ಕಾರು ಗುದ್ದಿದ್ದಕ್ಕೆ ಪೌರಕಾರ್ಮಿಕನ ಕ್ಷಮೆ ಕೇಳಿದ ರಚಿತಾ ರಾಮ್​; ಇಲ್ಲಿದೆ ವಿಡಿಯೋ

ಕನ್ನಡದ ಖ್ಯಾತ ನಟಿ ರಚಿತಾ ರಾಮ್​ (Rachita Ram) ಅವರು ಸೋಮವಾರ (ಆಗಸ್ಟ್​ 14) ಲಾಲ್​ಬಾಗ್​ಗೆ ತೆರಳಿದ್ದಾಗ ಒಂದು ಅಚಾತುರ್ಯ ನಡೆದಿತ್ತು. ಫಲಪುಷ್ಪ ಪ್ರದರ್ಶನ ನೋಡಲು ಬಂದಿದ್ದಾಗ ಅವರ ಕಾರು ಪೌರ ಕಾರ್ಮಿಕರೊಬ್ಬರಿಗೆ ಡಿಕ್ಕಿ (Car Accident) ಆಗಿತ್ತು. ಚಾಲಕನ ಅಜಾಗರೂಕತೆಯಿಂದ ಈ ತಪ್ಪು ಜರುಗಿತ್ತು. ಆದರೆ ಕಾರಿನ ವೇಗ ಕಡಿಮೆ ಇದ್ದ ಕಾರಣದಿಂದ ಕೂದಲೆಳೆಯಲ್ಲಿ ದುರಂತ ತಪ್ಪಿ ಹೋಯಿತು. ಆ ಸಂದರ್ಭದ ವಿಡಿಯೋ ಸೋಶಿಯಲ್​ ಮೀಡಿಯಾದಲ್ಲಿ ವೈರಲ್​ ಆಗಿತ್ತು. ಒಂದು ದಿನ ಕಳೆದ ಬಳಿಕ ರಚಿತಾ ರಾಮ್​ ಅವರು ಈ ಬಗ್ಗೆ ಪ್ರತಿಕ್ರಿಯಿಸಿದ್ದಾರೆ. ಅಷ್ಟೇ ಅಲ್ಲದೇ, ಆ ಪೌರ ಕಾರ್ಮಿಕರನ್ನು (Pourakarmika) ಭೇಟಿಯಾಗಿ ಕ್ಷಮೆ ಕೇಳಿದ್ದಾರೆ. ರಚಿತಾ ರಾಮ್​ ಅವರ ಈ ನಡೆಗೆ ಅಭಿಮಾನಿಗಳು ಭೇಷ್​ ಎಂದಿದ್ದಾರೆ. ತಪ್ಪನ್ನು ತಿದ್ದಿಕೊಳ್ಳುವ ಗುಣವನ್ನು ನೆಟ್ಟಿಗರು ಪ್ರಶಂಸಿಸಿದ್ದಾರೆ.

‘ಎಲ್ಲರಿಗೂ ನಮಸ್ಕಾರ. ಇವತ್ತು ಸ್ವಾತಂತ್ರ್ಯ ದಿನಾಚರಣೆ. ನಾನು ಇವರಿಂದ ವಿಶ್​ ಮಾಡಿಸುತ್ತೇನೆ’ ಎನ್ನುವ ಮೂಲಕ ರಚಿತಾ ರಾಮ್​ ಅವರು ವಿಡಿಯೋದಲ್ಲಿ ಮಾತು ಆರಂಭಿಸಿದ್ದಾರೆ. ‘ನಿನ್ನೆ ಲಾಲ್​ಬಾಗ್​ಗೆ ಹೋದಾದ ಆಕಸ್ಮಿಕವಾಗಿ ಒಂದು ಘಟನೆ ನಡೆಯಿತು. ನನ್ನ ಗಾಡಿ ಇವರಿಗೆ ಟಚ್​ ಆಯಿತು. ನಿನ್ನೆ ಈ ಘಟನೆ ಆದಾಗ ನನ್ನ ಗಮನಕ್ಕೆ ಬರಲಿಲ್ಲ. ನಾನು ಸ್ವಲ್ಪ ಟೆನ್ಷನ್​ನಲ್ಲಿ ಇದ್ದೆ. ನನ್ನ ಕಡೆಯಿಂದ, ನನ್ನ ಡ್ರೈವರ್​ ಕಡೆಯಿಂದ ತಪ್ಪಾಗಿದೆ. ನನ್ನ ಡ್ರೈವರ್​ ಕೂಡ ಒಬ್ಬ ಕಾರ್ಮಿಕ. ಅವನ ಪರವಾಗಿ ಮತ್ತು ನನ್ನ ಕಡೆಯಿಂದ ನಾನು ಕ್ಷಮೆ ಕೇಳುತ್ತೇನೆ. ತಪ್ಪಾಯ್ತು ಅಣ್ಣ. ಕ್ಷಮಿಸಿ’ ಎಂದು ರಚಿತಾ ರಾಮ್​ ಹೇಳಿದ್ದಾರೆ.

