ಫುಟ್​ಪಾತ್​ ಗುಂಡಿಗೆ ಬಿದ್ದು ಖ್ಯಾತ ಗಾಯಕ ಅಜಯ್​ ವಾರಿಯರ್​ಗೆ ಗಾಯ; ಬಿಬಿಎಂಪಿ ವಿರುದ್ಧ ಅಸಮಾಧಾನ

ಫುಟ್​ಪಾತ್​ ಗುಂಡಿಗೆ ಬಿದ್ದು ಖ್ಯಾತ ಗಾಯಕ ಅಜಯ್​ ವಾರಿಯರ್​ಗೆ ಗಾಯ; ಬಿಬಿಎಂಪಿ ವಿರುದ್ಧ ಅಸಮಾಧಾನ
ಅಜಯ್ ವಾರಿಯರ್

Singer Ajay Warrier: ಗಾಯಕ ಅಜಯ್​ ವಾರಿಯರ್ ಅವರು ಬೆಂಗಳೂರಿನ ಫುಟ್​ಪಾತ್​ ಗುಂಡಿಗೆ ಬಿದ್ದು ಗಾಯ ಮಾಡಿಕೊಂಡಿದ್ದಾರೆ. ಬಿಬಿಎಂಪಿ ಅಧಿಕಾರಿಗಳ ನಿರ್ಲಕ್ಷದಿಂದ ಈ ಅವಘಡ ಆಗಿದೆ.

TV9kannada Web Team

| Edited By: Madan Kumar

May 11, 2022 | 10:18 AM

ಜೋರಾಗಿ ಮಳೆ ಬಂದರೆ ಬೆಂಗಳೂರಿನ ಸ್ವರೂಪವೇ ಬದಲಾಗಿಬಿಡುತ್ತದೆ. ಅನೇಕ ರಸ್ತೆಗಳು ಜನರ ಜೀವ ಬಲಿ ಪಡೆಯುವ ಅಪಾಯಕಾರಿ ಸ್ಥಳಗಳಾಗುತ್ತವೆ. ಕಂಡಕಂಡಲ್ಲಿ ಎದುರಾಗುವ ಗುಂಡಿಗಳಿಂದ ತೊಂದರೆಗೆ ಒಳಗಾದವರ ಸಂಖ್ಯೆ ದೊಡ್ಡದಿದೆ. ಕನ್ನಡದ ಖ್ಯಾತ ಗಾಯಕ ಅಜಯ್ ವಾರಿಯರ್​ ಅವರು ಕೂಡ ಇದೇ ರೀತಿ ಈಗ ತೊಂದರೆಗೆ ಸಿಲುಕಿದ್ದಾರೆ. ಬೆಂಗಳೂರಿನಲ್ಲಿ ಡ್ರೈನ್​ ಹೋಲ್​ಗೆ ಬಿದ್ದಿರುವ ಅವರು ಪೆಟ್ಟು ಮಾಡಿಕೊಂಡಿದ್ದಾರೆ. ಬಿಬಿಎಂಪಿ (BBMP) ಅಧಿಕಾರಿಗಳ ನಿರ್ಲಕ್ಷ್ಯದಿಂದ ಅನೇಕ ಕಡೆಗಳಲ್ಲಿ ಫುಟ್​ಪಾತ್​ಗಳು ಓಪನ್​ ಆಗಿವೆ. ಮಳೆ ಬಂದಾಗ ನೀರು ತುಂಬಿಕೊಂಡರೆ ಈ ಫುಟ್​ಪಾತ್​ ಗುಂಡಿಗಳು ಕಾಣಿಸುವುದೇ ಇಲ್ಲ. ಫುಟ್​ಪಾತ್​ ಮೇಲೆ ನಡೆದುಹೋಗುವವರಿಗೆ ಇದರಿಂದ ಅಪಾಯ ಗ್ಯಾರಂಟಿ. ಗಾಯಕ ಅಜಯ್​ ವಾರಿಯರ್ (Singer Ajay Warrier) ಅವರು ಈ ಬಗ್ಗೆ ಫೇಸ್​ಬುಕ್​ ಮೂಲಕ ಘಟನೆಯ ವಿವರ ನೀಡಿದ್ದಾರೆ. ಭಾನುವಾರ (ಮೇ 8) ಸುರಿದ ಭಾರಿ ಮಳೆಯಿಂದ (Bengaluru Rain) ಆದ ಅನಾಹುತವನ್ನು ಅವರು ಜನರಿಗೆ ತಿಳಿಸಿದ್ದಾರೆ. ಬೆಂಗಳೂರಿನ ಫುಟ್​ಪಾತ್​ಗಳ ದುಸ್ಥಿತಿಯನ್ನು ಅವರು ಫೋಟೋಗಳ ಸಮೇತ ವಿವರಿಸಿದ್ದಾರೆ. ಡ್ರೇನ್​ ಹೋಲ್​ಗೆ ಬಿದ್ದ ಅವರ ಕಾಲಿಗೆ ಗಾಯ ಆಗಿದೆ. ಅಪಾಯಕಾರಿ ಘಟನೆಯಿಂದ ಅವರು ಪಾರಾಗಿದ್ದಾರೆ ಎಂಬುದಷ್ಟೇ ಸಮಾಧಾನ.

