‘ನಿಮ್ಮ ಮಗ ಐಸಿಸ್ ಸೇರ್ತಾನೆ’; ಪ್ರಿಯಾಮಣಿ ಕೇಳಿದ್ದ ಕಠೋರ ಮಾತಿದು
ಪ್ರಿಯಾಮಣಿ ಅವರು ತಮ್ಮ ಅಂತರ್ಧರ್ಮೀಯ ವಿವಾಹದ ನಂತರ ಎದುರಿಸುತ್ತಿರುವ ದ್ವೇಷಪೂರಿತ ಕಾಮೆಂಟ್ಗಳು ಮತ್ತು ಟ್ರೋಲಿಂಗ್ ಬಗ್ಗೆ ಮಾತನಾಡಿದ್ದಾರೆ. ಏಳು ವರ್ಷಗಳಿಂದ ಲವ್ ಜಿಹಾದ್ ಆರೋಪಗಳು ಮತ್ತು ಅವರ ಮಕ್ಕಳ ಮೇಲಿನ ಅಪಪ್ರಚಾರಗಳನ್ನು ಎದುರಿಸುತ್ತಿದ್ದಾರೆ ಎಂದು ಅವರು ಹೇಳಿದ್ದಾರೆ. ಈ ಕಾಮೆಂಟ್ಗಳು ಅವರ ಮಾನಸಿಕ ಆರೋಗ್ಯದ ಮೇಲೆ ಪರಿಣಾಮ ಬೀರಿದೆ ಎಂದು ಅವರು ವಿಷಾದಿಸಿದ್ದಾರೆ.
ಕನ್ನಡ ಹಾಗೂ ಇತರ ಭಾಷೆಯ ಸಿನಿಮಾಗಳಲ್ಲಿ ನಟಿಸಿ ಪ್ರಿಯಾಮಣಿ ಅವರು ಫೇಮಸ್ ಆದರು. ಅವರು ‘ದಿ ಫ್ಯಾಮಿಲಿ ಮ್ಯಾನ್’ ವೆಬ್ ಸರಣಿಯ ಮೂಲಕ ಹಿಂದಿ ಚಲನಚಿತ್ರೋದ್ಯಮದಲ್ಲಿ ಸಾಕಷ್ಟು ಹೆಸರು ಮಾಡಿದರು. ಅವರು ಕೆಲವೇ ಅತಿಥಿಗಳ ಸಮ್ಮುಖದಲ್ಲಿ ಈವೆಂಟ್ ಮ್ಯಾನೇಜರ್ ಮತ್ತು ನಿರ್ದೇಶಕ ಮುಸ್ತಫಾ ರಾಜ್ ಅವರನ್ನು ವಿವಾಹವಾದರು. ಆದರೆ, ಈ ಮದುವೆಯ ನಂತರ, ಇಬ್ಬರೂ ಸಾಕಷ್ಟು ಟ್ರೋಲಿಂಗ್ ಎದುರಿಸುತ್ತಿದ್ದಾರೆ. ಮುಸ್ತಫಾ ಜೊತೆ ಪ್ರಿಯಾಮಣಿ ಅಂತರ್ಧರ್ಮೀಯ ವಿವಾಹವಾಗಿದ್ದಕ್ಕೆ ನೆಟ್ಟಿಗರು ಅವರನ್ನು ಟೀಕಿಸುತ್ತಿದ್ದಾರೆ. ಇತ್ತೀಚಿನ ಸಂದರ್ಶನವೊಂದರಲ್ಲಿ, ಮದುವೆಯಾದ ಏಳು ವರ್ಷಗಳ ನಂತರವೂ ದ್ವೇಷಪೂರಿತ ಕಾಮೆಂಟ್ಗಳನ್ನು ಎದುರಿಸುತ್ತಿದ್ದೇನೆ ಎಂದು ಅವರು ದೂರಿದ್ದಾರೆ.
ಫಿಲ್ಮ್ಫೇರ್ಗೆ ನೀಡಿದ ಸಂದರ್ಶನದಲ್ಲಿ ಮಾತನಾಡಿದ ಪ್ರಿಯಾಮಣಿ, ‘ನನ್ನ ಜೀವನದ ಅತ್ಯಂತ ಸಂತೋಷದ ಕ್ಷಣಗಳನ್ನು ನನ್ನ ಜನರೊಂದಿಗೆ ಹಂಚಿಕೊಳ್ಳಲು ನಾನು ಬಯಸಿದ್ದೆ. ಹಾಗಾಗಿ ನಿಶ್ಚಿತಾರ್ಥದ ಸಿಹಿ ಸುದ್ದಿಯನ್ನು ಎಲ್ಲರಿಗೂ ಹೇಳಿದೆ. ಆದರೆ ಯಾವುದೋ ಕಾರಣಕ್ಕಾಗಿ, ಜನರು ನನ್ನನ್ನು ಟೀಕಿಸಲು ಪ್ರಾರಂಭಿಸಿದರು. ನಮ್ಮ ಮೇಲೆ ಲವ್ ಜಿಹಾದ್ ಆರೋಪ ಹೊರಿಸಲಾಯಿತು. ಅಷ್ಟೇ ಅಲ್ಲ, ನಮಗೆ ಮಕ್ಕಳಾದಾಗ ಅವರು ಭಯೋತ್ಪಾದಕ ಸಂಘಟನೆ ಐಸಿಸ್ ಸೇರುತ್ತಾರೆ ಎಂದು ಜನರು ನಮ್ಮನ್ನು ಟೀಕಿಸಿದರು’ ಎಂದು ಬೇಸರ ಹೊರಹಾಕಿದ್ದರು ಪ್ರಿಯಾಮಣಿ.
ಇಂತಹ ಕಾಮೆಂಟ್ಗಳು ಪ್ರಿಯಾಮಣಿಯವರ ಮಾನಸಿಕ ಆರೋಗ್ಯದ ಮೇಲೆ ಪರಿಣಾಮ ಬೀರಿದವು . ‘ನಾನು ಚಿತ್ರರಂಗದ ಭಾಗವಾಗಿರುವುದರಿಂದ, ನೀವು ನನಗೆ ಏನು ಬೇಕಾದರೂ ಹೇಳಬಹುದು ಎಂದು ನನಗೆ ಅರ್ಥವಾಗುತ್ತದೆ. ಆದರೆ ಇದೆಲ್ಲದರ ಭಾಗವಲ್ಲದ ವ್ಯಕ್ತಿಯ ಮೇಲೆ ಏಕೆ ಆರೋಪ ಮಾಡಬೇಕು? ಆ ವ್ಯಕ್ತಿಯ ಬಗ್ಗೆ ನಿನಗೆ ಏನೂ ತಿಳಿದಿಲ್ಲ. ನನಗೆ ನಿರಂತರವಾಗಿ ಸಂದೇಶಗಳು ಬರುತ್ತಿದ್ದರಿಂದ, ಈ ಕಾಮೆಂಟ್ಗಳು ಎರಡು ಅಥವಾ ಮೂರು ದಿನಗಳವರೆಗೆ ನನ್ನ ಮೇಲೆ ಭಾರಿ ಪರಿಣಾಮ ಬೀರಿದವು. ಇಂದಿಗೂ ನಾನು ಏನನ್ನಾದರೂ ಪೋಸ್ಟ್ ಮಾಡಿದರೆ, ಹತ್ತರಲ್ಲಿ ಒಂಬತ್ತು ಕಾಮೆಂಟ್ಗಳು ನಮ್ಮ ಧರ್ಮ ಅಥವಾ ಜಾತಿಯ ಬಗ್ಗೆ ಇರುತ್ತವೆ’ ಎಂದು ಅವರು ವಿಷಾದಿಸಿದರು.
ಇದನ್ನೂ ಓದಿ: ‘ಇಡೀ ಜೀವನವನ್ನು ಒಟ್ಟಿಗೆ ಕಳೆಯುತ್ತೇವೆ’; ಪತಿ ಮುಸ್ತಫಾ ಬಗ್ಗೆ ಪ್ರಿಯಾಮಣಿ ಮಾತು
‘ಬೆಂಕಿಯ ಮೇಲೆ ಎಣ್ಣೆ ಸುರಿಯುವುದರಿಂದ ಯಾರಿಗೂ ಸಹಾಯವಾಗುವುದಿಲ್ಲ ಎಂದು ನಾನು ಅರ್ಥಮಾಡಿಕೊಳ್ಳಲು ಪ್ರಾರಂಭಿಸುತ್ತಿದ್ದೇನೆ. ನನ್ನನ್ನು ಟ್ರೋಲ್ ಮಾಡುವ ವ್ಯಕ್ತಿಗೆ ನಾನು ಯಾವುದೇ ಪ್ರಾಮುಖ್ಯತೆ ನೀಡಲು ಬಯಸುವುದಿಲ್ಲ ಅಥವಾ ಅವರು ಪಡೆಯುವ ಒಂದು ನಿಮಿಷದ ಖ್ಯಾತಿಯನ್ನು ಆನಂದಿಸಲು ಬಿಡುವುದಿಲ್ಲ. ಕಂಪ್ಯೂಟರ್ ಅಥವಾ ಫೋನ್ ಹಿಂದೆ ಮುಖ ಮುಚ್ಚಿಟ್ಟುಕೊಂಡು ಈ ರೀತಿಯ ಕಾಮೆಂಟ್ ಮಾಡಿ ನಮ್ಮಿಂದ ಅದಕ್ಕೆ ಪ್ರತಿಕ್ರಿಯೆ ನಿರೀಕ್ಷಿಸುವ ಜನರು ಇವರು. ಹೀಗಾಗಿ ನಾನು ಅಂತಹ ನಕಾರಾತ್ಮಕತೆಯನ್ನು ನಿರ್ಲಕ್ಷಿಸಲು ಕಲಿತಿದ್ದೇನೆ’ ಎಂದು ಪ್ರಿಯಾಮಣಿ ಹೇಳಿದರು.
ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ.