ಪವಿತ್ರಾ ಲೋಕೇಶ್ ಶಿಕ್ಷಣ, ಪಿಎಚ್​ಡಿ ಬಗ್ಗೆ ಹೆಮ್ಮೆಯಿಂದ ಹೇಳಿದ ನರೇಶ್

ತೆಲುಗು ನಟ ನರೇಶ್ (Naresh) ಹಾಗೂ ಪವಿತ್ರಾ ಲೋಕೇಶ್ (Pavitra Lokesh) ಅವರುಗಳ ಜೀವನವನ್ನು ಆಧರಿಸಿದ ಮಳ್ಳಿ ಪೆಳ್ಳಿ ಸಿನಿಮಾ ಕೆಲವು ದಿನಗಳ ಹಿಂದಷ್ಟೆ ಆಂಧ್ರ-ತೆಲಂಗಾಣಗಳಲ್ಲಿ ಬಿಡುಗಡೆ ಆಗಿದೆ. ಇದೀಗ ಮಳ್ಳಿ ಪೆಳ್ಳಿಯ (Malli Pelli) ಕನ್ನಡ ಆವೃತ್ತಿ ಮತ್ತೆ ಮದುವೆ (Mathe Maduve) ಸಿನಿಮಾವನ್ನು ಕರ್ನಾಟಕದಲ್ಲಿ ಬಿಡುಗಡೆ ಮಾಡಲು ನರೇಶ್ ಹಾಗೂ ಪವಿತ್ರಾ ಸಜ್ಜಾಗಿದ್ದು, ಸಿನಿಮಾದ ಪ್ರಚಾರಕ್ಕಾಗಿ ಇಂದು ಬೆಂಗಳೂರಿಗೆ ಆಗಮಿಸಿದ್ದರು. ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ನಟ ನರೇಶ್, ಪವಿತ್ರಾ ಲೋಕೇಶ್​ ಅವರ ಶಿಕ್ಷಣ ಹಾಗೂ ಅವರು ಮಾಡುತ್ತಿರುವ ಪಿಎಚ್​ಡಿ ಬಗ್ಗೆ ಹೆಮ್ಮೆಯಿಂದ ಮಾತನಾಡಿದರು.

”ಪವಿತ್ರಾ ಲೋಕೇಶ್ ಉತ್ತಮ ಶೈಕ್ಷಣಿಕೆ ಹಿನ್ನೆಲೆ ಇರುವ ವ್ಯಕ್ತಿ. ಅವರು ಕನ್ನಡ ಹಾಗೂ ಇಂಗ್ಲೀಷ್ ಎರಡರಲ್ಲೂ ಸ್ನಾತಕೋತ್ತರ ಪದವಿ ಪಡೆದುಕೊಂಡಿದ್ದಾರೆ. ಅವರ ಶಿಕ್ಷಣದ ಬಗ್ಗೆ ನನಗೆ ಹೆಮ್ಮೆ ಇದೆ. ಏಕೆಂದರೆ ನಾನು ಹೆಚ್ಚು ಕಲಿತವನಲ್ಲ. ನಾನು ಗೌರವ ಡಾಕ್ಟರೇಟ್ ಪಡೆದಿದ್ದೇನೆ ಆದರೆ ಅದು ಭಿನ್ನ. ಪವಿತ್ರಾಗೆ ಸಿನಿಮಾ ಬಿಟ್ಟರೆ ಓದು ಮಾತ್ರವೇ ಗೊತ್ತು. ಆಕೆಯ ಬಳಿ ಪುಸ್ತಕಗಳ ಸಂಗ್ರಹವಿದೆ. ಪುಸ್ತಕಗಳನ್ನು ಓದುತ್ತಿರುತ್ತಾಳೆ. ಕಲಿಯುವುದರಲ್ಲಿ ಬಹಳ ಆಸಕ್ತಿ ಅವರಿಗೆ ಇದೆ. ಈಗ ವೀಣಾ ವಾದನ ಕಲಿಯುತ್ತಿದ್ದಾರೆ. ಅದರಲ್ಲಿಯೂ ಪದವಿ ಗಳಿಸುವ ಬಯಕೆ ಹೊಂದಿದ್ದಾರೆ” ಎಂದರು ನರೇಶ್.

