ಇಟಲಿಯಲ್ಲಿ ಪ್ರಭಾಸ್-ದಿಶಾ ಪಟಾಣಿ, ಅಭಿಮಾನಿಗಳಿಗೆ ಅನುಮಾನ

ಪ್ರಭಾಸ್ (Prabhas) ನಟಿಸುತ್ತಿರುವ ‘ಕಲ್ಕಿ 2898 ಎಡಿ’ ಸಿನಿಮಾದ ಬಗ್ಗೆ ದೊಡ್ಡ ನಿರೀಕ್ಷೆ ಈಗಾಗಲೇ ಮೂಡಿದೆ. ‘ಮಹಾನಟಿ’ ನಿರ್ದೇಶಿಸಿದ್ದ ನಾಗ್ ಅಶ್ವಿನ್ ನಿರ್ದೇಶಿಸುತ್ತಿರುವ ಈ ಸಿನಿಮಾ ಭೂತ-ಭವಿಷ್ಯದ ರೋಚಕ ಕತೆ ಒಳಗೊಂಡಿದೆ. ಸಿನಿಮಾದಲ್ಲಿ ಬಹುದೊಡ್ಡ ತಾರಾಗಣ ಇದೆ. ಇಷ್ಟು ದಿನ ದೊಡ್ಡ-ದೊಡ್ಡ ಸೆಟ್ ಗಳನ್ನು ಹಾಕಿ ‘ಕಲ್ಕಿ’ ಸಿನಿಮಾದ ಚಿತ್ರೀಕರಣ ಮಾಡಲಾಗುತ್ತಿತ್ತು. ಆದರೆ ಈಗ ಚಿತ್ರ ತಂಡ ಔಟ್ ಡೋರ್ ಶೂಟಿಂಗ್ ಗಾಗಿ ವಿದೇಶಕ್ಕೆ ಹಾರಿದೆ.

‘ಕಲ್ಕಿ’ ಚಿತ್ರತಂಡ ಇಟಲಿಗೆ ತೆರಳಿದ್ದು ಅಲ್ಲಿ ಕೆಲ ದಿನಗಳ ಕಾಲ ಚಿತ್ರೀಕರಣದಲ್ಲಿ ಭಾಗಿಯಾಗಲಿದೆ. ದೊಡ್ಡ ತಂಡವನ್ನು ನಿರ್ದೇಶಕ ನಾಗ್ ಅಶ್ವಿನ್ ಇಟಲಿಗೆ ಕರೆದೊಯ್ದಿದ್ದಾರೆ. ಪ್ರಭಾಸ್ ಹಾಗೂ ದಿಶಾ ಪಟಾನಿ ಅವರುಗಳು ಸಹ ತಂಡದ ಜೊತೆಗಿದ್ದು, ಇಟಲಿಯಲ್ಲಿ ಹಾಡಿನ ಚಿತ್ರೀಕರಣ ನಡೆಯಲಿದೆ ಎನ್ನಲಾಗುತ್ತಿದೆ. ಇಡೀ ತಂಡ ಇಟಲಿಯ ವಿಮಾನ ನಿಲ್ದಾಣದಲ್ಲಿ ಚಿತ್ರವನ್ನು ಹಂಚಿಕೊಂಡಿದ್ದು, ಚಿತ್ರ ನೋಡಿದ ಪ್ರಭಾಸ್ ಅಭಿಮಾನಿಗಳಿಗೆ ಅನುಮಾನವೊಂದು ಎದುರಾಗಿದೆ.

