‘ಯುಐ’ ಚಿತ್ರದಲ್ಲಿ ಚೀಪ್​ ಸಾಂಗ್​; ಉಪ್ಪಿ ಸಾಹಿತ್ಯ ಕೇಳಿ ತಲೆ ಕೆಡಿಸಿಕೊಂಡ ಫ್ಯಾನ್ಸ್​

ನಟ, ನಿರ್ದೇಶಕ ಉಪೇಂದ್ರ ಅವರು ‘ಯುಐ’ ಸಿನಿಮಾದ (UI movie) ಕೆಲಸಗಳಲ್ಲಿ ಬ್ಯುಸಿ ಆಗಿದ್ದಾರೆ. ಈ ಸಿನಿಮಾದಲ್ಲಿ ಅವರು ನಟಿಸುವುದರ ಜೊತೆಗೆ ನಿರ್ದೇಶನ ಕೂಡ ಮಾಡುತ್ತಿರುವುದರಿಂದ ಭಾರಿ ನಿರೀಕ್ಷೆ ಸೃಷ್ಟಿ ಆಗಿದೆ. ಉಪೇಂದ್ರ (Upendra) ಬರೆಯುವ ಹಾಡುಗಳು ಎಂದರೆ ಅಭಿಮಾನಿಗಳಿಗೆ ಸಖತ್​ ಇಷ್ಟ. ಈಗ ಅವರು ‘ಯುಐ’ ಸಿನಿಮಾದ ಮೊದಲ ಹಾಡಿನ ಝಲಕ್​ ತೋರಿಸಿದ್ದಾರೆ. ಇದು ಚೀಪ್​ ಸಾಂಗ್​. ಅಂದರೆ ಹಾಡಿನ ಕ್ವಾಲಿಟಿ ಹಾಗಿದೆ ಅಂತಲ್ಲ. ಅದರ ಹೆಸರೇ ‘ಚೀಪ್​ ಸಾಂಗ್​’. ಇನ್ನು, ಅದರಲ್ಲಿನ ಸಾಹಿತ್ಯ ಕೇಳಿ ಎಲ್ಲರಿಗೂ ಅಚ್ಚರಿ ಆಗುತ್ತಿದೆ. ‘ಲಹರಿ ಫಿಲ್ಮ್ಸ್​​’ ಮೂಲಕ ಈ ಹಾಡಿನ (Cheap song) ಪ್ರೋಮೋ ಬಿಡುಗಡೆ ಆಗಿದೆ. ಅಜನೀಶ್​ ಬಿ. ಲೋಕನಾಥ್​ ಅವರು ಈ ಸಿನಿಮಾಗೆ ಸಂಗೀತ ನೀಡಿದ್ದಾರೆ.

ವಿಜಯ್​ ಪ್ರಕಾಶ್​, ನಕಾಶ್​ ಅಜೀಜ್​, ದೀಪಕ್​ ಬ್ಲ್ಯೂ ಅವರು ‘ಚೀಪ್​’ ಹಾಡಿಗೆ ಧ್ವನಿ ನೀಡಿದ್ದಾರೆ. ಉಪೇಂದ್ರ ಅವರು ಸ್ವಲ್ಪ ವಿಚಿತ್ರವಾಗಿ ಸಾಹಿತ್ಯ ಬರೆದಿದ್ದಾರೆ. ‘ಎಲ್ಲ ಚೀಪ್​ ಚೀಪ್​. ನಂದು ತುಂಬ ದೊಡ್ಡದು. ಅವನಿಗಿಂತ ನಿಂದು ಚಿಕ್ಕದು. ನಿಂದು ತುಂಬ ಚಿಕ್ಕದು. ಇವನಿಗಿಂತ ಅವನ್ದು ದೊಡ್ಡದು. ಎಲ್ಲ ಚೀಪ್​ ಚೀಪ್​..’ ಎಂಬ ಸಾಲುಗಳು ಈ ಹಾಡಿನಲ್ಲಿ ಇವೆ. ‘ಚಿಕ್ಕದೋ ಅಥವಾ ದೊಡ್ಡದೋ ಗೊತ್ತಿಲ್ಲ. ಈ ಹಾಡು ಸೂಪರ್​ ಆಗಿದೆ’ ಎಂದು ಫ್ಯಾನ್ಸ್​ ಕಮೆಂಟ್​ ಮಾಡುತ್ತಿದ್ದಾರೆ.

