Ram Charan Teja: ಅಮೆರಿಕದಲ್ಲಿ ಮಿಂಚು ಹರಿಸಿದ ರಾಮ್ ಚರಣ್, ರಾಜಮೌಳಿ ಬಗ್ಗೆ ಮೆಚ್ಚುಗೆಯ ಸುರಿಮಳೆ
ಅಮೆರಿಕದಲ್ಲಿ ಆರ್ಆರ್ಆರ್ (RRR) ಸಿನಿಮಾ ಮರು ಬಿಡುಗಡೆ ಆಗಲಿದ್ದು, ಸಿನಿಮಾ ಪ್ರಚಾರಾರ್ಥ ಅಮೆರಿಕದ ಟಾಕ್ ಶೋ ಒಂದರಲ್ಲಿ ಭಾಗವಹಿಸಿದ್ದ ನಟ ರಾಮ್ಚರಣ್, ಭಾರತೀಯ ಸಿನಿಮಾ ಹಾಗೂ ರಾಜಮೌಳಿಯನ್ನು ಕೊಂಡಾಡಿದ್ದಾರೆ.
Updated on:Feb 23, 2023 | 11:26 AM
ಆಸ್ಕರ್ (Oscar) ಪ್ರಶಸ್ತಿ ಸಮಾರಂಭ ಪ್ರಾರಂಭವಾಗಲು ಇನ್ನೂ ಕೆಲವು ದಿನಗಳಿರುವಾಗಲೇ ಆರ್ಆರ್ಆರ್ (RRR) ಸಿನಿಮಾದ ನಾಯಕದ್ವಯರಲ್ಲಿ ಒಬ್ಬರಾದ ನಟ ರಾಮ್ ಚರಣ್ (Ram Charan) ಅಮೆರಿಕದ ನ್ಯೂಯಾರ್ಕ್ಗೆ (New York) ಭೇಟಿ ನೀಡಿದ್ದು, ಭಾರತೀಯ ಸಿನಿಮಾ, ಆರ್ಆರ್ಆರ್ ಸಿನಿಮಾ, ನಾಟು–ನಾಟು ಹಾಡು (Natu Natu Song) ಹಾಗೂ ನಿರ್ದೇಶಕ ರಾಜಮೌಳಿ ಕುರಿತಾಗಿ ಹೆಮ್ಮೆಯ ಮಾತುಗಳನ್ನಾಡಿದ್ದಾರೆ.
ಜನಪ್ರಿಯ ಟಾಕ್ ಶೋ ಗುಡ್ ಮಾರ್ನಿಂಗ್ ಅಮೆರಿಕದಲ್ಲಿ ಅತಿಥಿಯಾಗಿ ಭಾಗವಹಿಸಿದ್ದಾರೆ ರಾಮ್ ಚರಣ್. ಈ ವೇಳೆ ರಾಮ್ ಚರಣ್ ಅವರನ್ನು ಕಾಣಲು ಸ್ಟುಡಿಯೋದ ಮುಂದೆ ಭಾರಿ ಸಂಖ್ಯೆಯ ಅಭಿಮಾನಿಗಳು ಸಹ ಜಮಾಯಿಸಿದ್ದರು. ಟಾಕ್ ಶೋನಲ್ಲಿ ಆರ್ಆರ್ಆರ್ ಸಿನಿಮಾ ನಿರ್ದೇಶಕ ರಾಜಮೌಳಿಯನ್ನು ಭಾರತದ ಸ್ಪೀಲ್ಬರ್ಗ್ ಎಂದು ಬಣ್ಣಿಸಿದ್ದಾರೆ. ಅಲ್ಲದೆ ಆದಷ್ಟು ಶೀಘ್ರವೇ ಅವರು ವಿಶ್ವಮಟ್ಟದ ಸಿನಿಮಾಕರ್ಮಿಯಾಗಿ ಹೆಸರುಗಳಿಸಲಿದ್ದಾರೆ ಎಂದಿದ್ದಾರೆ.
ನಾಟು ನಾಟು ಹಾಡು ಆಸ್ಕರ್ಗೆ ನಾಮಿನೇಟ್ ಆಗಿರುವ ಬಗ್ಗೆಯೂ ಪ್ರತಿಕ್ರಿಯಿಸಿರುವ ರಾಮ್ ಚರಣ್, ಇದು ಭಾರತೀಯ ಸಿನಿಮಾಕ್ಕೆ ಸಂದ ಗೌರವ. ಎಂಟು ದಶಕಗಳ ಬಳಿಕ ಭಾರತೀಯ ಸಿನಿಮಾವನ್ನು ಅದರ ಹಾಡನ್ನು ಗೋಲ್ಡನ್ ಗ್ಲೋಬ್, ಆಸ್ಕರ್, ಕ್ರಿಟಿಕ್ ಚಾಯ್ಸ್ ಇನ್ನಿತರೆ ಪ್ರಶಸ್ತಿಗಳು ಗುರುತಿಸಿವೆ ಗೌರವಿಸುತ್ತಿವೆ. ಇದು ಭಾರತದ ಪ್ರತಿಯೊಬ್ಬ ಸಿನಿಮಾ ಕರ್ಮಿಗೂ ಸಲ್ಲಬೇಕಾದ ಗೌರವ ಎಂದಿದ್ದಾರೆ.
”ಭಾರತದಲ್ಲಿ ಆರ್ಆರ್ಆರ್ ಸಿನಿಮಾಕ್ಕೆ ಒಳ್ಳೆಯ ಪ್ರತಿಕ್ರಿಯೆ ವ್ಯಕ್ತವಾಗಿ ಇನ್ನೇನು ನಾವು ನಮ್ಮ ಮುಂದಿನ ಸಿನಿಮಾಗಳ ಕಡೆಗೆ ಗಮನ ಹರಿಸಬೇಕು ಎಂದುಕೊಂಡಾಗಲೇ ಪಶ್ಚಿಮಾತ್ಯ ದೇಶಗಳು ನಮ್ಮ ಸಿನಿಮಾಕ್ಕೆ ಪ್ರತಿಕ್ರಿಯಿಸಲು ಆರಂಭಿಸಿದವು ಮಾತ್ರವಲ್ಲ, ಇದು ಇನ್ನೂ ಆರಂಭ ಎಂದು ತೋರಿಸಿದವು ಎಂದು ವಿದೇಶಗಳಲ್ಲಿ ಆರ್ಆರ್ಆರ್ಗೆ ವ್ಯಕ್ತವಾದ ಅಭೂತಪೂರ್ವ ಪ್ರತಿಕ್ರಿಯೆಗಳ ಬಗ್ಗೆ ರಾಮ್ ಚರಣ್ ಹೇಳಿದ್ದಾರೆ.
‘ನಾಟು ನಾಟು ಹಾಡು, ಗೋಲ್ಡನ್ ಗ್ಲೋಬ್ನಲ್ಲಿ ವಿಶ್ವಪ್ರಸಿದ್ಧ ಗಾಯಕಿಯರಾದ ಲೇಡಿ ಗಾಗ, ರಿಹಾನಾ ಹಾಡಗಳನ್ನು ಹಿಂದಿಕ್ಕಿದ ಬಗ್ಗೆ ಮಾತನಾಡಿದ ರಾಮ್ ಚರಣ್, ನನಗೆ ವೈಯಕ್ತಿಕವಾಗಿ ಲೇಡಿ ಗಾಗ, ರಿಹಾನಾ ಹಾಗೂ ಟಾಪ್ ಗನ್ ಮೇವರಿಕ್ ಹಾಡುಗಳು ಬಹಳ ಇಷ್ಟ, ಆದರೆ ನಾಟು ನಾಟು ಗೆದ್ದಿದ್ದು ನಮ್ಮ ತಂತ್ರಜ್ಞರ ಬಗ್ಗೆ ಹೆಮ್ಮೆ ತಂದಿದೆ ಎಂದಿದ್ದಾರೆ.
ಆರ್ಆರ್ಆರ್ ಸಿನಿಮಾವು ನ್ಯೂಯಾರ್ಕ್ ಹಾಗೂ ಅಮೆರಿಕದ ಇನ್ನಿತರೆ ಪ್ರಮುಖ ನಗರಗಳಲ್ಲಿ ಮಾರ್ಚ್ 3 ರಿಂದ ಮರು ಬಿಡುಗಡೆ ಆಗಲಿದೆ. ಇದರ ಪ್ರಚಾರಾರ್ಥವಾಗಿ ರಾಮ್ ಚರಣ್ ಅಮೆರಿಕಕ್ಕೆ ತೆರಳಿದ್ದಾರೆ. ಕೆಲವು ಟಾಕ್ ಶೋಗಳಲ್ಲಿ ಸಹ ಭಾಗವಹಿಸಲಿದ್ದಾರೆ.
ಆರ್ಆರ್ಆರ್ ಸಿನಿಮಾ ಈ ಹಿಂದೆ ಅಮೆರಿಕದಲ್ಲಿ ಬಿಡುಗಡೆ ಆಗಿ ಸುಮಾರು 17 ಕೋಟಿಗೂ ಹೆಚ್ಚು ಹಣ ಗಳಿಸಿತ್ತು. ನೆಟ್ಫ್ಲಿಕ್ಸ್ ಮೂಲಕವೂ ಅಮೆರಿಕ ಸೇರಿದಂತೆ ಹಲವು ದೇಶಗಳ ಸಿನಿಮಾ ಪ್ರೇಮಿಗಳನ್ನು ಸೆಳೆದಿತ್ತು. ಇದೀಗ ಮಾರ್ಚ್ 3 ರಂದು ಸಿನಿಮಾ ಮರು ಬಿಡುಗಡೆ ಆಗುತ್ತಿದ್ದು, ಮತ್ತೊಮ್ಮೆ ದಾಖಲೆ ಬರೆಯಲು ಸಜ್ಜಾಗಿದೆ.
Published On - 11:23 am, Thu, 23 February 23
