Roberrt Trailer: ಒಬ್ಬರ ಲೈಫಲ್ಲಿ ಹೀರೋ ಆಗ್ಬೇಕಂದ್ರೆ ಇನ್ನೊಬ್ಬರ ಲೈಫಲ್ಲಿ ವಿಲನ್ ಆಗ್ಲೇ ಬೇಕು, ರಾಬರ್ಟ್​ನಲ್ಲಿ ಅಬ್ಬರಿಸಿದ ದರ್ಶನ್

ಅಭಿಮಾನಿಗಳ ಪಾಲಿನ ಮಾಸ್ ಮಹಾರಾಜ, ಸ್ಯಾಂಡಲ್​ವುಡ್ ಬಾಕ್ಸ್ ಆಫೀಸ್ ಸುಲ್ತಾನ್, ಡಿಬಾಸ್ ದರ್ಶನ್ (D Boss Darshan) ಅಭಿನಯದ ಬಹುನಿರೀಕ್ಷಿತ ಸಿನಿಮಾ ರಾಬರ್ಟ್ ಟ್ರೇಲರ್ ಬಿಡುಗಡೆ ಆಗಿದೆ. ಬಾ ಬಾ ನಾನ್ ರೆಡಿ ಅಂತ ಬಂದೇ ಬಿಟ್ಟ ದಚ್ಚು ಎಂಟ್ರಿ ಟ್ರೇಲರ್​ನಲ್ಲಿ ಸಖತ್​ ಆಗಿ ಮೂಡಿಬಂದಿದೆ. ಒಬ್ಬರ ಲೈಫಲ್ಲಿ ಹೀರೋ ಆಗ್ಬೇಕಂದ್ರೆ ಇನ್ನೊಬ್ಬರ ಲೈಫಲ್ಲಿ ವಿಲನ್ ಆಗ್ಲೇ ಬೇಕು ಅನ್ನೋ ಕಿಲ್ಲರ್ ಡೈಲಾಗ್​ ಮೂಲಕ ದರ್ಶನ ಕೊಟ್ಟಿದ್ದಾರೆ ರಾಬರ್ಟ್. ಹೀಗಾಗಿ ರಾಬರ್ಟ್ ಸಿನಿಮಾದಲ್ಲಿ ದರ್ಶನ್ ಪಾತ್ರವೇನು ಅನ್ನುವುದರ ಬಗ್ಗೆ ಸಿಕ್ಕಾಪಟ್ಟೆ ನಿರೀಕ್ಷೆ ಕ್ರಿಯೇಟ್ ಆಗಿದ್ದು, ಎರಡು ಶೇಡ್​ ಪಾತ್ರ ಅನ್ನೋದಂತು ಫಿಕ್ಸ್ ಆಗಿದೆ. ಟ್ರೇಲರ್​ ಕೊನೆಯಲ್ಲಿ ನೀನು ಮಾಸ್ ಆದ್ರೆ ನಾನು ಮಾಸ್​ಗೆ ಬಾಸ್ ಅನ್ನೋ ದರ್ಶನ್ ಡೈಲಾಗ್ ಧೂಳೆಬ್ಬಿಸುವಂತಿದೆ.

