ಇನ್ಮುಂದೆ ಬೇರೆಯದೇ ಲೆಕ್ಕ; ಸಿನಿಮಾ ಆಯ್ಕೆಯಲ್ಲಿ ನೀನಾಸಂ ಸತೀಶ್ ಮಹತ್ವದ ನಿರ್ಧಾರ

ನೀನಾಸಂ ಸತೀಶ್ ಅವರು ಸೂಪರ್ ಹಿಟ್ ಚಿತ್ರಗಳನ್ನು ನೀಡಿದ್ದಾರೆ. ‘ಲೂಸಿಯಾ’, ‘ಅಯೋಗ್ಯ’ ರೀತಿಯ ಚಿತ್ರಗಳ ಮೂಲಕ ಅವರು ಗಮನ ಸೆಳೆದಿದ್ದಾರೆ. ಇಷ್ಟು ವರ್ಷಗಳ ಕಾಲ ನೀನಾಸಂ ಸತೀಶ್ ಅವರು ಸಣ್ಣ ಬಜೆಟ್​ ಚಿತ್ರಗಳನ್ನು ಕೂಡ ಮಾಡಿದ್ದರು. ಆದರೆ, ಈಗ ಅವರ ಸಿನಿಮಾ ಆಯ್ಕೆಯಲ್ಲಿ ಬದಲಾವಣೆ ಮಾಡಿಕೊಂಡಿದ್ದಾರೆ. ಮುಂದಿನ ವರ್ಷಗಳಲ್ಲಿ ಬಿಗ್ ಬಜೆಟ್ ಸಿನಿಮಾಗಳನ್ನು ಮಾಡುವ ಆಲೋಚನೆಯಲ್ಲಿ ಅವರಿದ್ದಾರೆ. ಈ ಬಗ್ಗೆ ಅವರು ಟಿವಿ9 ಕನ್ನಡ ಡಿಜಿಟಲ್ ಜೊತೆ ಮಾತನಾಡಿದ್ದಾರೆ.

ಇತ್ತೀಚೆಗೆ ‘ದಿ ರೈಸ್ ಆಫ್ ಅಶೋಕ’ ಚಿತ್ರದಲ್ಲಿನ ಸತೀಶ್ ಅವರ ಲುಕ್ ರಿವೀಲ್ ಆಗಿದೆ. ಈ ಚಿತ್ರದಲ್ಲಿ ಸತೀಶ್ ಮಚ್ಚನ್ನು ಹಿಡಿದು ಕಾಣಿಸಿಕೊಂಡಿದ್ದಾರೆ. ಈ ಸಿನಿಮಾಗೆ ಇನ್ನು ಶೇ.20 ಶೂಟಿಂಗ್ ಬಾಕಿ ಇದೆ. ಇದರ ಶೂಟಿಂಗ್ ಪೂರ್ಣಗೊಳಿಸಿ ಈ ವರ್ಷವೇ ಸಿನಿಮಾನ ರಿಲೀಸ್ ಮಾಡುವ ಆಲೋಚನೆ ತಂಡಕ್ಕೆ ಇದೆ.

‘ಇದು ಅದ್ಭುತವಾದ ಸಿನಿಮಾ. ಒಳ್ಳೆಯ ಅನುಭವ. ಒಳ್ಳೆಯ ಕಂಟೆಂಟ್ ಸಿನಿಮಾ. ಕ್ರಾಂತಿ ಸಿನಿಮಾ. ಕಂಟೆಂಟ್ ಜೊತೆ ಮಾಸ್ ಅಂಶಗಳವೂ ಇದೆ. ಕಥೆ ಕೂಡ ಚೆನ್ನಾಗಿದೆ. ವಾರ್ ಎಂದಾಗ ಫೈಟ್ ತೋರಿಸಲೇಬೇಕು. ಆ ರೀತಿಯ ಹಿನ್ನೆಲೆ ಇರುವ ಸಿನಿಮಾ. ದೊಡ್ಡ ಸಂಘರ್ಷದ ಬಗ್ಗೆ ಹೇಳುತ್ತಿದ್ದೇವೆ. ಗ್ರ್ಯಾಂಡ್ ಆಗಿ ಸಿನಿಮಾ ಬರುತ್ತಿದೆ. ಐ ಮ್ಯಾಕ್ಸ್​ನಲ್ಲಿ ನೋಡಬೇಕಾದ ಸಿನಿಮಾ ಇದು’ ಎಂದರು ಸತೀಶ್. ಇದು ನೈಜ ಘಟನೆ ಆಧಾರಿತ ಸಿನಿಮಾ ಅನ್ನೋದು ವಿಶೇಷ.

‘ದಿ ರೈಸ್ ಆಫ್ ಅಶೋಕ’ ಚಿತ್ರಕ್ಕೆ ಈ ಮೊದಲು ‘ಅಶೋಕ ಬ್ಲೇಡ್’ ಎಂದಿತ್ತು. ಈ ಚಿತ್ರದ ನಿರ್ದೇಶಕ ವಿನೋದ್ ದೊಂಡಾಲೆ ನಿರ್ದೇಶನ ಮಾಡುತ್ತಿದ್ದರು. ಅವರು ನಿಧನ ಹೊಂದಿದರು. ಈಗ ಈ ಚಿತ್ರಕ್ಕೆ ಟೈಟಲ್ ಬದಲಾಯಿಸಿ ಸಿನಿಮಾ ಕೆಲಸ ಆರಂಭ ಮಾಡಲಾಗುತ್ತಿದೆ. ‘ನಿರ್ದೇಶಕರು ಯಾವ ರೀತಿ ಕಥೆ ಮಾಡಿದ್ದರೋ ಅದನ್ನೇ ಮುಂದುವರಿಸುತ್ತಿದ್ದೇವೆ. ಅವರ ಕನಸನ್ನೇ ಮುಂದುವರಿಸಿಕೊಂಡು ಹೋಗುತ್ತಿದ್ದೇವೆ’ ಎನ್ನುತ್ತಾರೆ ಸತೀಶ್.

ಇದನ್ನೂ ಓದಿ: ‘ದಿ ರೈಸ್ ಆಫ್ ಅಶೋಕ’ ಸಿನಿಮಾದಲ್ಲಿ ಸತೀಶ್ ನೀನಾಸಂ ಮಾಸ್ ಅವತಾರ

ಸತೀಶ್ ನಟನೆಯ ಒಂದು ಚಿತ್ರವಂತೂ ಪ್ರತಿ ವರ್ಷ ರಿಲೀಸ್ ಆಗುತ್ತದೆ. ಈ ವರ್ಷ ಅವರ ನಟನೆಯ ‘ದಿ ರೈಸ್ ಆಫ್ ಅಶೋಕ’ ಚಿತ್ರ ಹಾಗೂ ‘ಅಯೋಗ್ಯ 2’ ರಿಲೀಸ್ ಆಗಲಿದೆ. ‘ಇನ್ನು ಮುಂದೆ ಬರುವ ನನ್ನ ಎಲ್ಲ ಚಿತ್ರಗಳು ದೊಡ್ಡ ಲೆವೆಲ್​ನಲ್ಲೇ ಇರುತ್ತದೆ’ ಎಂದಿದ್ದಾರೆ. ಈ ಮೂಲಕ ಸಿನಿಮಾ ಆಯ್ಕೆ ಸಂಪೂರ್ಣವಾಗಿ ಬದಲಾಗಿದೆ ಎನ್ನುವ ಸೂಚನೆ ನೀಡಿದ್ದಾರೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ.