‘ಮನದ ಕಡಲು’ ಸಿನಿಮಾಗಾಗಿ ಅರ್ಥವಿಲ್ಲದ ಹಾಡು ಬರೆದ ಯೋಗರಾಜ್​ ಭಟ್​

ಹಾಡುಗಳ ಮೂಲಕ ‘ಮನದ ಕಡಲು’ ಸಿನಿಮಾ ಸುದ್ದಿ ಆಗುತ್ತಿದೆ. ಕೆಲವೇ ದಿನಗಳ ಹಿಂದೆ ‘ಹೂ ದುಂಬಿಯ ಕಥೆ..’ ಹಾಡನ್ನು ಬಿಡುಗಡೆ ಮಾಡಲಾಗಿತ್ತು. ಯೋಗರಾಜ್​ ಭಟ್​ ಬರೆದ ಆ ಹಾಡಿನ ಸಾಹಿತ್ಯ ಕೇಳಿ ಪ್ರೇಮಿಗಳ ಮನಸ್ಸಿಗೆ ಖುಷಿ ಆಗಿತ್ತು. ಈಗ ಇದೇ ಸಿನಿಮಾದಿಂದ 2ನೇ ಹಾಡು ರಿಲೀಸ್ ಆಗಿದೆ. ಆದರೆ ಯಾವುದೇ ಕಾರಣಕ್ಕೂ ಈ ಹಾಡಿನ ಸಾಹಿತ್ಯ ಅರ್ಥ ಆಗುವುದಿಲ್ಲ. ಯಾಕೆಂದರೆ, ಇದು ಅರ್ಥ ಇರುವ ಹಾಡಲ್ಲ. ಬದಲಿಗೆ ಅನರ್ಥದ ಹಾಡು. ಇದನ್ನು ಕೂಡ ಯೋಗರಾಜ್ ಭಟ್ ಅವರೇ ಬರೆದಿದ್ದಾರೆ.

‘ಮುಂಗಾರುಮಳೆ’ ಸಿನಿಮಾಗೆ ಈ. ಕೃಷ್ಣಪ್ಪ ಅವರು ಬಂಡವಾಳ ಹೂಡಿದ್ದರು. ಯೋಗರಾಜ್ ಭಟ್​ ನಿರ್ದೇಶನ ಮಾಡಿದ್ದರು. ಈಗ ಅವರಿಬ್ಬರ ಕಾಂಬಿನೇಷನ್​ನಲ್ಲಿ ಬರುತ್ತಿರುವ ಚಿತ್ರವೇ ‘ಮನದ ಕಡಲು’. ಈಗ ಬಿಡುಗಡೆ ಆಗಿರುವ ಹಾಡಿನ ಹೆಸರು ‘ತುರ್ರಾ’. ನೆಲಮಂಗಲದ ಬಳಿ ಇರುವ ಈ. ಕೃಷ್ಣಪ್ಪ ಅವರ ತೋಟದಲ್ಲಿ ಈ ಸಾಂಗ್ ರಿಲೀಸ್ ಮಾಡಲಾಯಿತು. ಈ ಗೀತೆಗೆ ವಿ. ಹರಿಕೃಷ್ಣ ಅವರ ಸಂಗೀತವಿದೆ. ಹರಿಕೃಷ್ಣ, ಸಂಜಿತ್ ಹೆಗ್ಡೆ, ಪ್ರಾರ್ಥನಾ ಅವರ ಧ್ವನಿಯಲ್ಲಿ ‘ತುರ್ರಾ’ ಹಾಡು ಮೂಡಿಬಂದಿದೆ.

ಸುದ್ದಿಗೋಷ್ಠಿಯಲ್ಲಿ ಯೋಗರಾಜ್ ಭಟ್​ ಅವರು ‘ತುರ್ರಾ’ ಹಾಡಿನ ಬಗ್ಗೆ ಮಾಹಿತಿ ನೀಡಿದರು. ‘ನನ್ನ ಮತ್ತು ವಿ. ಹರಿಕೃಷ್ಣ ಕಾಂಬಿನೇಷನ್​ನಲ್ಲಿ ಅರ್ಥ ಇರುವ ಅನೇಕ ಹಾಡುಗಳು ಹಿಟ್ ಆಗಿದೆ. ಆದರೆ ಅರ್ಥವಿಲ್ಲದ, ಅನರ್ಥದ ಸಾಂಗ್​ಗಳು ಸೂಪರ್ ಹಿಟ್ ಆಗಿವೆ. ಅಂತಹ ಅನರ್ಥದ ಹಾಡುಗಳ ಪಟ್ಟಿಗೆ ತುರ್ರಾ ಸಾಂಗ್ ಕೂಡ ಸೇರ್ಪಡೆ ಆಗಿದೆ’ ಎಂದು ಯೋಗರಾಜ್​ ಭಟ್ ಹೇಳಿದ್ದಾರೆ.

