ನಿರ್ಮಾಣ ಸಂಸ್ಥೆ ಆರಂಭಿಸಿದ ಸಮಂತಾ, ನಿರ್ಮಿಸುತ್ತಿರುವುದು ಸಿನಿಮಾ ಅಲ್ಲ, ಮತ್ತೇನು?

ಹಲವು ಹೊಸ, ಗ್ಲಾಮರಸ್ ನಟಿಯರು ಇತ್ತೀಚಿನ ಕೆಲವು ವರ್ಷಗಳಲ್ಲಿ ಚಿತ್ರರಂಗಕ್ಕೆ ಬಂದಿದ್ದಾರೆ. ಆದರೆ ಈಗಲೂ ನಟಿ ಸಮಂತಾ (Samantha) ಟಾಪ್ ನಟಿಯರಲ್ಲಿ ಒಬ್ಬರಾಗಿ ಗುರುತಿಸಿಕೊಳ್ಳುತ್ತಾರೆ. ಒಂದರ ಹಿಂದೊಂದು ಭಿನ್ನ ಸಿನಿಮಾಗಳ ಅವಕಾಶಗಳನ್ನು ಬಾಚಿಕೊಳ್ಳುತ್ತಿರುವ ಹೊತ್ತಿನಲ್ಲಿಯೇ ಸಿನಿಮಾದಿಂದ ಬ್ರೇಕ್ ಪಡೆದುಕೊಂಡಿದ್ದಾರೆ. ಈಗ ಸಿನಿಮಾದಿಂದ ದೂರಾಗಿ, ಪ್ರವಾಸ, ಆರೋಗ್ಯ ಸುಧಾರಣೆಯಲ್ಲಿ ತಮ್ಮನ್ನು ತೊಡಗಿಸಿಕೊಂಡಿದ್ದಾರೆ. ಆದರೆ ಸಮಂತಾ ಸಂಪೂರ್ಣವಾಗಿ ಸಿನಿಮಾಗಳಿಂದ ದೂರವಾಗಿಲ್ಲ, ಸಮಂತಾ ಸ್ವಂತ ನಿರ್ಮಾಣ ಸಂಸ್ಥೆಯೊಂದನ್ನು ಪ್ರಾರಂಭಿಸಿದ್ದಾರೆ. ನಿರ್ಮಾಣ ಸಂಸ್ಥೆಯಿಂದ ಸಿನಿಮಾ ನಿರ್ಮಿಸುವ ಬದಲಿಗೆ ಬೇರೆ ಒಂದು ವಿಭಾಗಕ್ಕೆ ಕೈ ಇಟ್ಟಿದ್ದಾರೆ.

ಸಮಂತಾ, ರಿಯಾಲಿಟಿ ಶೋ ಒಂದನ್ನು ಪ್ರಾರಂಭಿಸುತ್ತಿದ್ದಾರೆ. ಅವರ ನಿರ್ಮಾಣ ಸಂಸ್ಥೆಯ ಮೊದಲ ಪ್ರಾಜೆಕ್ಟ್ ಈ ರಿಯಾಲಿಟಿ ಶೋ ಆಗಿರಲಿದೆ. ‘ಎಂಟಿವಿ ಹಸಲ್’ ಹೆಸರಿನ ಹಿಂದಿ ರಿಯಾಲಿಟಿ ಶೋ ಈಗಾಗಲೇ ಪ್ರಸಾರವಾಗುತ್ತಿದೆ. ಈ ಶೋನಲ್ಲಿ ಸ್ಪರ್ಧಿಗಳು ರ್ಯಾಪ್ ಸಂಗೀತವನ್ನು ಪ್ರಸ್ತುತ ಪಡಿಸುತ್ತಾರೆ. ಹೊಸ ತಲೆಮಾರಿನವರನ್ನು ಈ ಸಂಗೀತಾ ಸಖತ್ ಸೆಳೆಯುತ್ತಿದೆ. ಸಾಮಾನ್ಯ ಹಾಡುಗಳಿಗಿಂತಲೂ ಎಲ್ಲ ವಿಧದಲ್ಲಿಯೂ ಈ ಸಂಗೀತ ಮಾದರಿ ಭಿನ್ನವಾಗಿದೆ. ಹಾಗಾಗಿ ಈ ರಿಯಾಲಿಟಿ ಶೋ ಅನ್ನೇ ಸಮಂತಾ ಮೊದಲಿಗೆ ನಿರ್ಮಾಣ ಮಾಡುತ್ತಿದ್ದಾರೆ.

