Yuvarathnaa 2021:​ ಯುವರತ್ನ ಸಿನಿಮಾದ ಊರಿಗೊಬ್ಬ ವಿಡಿಯೋ ಸಾಂಗ್​ ಬಿಡುಗಡೆಗೆ ಸಜ್ಜು, ಪುನೀತ್​​ ಧ್ವನಿಯಲ್ಲೇ ಮೂಡಿಬಂದ ಹಾಡು

ಕೊರೊನಾ ಮೂಡಿಸಿದ ಬಿರುಗಾಳಿಯ ನಂತರ ಚಿತ್ರರಂಗದಲ್ಲಿ ಇದೀಗ ಹೊಸ ಗಾಳಿ ಆರಂಭವಾಗಿದೆ. ಸ್ಟಾರ್ ನಟರ ದೊಡ್ಡ ದೊಡ್ಡ ಸಿನಿಮಾಗಳು ಪ್ರೇಕ್ಷಕರನ್ನು ರಂಜಿಸಲು ಸಿದ್ಧವಾಗಿ ಸರತಿಯಲ್ಲಿ ನಿಂತಿವೆ. ಒಂದೊಂದೇ ಸಿನಿಮಾದ ಟೀಸರ್​, ಟ್ರೇಲರ್​, ಹಾಡು ಬಿಡುಗಡೆಯಾಗುತ್ತಿದ್ದು ಸಿನಿ ರಸಿಕರಿಗೆ ರಸದೌತಣ ಬಡಿಸುತ್ತಿವೆ. ಈ ಸಾಲಿನಲ್ಲಿ ಪವರ್​ ಸ್ಟಾರ್​ ಪುನೀತ್ ರಾಜ್​ಕುಮಾರ್ (Puneeth Rajkumar)​ ಅಭಿನಯದ ಹೊಚ್ಚ ಹೊಸ ಸಿನಿಮಾ ಯುವರತ್ನ (Yuvarathnaa) ಸಹ ಇದ್ದು, ಪುನೀತ್​​ ಅಭಿಮಾನಿಗಳಂತೂ ಉತ್ಸುಕರಾಗಿದ್ದಾರೆ. ಈ ಉತ್ಸಾಹಕ್ಕೆ ಮತ್ತಷ್ಟು ಹುರುಪು ತುಂಬುವಂತೆ ಫೆಬ್ರವರಿ 25ರಂದು ಮಧ್ಯಾಹ್ನ 3.33ಕ್ಕೆ ಯುವರತ್ನ ಚಿತ್ರದ ಊರಿಗೊಬ್ಬ ರಾಜ (Oorigobba Raaja) ವಿಡಿಯೋ ಸಾಂಗ್​ ಬಿಡುಗಡೆಯಾಗುತ್ತಿದ್ದು ಚಿತ್ರಾಭಿಮಾನಿಗಳು ಕುತೂಹಲಭರಿತರಾಗಿ ಕಾಯುತ್ತಿದ್ದಾರೆ.

ವಿಡಿಯೋ ಸಾಂಗ್​ ಬಿಡುಗಡೆ ಬಗ್ಗೆ ಚಿತ್ರದ ನಿರ್ದೇಶಕ ಸಂತೋಷ್​ ಆನಂದ್​ ರಾಮ್​ ಟ್ವೀಟ್​ ಮಾಡಿದ್ದು, ಕನ್ನಡ ಮತ್ತು ತೆಲುಗು ಎರಡೂ ಭಾಷೆಗಳಲ್ಲೂ ಬಿಡುಗಡೆಗೊಳಿಸುವುದಾಗಿ ಮಾಹಿತಿ ನೀಡಿದ್ದಾರೆ. ಹೊಂಬಾಳೆ ಫಿಲ್ಮ್ಸ್ ಬ್ಯಾನರ್​ ಅಡಿಯಲ್ಲಿ ನಿರ್ಮಾಣಗೊಂಡಿರುವ ಯುವರತ್ನ ಚಿತ್ರ ಈಗಾಗಲೇ ದೊಡ್ಡ ಮಟ್ಟದ ನಿರೀಕ್ಷೆ ಹುಟ್ಟುಹಾಕಿದ್ದು, ನಾಳೆ ಬಿಡುಗಡೆಯಾಗುತ್ತಿರುವ ಊರಿಗೊಬ್ಬ ರಾಜ ಹಾಡಿಗೆ ರಮ್ಯಾ ಬೆಹರಾ ಜೊತೆಗೆ ಸ್ವತಃ ಪುನೀತ್​ ರಾಜ್​ಕುಮಾರ್​ ಧ್ವನಿಯಾಗಿರುವುದು ಕಾಯುವಿಕೆಗೆ ಮತ್ತಷ್ಟು ಮೆರಗು ತುಂಬಿದೆ.