ಇದನ್ನೂ ಓದಿ:ನಟ ಪ್ರಭಾಸ್ ಫೇವರಿಟ್ ಹೀರೋಯಿನ್ ಯಾರು? ಈ ವಿಡಿಯೋದಲ್ಲಿದೆ ಉತ್ತರ

ಸಿನಿಮಾದ ಮುಖ್ಯ ನಟರುಗಳ ಪೈಕಿ ಇಟಲಿಗೆ ಪ್ರಭಾಸ್, ದಿಶಾ ಪಟಾನಿ ಮಾತ್ರವೇ ಹೋಗಿದ್ದಾರೆ. ದೀಪಿಕಾ ಪಡುಕೋಣೆ ಹೋಗಿಲ್ಲ. ಇದು, ‘ಕಲ್ಕಿ’ ಸಿನಿಮಾದ ನಾಯಕಿ ದೀಪಿಕಾ ಪಡುಕೋಣೆಯಾ ಅಥವ ದಿಶಾ ಪಟಾಣಿಯ ಎಂಬ ಅನುಮಾನ ಮೂಡುವಂತೆ ಮಾಡಿದೆ. ಇಟಲಿಯಲ್ಲಿ ಪ್ರಭಾಸ್ ಹಾಗೂ ದಿಶಾ ನಡುವೆ ಯುಗಳ ಗೀತೆಯ ಚಿತ್ರೀಕರಣ ನಡೆಯಲಿದೆಯಂತೆ. ಅಂದಹಾಗೆ ದೀಪಿಕಾ ಪಡುಕೋಣೆ ತಾಯಿಯಾಗುತ್ತಿದ್ದು, ಕೆಲವು ದಿನಗಳ ಹಿಂದೆಯಷ್ಟೆ ಈ ವಿಷಯ ಬಹಿರಂಗಪಡಿಸಿದ್ದಾರೆ. ಕಲ್ಕಿ ಸಿನಿಮಾದಲ್ಲಿ ದೀಪಿಕಾ ಪ್ರಮುಖ ಪಾತ್ರದಲ್ಲಿ ನಟಿಸುತ್ತಿದ್ದು ಈಗ ದೀಪಿಕಾ ಗರ್ಭಿಣಿ ಆಗಿರುವ ಕಾರಣ ‘ಕಲ್ಕಿ’ ಸಿನಿಮಾದ ಚಿತ್ರೀಕರಣ ಹಾಗೂ ಪ್ರಚಾರದ‌ ಮೇಲೆ ಋಣಾತ್ಮಕ ಪರಿಣಾಮ ಬೀರಲಿದೆ ಎನ್ನಲಾಗುತ್ತಿದೆ.

‘ಕಲ್ಕಿ’ ಸಿನಿಮಾದಲ್ಲಿ ಬಹುದೊಡ್ಡ ತಾರಾಗಣವಿದೆ. ಪ್ರಭಾಸ್ ನಾಯಕನಾಗಿ ನಟಿಸಿದ್ದು, ದೀಪಿಕಾ ಪಡುಕೋಣೆ, ದಿಶಾ ಪಟಾನಿ ನಾಯಕಿಯರಾಗಿ ನಟೊಸಿದ್ದಾರೆ. ಅಮಿತಾಬ್ ಬಚ್ಚನ್ ಸಹ ಸಿನಿಮಾದ ಪ್ರಮುಖ ಪಾತ್ರದಲ್ಲಿ ನಟಿಸುತ್ತಿದ್ದಾರೆ. ನಟ ಕಮಲ್ ಹಾಸನ್ ಈ ಸಿನಿಮಾದ ವಿಲನ್ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಈ ಸಿನಿಮಾಕ್ಕೆ ಕೆಲವು ವಿದೇಶ ತಂತ್ರಜ್ಞರು ಸಹ ಕೆಲಸ ಮಾಡಿದ್ದು, ಸಿನಿಮಾವನ್ನು ಭಾರತದಲ್ಲಿ ಮಾತ್ರವೇ ಅಲ್ಲದೆ ವಿದೇಶದಲ್ಲಿಯೂ ದೊಡ್ಡ ಮಟ್ಟದಲ್ಲಿ ಬಿಡುಗಡೆ ಮಾಡುವ ಆಲೋಚನೆ ಚಿತ್ರತಂಡಕ್ಕಿದೆ.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