Rishi Kapoor Death Anniversary: ಸ್ವಂತ ಮಗನ ಗಾಸಿಪ್​ ಸುದ್ದಿಯನ್ನು ಮುಗಿಬಿದ್ದು ಓದುತ್ತಿದ್ದ ರಿಷಿ ಕಪೂರ್​; ಕಾರಣ ಏನು?

ಬಾಲಿವುಡ್​ನ ಖ್ಯಾತ ನಟ ರಿಷಿ ಕಪೂರ್​ ಅವರು ಇಹಲೋಕ ತ್ಯಜಿಸಿ ಒಂದು ವರ್ಷ ಕಳೆದಿದೆ. 2020ರ ಏ.30ರಂದು ಅವರು ನಿಧನರಾದರು. ಎರಡು ವರ್ಷಗಳ ಕಾಲ ರಕ್ತದ ಕ್ಯಾನ್ಸರ್​ನಿಂದ ಬಳಲುತ್ತಿದ್ದ ಅವರು ಕೊನೆಗೂ ಚಿಕಿತ್ಸೆ ಫಲಕಾರಿಯಾಗದೇ ಮೃತರಾದರು ಎಂದು ಸುದ್ದಿ ಹೊರಬಿದ್ದ ದಿನ ಇಡೀ ಭಾರತೀಯ ಚಿತ್ರರಂಗಕ್ಕೆ ಶಾಕ್​ ಆಗಿತ್ತು. ಇಂದು ಅವರ ಮೊದಲ ವರ್ಷದ ಪುಣ್ಯ ಸ್ಮರಣೆ. ಈ ಸಂದರ್ಭದಲ್ಲಿ ರಿಷಿ ಕಪೂರ್​ ಬಗೆಗಿನ ಅನೇಕ ವಿಚಾರಗಳನ್ನು ಮೆಲುಕು ಹಾಕಲಾಗುತ್ತಿದೆ. ತಮ್ಮ ವಿಶೇಷ ವ್ಯಕ್ತಿತ್ವದ ಕಾರಣಕ್ಕಾಗಿ ರಿಷಿ ಆಗಾಗ ಹೈಲೈಟ್​ ಆಗುತ್ತಿದ್ದರು.

ರಿಷಿ ಕಪೂರ್​ ಪುತ್ರ ರಣಬೀರ್​ ಕಪೂರ್​ ಅವರು ಬಾಲಿವುಡ್​ನಲ್ಲಿ ತಮ್ಮದೇ ಛಾಪು ಮೂಡಿಸಿದ್ದಾರೆ. ಬಹುಬೇಡಿಕೆಯ ನಟನಾಗಿ ಗುರುತಿಸಿಕೊಂಡಿದ್ದಾರೆ. ಆದರೆ ಅವರ ವೈಯಕ್ತಿಕ ಜೀವನ ಆಗಾಗ ಹಳ್ಳ ಹಿಡಿದು ಹೋಗಿದ್ದುಂಟು. ಈ ಬಗ್ಗೆ ರಿಷಿ ಕಪೂರ್​ಗೆ ಬೇಸರ ಆಗಿದ್ದು ಸಹಜ. ಅದೇನೇ ಇರಲಿ, ಸ್ವಂತ ಮಗನ ಬಗ್ಗೆ ಬರುತ್ತಿದ್ದ ಗಾಸಿಪ್​ ಸುದ್ದಿಯನ್ನು ರಿಷಿ​ ಕಪೂರ್​ ಮುಗಿಬಿದ್ದು ಓದುತ್ತಿದ್ದರು ಎಂಬುದು ಅಚ್ಚರಿಯ ಸಂಗತಿ.

ಸಾಮಾನ್ಯವಾಗಿ ಸೆಲೆಬ್ರಿಟಿಗಳ ಕುಟುಂಬದವರು ಗಾಸಿಪ್​ ಸುದ್ದಿಗಳಿಗೆ ಬೆಲೆ ಕೊಡುವುದಿಲ್ಲ. ಅವುಗಳನ್ನು ನಿರ್ಲಕ್ಷ್ಯ ಮಾಡುವುದೇ ಉತ್ತಮ ಎಂದು ನಿರ್ಧರಿಸಿಬಿಟ್ಟಿರುತ್ತಾರೆ. ಆದರೆ ರಿಷಿ ಕಪೂರ್​ ಈ ಮಾತಿಗೆ ವಿರುದ್ಧ. ತಮ್ಮ ಪುತ್ರ ರಣಬೀರ್​ ಕಪೂರ್​ ಬಗ್ಗೆ ಬರುತ್ತಿದ್ದ ಎಲ್ಲ ಗಾಸಿಪ್​ ಬರಹಗಳನ್ನು ಅವರು ಓದುತ್ತಿದ್ದರಂತೆ. ಹಾಗಂತ ಅವುಗಳನ್ನು ಓದುತ್ತಾ ಅವರು ಎಂಜಾಯ್​ ಮಾಡುತ್ತಿರಲಿಲ್ಲ. ಅವರ ಉದ್ದೇಶವೇ ಬೇರೆ ಆಗಿತ್ತು.

ಎಲ್ಲರಿಗೂ ತಿಳಿದಿರುವಂತೆ ರಣಬೀರ್ ಕಪೂರ್​ ಪ್ರೀತಿ ಪ್ರೇಮದ ವಿಚಾರದಲ್ಲಿ ಪದೇಪದೇ ಕೈ ಸುಟ್ಟುಕೊಂಡಿದ್ದಾರೆ. ಮೊದಲ ದೀಪಿಕಾ ಪಡುಕೋಣೆ ಜೊತೆ ಡೇಟಿಂಗ್​ ಮಾಡುತ್ತಿದ್ದ ಅವರು ನಂತರ ಬ್ರೇಕಪ್​ ಮಾಡಿಕೊಂಡರು. ಬಳಿಕ ಕತ್ರಿನಾ ಕೈಫ್​ ಜೊತೆ ಅವರ ಲವ್​ಸ್ಟೋರಿ ಶುರು ಆಯಿತು. ಅದು ಕೂಡ ಹೆಚ್ಚು ದಿನ ಉಳಿಯಲಿಲ್ಲ. ನಂತರ ಆಲಿಯಾ ಭಟ್​ ಜೊತೆ ಓಡಾಡಲು ಆರಂಭಿಸಿದರು.

ಇತ್ತ ರಿಷಿ ಕಪೂರ್​ಗೆ ತಮ್ಮ ಮಗ ಏನು ಮಾಡುತ್ತಿದ್ದಾನೆ ಎಂಬುದೇ ತಿಳಿಯುತ್ತಿರಲಿಲ್ಲ. ಮಗನ ಚಲನವಲನಗಳ ಬಗ್ಗೆ ಒಂದು ಕಣ್ಣು ಇಡಬೇಕು ಎಂಬ ಕಾರಣಕ್ಕೆ ಅವರು ಗಾಸಿಪ್​ ಕಾಲಂಗಳನ್ನು ಓದುತ್ತಿದ್ದರಂತೆ. ಅದರ ಮೂಲಕ ರಣಬೀರ್​ ಕಪೂರ್​ ಏನೇನು ಮಾಡುತ್ತಿದ್ದಾರೆ? ಎಲ್ಲಿಗೆ ಹೋಗುತ್ತಿದ್ದಾರೆ ಎಂಬಿತ್ಯಾದಿ ಮಾಹಿತಿಯನ್ನು ರಿಷಿ ಕಪೂರ್​ ತಿಳಿದುಕೊಳ್ಳುತ್ತಿದ್ದರು. ಈ ವಿಚಾರವನ್ನು ಅವರು ಅಭಿಷೇಕ್​ ಬಚ್ಚನ್​ ಜೊತೆ ಹಂಚಿಕೊಂಡಿದ್ದರು.

ಇದನ್ನೂ ಓದಿ: 74ರ ಪ್ರಾಯದ ರಣಧೀರ್​ ಕಪೂರ್​ಗೆ ಕೊವಿಡ್​; ಕರೀನಾ ಕುಟುಂಬದಲ್ಲಿ ಹೆಚ್ಚಿದ ಆತಂಕ

ಸಹ ನಟರಿಗೆ ಅಮಿತಾಭ್ ಎಂದಿಗೂ ಕ್ರೆಡಿಟ್​ ಕೊಡುತ್ತಿರಲಿಲ್ಲ; ಪುಸ್ತಕದಲ್ಲಿ ಹೊರಬಿತ್ತು ಬಿಗ್​ ಬಿ ಸ್ವಾರ್ಥ ಮುಖ