ಊರಿಗೊಬ್ಬ ರಾಜ ಹಾಡಿನ ಸಾಹಿತ್ಯವನ್ನು ಚಿತ್ರ ನಿರ್ದೇಶಕ ಸಂತೋಷ್​ ಆನಂದ್​ ರಾಮ್​ ಅವರೇ ರಚಿಸಿದ್ದು, ತಮನ್.ಎಸ್​ ಸಂಗೀತ ನೀಡಿದ್ದಾರೆ. ಕನ್ನಡದಲ್ಲಿ ಊರಿಗೊಬ್ಬ ರಾಜ ಮತ್ತು ತೆಲುಗಿನಲ್ಲಿ ಊರಿಕೊಕ್ಕ ರಾಜ ಹಾಡು ಬಿಡುಗಡೆಯಾಗುತ್ತಿದ್ದು, ಕನ್ನಡದ ಹಾಡು ಹೊಂಬಾಳೆ ಯೂಟ್ಯೂಬ್​ ಚಾನೆಲ್​ನಲ್ಲಿ ತೆರೆಕಾಣಲಿದೆ. ಯುವರತ್ನ ಸಿನಿಮಾದಲ್ಲಿ ಪುನೀತ್​ ಜೊತೆಗೆ ಧನಂಜಯ್​, ಸಯೇಶ ಸೈಗಲ್​, ವಸಿಷ್ಠ ಸಿಂಹ, ದಿಗಂತ್​, ಸೋನು ಗೌಡ, ರಂಗಾಯಣ ರಘು, ಸುಧಾರಾಣಿ, ಸಾಯಿಕುಮಾರ್​, ಅಚ್ಯುತ್​ ಕುಮಾರ್​, ಕುರಿ ಪ್ರತಾಪ್​, ರಾಧಿಕಾ ಶರತ್​ ಕುಮಾರ್​, ಪ್ರಕಾಶ್​ ಬೆಳವಾಡಿ, ಪ್ರಕಾಶ್​ ರಾಜ್​, ಗುರುದತ್​, ರವಿಶಂಕರ್​ ಗೌಡ, ರಾಜೇಶ್​ ನಟರಂಗ್​, ಅವಿನಾಶ್​, ನಾಗಭೂಷಣ್​, ತಾರಕ್​ ಪೊನ್ನಪ್ಪ, ಯಮುನಾ ಶ್ರೀನಿಧಿ, ಸುಧಿ, ಅರುಣ್​ ಗೌಡ ಸೇರಿದಂತೆ ಹಲವರು ಬಣ್ಣ ಹಚ್ಚಿದ್ದಾರೆ.

ಊರಿಗೊಬ್ಬ ರಾಜ

ಊರಿಕೊಕ್ಕ ರಾಜ (ತೆಲುಗು ಪೋಸ್ಟರ್​)

Get ready to groove for a fun filled video song #OorigobbaRaaja/#OorikokkaRaaja on Feb 25th at 3:33 PM.#Yuvarathnaa @PuneethRajkumar @VKiragandur @hombalefilms @MusicThaman @sayyeshaa @Dhananjayaka @AlwaysJani @iamRamyaBehara @Karthik1423 #HombaleMusic pic.twitter.com/cCMGM49FTT

— Santhosh Ananddram (@SanthoshAnand15) February 23, 2021

ಇದನ್ನೂ ಓದಿ: ಪ್ರಿಯಾಂಕ ಉಪೇಂದ್ರ ನಟನೆಯ ‘1980 ಟೀಸರ್’ ರಿಲೀಸ್
ಬ್ರಾಹ್ಮಣ ಸಮುದಾಯಕ್ಕೆ ನೋವುಂಟುಮಾಡಿರುವ ದೃಶ್ಯವನ್ನು ನಾಳೆಯೊಳಗೆ ತೆಗೆಯುತ್ತೇವೆ: ಪೊಗರು ನಿರ್ದೇಶಕ ನಂದಕಿಶೋರ್​