ಸಲ್ಲು ಶೋನಿಂದ ಮೊದಲ ದಿನಕ್ಕೆ ಹೊರದಬ್ಬಿಸಿಕೊಂಡ ಪುನೀತ್ ಈಗ ಕಂಗನಾ ಶೋ ಕಡೆ ಮುಖ: ಯಾರು ಈ ಪುನೀತ್?

ಸಲ್ಮಾನ್ ಖಾನ್ (Salman Khan) ನಿರೂಪಣೆ ಮಾಡುವ ಬಿಗ್​ಬಾಸ್ (Bigg Boss) ಶೋನಿಂದ ಒಂದೇ ದಿನಕ್ಕೆ ಹೊರದಬ್ಬಿಸಿಕೊಂಡ ‘ಸೂಪರ್ ಸ್ಟಾರ್ ಪುನೀತ್’ ಈಗ ಹೊಸ ರಿಯಾಲಿಟಿ ಶೋ ಸೇರಿಕೊಳ್ಳಲು ಸಜ್ಜಾಗಿದ್ದಾನೆ. ಸಾಮಾಜಿಕ ಜಾಲತಾಣದಿಂದಾಗಿ ಚಿತ್ರ-ವಿಚಿತ್ರ ವ್ಯಕ್ತಿಗಳೆಲ್ಲ ಜನಪ್ರಿಯತೆ ಗಳಿಸಿದ್ದಾರೆ ಅಂಥಹಾ ಚಿತ್ರ ವಿಚಿತ್ರ ವ್ಯಕ್ತಿಗಳ ಪಟ್ಟಿಗೆ ಸೇರುವ ವ್ಯಕ್ತಿಯೇ ಈ ಪುನೀತ್. ಬಿಗ್​ಬಾಸ್ ಒಟಿಟಿ2 ನಲ್ಲಿ ಸ್ಪರ್ಧಿಯಾಗಿದ್ದ ಪುನೀತ್, ಚಿತ್ರ ವಿಚಿತ್ರ ಅವತಾರಗಳನ್ನು ಬಿಗ್​ಬಾಸ್ ಮನೆಯಲ್ಲಿ ತೋರಿಸಿದ ಕಾರಣ ಒಂದೇ ದಿನಕ್ಕೆ ಆತನನ್ನು ಹೊರಗೆ ಹಾಕಲಾಗಿತ್ತು.

ಬಿಗ್​ಬಾಸ್ ಒಟಿಟಿ 2 ನಿಂದ ಹೊರಗೆ ಹಾಕಿಸಿಕೊಂಡ ಬೆನ್ನಲ್ಲೆ ಒಟಿಟಿಯ ಮತ್ತೊಂದು ಜನಪ್ರಿಯ ರಿಯಾಲಿಟಿ ಶೋ ಆಗಿರುವ ‘ಲಾಕ್​ ಅಪ್’ನ ಸ್ಪರ್ಧಿಯಾಗಲು ತಯಾರಾಗಿದ್ದಾರೆ. ನಟಿ ಕಂಗನಾ ರನೌತ್, ಈ ಲಾಕ್ ಅಪ್ ಶೋ ಅನ್ನು ನಿರೂಪಣೆ ಮಾಡುತ್ತಿದ್ದು, ಈ ಶೋ ಸಹ ಬಿಗ್​ಬಾಸ್ ಮಾದರಿಯಲ್ಲಿಯೇ ಇದೆ. ಲಾಕ್​ ಅಪ್​ನ ಎರಡನೇ ಸೀಸನ್​ನಲ್ಲಿ ಪುನೀತ್ ಸ್ಪರ್ಧಿಯಾಗಿ ಪಾಲ್ಗೊಳ್ಳಲಿದ್ದಾರೆ ಎನ್ನಲಾಗುತ್ತಿದೆ.

ಇದನ್ನೂ ಓದಿ:ತುಳು ಚಿತ್ರರಂಗದಲ್ಲಿ ದಾಖಲೆ ಬರೆದ ಬಿಗ್​ಬಾಸ್ ರೂಪೇಶ್ ಶೆಟ್ಟಿಯ ಹೊಸ ಸಿನಿಮಾ

ಇನ್​ಸ್ಟಾಗ್ರಾಂನಲ್ಲಿ ಪುನೀತ್, ಸೂಪರ್ ಸ್ಟಾರ್ ಪುನೀತ್ ಎಂದು ಜನಪ್ರಿಯ. ಇನ್​ಸ್ಟಾಗ್ರಾಂನಲ್ಲಿ ಹಂಚಿಕೊಳ್ಳುವ ವಿಡಿಯೋಗಳಲ್ಲಿ ಚಿತ್ರ ವಿಚಿತ್ರವಾಗಿ ಮಾತನಾಡುತ್ತಾ, ಚಿತ್ರ ವಿಚಿತ್ರವಾಗಿ ಬಣ್ಣ ಬಳಿದುಕೊಂಡು ಕಾಣಿಸಿಕೊಳ್ಳುತ್ತಿದ್ದ ಪುನೀತ್​ಗೆ ಮಿಲಿಯನ್​ಗಟ್ಟಲೆ ಫಾಲೋವರ್​ಗಳಿದ್ದರು. ಆದರೆ ಒಂದು ದಿನದ ಹಿಂದಷ್ಟೆ ಪುನೀತ್​ರ ಖಾತೆಯನ್ನು ಇನ್​ಸ್ಟಾಗ್ರಾಂ ಡಿಲೀಟ್ ಮಾಡಿಬಿಟ್ಟಿದೆ. ಇನ್​ಸ್ಟಾಗ್ರಾಂನ ಕಮ್ಯೂನಿಟಿ ಗೈಡ್​ಲೈನ್ ಮೀರಿ ವರ್ತಿಸಿದ ಕಾರಣದಿಂದಾಗಿ ಇನ್​ಸ್ಟಾಗ್ರಾಂ, ಪುನೀತ್​ ಖಾತೆಯನ್ನು ಡಿಲೀಟ್ ಮಾಡಿದೆ.

ಇನ್​ಸ್ಟಾಗ್ರಾಂನಿಂದಾಗಲೇ ಲಕ್ಷಾಂತರ ಹಣ ಮಾಡುತ್ತಿದ್ದ ಪುನೀತ್​ಗೆ ಇದರಿಂದ ಭಾರಿ ನಷ್ಟವಾಗಿದೆ. ಇನ್​ಸ್ಟಾಗ್ರಾಂನ ರೀಚ್​ನಿಂದಾಗಿ ಲಕ್ಷಾಂತರ ಪಡೆಯುತ್ತಿದ್ದ ಜೊತೆಗೆ ಕೆಲವು ಜಾಹೀರಾತುಗಳಲ್ಲಿ, ಯೂಟ್ಯೂಬ್​ ವಿಡಿಯೋಗಳಲ್ಲಿ ಸಹ ಪುನೀತ್ ನಟಿಸುತ್ತಿದ್ದರು. ಇದಕ್ಕಾಗಿ ಭಾರಿ ಮೊತ್ತದ ಸಂಭಾವನೆಯನ್ನು ಪಡೆಯುತ್ತಿದ್ದರು. ಯೂಟ್ಯೂಬರ್ ಒಬ್ಬರು ಹೇಳಿಕೊಂಡಿದ್ದಂತೆ, ಒಂದು ಗಂಟೆಗೆ ಎರಡು ಲಕ್ಷ ರೂಪಾಯಿ ಸಂಭಾವನೆಯನ್ನು ಪುನೀತ್ ಪಡೆಯುತ್ತಿದ್ದರಂತೆ. ಆದರೆ ಈಗ ಅವರ ಇನ್​ಸ್ಟಾಗ್ರಾಂ ಖಾತೆಯೇ ಡಿಲೀಟ್ ಆಗಿದೆ.

ಇನ್ನು ಕಂಗನಾರ ‘ಲಾಕ್​ ಅಪ್’ ರಿಯಾಲಿಟಿ ಶೋ ಕೂಡ ಬಿಗ್​ಬಾಸ್ ಮಾದರಿಯಲ್ಲಿಯೇ ಇದೆ. ಬಿಗ್​ಬಾಸ್​ ಗಿಂತಲೂ ಹೆಚ್ಚು ವಿವಾದಾತ್ಮಕ ವ್ಯಕ್ತಿಗಳನ್ನು ಸ್ಪರ್ಧಿಗಳನ್ನಾಗಿ ಕರೆದು ಎಲ್ಲರನ್ನೂ ಒಂದು ಕಡೆ ಕೂಡಿ ಹಾಕಿ, ಆಟ ಆಡಿಸಲಾಗುತ್ತದೆ. ಕಳೆದ ಬಾರಿ ವಿವಾದಿತ ಸ್ಟಾಂಡಪ್ ಕಮಿಡಿಯನ್ ಮುನಾವರ್ ಫಾರೂಖಿ ಈ ಸ್ಪರ್ಧೆಯಲ್ಲಿ ಭಾಗವಹಿಸಿದ್ದಲ್ಲದೆ ಗೆದ್ದಿದ್ದರು ಸಹ. ಈ ಬಾರಿ ಪುನೀತ್ ಸಹ ಸ್ಪರ್ಧಿಯಾಗಿದ್ದು ಅವರೊಟ್ಟಿಗೆ ಇನ್ನೂ ಎಂಥೆಂಥಹಾ ವಿವಾದಿತ ವ್ಯಕ್ತಿಗಳು ಲಾಕ್​ ಅಪ್ ಸೇರುತ್ತಾರೆ ಎಂಬುದು ಕಾದು ನೋಡಬೇಕಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