‘ಬೆಂಗಳೂರಿನಲ್ಲಿ ಭಾನುವಾರ ಧಾರಾಕಾರ ಮಳೆ ಸುರಿದಿತ್ತು. ಕೇರಳಕ್ಕೆ ತೆರಳಬೇಕಿದ್ದ ನಾನು ರೈಲ್ವೇ ನಿಲ್ದಾಣದ ಕಡೆಗೆ ಹೊರಟಿದ್ದೆ. ಮಗಳಿಗೆ ಹುಟ್ಟುಹಬ್ಬದ ದಿನ ಸರ್ಪ್ರೈಸ್​ ನೀಡಲು ಪ್ಲ್ಯಾನ್​ ಮಾಡಿದ್ದೆ. ಓಲಾ/ಉಬರ್​ ಇಲ್ಲದ ಕಾರಣ ಮುಖ್ಯ ರಸ್ತೆಯ ಕಡೆಗೆ ನಡೆದುಹೋಗಲು ನಿರ್ಧರಿಸಿದೆ. ರಸ್ತೆಯಲ್ಲಿ ನೀರು ತುಂಬಿಕೊಂಡಿದ್ದರಿಂದ ನಾನು ಫುಟ್​ಪಾತ್​ ಮೇಲೆ ಹೋದೆ. ಕೆಲವೇ ಹೆಜ್ಜೆ ನಡೆದು ಸಾಗಿದ ಬಳಿಕ ನಿಯಂತ್ರಣ ತಪ್ಪಿ, ಗುಂಡಿ ಒಳಗೆ ಬಿದ್ದೆ. ಏನೆಂದು ತಿಳಿಯುವುದರೊಳಗೆ ಚರಂಡಿ ಹೋಲ್​ ಒಳಗೆ ಹೋದೆ. ನನ್ನ ಎದೆಮಟ್ಟದ ವರೆಗೂ ನೀರು ಇತ್ತು. ನಾನು ಹೇಗೋ ಬಚಾವ್​ ಆದೆ. ಆದರೆ ಕಾಲಿಗೆ ಪೆಟ್ಟಾಗಿದೆ’ ಎಂದು ಅಜಯ್​ ವಾರಿಯರ್ ಬರೆದುಕೊಂಡಿದ್ದಾರೆ.