‘ಏನಮ್ಮಿ..’ ಬಳಿಕ ಮತ್ತೊಂದು ಹಿಟ್​ ಹಾಡು ನೀಡಿದ ರಚಿತಾ ರಾಮ್-ಸತೀಶ್ ನೀನಾಸಂ; ‘ಮ್ಯಾಟ್ನಿ’ ಗೀತೆಗೆ ಮೆಚ್ಚುಗೆ

‘ಆಕಸ್ಮಿಕವಾಗಿ ಅದು ನಡೆಯಿತು. ಉದ್ದೇಶಪೂರ್ವಕವಾಗಿ ಮಾಡಿದ ತಪ್ಪು ಅಲ್ಲ. ಮನಸಾರೆ ನಾನು ಕ್ಷಮೆ ಕೇಳುತ್ತೇನೆ. ನಿನ್ನೆಯ ಘಟನೆಯಿಂದ ಕಾರ್ಮಿಕರಿಗೆ ಬೇಸರ ಆಗಿದ್ದರೆ ದಯವಿಟ್ಟು ಕ್ಷಮಿಸಿ. ಇಂದು ಸ್ವಾತಂತ್ರ್ಯ ದಿನಾಚರಣೆ. ಇದು ನನಗೆ ಸ್ಮರಣೀಯವಾಗಿರುತ್ತದೆ. ಈ ರೀತಿ ವಿಶ್​ ನನ್ನ ಕಡೆಯಿಂದ ಯಾವತ್ತೂ ಬಂದಿರಲಿಲ್ಲ’ ಎಂದು ಹೇಳಿದ್ದಾರೆ ರಚಿತಾ ರಾಮ್​.

ರಚಿತಾ ರಾಮ್ ಕ್ಷಮೆ ಕೇಳಿರುವ ವಿಡಿಯೋ:

View this post on Instagram

A post shared by Rachita Ram (@rachita_instaofficial)

ಅಂದಹಾಗೆ, ಲಾಲ್​ಬಾಗ್​ನಲ್ಲಿ ಕೆಲಸ ಮಾಡುವ ಈ ಪೌರ ಕಾರ್ಮಿಕರ ಹೆಸರು ರಂಗಪ್ಪ. ‘ನಿನ್ನೆಯಿಂದ ನಾನು ಇವರಿಗಾಗಿ ಕಾಯುತ್ತಿದ್ದೆ. ನಾವೇ ವಿಡಿಯೋ ಮಾಡಿ ಬಿಡುವ ಬದಲು ಪರ್ಸನಲ್​ ಆಗಿ ಭೇಟಿ ಮಾಡಿ ಕ್ಷಮೆ ಕೇಳಬೇಕು. ಹಾಗಾಗಿ ಅವರ ಮುಂದೆಯೇ ಕ್ಷಮೆ ಕೇಳುತ್ತಿದ್ದೇನೆ. ಇಂಥ ಘಟನೆ ಮತ್ತೊಮ್ಮೆ ಆಗದ ರೀತಿಯಲ್ಲಿ ನಾನು ನೋಡಿಕೊಳ್ಳುತ್ತೇನೆ’ ಎಂದು ರಚಿತಾ ರಾಮ್​ ಹೇಳಿದ್ದಾರೆ. ನೆಟ್ಟಿಗರು ಈ ವಿಡಿಯೋಗೆ ಹಲವು ರೀತಿಯಲ್ಲಿ ಕಮೆಂಟ್​ ಮಾಡುತ್ತಿದ್ದಾರೆ. ‘ನಿಮ್ಮದು ವಿಶಾಲ ಹೃದಯ’ ಎಂದು ಅಭಿಮಾನಿಗಳು ಹೊಗಳುತ್ತಿದ್ದಾರೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.

Published On - 7:51 pm, Tue, 15 August 23