‘ಚೀಪ್​ ಸಾಂಗ್​’ ಪ್ರೋಮೋ:

ಉಪೇಂದ್ರ ಅವರು ಬರೆದು ಹಾಡುಗಳಲ್ಲಿ ಬಗೆಬಗೆಯ ಅರ್ಥ ಇರುತ್ತದೆ. 25 ವರ್ಷಗಳ ಹಿಂದೆ ಅವರು ‘ಉಪೇಂದ್ರ’ ಸಿನಿಮಾದ ‘ಏನಿಲ್ಲ ಏನಿಲ್ಲ..’ ಹಾಡಿನ ಸಾಲುಗಳು ಈಗ ಇನ್​ಸ್ಟಾಗ್ರಾಮ್​ನಲ್ಲಿ ಟ್ರೆಂಡ್​ ಆಗಿರುವುದು ಗೊತ್ತೇ ಇದೆ. ಎಲ್ಲರ ಬಾಯಲ್ಲೂ ‘ಕರಿಮಣಿ ಮಾಲಿಕ ನೀನಲ್ಲ’ ಎಂಬ ಲೈನ್​ ರಾರಾಜಿಸುತ್ತಿದೆ. ಈಗ ‘ಯುಐ’ ಸಿನಿಮಾದ ‘ಚೀಪ್​ ಸಾಂಗ್​’ ಕೂಡ ಅದೇ ರೀತಿ ಟ್ರೆಂಡ್​ ಆಗುವ ಸಾಧ್ಯತೆ ದಟ್ಟವಾಗಿದೆ. ಚಿನ್ನಿ ಪ್ರಕಾಶ್​ ಅವರು ಈ ಹಾಡಿಗೆ ಕೊರಿಯೋಗ್ರಫಿ ಮಾಡಿದ್ದಾರೆ. ಸದ್ಯಕ್ಕೆ ಬಿಡುಗಡೆ ಆಗಿರುವುದು ಪ್ರೋಮೋ ಮಾತ್ರ. ಫೆಬ್ರವರಿ 26ರಂದು ಫುಲ್​ ಹಾಡು ಬಿಡುಗಡೆ ಆಗಲಿದೆ.

ಇದನ್ನೂ ಓದಿ: ಉಪೇಂದ್ರ ಬಗ್ಗೆ ಶಿವಣ್ಣನಿಗೆ ಯಾಕೆ ಇಷ್ಟು ಪ್ರೀತಿ? ‘ಯುಐ’ ವೇದಿಕೆಯಲ್ಲಿ ಮನಸಾರೆ ಮಾತಾಡಿದ ‘ಹ್ಯಾಟ್ರಿಕ್​ ಹೀರೋ’

‘ಓಂ’, ‘ಶ್​’, ‘ಎ’, ‘ಉಪೇಂದ್ರ’ ಮುಂತಾದ ಸೂಪರ್​ ಹಿಟ್​ ಸಿನಿಮಾಗಳಿಗೆ ನಿರ್ದೇಶನ ಮಾಡಿರುವ ಉಪೇಂದ್ರ ಅವರ ಸಾಮರ್ಥ್ಯದ ಬಗ್ಗೆ ಅಭಿಮಾನಿಗಳಿಗೆ ಭಾರಿ ಭರವಸೆ ಇದೆ. ಹಲವು ವರ್ಷಗಳ ಬಳಿಕ ಅವರು ‘ಯುಐ’ ಸಿನಿಮಾಗೆ ನಿರ್ದೇಶನ ಮಾಡುತ್ತಿರುವುದರಿಂದ ಸಹಜವಾಗಿಯೇ ನಿರೀಕ್ಷೆ ಜೋರಾಗಿದೆ. ಈ ಸಿನಿಮಾಗೆ ಜಿ. ಮನೋಹರನ್​ ಮತ್ತು ಕೆ.ಪಿ. ಶ್ರೀಕಾಂತ್​ ಅವರು ಬಂಡವಾಳ ಹೂಡಿದ್ದಾರೆ. ನವೀನ್​ ಮನೋಹರನ್​ ಸಹ-ನಿರ್ಮಾಪಕರಾಗಿದ್ದಾರೆ. ಈಗಾಗಲೇ ಈ ಸಿನಿಮಾದ ಟೀಸರ್​ ಸಖತ್​ ಕೌತುಕ ಮೂಡಿಸಿದೆ.

ಇನ್ನಷ್ಟು ಸಿನಿಮಾ ಸುದ್ದಿಗಳಿಗಾಗಿ ಇಲ್ಲಿ ಕ್ಲಿಕ್​ ಮಾಡಿ