ಇತ್ತೀಚೆಗಷ್ಟೆ ‘ಎಂಟಿವಿ ಹಸಲ್’ ಹಿಂದಿ ರಿಯಾಲಿಟಿ ಶೋಗೆ ಜಡ್ಜ್ ಆಗಿ ಹೋಗಿದ್ದರು ಸಮಂತಾ. ಸ್ಪರ್ಧಿಗಳ ರ್ಯಾಪ್ ಹಾಡುಗಳನ್ನು ಸಖತ್ ಎಂಜಾಯ್ ಮಾಡಿದ ಸಮಂತಾ, ಅದೇ ಶೋನಲ್ಲಿ ತಾವು ಪ್ರಾರಂಭಿಸುತ್ತಿರುವ ರಿಯಾಲಿಟಿ ಶೋನ ಘೋಷಣೆ ಮಾಡಿ ಅದರ ಲೋಗೋವನ್ನು ಸಹ ಬಿಡುಗಡೆ ಮಾಡಿದರು.

ಇದನ್ನೂ ಓದಿ:ನಿರ್ಮಾಪಕಿ ಆದ ಸಮಂತಾ; ನಿರ್ಮಾಣ ಸಂಸ್ಥೆಗೆ ಹೆಸರು ಸಿಕ್ಕಿದ್ದು ಇಂಗ್ಲಿಷ್ ಹಾಡಿನಿಂದಿಂದ

ಶೋನಲ್ಲಿ ಮಾತನಾಡಿದ ಸಮಂತಾ, ‘‘ದಕ್ಷಿಣ ಭಾರತದಲ್ಲಿ ಬಹಳ ಜನ ಪ್ರತಿಭಾವಂತರಿದ್ದಾರೆ. ಅದ್ಭುತವಾದ ಸಂಗೀತ ಅಲ್ಲಿದೆ. ಆದರೆ ಆ ಪ್ರತಿಭಾವಂತರಿಗೆ ಒಂದು ವೇದಿಕೆಯ ಅಗತ್ಯವಿದೆ. ಅವರ ಸಂಗೀತ ಪ್ರಪಂಚದ ಮೂಲೆಗಳಿಗೆ ತಲುಪಬೇಕಿದೆ. ಬೇರೆ ಎಲ್ಲವೂ ತೋರಿಕೆಗಾಗಿಯೇ ನಾಜೂಕಾಗಿ ಜೋಡಿಸಿದಂತೆ ಕಾಣುತ್ತಿರುವಾಗ ‘ಹಸಲ್’ ನಿಜದಂತೆ ಕಾಣುತ್ತದೆ. ಎಲ್ಲ ತಲೆಮಾರುಗಳಿಗೂ ಅದರದ್ದೇ ಆದ ಸಂಗೀತವಿದೆ. ನನಗೆ ಅನ್ನಿಸುತ್ತದೆ. ಈ ತಲೆಮಾರಿನ ಸಂಗೀತ ಈ ರ್ಯಾಪ್’’ ಎಂದಿದ್ದಾರೆ ಸಮಂತಾ.

‘‘ಈ ಅದ್ಭುತ ಸಂಗೀತ ಪರಂಪರೆಯ ಭಾಗವಾಗಲು ನನಗೆ ಖುಷಿ ಇದೆ. ಈ ಅದ್ಭುತವಾದ ಪ್ರಕಾರವನ್ನು ನಮ್ಮ ಊರಿಗೆ (ಹೋಮ್) ಪರಿಚಯಿಸಲು ನಾನು ಬಯಸುತ್ತೇನೆ. ಹಾಗಾಗಿಯೇ ಎಂಟಿವಿ ಹಸಲ್ ತಮಿಳು ಆವೃತ್ತಿಯನ್ನು ಪ್ರಾರಂಭಿಸುತ್ತಿದ್ದೇನೆ’’ ಎಂದ ಸಮಂತಾ ಅದರ ಲೋಗೋ ಅನಾವರಣ ಮಾಡಿದರು. ‘‘ಎಂಟಿವಿ ಹಸಲ್ ನಮ್ಮ ಪೇಟೈ’ ಎಂದು ಈ ಶೋನ ಹೆಸರು, ಇದು ನನ್ನ ನಿರ್ಮಾಣ ಸಂಸ್ಥೆಯ ಮೊದಲ ಪ್ರಯತ್ನ. ಈ ಶೋನ ಆಡಿಷನ್ ಓಪನ್ ಆಗಿದೆ, ಎಲ್ಲರೂ ಅಪ್ಲೈ ಮಾಡಿ’’ ಎಂದು ಸಮಂತಾ ಕರೆ ನೀಡಿದರು.

ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