Manasi Sudhir: ‘ಕಾಂತಾರ’ ಚಿತ್ರದ ಶಿವನ ತಾಯಿ ಕಮಲಾ ಅಲಿಯಾಸ್​ ಮಾನಸಿ ಸುಧೀರ್​ ಬಗ್ಗೆ ಇಲ್ಲಿದೆ ಇಂಟರೆಸ್ಟಿಂಗ್​ ವಿಚಾರ

ರಿಷಬ್​ ಶೆಟ್ಟಿ ನಟಿಸಿ, ನಿರ್ದೇಶಿಸಿರುವ ‘ಕಾಂತಾರ’ (Kantara) ಸಿನಿಮಾ ಸೂಪರ್​ ಹಿಟ್​ ಆಗಿದೆ. ಗಲ್ಲಾ ಪೆಟ್ಟಿಗೆಯಲ್ಲಿ 350 ಕೋಟಿ ರೂಪಾಯಿ ಸಮೀಪಿಸಿರುವ ಈ ಚಿತ್ರದಿಂದ ಕನ್ನಡ ಸಿನಿಮಾರಂಗದ ಹಿರಿಮೆ ಹೆಚ್ಚಾಗಿದೆ. ಈ ಸಿನಿಮಾದಲ್ಲಿ ಕಾಣಿಸಿಕೊಂಡ ಎಲ್ಲ ಪಾತ್ರಗಳು ಕೂಡ ಸಖತ್​ ಹೈಲೈಟ್​ ಆಗಿವೆ. ರಿಷಬ್​ ಶೆಟ್ಟಿ (Rishab Shetty) ಮಾಡಿದ ಶಿವ ಎಂಬ ಪಾತ್ರ ಎಲ್ಲರ ಅಚ್ಚುಮೆಚ್ಚಾಗಿದೆ. ಕಥಾನಾಯಕನ ತಾಯಿ ಕಮಲಾ ಎಂಬ ಪಾತ್ರದಲ್ಲಿ ಮಾನಸಿ ಸುಧೀರ್​ (Manasi Sudhir) ಅವರು ಮಿಂಚಿದ್ದಾರೆ. ಸದಾ ಕಾಲ ಸಿಟ್ಟು ಪ್ರದರ್ಶಿಸುವ ಅವರ ಪಾತ್ರ ಪ್ರೇಕ್ಷಕರ ಮನ ಗೆದ್ದಿದೆ. ಅವರ ಬಗ್ಗೆ ತಿಳಿದುಕೊಳ್ಳುವ ಆಸಕ್ತಿ ಅಭಿಮಾನಿಗಳಿಗೆ ಇದೆ.

ಕಲಾ ರಂಗದಲ್ಲಿ ಮಾನಸಿ ಸುಧೀರ್​ ಅವರು ಹಲವು ವರ್ಷಗಳಿಂದ ಗುರುತಿಸಿಕೊಂಡಿದ್ದಾರೆ. ನಟನೆ ಮಾತ್ರವಲ್ಲದೇ ಭರತನಾಟ್ಯದಲ್ಲೂ ಅವರು ಪಳಗಿದ್ದಾರೆ. ಅವರು ಮೊದಲು ಬಣ್ಣ ಹಚ್ಚಿದ್ದು ‘ರಮ್ಯ ಚೈತ್ರ ಕಾಲ’ ಸಿನಿಮಾದಲ್ಲಿ. ಆ ಚಿತ್ರಕ್ಕೆ ಖ್ಯಾತ ನಿರ್ದೇಶಕ ಸುನಿಲ್​ ಕುಮಾರ್​ ದೇಸಾಯಿ ಅವರು ಆ್ಯಕ್ಷನ್​-ಕಟ್​ ಹೇಳಿದ್ದರು. ಅಂದು ಅವಕಾಶ ಕೊಟ್ಟ ನಿರ್ದೇಶಕರನ್ನು ಮಾನಸಿ ಸುಧೀರ್​ ಇಂದಿಗೂ ನೆನಪು ಮಾಡಿಕೊಳ್ಳುತ್ತಾರೆ.

