೆ. ಹೊಸ ಪ್ರಶಸ್ತಿ ಘೋಷಣೆಗೆ ‘ಆರ್​ಆರ್​ಆರ್’ ಸಿನಿಮಾದ ಐಕಾನಿಕ್ ಚಿತ್ರವೊಂದನ್ನು ಬಳಸಿಕೊಂಡಿದೆ.

ಆಸ್ಕರ್​ ಶುರುವಾದಾಗಿನಿಂದಲೂ ಆಕ್ಷನ್ ಡಿಸೈನ್ ವಿಭಾಗಕ್ಕೆ ಯಾವುದೇ ಪ್ರಶಸ್ತಿ ಇರಲಿಲ್ಲ. ಸಿನಿಮಾಗಳ ಕತೆ ಹೇಳುವಲ್ಲಿ ಆಕ್ಷನ್ ಡಿಸೈನ್ ಬಹಳ ಪ್ರಮುಖವಾದ ಪಾತ್ರ ನಿರ್ವಹಿಸುತ್ತದೆ, ಸಿನಿಮಾಗಳಿಗೆ ಆಕ್ಷನ್ ಬಹಳ ಮುಖ್ಯ ಆದರೆ ಆಸ್ಕರ್​ನಲ್ಲಿ ಈ ವರೆಗೆ ಆಕ್ಷನ್​ಗೆ ಪ್ರಶಸ್ತಿ ಇರಲಿಲ್ಲ. ಆದರೆ ಈಗ ಆಸ್ಕರ್ ಈ ಪ್ರಶಸ್ತಿಯನ್ನು ತನ್ನ ಪಟ್ಟಿಗೆ ಸೇರಿಸಲು ಮುಂದಾಗಿದೆ. ಇದರ ಘೋಷಣೆಗೆ ‘ಆರ್​​ಆರ್​ಆರ್’ ಸಿನಿಮಾದ ಆಕ್ಷನ್ ದೃಶ್ಯವೊಂದರ ಚಿತ್ರವನ್ನು ಬಳಸಿಕೊಂಡಿದೆ.

‘ಆರ್​ಆರ್​ಆರ್’ ಸಿನಿಮಾದ ಇಂಟರ್ವೆಲ್ ಫೈಟ್ ನ ಒಂದು ಅದ್ಭುತ ದೃಶ್ಯವನ್ನು ಆಸ್ಕರ್ ತನ್ನ ಟ್ವಿಟ್ಟರ್​ನಲ್ಲಿ ಹಂಚಿಕೊಂಡಿದೆ. ರಾಮ್ ಚರಣ್ ಹಾರಿ ಹುಲಿಗೆ ಹೊಡೆಯುವ ದೃಶ್ಯದ ಚಿತ್ರ ಇದಾಗಿದೆ. ಆ ಮೂಲಕ ‘ಆರ್​ಆರ್​ಆರ್’ ಸಿನಿಮಾದ ಫೈಟ್ ಡಿಸೈನ್​ಗೆ ಗೌರವ ನೀಡಿದೆ ಆಸ್ಕರ್. ಮತ್ತೊಂದು ವಿಶೇಷವೆಂದರೆ ‘ಆರ್​ಆರ್​ಆರ್​’ ಸಿನಿಮಾದ ಚಿತ್ರವನ್ನು ವಿಶ್ವದ ಅತ್ಯುತ್ತಮ ಆಕ್ಷನ್ ಸಿನಿಮಾಗಳಲ್ಲಿ ಮುಖ್ಯವಾದ ‘ಮಿಷನ್ ಇಂಪಾಸಿಬಲ್’ನ ಜೊತೆಗೆ ಹಂಚಿಕೊಳ್ಳಲಾಗಿದೆ. ಇದು ಸಾಮಾನ್ಯ ಗೌರವವೇನಲ್ಲ. ‘ಆರ್​ಆರ್​ಆರ್’, ‘ಮಿಷನ್ ಇಂಪಾಸಿಬಲ್’ ಜೊತೆಗೆ ಆಸ್ಕರ್ ವಿಜೇತ ‘ಎವರಿಥಿಂಗ್ ಎವರಿವೇರ್ ಆಲ್ ಅಟ್ ಒನ್ಸ್’ ಸಿನಿಮಾದ ಒಂದು ಚಿತ್ರವನ್ನು ಸಹ ಹಂಚಿಕೊಳ್ಳಲಾಗಿದೆ.

ಇದನ್ನೂ ಓದಿ:97ನೇ ಸಾಲಿನ ಆಸ್ಕರ್ ಅವಾರ್ಡ್ ಕಾರ್ಯಕ್ರಮ: ವಿನ್ನರ್ ಸಂಪೂರ್ಣ ಲಿಸ್ಟ್ ಇಲ್ಲಿದೆ

ಆಸ್ಕರ್ ಟ್ವೀಟ್​ಗೆ ಪ್ರತಿಕ್ರಿಯೆ ನೀಡಿರುವ ನಿರ್ದೇಶಕ ರಾಜಮೌಳಿ, ‘100 ವರ್ಷಗಳ ಕಾಯುವಿಕೆ ಬಳಿಕ ಕೊನೆಗೂ ಆಸ್ಕರ್​ನಲ್ಲಿ ಆಕ್ಷನ್ ಡಿಸೈನ್ ವಿಭಾಗಕ್ಕೆ ಪ್ರಶಸ್ತಿಯನ್ನು ಸೇರಿಸುವುದು ಬಹಳ ಖುಷಿಯ ವಿಷಯ’ ಎಂದಿರುವ ರಾಜಮೌಳಿ ಇದಕ್ಕೆ ಕಾರಣರಾದ ಕೆಲವರಿಗೆ ಧನ್ಯವಾದ ಹೇಳಿದ್ದಾರೆ. ನೆಟ್​ಫ್ಲಿಕ್ಸ್​ ಸಿಇಓಗೂ ಧನ್ಯವಾದ ಹೇಳಿದ್ದಾರೆ. ತಮ್ಮ ‘ಆರ್​ಆರ್​ಆರ್’ ಸಿನಿಮಾದ ಚಿತ್ರ ಹಂಚಿಕೊಂಡಿದ್ದು ಖುಷಿ ತಂದಿದೆ ಎಂದು ಸಹ ಅವರು ಹೇಳಿದ್ದಾರೆ. ಅಂದಹಾಗೆ ಹಾಲಿವುಡ್​ನ ನಿಕ್ ಪೋವೆಲ್ ಮತ್ತು ದಕ್ಷಿಣದ ಸ್ಟಾರ್ ಆಕ್ಷನ್ ಕೊರಿಯೋಗ್ರಫರ್ ಆಗಿರುವ ಕಿಂಗ್ ಸೋಲೊಮನ್ ಅವರುಗಳು ‘ಆರ್​ಆರ್​ಆರ್’ ಸಿನಿಮಾದ ಆಕ್ಷನ್ ಕೊರಿಯೋಗ್ರಫಿ ಮಾಡಿದ್ದರು.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