ಸ್ಟೈಲಿಶ್ ವಿಲನ್ ಜಗಪತಿಬಾಬು ಆರ್ಭಟಿಸಿದ್ದರೆ, ರವಿಶಂಕರ್, ರವಿಕಿಶನ್ ಖಡಕ್ ವಿಲನ್​ಗಳಾಗಿ ಟ್ರೇಲರ್​ನಲ್ಲಿ ಅಬ್ಬರಿಸಿದ್ದಾರೆ. ಈ ಟ್ರೇಲರ್​ನ ಒಂದೊಂದು ಸೀನ್ ಕೂಡ ಭಕ್ತಗಣಕ್ಕೆ ಕಣ್ಣಿಗೆ ಹಬ್ಬ ಎನ್ನುವಂತಿದೆ. ಡೈನಾಮಿಕ್ ಹೀರೋ ದೇವರಾಜ್ ಪ್ರಮುಖ ಪಾತ್ರದಲ್ಲಿ ನಟಿಸಿದ್ದು, ನಾಯಕಿ ಆಗಿ ಆಶಾ ಭಟ್ ಕಾಣಿಸಿಕೊಂಡಿದ್ದಾರೆ. ತೆಲುಗಿನಲ್ಲೂ ರಾಬರ್ಟ್ ಟ್ರೇಲರ್​ ಬಿಡುಗಡೆ ಆಗಿದ್ದು ಮಾರ್ಚ್ 11ಕ್ಕೆ ಶಿವರಾತ್ರಿ ಪ್ರಯುಕ್ತ ಅಭಿಮಾನಿಗಳನ್ನ ಥಿಯೇಟರ್​ನಲ್ಲೇ ಜಾಗರಣೆ ಮಾಡಿಸುವುದಕ್ಕೆ ಸಿನಿಮಾ ತೆರೆ ಮೇಲೆ ಬರ್ತಿದೆ. ಟ್ರೇಲರ್​ ನೋಡ್ತಿದ್ರೆ ಕರ್ನಾಟಕದ ಅಡ್ಡಾದಲ್ಲಷ್ಟೇ ಅಲ್ಲದೇ ಟಾಲಿವುಡ್ ಬಾಕ್ಸ್ ಆಫೀಸ್​ನಲ್ಲೂ ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಸೌಂಡ್​ ಮಾಡೋದು ಪಕ್ಕಾ ಅನ್ನಿಸುತ್ತಿದೆ.

ಇದನ್ನೂ ಓದಿ: ಲೈಟ್ ಬಾಯ್​ ಜೀವನದಿಂದ ರಾಬರ್ಟ್​ ಸಿನಿಮಾವರೆಗೆ ದರ್ಶನ್ ನಡೆದು ಬಂದ ದಾರಿ

ಹುಟ್ಟುಹಬ್ಬದ ದಿನ ಅಭಿಮಾನಿಗಳಿಗೆ ನೇರವಾಗಿ ದರ್ಶನ ಕೊಡದೇ ಹೋದ್ರು ಟ್ರೇಲರ್​ ಮೂಲಕ ಕಾಣಿಸಿಕೊಂಡು ಸಂಭ್ರಮ ಪಡುವಂತೆ ಮಾಡಿದ್ದಾರೆ. ಟ್ರೈಲರ್ ಬಿಡುಗಡೆ ಆದ 48 ನಿಮಷಕ್ಕೆ ಹತ್ತು ಲಕ್ಷ ವೀಕ್ಷಣೆ ಗಳಿಸೋ ಮೂಲಕ ರಾಬರ್ಟ್ ಟ್ರೇಲರ್​ ದಾಖಲೆ ಬರೆದಿದೆ. ಗುಣಮಟ್ಟದ ವಿಚಾರದಲ್ಲಿ ಕೂಡ ರಾಬರ್ಟ್ ಸಖತ್ ರಿಚ್ ಆಗಿ ಕಾಣಿಸುತ್ತಿದ್ದು, ತರುಣ್ ಸುಧೀರ್ ಈ ಸಿನಿಮಾದ ಮೂಲಕ ಮತ್ತೊಂದು ಗೆಲುವನ್ನು ತಮ್ಮ ಖಾತೆಯಲ್ಲಿ ಸೇರಿಸಿಕೊಳ್ಳಲಿದ್ದಾರೆ ಅನ್ನೋದ್ರಲ್ಲಿ ಅನುಮಾನವೇ ಇಲ್ಲ. ಈ ಹಿಂದೆ ಬಿಡುಗಡೆ ಆದ ಪೊಗರು ಡೈಲಾಗ್ ಟ್ರೇಲರ್ ಮತ್ತು ಕೆಜಿಎಫ್ 2 ಟೀಸರ್​ನಂತೆಯೇ ರಾಬರ್ಟ್ ಟ್ರೇಲರ್​ನಲ್ಲೂ ಡೈಲಾಗ್​ಗಳ ಧಮಾಕಾ ಜೋರಾಗಿದೆ.

Published On - 12:47 pm, Tue, 16 February 21