ಪದವಿ ಶಿಕ್ಷಣ ಪಡೆಯುವಾಗ ಮಾನಸಿ ಸುಧೀರ್​ ಅವರು ‘ರಮ್ಯ ಚೈತ್ರ ಕಾಲ’ ಚಿತ್ರದಲ್ಲಿ ನಟಿಸಿದರು. ಮರುವರ್ಷ ಅವರ ಮದುವೆ ಆಯಿತು. ಇಂಗ್ಲಿಷ್​ ಎಂ.ಎ. ಮುಗಿಸಿ ಉಪನ್ಯಾಸಕಿಯಾಗಿ ಕೆಲಸ ಮಾಡಲು ಆರಂಭಿಸಿದರು. ನಂತರ ಹೆಣ್ಣು ಮಗು ಜನಿಸಿತು. ಇಷ್ಟೆಲ್ಲ ಬ್ಯುಸಿ ದಿನಚರಿ ನಡುವೆ ಸಿನಿಮಾ ಅವಕಾಶಗಳು ಬಂದರೂ ಕೂಡ ಒಪ್ಪಿಕೊಳ್ಳಲು ಅವರಿಗೆ ಸಾಧ್ಯವಾಗಲಿಲ್ಲ. ಅಪರೂಪಕ್ಕೆ ಅಲ್ಲೊಂದು ಇಲ್ಲೊಂದು ಪಾತ್ರಗಳನ್ನು ಮಾತ್ರ ಒಪ್ಪಿಕೊಳ್ಳುತ್ತಾ ಬಂದರು.

ನಿಖಿಲ್​ ಮಂಜು ನಿರ್ದೇಶನದ ‘ರಿಸರ್ವೇಷನ್​’ ಚಿತ್ರದಲ್ಲಿ ಮಾನಸಿ ಸುಧೀರ್​ ನಟಿಸಿದರು. ರಾಘವೇಂದ್ರ ರಾಜ್​ಕುಮಾರ್​ ನಟನೆಯ ‘ಅಮ್ಮನ ಮನೆ’ ಸಿನಿಮಾದಲ್ಲೂ ಅವರು ಮುಖ್ಯಭೂಮಿಕೆ ನಿಭಾಯಿಸಿದರು. ಆ ಕುರಿತು ಟಿವಿ9 ವಿಶೇಷ ಸಂದರ್ಶನದಲ್ಲಿ ತಮ್ಮ ಅನುಭವವನ್ನು ಮಾನಸಿ ಸುಧೀರ್​ ಹಂಚಿಕೊಂಡಿದ್ದಾರೆ.

‘ಈ ಎಲ್ಲ ಅನುಭವಗಳು ಚೆನ್ನಾಗಿತ್ತು. ಡ್ಯಾನ್ಸರ್​ ಆದ ಕಾರಣ ನನ್ನ ಎಕ್ಸ್​ಪ್ರೆಷನ್ಸ್​ ಜಾಸ್ತಿ ಇತ್ತು. ಸಿನಿಮಾಗಾಗಿ ಅದನ್ನು ಸ್ವಲ್ಪ ಕಂಟ್ರೋಲ್​ ಮಾಡಬೇಕಿತ್ತು. ಈ ಎಲ್ಲ ಪ್ರಾಜೆಕ್ಟ್​ಗಳ ಮೂಲಕ ಕಲಿತೆ. ನಾನು ರಂಗಭೂಮಿ ಕಲಾವಿದೆ ಅಲ್ಲ. ನೀನಾಸಂನಲ್ಲಿ 21 ದಿನದ ವರ್ಕ್​ಶಾಪ್​ನಲ್ಲಿ ಭಾಗವಹಿಸಿದ್ದೇನೆ ಅಷ್ಟೇ. ಈ ಎಲ್ಲ ಅನುಭಗಳಿಂದ ನಾನು ಕಾಂತಾರ ಸಿನಿಮಾದಲ್ಲಿ ಪ್ರೇಕ್ಷಕರಿಗೆ ಇಷ್ಟ ಆಗುವ ರೀತಿ ಅಭಿನಯ ನೀಡಲು ಸಾಧ್ಯವಾಯ್ತು’ ಎಂದು ತಮ್ಮ ಸಿನಿಜರ್ನಿಯನ್ನು ಮೆಲುಕು ಹಾಕಿದ್ದಾರೆ ಮಾನಸಿ ಸುಧೀರ್​.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.