”ಈಗ ಅವರು ಪಿಎಚ್​ಡಿ ಮಾಡಲು ಮುಂದಾಗಿದ್ದಾರೆ. ರಂಗಭೂಮಿಯಲ್ಲಿ ಮಹಿಳೆಯರು ವಿಷಯವಾಗಿ ಪಿಎಚ್​ಡಿ ಮಾಡಲು ಮುಂದಾಗಿದ್ದು, ಈ ಬಗ್ಗೆ ನನ್ನ ಬಳಿ ಹೇಳಿದಾಗ ನನಗೆ ಬಹಳ ಖುಷಿಯಾಯಿತು. ಏಕೆಂದರೆ ನಾನೂ ಸಹ ಮಹಿಳಾ ನಿರ್ದೇಶಕಿಯ ಮಗ. ನನ್ನ ತಾಯಿ ಕೆಲವು ಅತ್ಯುತ್ತಮ ಸಿನಿಮಾಗಳನ್ನು ನಿರ್ದೇಶನ ಮಾಡಿದ್ದಾರೆ. ಆ ಬಗ್ಗೆ ನನಗೆ ಬಹಳ ಹೆಮ್ಮೆ ಇದೆ. ಸ್ವತಃ ಪವಿತ್ರಾ ಲೋಕೇಶ್ ಸಹ ದೇವಸ್ಥಾನವೊಂದರ ಮೇಲೆ ಡಾಕ್ಯುಮೆಂಟರಿ ಮಾಡಿದ್ದಾರೆ. ಹಾಗಾಗಿ ಅವರು ಮಹಿಳೆ ಮತ್ತು ರಂಗಭೂಮಿ ಬಗ್ಗೆ ಪಿಎಚ್​ಡಿ ಮಾಡುವೆ ಎಂದಾಗ ಬಹಳ ಖುಷಿಯಾಯಿತು. ಅವರೊಟ್ಟಿಗೆ ನಾನೂ ಸಹ ಹಂಪಿ ವಿಶ್ವವಿದ್ಯಾಲಯಕ್ಕೆ ಹೋಗಿ ದಾಖಲಾತಿ ವೇಳೆ ಜೊತೆಗೆ ಇದ್ದೆ ಎಂದಿದ್ದಾರೆ ನರೇಶ್.

ಪವಿತ್ರಾ ಲೋಕೇಶ್​ಗೆ ಪ್ರತಿಭೆ ಇದೆ, ಅವರಿಗೆ ಶಕ್ತಿ ಇದೆ. ಹಾಗಾಗಿ ನಾನೂ ಅವರನ್ನು ಬೆಂಬಲಿಸುತ್ತಿದ್ದೇನೆ. ಅವರು ಒಳ್ಳೆಯದನ್ನೇ ಮಾಡುತ್ತಾರೆಂಬ ವಿಶ್ವಾಸ ನನಗೆ ಇದೆ. ಪಿಎಚ್​ಡಿಗೆ ಅವರು ಆಯ್ದುಕೊಂಡಿರುವ ವಿಷಯವೂ ನನಗೆ ಬಹಳ ಇಷ್ಟವಾಯಿತು. ಸ್ವತಃ ಮಹಿಳಾ ಸಾಧಕಿಯೊಬ್ಬರ ಮಗನು ನಾನಾಗಿರುವಾಗ ಮಹಿಳೆಯರ ಬಗ್ಗೆ ಮಾಡಲಾಗುತ್ತಿರುವ ಅಧ್ಯಯನಕ್ಕೆ ನಾನು ಬೆಂಬಲವಾಗಿ ನಿಲ್ಲುವುದು ನನ್ನ ಜವಾಬ್ದಾರಿ ಎನಿಸಿತು ಎಂದಿದ್ದಾರೆ ನಟ ನರೇಶ್.

ನರೇಶ್ ಹಾಗೂ ಪವಿತ್ರಾ ಲೋಕೇಶ್ ಅವರ ಸಂಬಂಧದ ಬಗ್ಗೆ ಕಳೆದ ವರ್ಷ ಎದ್ದಿದ್ದ ವಿವಾದ ಹಾಗೂ ನರೇಶ್​ರ ಮೂರನೇ ಪತ್ನಿ ರಮ್ಯಾ ರಘುಪತಿ ಈ ಇಬ್ಬರ ಮೇಲೆ ಮಾಡಿದ ಆರೋಪಗಳು ಆ ನಂತರ ನಡೆದ ಘಟನೆಗಳನ್ನು ಇರಿಸಿಕೊಂಡೆ ಮತ್ತೆ ಮದುವೆ ಸಿನಿಮಾ ಮಾಡಲಾಗಿದೆ. ಈಗಾಗಲೇ ಈ ಸಿನಿಮಾ ತೆಲುಗಿನಲ್ಲಿ ಬಿಡುಗಡೆ ಆಗಿ ಮಿಶ್ರ ಪ್ರತಿಕ್ರಿಯೆ ಪಡೆದುಕೊಂಡಿದೆ. ಇದೀಗ ಅದೇ ಸಿನಿಮಾ ಕನ್ನಡದಲ್ಲಿ ಜೂನ್ 9ರಂದು ತೆರೆಗೆ ಬರುತ್ತಿದೆ. ಸಿನಿಮಾದಲ್ಲಿ ನರೇಶ್​ ಸ್ವತಃ ಡಬ್ಬಿಂಗ್ ಮಾಡಿದ್ದಾರಂತೆ. ಸಿನಿಮಾವನ್ನು ತೆಲುಗಿನ ಜನಪ್ರಿಯ ನಿರ್ದೇಶಕರಲ್ಲಿ ಒಬ್ಬರಾದ ಎಂಎಸ್ ರಾಜು ನಿರ್ದೇಶನ ಮಾಡಿದ್ದಾರೆ. ನಿರ್ಮಾಣ ಮಾಡಿರುವುದು ಸ್ವತಃ ನರೇಶ್.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್ ಮಾಡಿ