‘ಫುಟ್​ಪಾತ್​ ಗುಂಡಿ ಮುಚ್ಚದೇ ಇರುವ ಅಧಿಕಾರಿಗಳ ನಿರ್ಲಕ್ಷ್ಯದಿಂದ ನಾನು ಕಾಲಿಗೆ ಹೊಲಿಗೆ ಹಾಕಿಸಿಕೊಳ್ಳಬೇಕಾಯಿತು. ಅನೇಕ ಮ್ಯೂಸಿಕ್​ ಕಾರ್ಯಕ್ರಮಗಳನ್ನು ಬಿಡಬೇಕಾಯಿತು. ಇದಕ್ಕೆಲ್ಲ ಯಾರನ್ನು ದೂಷಿಸುವುದು? ನನ್ನನ್ನೇ! ಯಾಕೆಂದರೆ ನಾನು ಫುಟ್​ಪಾತ್​ನಲ್ಲಿ ನಡೆಯುವ ಬದಲು ರಸ್ತೆಯಲ್ಲಿ ನಿಂತಿದ್ದ ನೀರಿನಲ್ಲಿ ಈಜಿಕೊಂಡ ಹೋಗಬೇಕಿತ್ತು. ಅಧಿಕಾರಿಗಳಿಗೆ ಧನ್ಯವಾದಗಳು. ಜನರ ಹಿತದೃಷ್ಟಿಯಿಂದ ಈ ಸಂದೇಶವನ್ನು ನಾನು ನೀಡುತ್ತಿದ್ದೇನೆ. ಫುಟ್​ಪಾತ್​ ಗುಂಡಿಗಳನ್ನು ಮುಚ್ಚದಿರುವ ಕಾರಣ ಈ ರೀತಿ ಯಾರಿಗೆ ಬೇಕಾದರೂ ಅಪಾಯ ಆಗಬಹುದು. ಚಿಕ್ಕ ಮಕ್ಕಳು ಈ ರೀತಿ ಬಿದ್ದರೆ ಏನು ಗತಿ? ನಾನು ಕಾನೂನು ಪಾಲಿಸುವ ಮತ್ತು ತೆರಿಗೆ ಕಟ್ಟುವ ಬೆಂಗಳೂರಿನ ಪ್ರಜೆ. ಈ ನಗರದ ಜನರಿಗೆ ಸುರಕ್ಷಿತವಾದ ರಸ್ತೆ ಮತ್ತು ಫುಟ್​ಪಾತ್​ಗಳನ್ನು ನೀಡಿ ಎಂದು ಒತ್ತಾಯಿಸಿ ಬಿಬಿಎಂಬಿ ಅಧಿಕಾರಿಗಳಿಗೆ ಇದು ನನ್ನ ಬಹಿರಂಗ ಪತ್ರ. ಕಾಳಜಿ ವಹಿಸಿಕೊಳ್ಳಿ ಬೆಂಗಳೂರಿಗರೇ.. ನಮ್ಮ ಪ್ರಾಣ ಕೂಡ ಮುಖ್ಯ’ ಎಂದು ಅಜಯ್​ ವಾರಿಯರ್​​ ಅವರು ಫೇಸ್​ಬುಕ್​ನಲ್ಲಿ ಪೋಸ್ಟ್​​ ಮಾಡಿದ್ದಾರೆ.

ಮೇ 7ರಂದು ರಾತ್ರಿ ಕಿರುತೆರೆ ನಟಿ ಸುನೇತ್ರಾ ಪಂಡಿತ್​ ಅವರು ಕೂಡ ಬೆಂಗಳೂರಿನ ರಸ್ತೆ ಗುಂಡಿಯಿಂದಾಗಿ ಅಪಘಾತಕ್ಕೆ ಒಳಗಾದರು. ಎನ್​.ಆರ್​. ಕಾಲೋನಿಯಲ್ಲಿ ಅವರಿಗೆ ಆಕ್ಸಿಡೆಂಟ್​ ಆಗಿತ್ತು. ಈ ರೀತಿಯ ಘಟನೆಗಳು ಪದೇಪದೇ ಮರುಕಳಿಸುತ್ತಿವೆ.

ಹೆಚ್ಚಿನ ಸಿನಿಮಾ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.

ಪ್ರಮುಖ ಸುದ್ದಿಗಳನ್ನು ಓದಲು ಇಲ್ಲಿ ಕ್ಲಿಕ್​ ಮಾಡಿ.

ಇದನ್ನೂ ಓದಿ

Follow us on

Related Stories

Most Read Stories

Click on your DTH Provider to Add TV9 Kannada