ತುರ್ರಾ ಸಾಂಗ್:

ಅಷ್ಟಕ್ಕೂ ಯೋಗರಾಜ್​ ಭಟ್​ ಅವರಿಗೆ ಇಂಥ ಸಾಂಗ್ ಬರೆಯಲು ಸ್ಫೂರ್ತಿ ಆಗಿದ್ದು ಒಬ್ಬ ಹುಚ್ಚ! ‘ನನ್ನ‌ ಬಾಲ್ಯದಲ್ಲಿ‌ ನಮ್ಮೂರಿನಲ್ಲಿ ಅಲಿಮಾ‌ ಎಂಬ ಹುಚ್ಚನಿದ್ದ. ಅವನಿಗೆ ಮಕ್ಕಳೆಂದರೆ ಪ್ರೀತಿ. ಆತನ ಹಿಂದೆ ನಾವೆಲ್ಲಾ‌ ಸುತ್ತುತ್ತಿದ್ದೆವು. ಆತ ಬಳಸುತ್ತಿದ್ದ ಪದಗಳೇ ಈ ಹಾಡು ಬರೆಯಲು ಸ್ಫೂರ್ತಿ. ಈ ಹಾಡಿಗೆ ಹರಿಕೃಷ್ಣ ಧ್ವನಿ ಸೂಕ್ತವಾಗಿದೆ. ಅವರೊಂದಿಗೆ ಸಂಜಿತ್ ಹೆಗ್ಡೆ ಮತ್ತು ಪ್ರಾರ್ಥನಾ ಕೂಡ ಹಾಡಿದ್ದಾರೆ’ ಎಂದರು ಯೋಗರಾಜ್ ಭಟ್.

ಇದನ್ನೂ ಓದಿ: ರಂಗಾಯಣ ರಘು ಪಾತ್ರಕ್ಕೆ ಹೊಸ ಭಾಷೆ ಸೃಷ್ಟಿ ಮಾಡಿದ ಯೋಗರಾಜ್​ ಭಟ್

‘ನನಗೆ ಈ ಸಾಂಗ್ ಕೇಳಿದ ಕೂಡಲೇ ಇಷ್ಟ ಆಯಿತು. ಹಾಗಾಗಿ ಈ ಹಾಡು ಇರಲಿ ಎಂದು ನಿರ್ದೇಶಕರಿಗೆ ಹೇಳಿದೆ’ ಎಂದ ನಿರ್ಮಾಪಕ ಇ. ಕೃಷ್ಣಪ್ಪ ಅವರು ಚಿತ್ರತಂಡದ ಕೆಲಸವನ್ನು ಮೆಚ್ಚಿಕೊಂಡರು. ಈ ಗೀತೆಯನ್ನು ಹಾಡಲು ಬಹಳ ಸಮಯ ಬೇಕಾಯಿತು ಎಂದು ಹರಿಕೃಷ್ಣ ಹೇಳಿದರು. ಈ ಹಾಡಿನಲ್ಲಿ ನಾಯಕ ಸುಮುಖ, ನಾಯಕಿ ಅಂಜಲಿ ಅನೀಶ್, ನಟ ರಂಗಾಯಣ ರಘು ಮುಂತಾದವರು ಕಾಣಿಸಿಕೊಂಡಿದ್ದಾರೆ. ದತ್ತಣ್ಣ, ರಾಶಿಕಾ ಶೆಟ್ಟಿ, ಸಹ-ನಿರ್ಮಾಪಕ ಜಿ. ಗಂಗಾಧರ್, ಕಾರ್ಯಕಾರಿ‌ ನಿರ್ಮಾಪಕ ಪ್ರತಾಪ್, ಛಾಯಾಗ್ರಾಹಕ ಸಂತೋಷ್ ರೈ‌ ಪಾತಾಜೆ ಮುಂತಾದವರು ಸುದ್ದಿಗೋಷ್ಠಿಯಲ್ಲಿದ್ದರು.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.